I Love you 3000-13 by Remruati Bawitlung (Haylor)

Chapter-13

“For you see, each day I love you more, today more than yesterday and less than tomorrow ”

-Rosemonde Gerard

Inchhung kan lut chiah chu hmeichhe pakhat keimah ang rual vel hian kã ang hau in mak ti tak hian min lo en renga ,ka zah avangin tal pah hian ," ka chhuk duh " ka ti nghal hlar a.

Ani pawh chuan min chhuk tir ve mai bawka ,an in lah chu a reh ṭhuap a an unau mipa hlang an ni sia hmeichhia hi tunge ni ta ang ?

" Tunge ?" Zawi sap hian ka han zawt sa sa a ,ka thik tih a hriat loh hram ka beisei .

" kan nula a nih kha , in tur i duh em?" Tiin min zawt zui zat bawk . An awmpui nu alo ni hlauh chu ka thaw huai mai ,a hmel a fai ving veng sia ka thik hman ṭhelh alawm .

" tui ka duh, midang khawiah nge ?" Ka ti leh a .

Ni e ,an inah ka kal ta rau rau bakah midang an lo awm ve chuan a zahthlak dawn em a , hriat ve hrim hrim ka duh .

" Ka nu leh pa chu office ah "

ṭha takin min chhang zel a ,a û te pahnih an in dang tawh lehnghal a ,mi pathum chauh chenna tur atan chuan an in hi a lian mah mah in ka hria.

An choka lah chu a zau in a var sur a ,ka tim deuh duk mai . Engkim mai chu uluk taka design tih a hriat hle ,an chhungkua an zahawm tluk zetin an in pawh hi a zahawm.

" i ril a ṭam em?" tui min rawn pe a ,lu thing pahin ka hawi kual hruk hruk a ,awmdan tur pawh thiam a har .

" ngatinge hetah min hruai ?" Ka zawt ta nge nge ,ka ngaihtuah ngial pawhin an ina min hruai nachhan hi ngaihdan ka nei lo .

" kha heihi ei rawh " tih pahin sandwich hi min rawn pe a ," min rawn zui rawh " ti zui zat in a kal nghal a.

Inhnuai lamah ka zui thla zela light a on chiah chu in ruak lek chu lo niin .

" Gym hawn ka tum a ,nakin lawkah bungrua a rawn thleng ang " a tih takah chuan ka hrethiam nghal ,midang tumah an awm si lova aman bungrua ho chu alo dawnsawn ngei angai ang chu.

" a ṭha ngawt ang " ti chiam thiam lo mah ila a phur hmel ka hmuh hian thinlung takin ka lo hlim ve em em ringawt .

" hetah hian darthlalang ka dah phei tir vek anga , tukverh bulah hian thlanglam thlir nghal theih turin treadmill ka hung tlar bawk ang "

Phur takin a ruahmanna te chu min hrilh a ,mi ṭawng mawh ve tak in hetianga a ruahmanna te min hrilh hian special bik ta riau hian ka inhria .

" hemi bang hi engtin nge ka chei dawn ka hrelo ,Engtin nge ka tih ang ?"

Min rawn rãwn lehnghal , kei ang thil design hre lo lutuk hian eng idea mah ka lo nei leh pek lo .

" Lem ziak tar la " ka lo ti liam puat a ,ka idea chhe lutuk hi lo sawichhuah loh law law tur ania .

" Painting i ngaina em?"

Tehthut a ,ka ngainat loh pawh ka hrelo a milem a zir a ni mai .

"Ngaina ve tho " tiin ka lo chhang mai a ,a ni lahin a lo la thutak ngang mai .

" thil ka hmuh ang che "

Phur takin a ti a, inchung lamah kan in zui chho leh hna hna a ,tun ṭum ah hian engtak ti leh ang maw ?

Inchung ber ,a chhawng thumna kan thlen chhoh chuan ka rin ang ngeiin a room alo ni a mahse a chhawng pum in zu han luah veka mawle ,zau hem hem tak a ni .

Fapa mal ang a ni tawh bawka ,an duat hle tih a hriat a awm ve tho e .

A room chu doctor tih takah lehkhabu tam zet hi bangah a in tlar thla dul a ,a mawi letling zawk chutah painting mak deuh deuh nalh lem lo tak tak hi a tar ṭeuh bawk ,musical instrument chi hrang hrang drum ,guitar leh eng eng emaw a hung nual bawka a room ah hian nileng pawhin awm ila ka khua a har lo ang,a balcony lah saw khaw hawi a nawm hmel em em lehnghal .

" ngatinge i din reng ṭhu rawh "

Ka din reng avangin ṭhu turin min hrilh a ,ka vawikhat kalna ania a ṭhiante ang maia tlangnel turah min ngai emawni le ?

A wardrobe ah thil eng eng emaw a en kual vel lai chuan a lehkhabu ho chu ka lo en kual ve thung a, lehkhabu a ngah bawka a chung lampang ami phei chu a lakna tur leihlawn hun sawn theih a awm sa thlap.

Ka en thuak thuak na in a lehkhabu 20% chu medical lam kaihhnawih a ni in ka hria ,chung zingah chuan Anatomy ,Pharmacology te pawh ka hmu .Ni e, MBBS leh Pharmacy zirlai hi a inang ṭhup hlawm a , lehkhabu chhiar khat viau mah ila heng ho bikah hi chuan ka bo lutuk bik lo.

" chhiar duh te i nei em ?"

Ka hawi let vat a ,ka lehkhabu ken lai dah let pah chuan ," heng ho hi i lehkhabu vek em ni ?"

" ka pa lehkhabu pawh a tel "

" i chhiar ziah ṭhin em ni ?" Ka ti leh ngat a , heng lehkhabu zozai hi tar mawi mai mai chu a ni em lo maw ?

" mmm...hun awl ka neih apiangin "

Hahh...ka te nghal chem chem mai ,kei ve thung chuan ka hun awl hi Instagram emaw Fb khawih nan ka hmang tlangpui .Huizz...Surgeon a ni pawh hi a mak hran love .

" kha kha eng nge a ?"

A thil ken lai chu ka va melh a ,phur takin a painting ken lai chu dawhkanah a pahnih chuan a dah a ," lo kal teh " tih pahin a bula ṭhu turin min kai phei nghal a .

" khawi hi nge nalh i tih zawk ?"

Maw? Zeplo chuan nalh ka ti lo ve ve .Hetiang colour thai kual vel mai mai te hi chu keipawhin ka ziak thiam ang chu .

" hei hi "

Thal kahna target ang deuh ,a pawl leh duma chei zawk chu ka kawk ta ringawt a ,ka kawh chhan pawh ka hre bik lo .

" ka pe ang che, S H Raza Exhibition a ka lei a nih hi " a ti ta mai, diktaka sawi chuan he painting hi ka duh lo .

A chhuan hmel em em lehnghal , kei erawh in S H Raza pawh chu ka hre lova heng painting hlutna lah hi ka hre hek lo .

" angai lo "

Ka ti tak tak, ka inthlahrun avanga sawi pawh ka ni lo , he painting ho lutuk hi engatan mah ka ti leh chuang lovang.

" kawl hrim hrim rawh " a tih tlat avang chuan ka aw ta nge nge a ,a thlawn a dawn tur a ni bawka a sawi ang hian ka kawl mai aniang chu.

Mahse engvanga hetiang thil hi min pek tum tlat nge maw a nih ?

" ka lawm e , ka nau pawhin lem a ziak ṭhin a " ka lo ti luam a .

" ngatinge i kut hi?"

Rang takin ka kut chu vuan in ka inzaina ser chu a en vung vung a .

" ah! Heihi maw? Ka tetlaiin ka ban ruh ka ti tliak a ,an zaina a nih hi "

" a na em?"

" ka hre tawh lo a rei tawh a "

Ka kut vuan reng chung hian a kutzungpui in ka kut ser chu a chul a , ka thinphu a rawn rang nghal dut dut mai ,boruak pawh a rit nghal hle .

" A na tawh chuang hleinem "

Nuih luih sek pahin ka hawi chho a , min lo en reng a a mit ah tak ka han melh fuh chat lehnghal ! Ka mûr nghal sung sung in ka hria .

Min en reng chung chuan zawi raih hian "ka fawp thei che angem? " a rawn ti ta mai , Lalpa leh !! min hrilh hmasa lo hian min fawp tawp thei mai lo em ni ,min ti lai zo vek mahse min tih luih a duh loh vang zawk a ni .

"...ah "

Ka awm dan a lai em avang chuan zahzelah ka han tal deuh a mahse a tum tawh chu a ṭhulh lo chiang hle , a kut pahnih in ka biang tawn tawn ah a vuan a duhthawh zet hian min rawn fawp dak awrh a ,ka lo chang let chiang hle .

Chutah zei zet hian a lei a rawn hawl kual leh a ,hetiang em em a danglam hian ka la awm ngai lo , a ni pawh ka awmdan ang tho hian a awm ve ka ring .

Couch a min bawh thluk rual chuan ka awm lamah a ṭuan nghal chat a, he thil hi tihtawp ka duh takzet mahse dang tur lahin chia leh ṭha hriatna ka hlauh telh telh mai bawk si.

" Tete...ti turin min duh em?" A rawn ti vawt raih a mahse a kekawr chhan a a mipatna ka feel rual chuan ka harh chhuak nghal kawk ," nilo ,kan ti thei lovang " tih sap pahin a awma ka nam takah chuan a tho nghal .

"Nilo ...nilo ,engthil nge ka tih tak ?"

Ka kawr ka siam ṭha sawk sawk a ,Dr. Noel'an min koh lai pawh chuan engmah ka hre mumal tawh lo,ka sam siam ṭhat pahin ka tlan chhuak nghal daih ringawt .

Ka thil tih kha a dik lo takzet ,engvanga insum thei miah lo nge maw ka ni le? Ka at luat ah damchhungin ka inchhir ṭep a nih kha ! Keimah leh keimah hi ka inhaw takzet .

Inhnuai ka thlen thlak chuan engang pawhin tlan chhuah tum mah ila kawngka bulah ui an thlun avangin ka chhuak ngam tlat lo.


"Hreptak chuan" tih sap pahin dawhkan bulah chuan ka ṭhu hnawk a , ka zak lutuk hi ka ṭap lo chauh hmeichhe sihhnip takah min ngai tawh ngei ang .Zomuansang i va han â tak em .

Ka khup bawh chunga ka inngaihtuah ngut ngut lai chuan Dr. Noel chu ka hma ah tak a rawn ṭhu a ,ka dara a rawn vawn rual chuan ka phu chiang teh e .

" min hlau suh engmah a thleng dawn lo "

" ka haw duh "

" aw le , ka thlah haw ang che " a ti sap a ,a zaidam in a hma ai zawngin min dim in ka hria .

Inbe miah lovin kan chuang dun ran a ,Dr. Noel erawh ngaihtuah nei niawm takin hma lam a melh ngut ngut a ,a inthiam lo hmel ka hmuh hian nuamlo ka ti letling zawk .

Khuanu in sawifel turin min ti niawm takin traffic zam ah kan tang reng takah chuan zawi sap hian ," hmeichhe awlsam takah min ngai tiraw ?" Tiin tlang takin ka zawt pawp a , a ni bakin min chhang thei chuang lo chuvang chuan tlang taka zawh hi ka duh zawk .

" Engvangin maw ?" A ṭawng chhuak ve ta nge nge alawm .

" khatiang thil avang khan " ka sawi fak ngam lo ,pehhel deuh hian ka ti ta ringawt a .

" Tete ..." Ka lam rawn hawi pahin amah en turin min kuai her a ," Engtin mah ka ngai lo che ,ka tihpalh ka insum thei ngang lo ani .Khatiang thil kha a thleng nawn leh tawh ngai lovang "

" diktak chuan pasal neih hma ..." Ka han thaw hak a " pasal neih hma chu ka duh lo "ka tih chuan min chhuan hmel tak hian min rawn nuih suk a .

"Pasal i neih hma loh chuan engtin mah ka ti lovang che " zawi te hian min rawn fawp vawng vawng a ,hei lo lema vanram tlafual hi a awm thei dawn chuang em ni .

Car aṭanga ka chhuah hma chuan midang hmuh theih loh turin ka kut chu a han dawm leh vang vang phawt a,a awmdan hi a mak takzet min thlahlel ngawih ngawih ang hian a awm .

" Taka inrinni ah hian Reiek tlangah ṭhian ho in kan kal dawn a ,i chhungten an phal chuan lo kal ve rawh "

" ka hrelo ka dil phawt loh chuan "

" min rawn hrilh leh dawn nia "

" aw le " tih pahin a painting min pek bawk kha ka khai chhuak a , min pe duh miau sia lawm takin ka la mai aniang chu.

In ka thlen chuan varandah ah ka nu in puanpho alo seng mek a ,Reiek a kal chu a phal ka ring chiah lo na in dil ve reng reng ka duh .

" Nu , naktuk tukleh ah Reiek ah kan kal dawn a ,i phal em?"

" Tute nen ?"

" ṭhian ho in "

" rawn haw har lo ula "

Enga! Tunah khan a phal tihna em ni ? Nidangah chhuah hrim hrim hi a phal ngai si lova ,engvanga phal thut nge maw a nih le ?

Ka room-a ka inthlak lai chuan Muani hi a rawn lut tawl a ," Rawng ka bawl vek a naktuk ah rawng bawl turin tho hma ve tawh ang che " tih zawng min rawn hrilh , zingah ka tho hma thei lo tih a hre ve reng sia.

" aw le , aw le ka lo tho hma ang " ka ti ve tak na in alarm ka off anga ka mu leh hmak maithei a ni.

" Heihi khawia mi nge ?" Rang takin khuma ka painting dah chu a la nghal vat a ,mak a tih hmel em em lehnghal .

" ee...kha kha maw ? Nang lem ziak thiamah zawh che ka lo tum a "

" Engtin nge i neih ? A tak tak a ni em ?"

" Dr. Noel min pek a nih kha , Raza a tiin ka hria chupa exhibition-a a lei chu ania ,a ho tiraw khatiang te chu ka ziak thiam ve tho ang "

" i va han â tak , S H Raza India rama lemziak thiam lar lutuk anih chu a sawi bakah a exhibition ami maw a lei ? Hahh... Ka awih thei lo , he painting hlut zawng hi i hria em ?"

" Hre nang "

" hetia a thai kual vel mai mai pawh hi cheng singli man hu zet a nih hi i hria em ?"

" Enga !!"

Cheng Singli maw ? Chuvang a nih chu Dr. Noel'an a hlut hmel em em ka lo tih nachhan, engmah lah chu ka hriatpui ve der si lova ...urghh, hriat lohna hian min lo va ti â tak em .

Hetiang thil hlu lutuk te chu tar phal chi pawh a ni lo ,ka dahṭha daih ang.

" Hepa hian a duh takzet che a nih dawn hi ,in in karah eng chiah nge awm a? "

" ka hre bik lo "

Ni e ,keipawhin ka hre bik lo nichin lawk kha chuan inngaizawng ang chiahin kan awm a mahse pangngai takin kan inngaihzawn thu kan la sawi miah lo .Lalpa leh ! Kan la inkawp lo tihna em ni ? Urghh , ka zawt tawp thei bawk si lo kan awmdan hi a laklawh takzet .

" ti chiang vat rawh u "

" naktuk tuklehah Reiek ah kan kal dawn a i kawr ka ha dawn nia ...e taka nalh deuha lan ka ngai excer ka la nghal dawn "

" ka nu dil phawt rawh "

" ka dil daih tawh "

Ka room ah youtube a excer lak dan en pah chuan mawi tumin ka ti tarh tarh a ,a ni khatna a ni bawk a ka fit ṭha pap pap khawp mai .

1 day later

Ka lo in ngaihtuah lawk nasa tawh bawka Muani jeans kekawr leh croptop pink chu ka hak saka ,pawi ta ber chu ka nalh tum luatah excer ka lo la kher kher kha a ni .Ka sil lutuk hi pangngai tak pawhin ka kal thei lo .

" makeup kha in hnawih vak vak suh " Muani chuan min rawn hau a ,lan ṭhat loh ka hlau em a tin ni .

" vawiin nilengin ka daih angai "

" ngatinge tikhan i kal ṭuai ṭuai a ?" Muani lah hi min ti confi lo zo vek .

" ka sil lutuk , in rubber zuan na a hlah ang reng ka ni "

" chhul ṭha lo i ang lutuk ,tinge i sam te kha i phiar kir ve khanglanga "

" ka inhmeh lo em ni ?"

" hmeh lo ti ngil leh nghal rawh "

" aw ...Dr. Noel an min nghak tawh ,ka kal dawn " tih pahin ka sam tih ngil tum chuan ka kut in ka khuih thuak thuak a,a aia nasa in a puk tih reng ka hre lo.

" min lo nghak rei tawh em ?" Nui sang chungin ka ti a ,mahse car ah hmeichhe dang pathum a phur tel ve tih ka hmuh rual chuan ka nui tawp chiang hle .

" rawn chuang ve nghal rawh " Dr. Noel chuan alo ti vat a ,vawiin phei chu nidang ai zawngin a hmelṭha lehzual in ka hria.

Driver bulah hmeichhe dang an ṭhut tawh avangin a hnungah ka chuang ta ringawt a ,ka plan a flop chiang lutuk a ka nuih pawh a za tawh lo.

Chutah lah Dr. Noel bula hmeichhe ṭhu lah hi Mizoram-ah pawh host leh announcer lar lutuk leh hmelṭha a ni lehnghal.

(Fakna hmet leh hram hram ang u aw )