I Love you 3000-17 by Remruati Bawitlung (Haylor)

Chapter-17

“I saw that you were perfect, and so I loved you. Then I saw that you were not perfect and I loved you even more.” – Angelita Lim

ER-a ka let leh chuan a kal daih tawh emaw ka tih laiin ka kutah a rawn vuan thut a , midang emaw ka lo ti hman lehpek tawh a kut chu ka lo thing sawk a ,a hma aia nghet in min kai leh nghal.

" I kal dawn lo em ni ?" Ka lo ti hu a , duty ho lah chuan min kaih avang hian min en duh em em lehnghal.

" I chhungte chu keimah ngeiin ka hrilh ang "

" mahse a hmanhmawh thlak viau sia" ka tih chuan a sana chu a zuk bih zeuh a .

" Darkar hnih chhungin surgeon dang ho nen a natna hi kan zir chiang phawt anga , dar6 ah chuan kan zai hman ka ring "

A hmanhmawh thlak tawh bawka inpuahchahna hun an nei tlem takzet, mahse Noel hi ka ring tawk a a zai hlawhtlin hi ka ring tlat .

Dr. Noel ngeiin ka nu leh pa te chu thil thlen dan leh inzai an sawn dan chungchang te chu a hrilh vek a , an lo hrethiam hle nghe nghe mahse Muani erawh in a hrethiam thei tlat lo .

" Noel chu keimah ngeiin ka be dawn , hetiang ringawt hi chu a ni thei lo " Muani thinrim chu thlem ka tum ngial pawhin a ṭan ngaiin a ṭang tlat .

" Muan... Awmzia a awm lovang , damlo chu a kal hmasa zawk nilovin a hmanhmawhthlak dan a zirin alawm an zai ṭhin "

Engkim thil kalphung ka hriat ve vek avang hian ka pa hian na ti tawh hle mahse ka thinrim ve thei tlat lo. Thutlukna siam harsa tak a ni ang tih pawh ka hria,Dr. Noel hian a tih tur diktak a ti a ni , Carine hi ka thik hle tih pawh a hria mahse a mimal nun dahṭha in doctor a nih angin damlo nunna a dah pawimawh hmasak zawk avang hian a hna a tlin hle tih a hriat , ka chhuang hle bawk.

"Zomuansang , ka pa in na a tawrh mek hi i hmu ve lo em ni ?"

Zomuanpuii mai mai chuh!! A û zawk ka ni tih hi a theihnghilh leh tawh a nih hi .

" hmu e , engkim ka hmuh vang alawm ka hriatthiam nachhan .Ka pa hi naktuk thleng pawhin la zai lo mahse hlauhthawn tur a awmlo amaherawhchu Pi Muanpuii erawh in naktuk a nghak thei tawh lo thung, chutichung chuan Noel hi ila thiamlo cheu ang maw?"

Ka tih hrep takah chuan a hrethiam ve ta niin a lang , Muani hi mi rilru chhia a ni bik lova midang thih tir mai chu a phal dawn bik lo tih pawh ka hria .

" Ka pa dinhmun hi a hlauhthawn awm loh tak tak tih i chiang em ?"

"Hlauhthawn awm nise chuan Dr. Noel hian hetiang thutlukna hi a siam hauh lovang "

Ka confi ve tawk , Noel hian ka pa chungah engthil mah a thlen a phal hauh lovang.

Naktuk ah ka duty dawn avangin Noel ka hrilh hnuah ka nu nen kan lo zuk haw hmasa a ,Muani erawh haw tura kan hrilh ngial pawhin a haw ve duh lova ka pa a riahpui dawn thung.

Dr. Noel an a zai zawh tawh thu leh an zai hlawhtlin thu min rawn hrilh chuan dar11 a lo ri dawn der tawh , a hautak bawk aniang darkar 5 lai an zai.

Ka pa an zai lai chuan kan chhungte bakah Dr. Noel pawh a awm ve a ,kei erawh duty ka ngaih avangin ER lamah min tir thla daih thung. Muan'in a khat tawkin chanchin min rawn hrilh ve reng a , thlamuang takin ka duty theih phah .

Vawiin chu Dr. Jennifer a duty lehnghal a min vin reng mai chutah nizanah Dr. Noel an min kai lai kha lo hmu an awm nual lehnghal a, an inhrilh pung chak bawk nen min en hrek hrek loh leh min zawt nawlh nawlh lah an bang lo.

Ka period avangin toilet-ah ka pad ka thlak a ,ka tai a na ut ut lehnghal a dawhthei taka awm reng hi ka kham tawh takzet .

" Enteh Tetei leh Dr. Noel te an inngaizawng mawle " toilet chhung aṭangin kan chanchin an sawi ri ka hriat rual chuan ka beng ka dawh nghal hru a.

" Intern kha maw ? Awi , Dr. Noel hi a phu hlawl lo a hmelchhe ropui si "

Pakhat zawkin a ti ri ka hriat chuan kawngkhar hi tlawh hawng pawp a va keh nghal pawp pawp mai ka duh.

" Dikchiah an inhmeh hlawl lo , han ni rei deuh se Dr. Noel hi ala inchhir khawp ang "

" Hmeli te mai mai chu !"

Inhum ruh chungin ka phun sap sap a , an kal ta maw tih in thinrim tawkin kawngka chu ka hawng bur a ,"Noel Lalrinkim i chak dawn lo "tih pahin ka inseh ruh nghal .

Dr. Noel hi ka phu loh bikna ka hrelo ,Noel mitah chuan ka hmelṭha a ka chhelo bawk engpawh chu nise ka phu zia hi ka la hmuhtir khawp ang .

Ka pa an zai zawh chuan ER lamah Noel pawh a rawn tla thla rang khawp mai, midang ho min tih dan avang khan ka lungawi lo takzet mahse Dr. Noel chungah bak ṭuanna tur ka hrelo .

" I pa pawh ward ah an sawn tawh , i duty zawh veleh kan han kal dawn nia " a nui hmel te hi a ṭha bik sia keimah zawk hian nei daih ila.

" Keimah in ka kal mai ang " ka lo ti hmak , hrilh chawp ngai lovin ka lungawi lo tih a hre nghal.

" Hey ! Ngatinge i thinrim a? Tihsual ka nei leh tawh em ni ?"

Ka sam chu ka bengah min rawn xx ochar char alawm, ka phu ve chiang che emai " confi ve ngang ngang tak ka ni .

Ka thusawi avang chuan a khi nghal suk a ,tihngaihna a hriat loh hmel takzet .

" midang thil sawi mai mai ah buai duh tawh suh , i tai chu ala na em?"

" umm..."

" lo dam vat vat rawh se "Tih pahin ka tai chu a rawn chul heuh heuh a ,ka thinrim viau pawh hian a tum vang pawh ni hauh lovin min bengdai hma ṭhin khawp mai.

" ei chak i nei em?"

" ai ...tunah chuan mut ka chak "

Ka thi neih avanga ka tai a nat tawh hi chuan ka thinchhia in ei chak hi ka nei huam huam ṭhin a , ka vin vak vak pawh hian dawhthei takin min hmachhawn thei zel.

"Nangpawh haw la va mu hahdam rawh i chau lutuk ang " a sam chu ka tuai saka ,khawih hrim hrim hi a huat theih tehlul nen ka khawih ve hi chuan hua ang pawhin a awm ve ngai lo .

" nakinah "

" nakinah ti suh , chuti lo chu...."

" aw le Boss "nuih vur vur pahin ka kawr chhanah zawi te hian ka hnute chu a rawn seh zeuh a .

" Hey ! Ka hnute a na ania , a ṭang vek "

" anih chuan i period zawh hun ka nghah leh angai dawn a nih chu " tih pahin a thaw hak a .

Ka pa chu ka nu in a riahpui a ,Muani nen inah kan awm ve thung.

Ka tai na chu khumah ka let ka let a ka khua te hi a sik hialin ka hria chutah ice-cream ka ei chak huam huam a ei tur lah awm bawk si lo, engkim mai hian ka thin a ti rim vel vek .

Damdawi ka ei ta ringawt a ,min chhawk ṭan chiah tihin Noel an min rawn call hlauh , zan a rei tawh sia engvanga min rawn call thut nge maw a nih le ?

" Hello "

" Pawnah ka awm kawngka min rawn hawn rawh "

Ka ṭhu chhuak nghal zawk !! Tun ang hunah engthil nge rawn tih a tum ?

" maw !! I awm tak tak em ni? " ka tih chuan kawngka chu zawi te hian a rawn kik kerh kerh a ,rang lutuk in ka inperh tho nghal .

" I mawl mi ? Dar 11 a rik dawn tawh hi " tih pahin kawngka ka hawng nghal a , min rawn la nuih vur vur zui .

" Rawn lut rawh , ka nu leh pate chu awmse an ngai diklo vek ang che "

" an awmlai te chuan ka rawn kal dawn hleinem , kha ..." Tih pahin a thil ken lai chu min rawn pe a.

" Eng nge?"

Mak ti takin ka keu rawk rawk a ,ice-cream lo ni rengin ka hmuh zawng ringawt pawh hian ka chil a put .

"Ngatinge i rawn ken duh khera ?"

"I ei chak thu kha i sawi sia , Muani a mu tawh em ni ?"

" Umm...mahse ngatinge i rawn kal , ice- cream vang chauh chu a ni lo tih ka hria ania "a inngaihtuah nghal vung vung a ,a rilru a buai hle a ni tih hai theih a ni lo .

"Superintendent in Project liantham deuh min pe a "

" Eng Project ?"

" Mizoram ah a vawikhatna ni turin heart transplant nei turin " ka thil ei lai ka phuh chhuak hman ṭep , chutiang ang project liantham lutuk chu an pe amaw?

" anih chuan engtin nge i tih dawn ?"

Sawi hnawn sak zung zung ka duh loh avangin a ngaihdan ka ngaichang hmasa phawt a mahse he thil hi ti lo turin ka duh takzet.

" Team ka thlan fuh angai, Mi thiltithei tak fanu a nih avangin Kolkata aṭangin Cardiologist an chah a , donor an awm sa bawk nen engmah thil harsa a awm lo mahse a taksa a chak lovin nau a pai a, ka zai hlawhtling angem ka chiang lo "

Zai chu a tum tak tak emawni le ? A hlawhtling dawn tih a hriat chian loh te chuan hnawl mai tur ania.

" Hun engzat nge in neih ?"

" A rei berah thla 1 , Tete ....ka zai hlawhtlin i ring em ?"

He zawhna tehhrep chu chhan ava harsa tehlul em , tih hnual ka duh bawk si lo chhan loh law law ka duh rum rum .

" I tum chuan i hlawhtlin ka ring " ip chawi chawi chungin ka sawi chhuak thei hram ,amah pawh a thaw hawk in ka hria .

" chu chu lawm ka hriat duh chu, a hlawhtlin i rin chuan ka ti hlawhtling em em ang "

Ka biangah a rawn piai zeuh a , thil ka ei mawlh mawlh lai chuan ka hmuiah a rawn fawp thut a ,ka khawng nghal vek.

" Ice- cream chu a tui loh lem lo hi " a ti zui sup ringawt.

Dr. Noel bula ka awm apiang hian inngaizawng hlim ang mai hian ka thin hi a phu nghal dup dup zel a , min khawih apiang hian ka mur nghal sung sung ṭhin, ngaiah ka nei thei dawn lo chu a nih hi.

Ni hnih hnuah ka pa pawh damdawiin aṭangin a chhuak a , kan rin aiin a dam chakin a harh vang daih .Tunah phei chuan leng lo turin kan dan angai tawh zawk .

Vawiin hi internship ka zawhna tur a ni tawh bawka midangin eng ang pawhin min sawi mahse ka tuar hram hram tur a ni tih chu ka infuihna ber a ni .

Damlo an tam lo bawka kil khatah ka phone bih ngur ngur chung hian ka ṭhu ran a ,UNathan duty ni a ni bawk si lova biak tur pawh ka nei lo.

" Tete"

Ka hawi chhuah nak chuan Joysie leh a ṭhiante ho hi an lo nia , ka lo nuih nghal sang bawk .

" Eng nge in rawn tih ?" Tiin ka lo zawt vat a .

" Hei kan ṭhiannu hi kan dressing tir a ,i awm ka ringa kan rawn tlawh kawi lawk che "

" lo ṭhu rawh u , damlo an awm lova ka lo ṭhu vel mai mai a nih hi "

" ṭhu hman pawh kan ni lo , ka zun a chhuak lutuk a zun na tur a awm hnai mai angem ?" Joysie chu a in dawm deuh ṭai ṭai a ,a zun a chhuak ngang aniang.

" aw , min lo zui rawh " tih pahin duty room ah ka luhpui nghal a .

Noel leh Rinhlua te an in kawmngaih tluk zetin Joysie nen pawh hian kan in kawmngaih , a felin a nelawm em em a Rinhlua hian a thlang fuh chiang hle .

Duty room aṭanga ka let leh chuan Joysie ṭhiante ho min relna chu ka hre hman , engdang mah an sawi lo Noel ka phuloh thu bak .Heng ho hi ka kham tawh takzet , tunge ka nih tih hi ka la hmuh khawp ang.

" Tete , kan kal nghal mai ang " Joysie hian a ṭhiante mizia hi a hre ve lo niin a lang .

" aw le " ka ti chuai raih a ,ka mood an ti chhe chiang hle .

" Taka naktuk kha aw " tih pahin an chhuak dial a , ka ner khum leh hram.

Naktuk hi Joysie birthday ani tawh tih ka lo theihnghilh daih, Hotel Floria ah an lawm dawn a chutah chuan a ṭhiante pawh kha an kal ngei ang ,ka duai bik loh zia hi an la hmu khawp ang.

" Tete ...thil i ei tawh em?"

Noel û Dr. Op-a chuan min rawn zawt a ,kan duty dun apiang hian hetiang hian min zawt ve ziah a ka ngaih a ti ṭha lo.

" aw ...mahse thil pakhat , ngatinge min zawh ziah a ?"
Vawiin chauh ka awm tawh dawn bawka ,zawhna hun tak a ni .

" Noel an a ngaihtuah deuh che mawle , kha in ei ṭha rawh i cher tawh lutuk " a rawn nui ṭhaw a ,khuhva hi heh lo se chuan Noel ang tho in a luck ang.

"Tun laiah mi an thau duh tawh lo , cher pawh hi fashion a ni tawh " tiin ka lo fiam let a , Noel ang lo takin a ṭawng duh bawrh bawrh bawka a thawhpui te pawh hian an nel hle.

Dr. Noel hian min ngaihtuah leh lutuk a min in ti thlahrung zo vek .Dr. Mamawii hnenah lah ka chhun thil leina tur pawisa alo dah ringawt tawh bawk tunah pawh hian a û bulah a dah leh tih hriat reng reng. A hnen aṭangin ka la dawn lo tih a hria a hetiang zawng hian a ti tih ka hre nghal.

Ka nu hnenah Joysie birthday a kal ka dil chuan alo phal nghal chupawh Dr. Noel a tel dawn vang chauh in , ka nu hian Noel hi a ring khawpa khawi hmunah pawh kal dawn ila a tel tawh chuan a phal nghal zel .

A rin ang ngeiin Dr. Noel pawh hian him takin min thlah thlap thlap ṭhin a , nu leh paten fate tih a an hlauh ber sex lamah pawh kan fihlim khawp mai .

Joysie birthday party na a kal tur chuan ka inpeih leh diam tawh , insiam nan darkar 2 ngawt ka hmang a khang hmeichhia ho kha an phu chiang khawp ang .

Ka nau kawrfual khup chung hret off shoulder chu ka hak saka , pheikhawk sang nen ka in pack nasa hle chutah ka hnute tih leh nan pushup bra ngat ka ha a , ka nau mawng lenna ka ha tel bawk.

"Vawt i ti dawn lo em ni ?" Car a ka luh rual rual chuan Noel an min lo zawt nghal .

" ai, a lum em hi " ka ti ve tlat , ka dar hi a lan loh mawlh ka hlau.

" C'mon , thlasik a nih hi ...heng thil te hi eng nge ?" Tih pahin polythene seat hnung lama ka dah chu a kawk a .

" ka flat a nih kha ,pheikhawk sang ka bun peih loh huna bun ah " ka tih chuan mak min tih hmel takzet mahse engmah a sawi lem lo .

" kal tawh rawh.... kal tawh rawh, kan tlai dawn "

Ka nawr sek avang chuan a tlan chhuak ta nge nge a , chutah ka makeup a chhiat ka hlauh avangin a front glass chu inen nan ka hmang a Noel lahin ," I hmang zo tawh em? " a rawn ti ve chhen.

" Zo lo ,enga tan nge i hman dawn?" Ka lo ti vin hlar a .

" Hnung lama motor rawn tlan leh tlan loh en nan " tiin a phun sap ringawt.

" ngawi rawh , indo na a kal tur ka nih hi min lo tibuai suh " lipstick chu ka inhnawih belh leh a , nidang aiin ka fuh .

"Min lo en teh ,dik lo lai a awm em ?" Confi zet hian ka nuih sang a, min rawn thlek zeuh pah hian ," I hnute a sawi " tih ringawt a sawi a nih chu!!

" a ni maw !! Ka hnute aiin ka mawng lem hi a sawi duh zawk " ka phun sap a ,alo hre hman .

" Engmaw !!"

" Engmah a ni lo " ka hnute chu ka siamṭha nghal sawk sawk a , midang ai zawngin ka hnute a lian ber tur a ni ringawt .

" vawt i ti lo tak tak ang maw ?" A rawn ti leh ṭhin a , nalh duh chuan vawt tuar angai .

" ai ...teuh lo mai " ka nui vela ,"diklo lai ala awm em ?"

" ngatinge i inlak chhiat loh apiang hian i sam i tih kir zela?" A rawn ti chhuak hlawl ,tun ṭum chu phiar kir ni tawh lovin uluk taka roll kir a ni tawh.

" style thar a nih hi , korean ho pawhin an uar ber alawm "

" Korean leh bawk " a thaw hak a ,ka korean drama en nasa lutuk leh Park Jin Young ka atchilh lutuk hi chu a ning ve thei ngawt ang.

" I en ngai lova i hre lo mai mai a nih kha , Oppa " fiamthu pah deuh hian ka ti lui kher a ,min melh rum ngang mai hahthlak min tih hmel takzet .

" Park Jin Young ka ni lo ania " tih pahin a khi suk a , tunge a nih pawh a hre tawp si lova ka sawi ngun em avangin a hming alo chhinchhiah leh thlap tawh aniang.  

(Fakna hi hmet an tlem riau a ,hmet uar deuh ang u aw xoxo)