June 03, 2020
Chapter-16
“Time and time again I have to pinch myself when I see you next to me. You are my dream come true.”
" Noel kan mikhual te hian biak an duh che, khawiah nge kal i tum?" Ka pa chuan ka chhuak tur chu min ko let a , a hmel atang hian min chhuang hle tih a hriat theih .
" ka hman lo ang ...tih tur ka nei " ka sana chu ka bih chhen a .
" Heng ho biak aia pawimawh dang a awm lo "
" a nih chuan nangman lo va be mai rawh, a lehpek ah ani mai " tih leh chhuah ka rual nghal .Ka pa hi HOD a ni tho a kei ai chuan a pawimawh a , sawi tur a hre zawk ang.
Conference a zawh meuh chuan dar 3 a ri dawn tawh , midang be kawi lovin rang takin ER lam ka pan nghal , Tete in min hawsan mawlh ka hlau .
ER ka luh chuan Tetei ṭhiannu Zuali ka hmu a rang takin ," Khawiah nge Tetei? " tiin ka zawt a .
" A awm kha ,UNathan nen miṭha pan an lei pawh a ni maithei "
Chupa phiangsen chu ,Tetei hi hnaih tawh lo turin ka hrilh chiang viau a ni lawm ni.
" ka lawm e " nui mah ila chhungril ah ka sa hle thung.
" Thil in ei tawh em?" Ka ti leh a.
Tetei chauh nilo a ṭhian dangte pawh ka care tel vek , intih thiamloh nikhua in ka lamah an ṭang vek bawk,heng thil hi ka hriat lawk vang a ni.
" aw ei tawh, lo nghak deuh la an rawn let vat ang ....kan call hrim hrim ange"
An rawn let leh hun ngakin duty room ah chuan ka vei tawn sek ,minute 3 a liam tawh a engvang phiangsen a rawn la let lo nge an nih? Tazet hian !
" Sir , ilo kal leh elaw ?" Intern pakhat hian ka kut chu a rawn vuan ve ringawt , rang takin ka kut ka la sawn nghal , hmeichhe dang khawih hi ka ngaithei vak lo .
" Sir , i awmloh aṭang khan a nuam lo zo vek , ER a duty ho pawh an indaih lo thei lutuk Doctor ho lah an thatchhe bawk sia engkim Intern kutah an dah veka ,a chang phei chuan a hrehawm zawk "
He intern hi tunge a nih pawh hre lo mah ila pangngai takin ka lo dawngsawng mahse ka duh aiin a ṭawng rei.
Min khawih leh hma in ka kekawr ipte ah ka kut ka zen lut hmak , " ṭha deuhin i inzir dawn nia " ka ti sup a ,ka chhuak nghal .
Tetei leh Nathan te chu dawrah an kal dun ngei a , an in be lai ka hmuh ringawt pawh hian ka thin a rim. Tetei ka rin loh vang nilo in Nathan hian Tetei lakah ṭhian chauh nilo rilru dang a put vang a ni .
" Tete "
Hla deuh tak aṭang hian ka ko a ,min rawn hmuh chuan min rawn nuih nghal sang, rang takin min rawn pan nghal vat bawk.
" In zo tawh em ni ? I ti ṭha em?"
" Hi! Noel " Nathan ṭawng chu hre lo ang hmakin ka awm .
" umm...ṭha a ni mai, ka rawn hruai dawn che a "
" a ni maw ? Vawiin chu kan haw dun theih pawh ka lo ring lo asin "
" Dar 3 a pel tawh ,kal ang "
Nathan chu ka melh khai a ,ka hmeichhia alo hnaih avang hian ka lungawi lo tih hi hre rawh se .
" ka bag ka va la lawk ang , UNathan ka lo va kal hmasa ange " tiin phur takin ER lamah a tlan phei nghal hlawk hlawk a .
Tetei kal hlan in Nathan nen chuan kan in hmachhawn ran a , zalen takin hetiang hian ka awm tir mai mai tawh dawn lo .
" Noel , hlauthawng suh i bialnu hi ka chhuhsak dawn lo che ... I mit ka ti kham viau em ni ?"
" aw , a hnaih ah awm tawh lo la i ti kham lo a ni mai "
" hahh...hauh viau teh suh , engpawh sawi la a kiangah ka awm reng dawn "
" Hmela "
" a rilru i tih nat sak anih vaih chuan hetiang hian ka ngawi mai mai tawh lovang , hre reng rawh ka chhuhsak nghal ang che " a tih chuan ka khi suk a, a la harhchhuak meuh lo a nih hi .
" chutiang chu a thleng dawn lo "
Tetei hian kei chauh hi min duh , kei lo hi mipa dang a duh ngai bawk hek lovang .
Car-ah ngawi rengin Tetei chu ka lo nghak a , ka ngaihtuah chian pauh he hmeichhia ka duh zia hi ka in hrechhuak leh ṭhin .Tetei ka tawn hnu hian hmeichhe dang chu ka phek en veka tumah hi hmelṭha tih emaw ka mit la hi an awm tawh ngai lo.
" ka period dawn aniang thil ka ei chak huam huam mai "
Kuhva ṭhial nuau nuau chung hian a rawn lut a , henu hi ka hmangaih chu a ni sia ka awih thei lo .
" ka rei em?"
" ai "
" mmm...i thinrim em ni ?"
Hmeichhia ho hi an lo fing takzet a nih hi , feeling detector an ni ringawt .
"Kuhva khatiang khan ṭhial tawh lo turin ka ti che a ni lawm ni " a kuhva ei hi ka thimrimna chhan tak a ni lo .
" ka kamsir a sen leh tawh em ni?" Ka lo bu nghauh a ,lehlam ka hawi leh daih .
" hey !! Thinrimna dang i nei tih ka hria ania sawi vat teh " a kiu chuan min rawn nghawk zeuh a.
" mawh! Sawi rawh , eng nge i duh?"
Tunah hian duh pakhat chiah ka nei min kuah se nilo min fawp bawk sela.
" ka thin a rim lo " ka ti hmuk, ka thikthu chhiatzia hi lantir reng ka tum lo .
" i sawi duh loh chuan ka chhuak dawn ania "
Min blackmail a tum a ni maw?
" ka thinrim lo ka tih chu"
" one , two , two and half " ka la ngawi ngal reng.
" Three " kawngka a hawng ri rak .
Bialnu rilru lian deuh chan phal si loh neih hi chu a buaithlak a nih hi .
Rang takin a chhuak tur chu a banah ka man bet a ,"anih chuan sawi rawh " ṭhut ṭhat pahin min zawt leh ngat .
" Nathan hnaiah awm tawh suh " ka ti sap a.
Hriat loh karin bialnu te thu bawkin ka lo awm leh zul zul ṭhin.
" kha kha nimai lawm "
" lo kal teh " tih pahin ka mal chunga ṭhu turin ka pawt phei a ,ani pawhin a hnial lo.
Ka mal chungah chuan rem lo zet hian a rawn ṭhu a ,ka nghawngah a kut pahnih in a suih rial a .
" thinrim tawh suh , UNathan te kha chu ka duty pui ang bakin ka ngai hleinem bakah tunkar chiah intern ka ti tawh dawn tho a"
" ka ta i ni tawh a ,mipa dangin an hnaih che hi ka duh lo "
" aw le , ka hrethiam e " tih pahin ka hmuiah a rawn fawp vawng vawng a ,hetianga a awm tawh hi chuan thinrim rei hi a har ṭhin.
A period tur inṭham in KFC a ei chak thu a sawi avangin KFC ei turin ka kalpui a , a thil ei chak tawh hi chu a pe na thei bawka eitir ngei zel hi ka tum .
" vawiin nilengin ka ngaihtuah char char a ka chil te a put thei nia mawle , thil dang ka ei pawhin KFC tho ka ei leh chak zel "
Ei pah chuan a titi siam siam reng a ,ngawi rengin hmuhnawm ti takin ka lo thlir thung .Midang chu nise ṭawng hnem ka ti leh tawh ang .
" ka pu hei i order min pack tir kha " waitress pakhat chuan dawhkanah ka thil order chu a rawn dah a ,zanah a ei chak thut takin tiin ka order belh sak a ni.
" ehee...ngatinge zozai nge ?"
" i ei chak ani lawm ni "
" mahse a tam e "
" i chhungte nen in ei dawn nia "
" angai lo asin , a lehpek ah chuan ti tawh miah suh "
Ka thil tih sak apiang hi a la duh ngai lova ,ka lungawi lo leh dawn tih a hriat vang pawh a ni mahna tun ṭum erawh min hnial lo .
Phur taka Tetei a titi mawlh mawlh lai chuan Carine a rawn lang thut a ,a ngawi nghal hmak .A thik hle tih ka hriat avangin eng nge maw ka tih angai .
"Nangni pahnih chu "
Carine chuan ka dar ah a rawn vuan kher a,rang takin ka paithla nghal .
Ka ṭawng hma in Tetei chuan ," a mak viau em ni ?" Tiin min lo chhan khalh , a rukin ka khi nghak suk .
A tawpa tawpah a chhang let ve ta alawm , hetiang daih tawh tur hi a ni.
" mak chuang love , zaninah FSW (Female Surgical Ward) ah kan night dun dawn sia ka ti deuh mawle "
Tetei chuan mak tih hmel zet hian min rawn en a ,kan duty dun dawn tih hi ka la hrilh lo tak ...hreptak chuan .
"In duty dun dawn a ni mai alawm thil liantham vak a nih loh chu" ngeiawm zeta nuih pahin Carine chu a chhanglet leh a, Tetei hi hetiang hian a huai ang tih ka ring pha lo .
" nia ...Noel zanah kan inhmu dawn nia " Carine chuan min rawn bye bye a , Tetei lahin min melhrum bawk .
" ka ei pawh a tui tawh nek love ,kal ang " tih pahin a tho thut a ,inhnuai lamah a chhuk daih !!
A bag la lova a chhuk daih avangin a bag leh a hawn tur chu ka khai sawk sawk a ,ka umzui nghal .
Pawnah tum bur hian min lo nghak a ,ka thlem lungawi thei dawn em ka hrelo mahse a thil tih dan avang khan ka nuih a za hle thung .
" In night dun dawn tak tak em ni ?"
" aw "
" Ngatinge min hrilh loh ?"
Tunah tak hi chuan ka nu ai pawhin a hlauhawm zawk , Detective in thu min zawt fiah te pawh a ang .
" Diktak chuan hrilh che ka tum lo "
Nia,Carine chanchin hi hrilh nachhan tur ka nei lo .
" maw?" A hma aiin a sa zawk .
" kan inkarah engmah a awm miau hleinem "
" mahse ka hriat a ngai alawm "
" Tete , engvangin nge hmeichhe dang chanchin chu ka hrilh ang che ,pawimawhna an nei hleinem "
A inngaihtuah vung vung a , kan inkarah hian midang lo inrawlh ve hi a duh bik lo tih ka hria .
" anih chuan i be lo ang tih min tiam rawh " a rawn ti sap a , min intiam tir lo mahse he thil hi chu ka ti sa tawh.
" ka tiam a che ṭul lo ah chuan hmeichhe dang ka be lovang "
Ngawi rengin ka kut chu a rawn vuan a ,ka zungbun khawih niap niap pah hian," tihbuai an tum che chuan i zungbun hi hmuh zel ang che "
" umm"
Tum bar chung hian a bag chu min rawn chhuhsak a ,nuih vur vur pahin a chalah ka fawh sak zeuh thung.
★ 8 : 15 am ★
Nizan zankhua in hna thil ah lo chuan Carine chu ka pehhel ngat ngat a ,ka nurse duty pui ber han pehhel tlat mai chu a buaithlak khawp mai .
Tetei thawh hun awm ang zing dar 7: 30 velah ka call a mahse nizanah a mumangah ka lo rinawm loh san avangin ka lakah a lungawi lovin tun thlengin min la be ṭha duh lo.
A ngaihna pawh ka hrelo , ka lakah a lungawi lo miau bawk si . Hmeichhe rilru hi ka hrethiam thei ngai dawn lo a nih hi .
" Doctor , nupui i nei tawh em ni ?"
Ka patient pakhat kum 62 mi chuan min zawt a , hetiang zawhna hi ka dawng leh nawlh ṭhin .
" ka nei vat ang "
" Eee...chunu chu ava vannei dawn teh e , nizana i chet dan vel kha ka lo hmu a i fakawm takzet, i hah viau ang "
Nizanah a bul chiaha damlo hi chhul cancer avangin kan chhan hman lova , ani kha Heart bypass surgery ka lo tih sak tawh nge nge amaherawhchu ka zai khan cancer a ni tih ka hmuchhuak a, thla 2 pawh a dam hman lo.
" ni e, a pawi tak tak ani .Ka pi vawiin ah ka discharge dawn che a , in lamah in lo in enkawl thei tawh "
" ka va lawm ve , hei min zai avang khan ka dam hmak tawh asin . Nanghi ka chang fuh lo ang che tih kha ka hlau khawpa, doctor ṭha hi chan fuh te hi a har khawp mai"
" ka lawm e , karleh ah ṭhui phelh zawhah i rawn kal leh dawn nia ka lo en dik leh ang che "
Damlo chhan hman loh tamtak awm ṭhin mahse dam tamtak te avang hian ka inhnem a , ka rilru pawh a ti zang huai.
Ward ka fan zawh meuh chuan dar 8: 40 alo ri va tawh. Haw tura ka inpuahchah lai chuan Carine a rawn lut a ,Doctor dang an awm lo hlauh .
" Noel , hetiang hian min pehhel reng thei lovang '
Pehhel reng hi ka peih bik lo , ka thu tiam ka hlen mai a ni. Duh chuan Tetei hnena ka thutiam kha a rukin ka bawhpelh thei mahse khatiang thil kha ka ngaihdan a ni ve lo .
" hetiang hian awm tawh suh , engtik ah mah ka kalsan dawn lo che ka tih tawh kha "
" Carine , ka rawn let dawn lo chuvang chuan min nghak tawh suh "
" nilo .... Awlsam takin kha nu hnenah khan ka pe dawn reng reng lo che "
" khanu khan awlsam takin min nei tawh " tih pahin ka zungbun chu ka hmuh a ," a ta ka ni tawh , hna thil ah bak inbe tawh lovang"
Ka bag ka ak a ka chhuahsan hmak , min au lawm lawm mahse ka hawi let lo. Hmeichhe ṭap lai hmuh hi hrehawm ka ti mahse ka hmeichhe hmangaih ṭap lai hmuh hi hrehawm ka ti zawk.
Tetei tih lungawi phawt tumin haw ta mai lo chuan damdawiin bula pangpar zawrhna ah Lily var pathum lek hi ka siam tir a ,coffee nen alo thlen hun chu ka nghak phawt.
He thil ka tih nachhan hi ka hre tawh bik lo , a mumanga ka rinawm loh san avang khan thiamlohna ka nei em ni ?
Engkim mai hian awmzia a nei lo ,henu hian ka thluak a ti buai zo vek dawn .
★Tetei's Pov★
Nizanah ka pa pum a nawm theih loh avangin ka mu tlem takzet , Casualty a kal rum rum ai chuan OPD a inentir chu an ti thlu ta zawka , engkim a ṭhat ngei ka beisei .
Ka pa damloh chu sawi loh Carine avangin ngaihtuahna ṭha lo pui pui ka nei a ,zankhua a an duty dun tur chu ka ngaingam thlawt lo .Ka ngaihtuah nasa lutuk a ka lo mangphan lehnghal ,zing ka tho chu Noel hi ka haw hlur tawh mai.
Nidang ang bawkin Pharmacy department aṭangin ka hel leh a , tlai deuh hi chuan duty room ah lut tlang nghal daih ila a fuh ber.
Step-ah phur lo zet chunga ka chhuk thlak chhat chhat lai chuan tum loh deuhin Dr. Noel ka hmu thut a ka phu nasa khawp mai.
" Morning " min lo nuih sang mahse a chau tih a hmelah a hriat .
" ka be peih lo che ania " ka tum khum bur a .
" ka tihpalh ,i mumangah pawh ka rinawm lohsan tawh lo ang che "
Fiamthu deuh hian a rawn ti a ,pangpar leh coffee hi a rawn lek kang va va bawk .
" Ehhe...avan nalh em em "
Huizz! Lily var hi chu ka pehhel thei thlawt lo .
" ka lawm e , ngatinge i haw tlang mai loh?"
" i thinrim laiin engtin nge thlamuang takin ka haw daih theih ang ?"
Heihi chu Dr. Noel zia ve hrim hrim aniang , ka thinrim khum tawh chuan lungawi lovin min mut tir ngai lo , engkim kan sawi ṭha vek phawt a chutah chauh chuan lungawi takin thil dang min tih tir chauh thin .Naktuk ah emaw nakinah emaw kan sawi fel dawn nia tih te chu khawilam .
" haw vat vat la mu hahdam rawh "
" min..." A tih hman chauh tihin a hmuiah ka han fawp zeuh a ,tun ṭum chu hrilh chawp ka ngai lo .
" vawikhat leh "
" Hey ! Kal rawh midangin min rawn hmu ang " tih pahin duty room ah ka luhsan daih a , ka hlim lutuk hi kawngka phenah ka ke ka per vak vak ringawt .
Chhun thil ka ei zo chiah tihin ka nu in min rawn call a ,ka pa mît ah lungte a awm a an admit nghal thu te , tlaiah test an tih zawh hman chuan zaninah an zai nghal tur thu thlengin min rawn hrilh a. Engmah hrilh ve loh ai chuan tiin Dr. Noel chu ka hrilh ve a mahse darkar khat chhungin damdawiin a rawn thleng hman .
" Ngatinge i rawn kal duh , mu hahchawl ta che "
" darkar 4 ka mu tawh a ka chau tawh hleinem " a ti ve tlat , a hmanhmawh bawk aniang pajama nen flip flop nen a rawn kal a mahse a hma aiin a chhelo zawk .
"Anih chuan haw leh vat rawh aw " nizanah a night tawh sia ,ka inthlahrung takzet .
" ai .... Ka evening dawn "
" Engmaw i sawi a?"
" Dr. Varun nen kan in duty thleng dawn "
Enga !! Hetiang te chuan a chau lutuk anga sin , ka pa vang chauhin alo in duty thleng pui vela ka awm a ti nuamlo zo vek .Mahse a duty dawn chuan ka pa pawh a zai theih ka ring.
" nangmah pawh inngaihtuah ve ta che , mawl lutuk" ka tih ngaihna hre lo chuan ka hau hrep a ,a nui duh lek chauh .
" kha i rilru a hah a nih kha , ER ah lo va duty mai mai rawh test tur ho kha chu keiman ka lo buaipui vek ang "
" ni e , keipawh class ka bunk ta sa sa ka hman mah mah zawk " Muani chuan alo ti ve bawk.
" nge i rawn bunk ve ringawt , ka pa in na a ti tawh sia zanin a zai nghal theih turin zawh hman tum rawh aw " Muani chu ka hrilh niap niap a ,paukhauh ang takin lang mahse kei aiin a hlauthawng zawk .
" umm.... Ka nu lo han call zeuh zeuh ang che ,a hlauthawng ropui si "
Dr. Noel an a tihpui bawka doctor a nih bakah heta thawk alo ni bawk nen test tur ho pawh an ti zo nghal duak duak a , ka pa pawh an zai vat anga na a tuar rei tawh lovang .
ER kawtah Muani leh Dr. Noel te rawn let leh hun nghaka ka ṭhut lai chuan Noel chauh chu a rawn kal a .
" Khawiah nge Muani ?"
"I nu te bulah a kal , i pa pawh a zai theih vat ka ring "
" ka lawm e , awmlo la chuan kan buai ngawt ang "
" Hetiang hian awm suh , makpa in a tih tur ka ti mai chauh a nih hi " a tih chuan kan han nui leh rih a .
ER kawtah chuan car var hi a rawn ding a ,damlo an rawn zawn chhuah rualin Carine pawh a rawn lang nghal .
" Noel " Carine chuan mangan hmel tak hian a rawn ko a.
" ngatinge Nu Muanpuii chu? " tiin Noel pawh chuan damlo chu a lo buaipui nghal vat .
Noel an damlo a hriat chuan mak ka tiin ka lo mengphawk ve em em ringawt .Thil thlen dan hi ka hrethiam lo takzet .
" ka ...ka nu hian BP sang a nei a ,a stroke a nih ka ring "
Damlo hi Carine nu maw ni a !!
" Tete , ka rawn let leh vat ang " Noel chuan a ti sap a .
ER ah an zawn lut nghal vata , Dr. Noel pawhin a zui lut ve nghal kei erawh pawnah ka lo ding khawng reng thung .
Reife an buaipui hnu chuan Doctor panga vel chu an in rawn khawm nak nak hlawm a , Medical Superintendent nupui a ni bawka Doctor rual ho pawh an rawn thleng rang khawp mai .
" Are you Tetei ?" Vai pakhat hian min rawn bia a, Noel erawh ala buai em avangin ka ko buai duh lo .
" Aw ...eng nge ni ta ?"
" I pa doctor Dr. Deepak ka nia , pawi ka ti lutuk mahse inzai kha naktuk ah kan sawn mai angaih hmel "
" mahse engvangin maw ?" ka rilru a buai bawk nen rilru fim pawh ka pu hleithei lo .
" I hmuh angin patient thar saw zaninah zai vat angai dawn a , i pa chu naktuk ah kan zai ang "
Engmaw !! VIP a nih vang maiin ka pa inzai hun tur chu an sawn bik ang maw !! Ka pa pawhin na a tuar ve tho alawm .
" I don't accept , zaninah ka pa chu an zai ngei tur a ni " ka ti ve tlat , fair taka tih ka duh.
Noel chu a hman veleh a rawn kal a , rang takin " ka pa zai turin an ti hmasa zawk sia he vaipa hian zai hun tur a rawn sawn ve ringawt ania " ka lo ti vat a .
" Sir , please make the decision ....ka hrilhfiah thei lo " Chu vaipa zit zet chu , amah hi diklo zawk a ni reng sia .
Dr. Noel thutlukna chiah kan nghak tawh, ka pa zai hmasa turin a ti ngei bawk ang .
" Tete , i pa chu mît a lungte awm ania naktuk thleng stable takin ala awm thei mahse Nu Muanpuii erawh Aortic dissection (lung a thisenzam chat ) ania zai vat anih loh chuan zanin pawh a daih tawh lo maithei "
" Eng nge awmzia ?"
" Zaninah Nu Muanpuii saw keiman ka zai ang, naktuk ah i pa chu Dr. Deepak hian a zai ve thung ang "
" Maw !! Mahse ka pa a kal hmasa zawk daih sia , Nu Muanpuii chu a rawn thleng chiah a ni lawm ni "
" Tete...hriatthiam tum teh " min rawn khawih a tum chuan rang takin a kut ka paihthla nghal sawk a ," min rawn hnaih suh ka hua che " tih pahin EW lamah ka tlan phei nghal nal nal .
Ka thinrim lutuk chu ka mittui a tla nghal zung zung a , Dr. Noel chungah hian ka lungawi lo takzet .Ka pa dinhmun hi keimah aiin a hrechiang zawk daih a chutichung chuan Carine Nu ala thlang zawk cheu hi ka hrethiam thei lo .
" Tete ...pawi ka ti lutuk " hnung lam aṭangin min rawn kuah vawng vawng a .
" i thutlukna thlak leh rawh " ka tih chuan a lam hawi turin min kuai her a ,"ka chungah thinrim rawh mahse ka rilru erawh ka thlak thei lo " a ti zui sap bawk .
" VIP a nih vang a ni lawm ni ?"
" Nilo , a dinhmun a derthawn vang zawk ani. Zanin ah ka zai lo anih chuan a thi ang " ka hre fiah nghal kuarh kuarh mai ,mahse ka la lungawi thei chuang lo .
" Ka pa pawh nangman i zai thei mai lo em ni ,kha vaipa kha zaitir lo khan "
" mi patient ka chhuhsak ngawt thei hleinem , min ring rawh kha vaipa khan a zai hlawhtling em em ang "
Ni e , Dr. Noel hi cardiac specialist ania .Nu Muanpuii lung zai tur hian amah aia ṭha an awm chuang lo chuan a sawi ang hian ka pa dinhmun hi hlauhthawn awm nise zai hun hi a sawn hauh lo ang tih ka hria .
" anih chuan zai hlawhtling ngei ngei ang che " ka mittui chu a parawl kuang a , ka hnuk a ulh zel lehnghal .
" Tehreng mai , hei vang hi lawm ka duh em em che " min kuah vawng vawng a , ka rin aiin ka lo puitling tawh .Keimah leh keimah pawh hi ka inchhuang takzet hetiang rilru ka pu thei hi .
" kal tawh rawh , an lo mamawh tawh ang che "
" ka zai hma in min ṭawngṭai sak leh phawt dawn lo em ni? " a tih chuan ka nui hak a , ka lo theihnghilh hman alawm .
Ka ṭawngṭai sak zawh chuan duhthawh takin min fawp leh vawng vawng phawt a .
" i pa bulah lo han awm la , ka zai zawh veleh ka rawn lam ang che " a tih chuan ka bu nghat a ,nui vur vur chungin a kal liam a .
(In comment te hi ka lo chhiar ṭhin a ka lo hlimpui thei lutuk ania chuan selna pawh a leng vek aw , duhkhawp loh lai chu sawi hreh lo ang u ka haw dawn miah lo ania insiamṭhat nan ka lo hmang zel ang . Fakna hi hmet uar hram hram ang u aw Xoxo)
0 COMMENT:
Post a Comment