ZERO-36 by Remruati Bawitlung (Haylor)

Chapter-36

.

Amah en pah chuan ka han nui lui kher a,"Arden  sawi ang khan engthil mah a thleng lo" inring tawk hmel takin ka ti zui kher bawk.

"anih chuan tinge i chhuah daih si "

" ka chhan kher che angai em ni? " ka thinrim hmel a hmuh chuan min rawn nuih suk pahin nihliap hnuaiah chuan min pawt lut nawk a, ka darah nghet takin a kuah zui tlat bawk.

"min thlah rawh tunge maw i nih le? " amah nghawk deuh sawk pah chuan ka han ti vin hlar a rum zetin ka melh hraw bawk,a tlangnel em avang chuan ka ngaithei ṭhak lo.

"Juan.... ka hming chu Juan "

" anih chuan Juan min thlah thei tawh angem?"

"awle.... in thleng ka thlah ang che "

"i kut hi mawle... i dahthla thei tawh angem? "

.

A kut a dahthlak rual rual chuan subway station lam panin ka kal nghal hlawk hlawk a,Juan an min rawn zui ani tih ka hriat phei chuan ka kal chak zual sauh.Subway din lai tak alo ni bawk nen lawm ru tak chungin ka tlan lut nghal thauh a ṭhutna awl ka hmuh hmasak ber ah chuan ka ṭhu nghal thak bawk.Juan an min rawn zui tawh lo emaw tiin thawk halh pahin ka han hawi kual hrek hrek a, ka bul ami a tho chiah tih chuan ka bulah a rawn ṭhu ta thurh mai!! a rawn luh lai ka hriat bawk si loh avang chuan mak tih hmel zetin ka lo en tawp ringawt.Ka bulah chuan ngawi rengin a ṭhu ve ran a,biak chu sawi loh lehlam ka hawi san hmak, melh lah ka tum hek lo, ka hmelhriat ngai pawh anih loh mai bakah Arden kaihhnawih anih vang hrim hrim pawh hian ka hua.

.

Kan in aṭanga station hnai ber kan thlen chuan ngawi rengin ka tho thut a, rang lutuk in ka put chhuak nghal zeuh bawk.Diktak chuan tun ang dinhmun ah hi chuan keimah chauh a awm a, inngaihtuah a insum miah lova ṭah te pawh ka duh takzet.Muang changa pen chhat chhat pah chuan thil eng eng emaw ka ngaihtuah neuh neuh a a chang leh ka rilru hahna te tihbo tumin ka han nui leh suk ṭhin bawka.

"ruah sur tam hma in kal vat vat ang " chu aw bawk chu!! hepa hian engvanga min rawn zui zel nge maw anih le?

Hnial buai leh titi pui mood ah ka awm loh avangin ngawi rengin ka awm dan ngai ang chuan hma lam ka pan zela, ruah lah chu rawm buak hawk hawk tum ni awm takin khawpui te chu a ri dur dur bawka, kei lah hmanhmawh lek lo in ka pen chhat chhat mai bawk si.

.

Ke in in ka kal thleng der mai!!Juan lah ngawi rengin ka hnungah kal in min zui thleng ve ṭhak bawk.In kawt kan thlen  chuan ka luh hreh em avangin kan in thlir pah chuan ka han ding vang vang a,sana ka en nak chuan ka rin ai daihin alo tlai tawh lehnghal,ka pi lungawi lohna thu leh zilhhau na thu vel ka ngaithla peih lo takzet.

Juan thawm ka hriat tak loh avang chuan rang takin ka hawi let nghal vata, a kir leh daih tawh chu niin mahse ala kal thui lo hlauh .

"Hey!!" ka koh leh avang chuan mak tih hmel tak hian a rawn hawi let ha a,ngawi rengin min rawn thlah a ngawi renga kal leh daih a tum avang hian a awmdan hi ka hrethiam lo takzet.

.

"Engvangin nge min rawn thlah ?" ka hnuk a ulh deuh bawk nen ka duh ang pawhin ka ṭawng chhuak ṭha thei lo.Min chhan loh avang chuan a aia ringin,"Ngatinge helai thleng i rawn kal... Arden an a rawn tir che mi? " kan han ti ve leh thawr a, engvanga Arden hming hi lam ri nge ka nih pawh ka inhre bik lo.

"i sawi dik "

" maw?  eng chu maw dik a "

"Arden an i him leh him loh thlithlai tur che in min rawn tir ani... " engvangin nge hetiang thil hi a tih, lawm ru hle mah ila rinhlelh na in ka khat tlat lawi bawk si.

"ka hna ka zo tawh bawka mangṭha le " tih pahin a kut dinglam chuan min rawn bye bye a, nuih suk pahin a inher a hma lam panin a kal lehnghal nal nal bawk.

.

Juan thusawi khan ka ngaihtuahna a ti kalthui takzet dawt ani emaw ni lo emaw Arden an min ngaihsakna chungchang anih tawh hi chuan ka awih lo phal thlawt lo, engpawh chu nise naktuk mai hi camp ani tawh bawka karkhat chhung vel ka kalbo chuan ka rilru natna zawng zawng te leh Arden ngei pawh ka theihnghilh theih mai ka inring .

Huhphurh tak chunga kawngka hawn ka tum lai tak chuan ka pi in min rawn hawn khalh ta thut mai!!

"khawiah nge i kal? "inchhung pawh ka rah hma hma in min vin nghal hlur ringawt mahse ka pi hauh te hi chu ning hle mah ila enga tan mah ka ngai lo.

.

"han in thlak vat rawh... hei i huh vek ania" tih sup pahin min pawt lut nghal dawr dawr a,inchhung ka luh nak chuan Dylan alo awm reng chu niin!!

"Tina... eng thawmhnaw nge i hak kha...?"Dylan an a tih chuan pu Thompson te nupa pawh an rawn ding chhuak hlawl mai!! pu Thompson ka hmuh tak thut avang chuan mak tih hmel takin ka meng phawk nghal kawk a, tihngaihna ka hriat loh em avangin hnuai lam ka melh nghal lap bawk, tun ang zan rei ah engthil nge maw an rawn tih ni? nge min lo nghak reng zawk? dar9 lai a ri tawh dawn bawk si a chhan ṭha tak nei lo chuan an rawn kal hauh lo ang.

.

"ka.... ka han inthlak ange ka rawn let leh vat ang "tih pahin ka room lam pan mai chu ka han tum a ,"ding rawh " pu Thompson an a rawn tih chuan ka ding nghal chawt ringawt.Ngatinge pawh ka hrelo pu Thompson hi ka ngaina hlawl lo,chu mai bakah a aw thum dut te leh nelawm loh zet ka hriat zawng ringawt pawh hian ka zam nghal der nia mawle.Rin loh deuha min ko din tak thut avang chuan ka pi chu ka va melh nghal vata, kei ai mah in a hlauthawng emaw tih mai tur hian a lo khur nasa mai.

"kan inbiak angai "

"ka pa... " Dylan chuan min lo chhan tumin alo ti nghal vata,mahse hnial chi ani tawh lo. Pu Thompson hi pa lian leh sang tak, a awm mai mai pawh a thinrim reng emaw tih tur khawpa nui ngai lo anih avang in min biak a duh thu an sawi takah chuan ka hlau ru kher mai.

.

" awle... " tiin ka lo chhang sap a," a falin... "a tih takah chuan an tih tur chu an hai lo kher mai Dylan ,ka pi leh Mrs Thompson te chu pawn lamah an inzui chhuak nghal hna hna hlawm a,tunah tak hian ka pa ka ngai takzet, awm ve se chuan hetiang thil hi a thleng hauh lo ang.

An vaiin an chhuak fel chiah tih chuan sofa a ṭhut pah chuan ṭhu rawh a han ti thum dut a, ka lo inring sa lo bawk nen ka phu deuh zuk lehnghal.Ka tshirt hak hnawm chap chu nghet taka sih pahin ṭhu tura min tih na ah chuan ka han ṭhu dat a,bawp khawkherh chungin a ṭhu ul tawh mai bawk si a, melh ber tur pawh ka hrelo.

.

"i la thianghlim em? " engthil nge maw min zawh le?a zawhna maktak avang chuan phawk fe hian ka melh nghal kawk a, chhang nghal mai tur pawhin ka ṭawng chhuak mai thei lo.

"ka fapa tan hian hmeichhe thiang hlim ngei ka duh "

" maw!! " midang in min hmu se chu ramhuai ka hmu emaw an ti hial ang, heng thil hi engvanga min zawt nge anih tih ngaihdan pawh ka neilo.

"heihi ka vauna che ni rawh se....ka ring tawk che a ka duhthusam hi i tih hlawhtlin ngei pawh ka beisei ...i ti hlawhtling thei lo anih chuan ......." a kut zung chala zungbun lawk zet chu ka melh renga, ka hlauh em avangin ka thlan tui in min lei nghal bawrh bawrh bawk.

"ka.... ka hrethiam e "tih pahin ka tshirt chu ka han hmer vang vang a,Arden ka mitthla ah a rawn lang nghal zawk bawk, darkar thum em pawh ala liam lo ang tih khan kan chakna te chu kan in phuhruk sak tawn a, mahse tunah erawh mal takin min kalsan leh si .

.

Tunah chuan Arden an min kalsan tawh bawka Dylan bak neih ka nei tawh lo chuvang chuan ka tih tur awmchhun chu Arden nen a kan chungchang hi ka theih chen chen ka thup angai.Pu Thompson hi ka hrethiam lutuk tunge mahni fa te tan thil ṭha duh lo ang.

Tun hnai te Arden ka nuna a rawn lan tak aṭang khan Dylan nena kan inkar chu nasa takin a ti chhia a, pasal hual ka nei ani tih pawh theihnghilh ṭhak khawpin ka khawsa a,harsatna tamtak karah pawh amah vang chauhin beiseina ka nei thar leh ṭhin, hlim takin kan awm dun dawn emaw ka tih laiin min thlauh thla leh daih si,tawrh har viau mahse pawm mai loh chu tih theih dang ka nei lo.Arden kha engvanga lo ring em em nge maw ka nih le?  mahse.... mahse ka chunga a thil tih zawng zawng te leh a bula ka hun ka hman chhun chhun te kha ka nun a ka hlim ber ṭum ani tih ka hai hauh si lo.

.

"Tina... in enkawl ṭha rawh aw, ka hmangaih che " Dylan an min fawh vang vang hnu chuan car ah a lut a,anu leh pa te nena an tlan liam lai chu ka pi nen chuan ka thlir liam vauh vauh bawk.

"i thawmhnaw hi thlak vat rawh.... hetiang hi rawn ha chhuak tawh miah suh "

" awle... " tih pahin inchhungah ka lut leh hna hna a, ka pi hnial tur pawhin tha ka nei lo.

" khapa kha i hmu leh ani tih min hrilh hauh suh... "

"ka hmu tawh lo ang... i lawm tawh em?"

"hepa a rawn lan aṭang hian ka tunu pawh i ang tawh love....khawiah nge nula fel leh thuawih deuh ni ṭhin kha a awm tak? "

"ka mu dawn nia... mangṭha le"

"khatiang mi dukdak lo... hmeichhe chhaih kual ṭhin ho kha hnaih tawk suh ang che "lehlam hawi pahin ka mittui far fap chu ka hruhul zeuh a, ka pi hian a tunu hi kha mi dukdak lo hmeichhe chhaih kual mai mai ṭhin avang khan rilru na in a awm mek ani tih a hre hauh si lo.

.

Engkim a thlen hnu ah pawh Dylan chuan lawm takin min pawm leh thei a,

ka chhiat leh ṭha hriatna chuan Dylan thlang turin min duh mahse ka thinlung erawh in Arden a thlang thung... ni e.. Arden hi ka duh ani tih ka in pawm thlap, Dylan bulah ka awm pawhin amah lo ka ngaihtuah thei lo,awlsam taka theihnghilh mai tur chuan kan inkar ah thil thleng a tam tawh lutuk mahse hma lam pana nun ṭha zawk neih ka duh chuan hai rual loh in ka theihngilh angai tih kei tluk a hrechiang an awm lo.

Ngawi rengin ka room thim ruih hmeh en pah in ka tshirt hak lai chu basket ah ka vawm lut nghal tawp a,chau hle mah ila ka mut pawh a chhuak lo,muhil pawh ni ila mangchhia in min ti harh leh tho ang.Bra pawh ha lo in panty nen chauh darthlalang hma ah chuan ka han ding tau a, darkar tlemte liam ta mai a ka awm a fawhna duk kulh te leh min thamna sen vual kalh te pawh ala reh em hma a khatiang thil a ti kha ka la ring thei lo.