Dr Noel 2 -12

 CHAPTER -12

'I’m tired of loving you and hoping you’ll do the same.'

Kan zanriah ei zo thleng ka sil lai chuan ka nutei  chu a phone nen ka bulah a rawn kal a , 'bawihte an be duh che ' tih pahin a phone chu min rawn pe a . Ka kut ala huh bawk nen tunge tiin ka lo zawt let vat a .

Ka pa a nih chu a sawi rual rual chuan ka nui tawp chiang kher mai . Biak chu sawi loh lehlam ka hawi hmak a , thleng chu ring zet hian ka sil nghal bawrh bawrh a . 

' Kha reilote be lawk la ' a rawn ti leh a mahse a tawng hre lo ang hmakin ka tih ngai chu ka ti lui ngar ngar a .

Ka nutei tih ngaihna hrelo chuan phone chu a off ta ringawt a , ka pa ka biak duh loh avang chuan a thinrim leh ringawt tawh .

' Engang pawhin i pa hi be duh lo mahla kumkhua in i pa a nihna a bo dawn chuang lo . Ngaihsak lo che a thlahthlam hmak che pawh a nih loh hi . I pian tirh atang tawhin engkim a tih sak che a , thla tin i account ah pawisa pawh a rawn thun ziah kha ' tiin ka nutei chu a phun zui nghal mawlh mawlh a , kei erawh ka lo ngawi reng thung .

' I pa in ala dampui lai che hian hmangaih takin be zawk ta che , chutilo chu nakinah ila inchhir ang ' a rawn ti leh chiah chu ka ngawihpui mai mai thei ta bik lo .

Ka thleng sil lai nghah chawrh pah chuan zawi te hian , ' Hmangaih a!!' tih sep pahin ka nui lui kher a,ka thil tih lai chu ka chhunzawm leh ngat bawk .Ka awmdan chu ka nutei huat tawk a tling leh em em tho .

Ni e ka pa biak chakna hi ka nei thlawt lo,  Ka nu nen an innei lo a ,vawikhat pawh kan la cheng ho lo , a nihna takah chuan sawn ka nih ber chu . 

Engang pawhin min ngaihtuah in min ngaihsak mahse a hmingin ka pa a ni ringawt a , nupui fanau a neih tawh avangin min rawn ngaihsak lo mahse pawi tihna pawh ka nei lo. 

'I pa in a hmangaih che tih hi theihnghilh ngai suh , zanin ah reilote ka duty leh dawn a min lo pui ve lawk rawh aw , a rei lo ang minute 20 vel a ni mai ' Ka nute'in a tih chuan ka lo bu nghat a .

Ka pu chuan , ' Malawmi ai kal lak tur chu engtik ah maw a rawn thlen dawn? ' tiin ka nutei insiam lai chu a zawt a .

A sam ṭawn that mawlh mawlh pah hian , ' Naktuk ah a rawn thleng ang . Kan indaih lo bawk nen rawn thleng vat vat se ka ti teh ania ' a ti zui mawlh mawlh a .

Nu Malawmi ai kal tur nurse hi naktuk ah Mamit atangin a rawn kal dawn a , ka nutei hi a hah thin sia ka lo nghakhlel pui takzet . 

Damdawiin a kal tur ka nih avangin ka inchei hmasa leh te te phawt a , ka insiam laiin Christian 'an min rawn call bawk nen ka awm rei dawn lo bawka tiin ka pu phone chu ka keng ta ringawt a .

Thil ho deuh deuh kan sawi a damdawiin ka thlen pawh chuan kan la inbia a . 

Damdawiin varanda ah chuan ṭhu in tattoo chungchang te chu kan sawi dun a , thir ṭhuthleng ah ke hlang meuha kan lo inbiak lai chuan Dr Noel chu ka hma ah tak a rawn lang thut a,ka hmu chiah chu ,'Awi Pathian ta lian 'ka ti tuarh a ka phu chiang kher mai .

' Min ti phu alawm ' tih pahin ka la beng thurh zui . Ka awmdan chuan a nuih ati za ngang aniang a nui ri ve huk huk mai.

' Han sawi nawn leh teh nichina i sawi kha ' nuih pahin min rawn zawt nawn leh ngat a , Dr Noel a awm bawk nen Christian bulah chuan ka buai deuh thu hrilh in phone chu ka dah ta ringawt a .

Ka bulah hian lo ṭhu ve rawh ti niawm tak hian ka tawlh phei nghal vat a' Ramhuai emaw ka ti hman che lawm ' nuih let pahin ka fiam zui zeuh bawk.

Ka duh na ah hi chuan ka zei mawle .Awmtea phei chuan i mipa duh deuh te i biak hian i duh a ni tih hriat deuh hian i be thiam min tih hial tawh kha .

' I phone wallpaper kha white Lily em ni? ' tih pahin ka bulah chuan a rawn ṭhu a , tumah kan bul velah an awmlo bawk nen nuam ka ti lutuk hi ka khi reng lo thei lo.

' Aw...ahhh ka pu phone ania phone ka la nei ve lo . Engpawh chu nise wallpaper hi chu white Lily a nih hi ' ka lo ti duah a , Lily var chungchang sawi tawh hi chuan a hma ang bawkin lungngai hmel hi a pu ve ziah . 

' A nalh ngawt mai ' a zungbun bun lai khawih neuh neuh pah chuan zawi te hian a ti a . A zungbun lah hi zungte ù(finger ring) ah a bun bawk sia , nupui chu sawi loh bialnu pawh a nei lo an ti bawk sia ngaihtuah na a ti thui takzet . 

' Nia .... min pek hma kha chuan nalh ka ti ngai lo ' ka ti chhuak hlawl a , min hre tawh lo mahse pawi tihna ka nei lo keiman ka hriat chhung chuan ka lungawi. 

' Keiman maw ... Keiman Lily ka pe che maw?! 'amah leh amah in kawk meuh in mak tih hmel zet hian min rawn en a. 

'Aw .... i hre tawh lo ang mahse Civil hospital a Lily var i pek hmeichhe naupang kha chuan ala theihnghilh ve lo che, tun.... ' ka sawi zawh hma hma chuan gypsy var pakhat hi kawtah a rawn tlan lut thut mai a , an hmanhmawh hmel hle bawk . 

Dr Noel chuan min en reng a ,mak a tih hmel tluk zetin zawhna a ngah tih a hmel aṭang hian hai theih a ni lo mahse emergency a awm avangin damlo chu buaipui turin a tlan phei ta zawka , kei pawhin ka va pui ve nghal vat bawk . 

Pa upa lam kum 70 bawr vel nikhaw hrelo a let reng tawh chu motor aṭanga zawn chhuak in damdawiin ah chuan an zawn lut nghal zung zung a , ka nutei pawh a rawn lang rang khawp mai .

' Engtin nge a awm ? ' Dr Noel chuan damlo rawn hruai tute chu alo zawt nghal zung zung a .

' Amah hi hrawk cancer a nia , tun lawkah khan nikhaw hrelo in a rawn tlu tawp a kan rawn kalpui nghal a nih hi ' an tih chuan a kâ chu light nen a enfiah nghal vat a,a ka zawnah chuan a beng dawh in ngun takin a ngaithla vang vang phawt a chutah stethoscope in a awm leh nak bawr vel chu a ngaithla nghal vat bawk .

'a awmdan ah hian a thaw a hah a ni lo maw a oxygen level a hniam khawp mai' ka nutei chuan alo ti nghal vata . 

' Ambu kan mamawh ang ' ka nutei bula a tih chuan a ni chu a lo bu nghat a ambu bag la turin ka nutei chu a kal nghal vang vang bawk . 

Ka nutei kal chhungin Dr Noel chuan damlo chu alo la endik a , ka hriat tawk lek hian , ' A chhungte hi lo va chhuah tir rawh ' a rawn ti sup a .

 Chutia Doctor berin a tih takah chuan hnial chi a ni tawh lo,zah pawh dawnlo in kei aia upa ṭhah ka nu leh pate aia upa ho chu room atangin ka hnawtchhuak ta ringawt a, an ni pawhin min lo hrethiam aniange thuawi takin pawnah an chhuak diak hlawm a. 

Ka nutei a rawn let leh chuan min mamawh takin tiin a rual chuan ka lut ve nghal a . Rang takin ambu bag chu vuah in an han hmet chiah chu oxygen a lut thei reng reng lo chu niin .

' Eng nge awmzia?' ka nutei chuan hlauthawng tih hriat tak hian a ti a ,kei erawh in engmah ka hre lo bawka ka lo tangkai ve tak mial in tiin ka lo ding zum reng ringawt . 

' A hrawk hi a vung nasa lutuk a , oxygen a lut thei lo a nih hi . Kan intubate mai angai ang ' buai leh hlauthawng hmel pu eih lo hian alo ti a . Buaina a thlen lai pawha a chiai ve ngai miah lo hi a mak zawk . 

Helai hmun ah hian Doctor chi hrang hrang an lo awm ve nual tawh a ani ang em em a doctor mahni inringtawk hi ka la hmu ngai lo. 

' Mahse intubate na tur engmah kan nei lo engtin nge kan tih ang? Oxygen a dawn vat loh chuan a thi mai ang '  ka nutei hlauthawng chu a phi leh cheng tawh . A ni aiin ka lo hlauthawng zawk lehnghal. 

'Ambu bag vuahna tur hi lo siam rawh ' ka nutei bulah chuan a ti a. Ngawi rengin central line tih inziahna box chu a hawng sawk sawk a . Central line an vihna hriau lian leh hrawl zet chuan eng nge pawh ka hriat ve loh hi a hip lut a . Direct in damlo hrawk ah chuan vih a tum ta mai . 

Ka nutei bawk chuan aw khur dar dar chung hian , ' Noel heng thil hi ka la ti ngai lo a nia ' a ti ta mai , ka nutei senior nurse meuh pawhin a la hmuh lai ngai loh chuan thil thalo a thleng mai ang tih ka hlau takzet . 

' Hlauthawng suh , ka sawi ang zelin i ti dawn nia ' a ti a .

Central line catheter hi hetianga hman tur pawh hi a ni lo tih ka hriat ve kar avangin ka hlauthawng chu ka thlan tui in min bual huh vek tawh .

Hun tam a awm loh avangin damlo hrawk ah chuan a vih na lai tur chu a han khawih  te te phawt a muang changin hriau lian zet mai chu a vit lut ta mai . Chutah a vih luh tur zat a vih tak hnuah chuan syringe chu a han hip let leh a , tui chu tlemte hian a rawn phuan(bubble) berh a , ka nutei a thawk huai danah a dik a ni tih ka hre thei .

Ka awm hmunah chuan ka lo thaw ve nghal huai a ,rilru ṭawngtaina ka neih chhunzawm nghal mawlh mawlh bawk .

Central line catheter leh ambu bag chu an vuah zawm a , ambu bag an han pump leh chuan damlo pawhin oxygen a dawng ve leh thei ta ! ka lawm lutuk chu ka mittui a tla hial nia mawle . 

' Hmanrua engmah kan nei lo a damdawiin lian zawk panpui vat angai , kalkawng ah an buai takin keiman Saitual thleng kan kalpui ange ' Dr Noel an a tih chuan ka nutei chu alo in rawlh nghal vat a .

' Hetah damlo in an mamawh zawk ang che , keimah zawk hi ka kal ang . Naktuk zingah ka rawn haw leh mai ang ' tiin kal chu a chuh ta zawk a .

Ka nutei hian a sawi dik , damdawiin ah damlo admit an awm nual a Dr Noel hi an mamawh a ni . 

Venflon leh a mamawh tur ang anga an chiu hnuah drip an khai sak leh a, chumi hnuah chuan hmanhmawh takin damlo chu Saitual lam an panpui nghal vang vang bawk . 

Motor an tlan liam chiah tih chuan ka kut khur nasa lutuk chu a hria niawm tak hian Dr Noel chuan min rawn chelh sak nghal vat a , ka sam thlan in a tih huh zuih chu nuih vur vur pah hian min rawn hui kian sak a ,

' Nichin khan i tap tih ka hria a nia ' tiin min rawn chhaih leh kher a . 

' Ka tap bawk lo ' ka mittui hruk zeuh pah chuan lehlam ka hawi hmak a.