ZERO-30 BY Remruati Bawitlung (Haylor)

Chapter-30

.
"nula.... hepa hi i hria em ni? "
Tawng mai nachang pawh ka hre lo,muttui tling pam chungin Tristan ruang chu mak tih hmel zet in ka en reng ringawt.
"ka pu min lo hrethiam la Tina hi chu Sacramento ah hian a rawn awm thar chauh avangin mi tumah hriat a nei lo ang "ka pi chuan ka hnungzang chul pah hian a rawn ti nghal vata,police pa pawh chuan min hriatthiam hmel takin a lo bu nghut bawk.
" anih chuan helai hnaia awm hi in ni hrim hrim em? "
" aw ni e.... mahse khapa kha tun hma in ka la hmu ngai lo,helai veng ami hi ani lo aniang ....Tina inah lo va awm rawh ...." tih pahin police pa chu a hruai hrang nghal daih a, thiam lohna kan nei lo bawk nen min lo ringhkel pawh nise ka pi hian engkim a sawi fel leh vek mai ang.
.
Ka pi'n in a awm turin min hrilh mahse ka hamhaih em avangin ka ding khawng reng ringawt, Tristan hmel dang bem te leh a hmai duk raih te chu ka mitthla ah a cham renga nizan hmasa lawkah mai khan kan inhmu bawk si a ka mak tihna hi a zual tulh tulh mai.
Ngawi rengin a ruang an chharna hmun lam pan chuan ka kal phei chhat chhat a, police siren ri vung vung ri te, mipui leh chanchinbu mite authawm te pawh in min tibuai pha tawh lo, engkim mai hi a deh duk nimai hian ka hria.
"Tina.... haw ang " ka pi chuan ka kutah vuan in min rawn pawt ding nghal chawt a,ka mittui ka dang thei tawh thlawt lo ka biangah a luang thla nghal zung zung ringawt.
★
★
Melh ngai melh ngur ngur pahin couch ah chuan ka ṭhu renga,ka pi erawh a mu daih tawh thung, police siren ri vung vung te leh thawm dang dang te chu zan rei ah pawh a reh tak tak thei chuang lo, khatiang thil kha ka vawikhat tawnna anih mai bakah ka vawikhat hmuh na anih avangin ka ngaihtuah let zawng ringawt pawh hian ka mur nghal sung sung thei.
" ila mu nange? " ka pa aw ka hriat rual rual chuan ka thaw nghal huai mai, ka bula a rawn ṭhut chuan a darah ka lo bei hle hle a .
" ngatinge i la mut loh a.... ṭhenawm a thil thleng vang hian em ni? "
"ruang i hmuh hmasak berin engtin nge i awm? "
" umm... ka hre tawh lo"
.
" tunge that ang le? " ka han ti leh sap a, ka rilru ah erawh thil tamtak a chhanna ka hriat si loh a rawn lang zut zut thung.
" a lan dan chuan a lu ah na taka vuak anih hmel...."
"pa....ngatinge kan awmna bulah kher kher hetiang thil hi a thlen le? "ka pa pawhin chhanna a nei bik lo tih ka hria ,ka room a thil thleng avang khan ka dawih tawh nak alaiin hetiang thil a thlen leh hnu ngat phei hi chuan maimiching takngial pawh ka ngam tawh lo.
"tleirawl ho insual buai vel vang mai mai pawh ani mahna.... "thil ho te ang maiin sawi mahse a serious zia ka hre ve kur tho mahse ka pa thusawi anih vang hrim hrim pawh hian ka thla a muang ve em em tho.
.
" a lehpekah chuan keimah pawh ka ni tawh maithei asin "thil thleng kha ka pa ka hrilh thei bawk si lo,chuti lo chu thinthi in a awm thei dawn lo tih ka hria chubakah a rilru a hah sa tawh nak alaiin ka tih hah belh duh tawh lo,thil thleng ah khan engmah finfiahna awm lo mahse min tibuai tu erawh chiang takin an awm tih ka hria.
" nilo,nilo... bawihte engtin mah i awm ka phal dawn lo " tih pahin nghet takin min kuah beta,ka pa bulah hian ṭah chhuah hawm hawm ka chak takzet mahse ka inti pachang hram hram zawk tur ani.
"mu tawh rawh aw.... i chau lutuk palh ange"a tlai tawh em avangin ka lo bu nghata mahse ka pa ka tihbuai duh tawh loh vang zawk ani.
.
Ka room bul thleng in min kuah chho a, ka room chhungah hian ka luh hreh zia hria se chuan a bul hnaiah pawh hian min kalpui lo tawp ang.
"lut tawh rawh.... "tih pahin ka lu ah a rawn fawp zeuh a, a chau ngang aniang a ham nghal bai bai bawk.
"ka hmangaih che... "
" keipawh ka hmangaih che... " ka pa in min en reng avang chuan nuih suk pahin kawngkhar chu ka han hawng ri rak a,ka hawn zawng ringawt pawh hian ka khur nghal der der mai.
" mangṭha le "ka huaisenna zawng zawng sawmkhawm in maimichhing chung hian ka han lut zal zal a, kawngka ka kalh fel chiah tih chuan ka thaw chhuak nghal hawk bawk.
.
Kawngka ngheng chung chuan ka han hawikual hrak hrak a ,engthil mah hmu lo mah ila ka luh belh ngam tawh thlawt lo.Reife ka dinna ngaia ka din khawng reng hnu chuan dar3 a rawn ri ta va va mai, kawngka ngheng chung chuan ka ṭhu ran a mut chu sawi loh dar4 ah pawh ka la hawi kual hruk hruk mai,nghakhlel takin haw var hun nghakin tukverh lam chu ka thlir deuh chhen bawk a zan a rei tawh ka ti takzet.
A khat tawkin ka phone chu ka zuk melh leh zeuh ṭhin a,tun dinhmun ah tak hian ka nu ka ngai takzet mahse a tlai tawh em avangin ka tibuai hreh ve bawk si.Ka lo chau ve tho bawk nen ka khup bawh chungin ka ṭhu kun lap renga, a tawp a tawp ah engtin tin emaw ka muhil ve mai bawk.
.
____________________________________________
.
★Library★
.
" Tina... tho tawh rawh " Hailey in min rawn sawi nawk nawk avang chuan ka harh nghal zawka,ham bai bai chungin ka hawikual nghal vat bawk.
"hetah eng nge i tih a.... mu turin maw? "
" nizanah ka mu tlem teh mai nia min mut tir mai mai teh "
"Summer camp ah i kal dawn chuan in register a hun tawh ania....naktuk tuk leh mai hi ani tawh tih i hria em? "
"ka kal dawn lo ka tih tawh kha... "
"i ti leh ta....engkim ka tih kep vek tawh che "
"Hailey...."
" ngatinge hetiang hian i awm tlata....tun hnai te aṭang hian i awmdan a danglam sawt riau "
.
" bengchheng suh u "Hailey a ṭawngring em avangin min rawn hau a,ka lehkhabu khung sawk sawk pahin ka kal nghal hlawk hlawk a, ka hnungah min rawn zui ve nghal vat bawk.
" Engthil nge i chungah thleng a?"
" keimah chauh a awm ka duh naktuk ah kan inhmu leh dawn nia"
" Valentina...hetiang hian awm suh" tih pahin ka banah chuan a rawn vuan leh ngat a.
"engtin nge awm se min tih a... kan ṭhenawm lawkah inthahna a thleng a chupawh ka hmelhriat lehnghal chutichung chuan thil thleng min la zawt cheu amaw!?"
"chu chu ka sawi tum ani lo "
"mutthilh chu sawi loh ka room ah takngial pawh ka lut ngam lo asin....maimichhing hlek ila thisen hlir ka hmu a,ka mutthilh ve chhunah lah mangchhia in min ti harh zel bawk si"
.
" oh... ka tihpalh lutuk " min khawngaih hmel tak hian min rawn kuah nghal vata, duat takin ka hnungzang ah a chul hle hle bawk,ka chhungte bula ka sawi chhuah ngam loh ka bun chhuah vek takah chuan ka zang nghal huai mai.
"mahse summer camp ah i rawn kal ve ang tih min tiam rawh ....ugh ka bulah i mu anga bakah intih thawven nan pawh a ṭha hrim hrim kar hnih chhung anih dawn avangin thawm vel pawh alo reh hman vek tawh ang " ka han inngaihtuah vung vung a, ka room a awm ai chuan a chakawm fe zawk bakah kar hnih chhung chuan ka hlauhna te leh dawihzepna zawng zawng te pawh a bo hman vek mahna.
"anih chuan vawinah puan in ka zawng dawn mi niang "
"tehreng mai " phur takin min lo chhang let nghal vat bawk.
.
Titi pahin ground ah kan chhukthla dun chhat chhat a,ka rilru tawt lutuk te pawh kha a zia hret hret bawk.
"khupa khu tunge? " tia an phun sap sap ri ka hriat chuan zawh buai ngai lo in gate bulah Arden ka zuk hmu thut mai chu ka lo inring lawk lo bawk nen ramhuai hmu thut ang mai hian ding nghal chawt ringawt,a sam phir vah te leh a shades vuah nen zawng zawng khuan a inhmeh vel vek,a chhelo ani tawp mai. A bike nalh zet a ṭhut pahin  cigrattee a zu ham ham bawka, a chhiatloh mai bakah a hmelṭhat em avang hian a awm mai mai pawh hi a hmuhnawm tham in a langsar takzet mahse a hmel ka hmuh zawng ringawt pawh hian ka rilru a na nghal vawng vawng thei.
.
"Hailey....let leh ang class ah thil theihnghilh ka nei "
" Engthil maw? "
" nakinah ka hrilh ang che " tih pahin ka pawt let nghal dawr dawr a, Arden an min rawn hmuh chuan a cigratte zuk lai rahhlum pah chuan a rawn tlan chho nghal vata
" ding rawh... " a ṭawng ka hriat zawng ringawt pawh hian ka mur nghal chuaih mai,mahse ka ding anih vaih chuan kan insum leh thei dawn lo tih ka hrechiang.Ngawi rengin nghet taka ka bana rawn pahin min rawn kuai her nghal sawk a, a shades vuah lai a phelh nak chuan a mit ko ser te leh a hmai pilh phung te chu ka hmu chiang kher mai, chu chauh chu ala ni lo a hmai duk leh pilh tam zawk hi ala tharlam lutuk tlat.