ZERO-21 by Remruati Bawitlung (Haylor)

Chapter-21

.

"Engthil nge maw i sawi le? "

"i hrechiang khawp ang .... " ka bag ah ṭhat pah chuan ka nui lui kher a,khawi lam nge ka pan dawn pawh ka hre lo,tunah hi chuan amah hlat thei ang bera awm hi ka duh ber ani hrih.Zawi zetin kun lap chungin subway lam panin step ah chuan ka chhuk thla chhat chhat a,Arden ka hmu leh kher kher khan ka mood a ti off zual vek.

.

In ka thlen chuan rin loh tak maiin ka pa pawh alo bang der tawh a, zanin chu kan pathum in dinner kan kil ho ve thei dawn anih hi.

"Zanin chu i va dâng ve.... "

"tui in tam ka mamawh aniang " tiin ka lo chhang ringawt a, tui in tam nen a in kaihhnawih vak na pawh ka hrelo.

"i nu i be leh tawh em? "

" aih....nakin ah ka bia ang "

" awle... a ṭhat chu,zanin chu mikhual kan nei dawn a dinner kil turin rawn tlai suh aw.... "

"tehreng mai.... " ka pa chuan ka chala rawn fawh zeuh pahin phur takin kitchen lamah min pheisan lehnghala, hetianga ka pa hlim hmel ka hmuh hian nuam ka ti in ka hlim takzet.

.

A ngai te bawkin room ka luh rual rual chuan khumah ka let thla lehnghal tawp a, vawin zet zawng thil thleng zozai te khan min ti chau takzet.Thawk chhuah hak pahin ka awm chu ka han dawm vang vang leh rih ṭhin a, ka awmdan ka nin em avangin han tal vak vak ṭhin mahila ka thinrimna te a reh thei chuang lo. Thil eng eng emaw ngaihtuah in khumah chuan ka mu thlur renga, engmah tih chakna pawh ka nei lo.

"Zero.... urghhhh" thil hrechhuak niawm tak hian ka ṭhu chhuak nghal hlawl a, rang lutuk in ka laptop ka la nghal vata google ah zero tih ka search nghal vat bawk.

.

Eng eng emaw chhiar tur awm nual mahse zero chungchang erawh chhiar tur a awm mang lo, a hming hi a lar em avangin tlem te chu a inziak ve chupawh engtham mah ani lo.Engemaw tal hriat belh inbeisei in ka chhiar thla zela a, American Mafia tih ka hmuh chuan mak ka tih em avangin ka kâ ka hup nghal vata

"America mafia mi leh sa maw anih a.... " ka ti zui sap bawk. Tu in nge American mafia te chu hrelo ang,keitak ngial pawhin an hlauhawm zia leh thil an tih theih zia ka hria ania, bakah ka pa hi police anih vang pawh ani mahna hetiang thil ah hi chuan ka bo lutuk lem lo.

.

Chutia hlauthawng leh thinphu dep dep chunga thil ka lo en lai tak chuan ka phone a rawn ri ta thut mai!!  ka phu nasa lutuk hi ka thlarau a chhuak thei hial ang mawle.

" Eng nge?"Jade anih avang chuan vin zet hian ka lo ti vin nghal hlur a

"thil pakhat min lo tihsak teh"

"Enteh chumi hma chuan zero hi mafia maw anih a!! "

" Eng nge ni se i tih chuan a...? "

"nilo.... chutiang pawh a ni lo, a sual tih chu hre tho mah ila hetiang kawng sira awm ṭha duh lo khawtlang tibuai vel mai mai ṭhin turah ka lo ngai a..... " Diktak chuan mafia em anih chu ka ring pha ngai lo.

.

" chuan eng nge? "Jade hian engmah a hre ve der mai bawk si lo, kei hian thil hlauhawm tak ka ti ani eng thil ah hian nge ka inhnam hnawih tak hi? Lalpa leh engtin nge ka tih tak ang.

" Jade.... buaina ka tawk dawn in ka hria "

" maw?"

" enteh.... mafia ho hi engtiang chiah a hlauhawm nge an nih....? " engvanga zawt nge ka nih pawh ka hrelo, ani ai chuan ka hrechiang zawk daih ang chu.

"ramchhung ah phalloh thil an tawlh lut ru a....bakah hmelhriat an neih ṭhat avangin jail ah an tang ngai lo chu chu ani mai alawm "

"chuan mi thah an hreh lo bawk " ka lo tih chhunzawm zat bawk.

"mahse engvanga chu chu min zawt nge i nih? "

.

"eng thil nge ti turin min duh a?" chhang lo in thil dang ka sawi ta daih zawka,

"assignment "

" Jade..... ka tih sak ngun tawh lutuk che, nangmah in ti ve tawh rawh "

"tun chiah please in.... " lehlamah ka pa in min lo koh ve bawk avang chuan ka tho nghal vata inhnuai a chhuk thlak pah chuan,"a tawpna ani tawh ang " tih pahin phone ka off nghal hmak bawk. Mikhual kan neih dawn avangin hmanhnawh takin pangpar chu dawhkhan ah ka hung phei nghal a, a dang erawh ka pa leh ka pi in an lo tifel vek tawh thung.

" ka pa tunge rawn kal..... " ka sawi zawh hma hma in doorbell a rawn ri nghal.

.

"ka va hawn ange? " tih pahin kawngka hawn tur chuan phur takin a kalphei nghal vata,dawhkana fork sawi dah rem zeuh pahin ka pa chu ka zui phei ve nghal vat bawk.Eng ang mikhual tak ni ang maw ka pa ti hlim em em tu hi tiin hriat chak hmel tak in ka phei a mahse hmeichhe pakhat la upa lo tak mai, makeup hmang nasa zet leh ka pa lo inbe mawlh mawlh lai ka hmuh chuan ka ding nghal chawt a, ka nui tawp nghal hmak bawk.

"bawihte, lo kal teh..... Natalie anih hi.... " ka pa in a tih chuan za lo zet hian ka lo nuih suk a, chu nu lah chuan min hre sa tawh niawm tak hian min rawn chibai a, min be zui nghal bawrh bawrh bawk.

.

Ka pi leh ka pa in Natalie be reng reng a an buai lai chuan ngawi rengin chaw chu ka lo ei mawlh mawlh a,diktak chuan henu hi ka mi ngainat zawng ani lo.

"Tina.... " ka pa in min rawn koh avang chuan ka hawi chhuak vata,Natalie in min rawn nuih avang chuan ka lo nuih let ve nghal suk bawk.

"thil hrilh tur che ka nei a " a tih chuan hlauhthawn na in ka khat nghal ,ka pa chuan zam hmel takin chunu chu a melh zeuh a, thawk chhuah hak pahin a kut ah a vawn sak nghal bawk.

"Natalie hi nupuiah neih ka duh ani "

" maw!!" ka hlauhthawn ang nge nge in thil a thleng ta!

"kan hmanhnawh lutuk chuang lo a..... ughhh..... thlaleh ah hian kan inhual phawt anga chuan....."

"ka pawm ve lo " a sawi zawh hma hma chuan ka ti chhuak nghal phawng mai.

.

Ka ṭhutna aṭang chuan ka ding nghal hluai a,an pathum chuan ka awmdan chu mak tih hmel takin min en ṭhap bawk.

"engtin nge ka nu i rinawm loh san theih zawk? "

"i nu nen te chuan kum tamtak lian ta ah khan an in ṭhen daih tawh alawm... " ka pi in a tih chuan ka sa nghal phat mai." ka pawm ve lo.... henu hi ka nu atan ka duh lo engtik ah mah ka pawm ngai lo ang.... "

" Valentina....khatiang khan ṭawng reng reng suh " ka pa in aw vin zeta a rawn tih avang chuan ka rilru a na takzet, henu avang mai mai hian ka pa in min vin amaw!!

"Ka pa hetiang thil hi engtin nge ka chungah i tih theih zawk ?" tih pahin Natalie pangpar rawn ken chu chhuatah ka paih thla kher a ,rah pahin pawnah ka tlan chhuak nghal daih bawk.

.

Kawngsir ṭhuthleng ah ṭhu in ka nu chu ṭap chungin ka be mawlh mawlh a, engkim ka hrilh nghal vek bawk .Diktak chuan ka nu leh pate inkar siamṭhat ka tum mek laiin hetiang thil a thleng ta mai hi pawm thiam har ka ti takzet. Ka pa hlimna tur pawh ni mah se khanu kher kher kha chu ka duhpui lo. Min melh dan reng reng aṭang khan hnawk min tih hmel in kan chhungkua hi keh darh vek dawn mah se pawi a ti lo ang.Mittui tling pam chunga thil ka lo ngaihtuah neuh neuh lai chuan ka phone chu ka han hmet eng zeuh a dar11 a lo pel der tawh. Reilo te chauh ka ṭhu emaw ka tih laiin darkar thum dawn chu ka ṭhu der tawh .

.

.

Khatiang thil teh nuaih a thlen avang khan haw lo in Hailey te ina riah chu ka tum ta zawka mahse tun tut tut ah chuan kal ka tum chuang lo a chhan chu hun thawl ka la mamawh vang ani.

"darkar thum dawn i ṭap tawh ania " rang lutuk in hnunglam ka hawi let nghal vata, Arden ka hmu chiah mai chu hlauhna in ka khat nghal. Phawk fe hian ka melh nghal kawk a ka rilru ah engtin nge ka tlan chhiat san vat theih ang tih bak a awm tawh lo.

" i va hlauh hmel ve.... "

" umm.... "

Ka bula rawn ṭhut pahin beer um hi min rawn pe a, ka la lo ngam bawk si lo a nuih luih suk pahin kut khur der der chungin ka la nghal vata, túr a tel nge tel lo pawh ka hre si lova in pawh ka in ngam lo.

.

" ngatinge....min ṭawngkhum miah loh a " ka lo phu zuk ringawt ,ngatinge ka hlauh tak em em mai le nichin a ka thil chhiar vang vek kha. Ka awmdan avang chuan ngaihṭhat loh hmel zet hian min rawn en ha a ,chung te chuan min ti hlau zual.

"min... min kalsan rawh "

" Engvangin maw? "

" i nihna ka hre tawh " tih pahin ka ding nghal hluai a, ka lo sawi chhuak ta kher kher kha ka inchhir takzet.

"nanghi mafia i ni....chuan engvanga ka kalna apianga min zui nge i nih?"ka tih chuan a rawn nui ri hak a, kei lah ka hlauthawng tawh mai si.

.

"a tlai tawh.... ka thlah haw ang che... "

"khawngaih in min kalsan rawh"an thil tih ṭhin nen inzawmna kan neih hauh si lo a, engvanga hlau em em nge maw ka nih le? nilo.... hlau hle tur zawk ka ni a chhanchu min thah tum lo se hetiang hian min umzui zel tawp lo ang.

"that duh che ni ila ka that daih tawh ang che.... "

"anih chuan engvangin nge min umzui a min tih buai reng...."

" a chhanchu tihbuai reng che hi nuam ka ti ani "

"maw! "

"pawm phei kher i duh nge.... " tih pahin silai lak chhuah inring reng niawm tak hian a kawng chu a han dawn kher a .