I Love you 3000 -15 by Remruati Bawitlung(Haylor)

Chapter-15

“When love is not madness it is not love.“
-Pedro Calderón de la Barca

*Five months later *

Vawiin hi Dr. Noel nena kan inngaihzawn aṭanga thla 5 na alo ni der tawh ,in tih thiam loh chang leh tih tauh khum chang nei ve ṭhin mah ila buaina liantham kan la tawh loh avang hian engkim mai hi a kal tluang put nimai hian ka hria , vawiin ni thleng hian kan inkar chungchang hi midang lakah ka la zep tlat a chhanchu midang in an hria an nih chuan kan inkarah buaina nasa tak a awm dawn tih ka hriat lawk vang a ni .

Inngaizawng dangte ang tho in Dr. Noel pawh a hman chang apiangin kan inah a rawn leng ṭhin a ,a rintlak bakah a puitling bawka ka nu phei chuan a ring in a duh loh thu engmah ala sawi lo .Ka nu hi mi ti huam huam chi a ni lova ,ṭawngka in sawi lo mahse min duhpui tih erawh a chezia aṭangin a hriat theih .

Thil hi a nih dan tur ang thlap in thleng ṭhin mahse hmeichhe dang thik erawh ka bansan thei lo chu a nih hi, ka thikthu chhiat luatah ka tihtauh khum fo bawk.

Doctor a nih bakah thawhpui hmeichhe chhelo tak tak a lo nei ve zel bawk nen mi a biak ṭhat deuh hlekin ka thik loh leh ngaihtuahna ṭha lo pui pui ka pu reng a, ka rin loh vang nilo in ka awmdan hi chu Dr. Noel anga mipa chhelo leh hmelṭha in kawp hunah in hrethiam ve mai ang .

Kitchen ah phone bih chungin ka kun ngur ngur lai chuan hnung lam aṭangin Dr. Noel chuan," ka ngai tawh lutuk che " tih pahin min rawn kuah thut a ka phu chiang teh e .

" Midang in min rawn hmu ange " phun sap pahin ka hawi kual nghal vat a ,vanneihthlak lutuk in midang an awm lo hlauh ,ka thaw nghal huai bawk .

" min hmuh ka hlauh vang alawm inchung aṭangin ka rawn hel " ka hmuiah a rawn fawp zeuh a ,ka lo nam sawn vat thung .

" OPD lamah in buai lo em ni? Min hrilh lawk lo chuan rawn kal tawh suh " 

" ka hmu chak che a chhuanlam ka rawn siam , Tete ...kan inkar hi zep kher a ṭul em ni ? " He thil hi min zawt ve ziah ,zep lo ila chu kan buai nasa tawh ngawt ang .

" intern ka zawh hun thleng chiah min nghak rawh ,ummm...." Ka tih chuan thuawi takin a bu nghauh a , min hmuh te hi a chak thei sia ,a ruka in hmuh ngai reng mai te hi a ning tih ka hria mahse min dawhthei takzet .

" Eng nge i lo en a ?" Ka phone chu a rawn thlek a .

" ahh.. Parda mawle , satin offwhite chu a awm maia mahse a ruka rang kher kher ka duh bawk sia ka zawng hmu zo lo " ka ner nang a , ka hmel a hmuh chuan min rawn nuih leh vur vur tawh .

" A thar in lei dawn em ni?" 

" dawn chuang love ,a nalh ka tia ka lo en vel mai mai ...cho tawh rawh midang an rawn kal ang" ka nam deuh ti tih tawh ,midang in min rawn hmu fuh a nih vaih chuan ka chhe vek a ni mai .

" aw le mahse ka kal hma in min fawp phawt rawh " a ti leh ta ! Hlauhthawn nak alaiin .

Ka fawh hma loh chu a kal duh leh dawn loh avangin hawi zak zak pah hian a hmuiah ka han fawp zeuh a, min rawn fawh let leh zeuh pah hian ," Happy 5th monthsary" a ti zui sup bawk .

Kan thla 1-na kha a theihnghilh avangin ka sa lutuk a ,khataṭang kha chuan theihnghilh chu sawi loh hmaichhanah ngei min wish zat zat tawh,hei tunah pawh min hmuh hman veleh a rawn kal leh vang vang tawh hi .

"I theihnghilh emaw ka ti hman alawm " 

"Kan pahnih a kan ni pawimawh ber i tih kha engtin nge ka theihnghilh theih ang ,tlaiah ka rawn lam ang che " 

" aw le " ka nui ve ta nge nge alawm .

Vawiin chu kan thla 5 na a nih angin chhuah dun kan tum ve a ,buai thei hle mahse hemi ni ah hi chuan hun a in siam hram hram ṭhin. 

Damlo pakhat chiu tur vein ka zawn lai chuan ka piaha mite titi chu a rukin ka lo ngaithla ve kur a ,a chhan pawh Dr. Noel chungchang an sawi vang a ni .

" Enteh Dr. Noel an bialnu a nei asin " 

" a ni maw? A bialnu chu tunge niang le ?" 

" ka hre bik lo ,Dr. Hmuak'in amah ngeiin a neih thu a sawi a ti mahse tunge a nih a sawi lo aniang" ka thaw nghal huai, ka hming a sawi lo chu a vanneih thlak takzet . 

" a hmeichhia zawk chu a nasa ngawt ang Dr. Noel te ang a neih theih chuan " an tih lai te chuan ka lo ip chawih chawih a ,ka thin a lo rim ru hle bawk .

" ni chiah , keichu hmeichhe nasa lutuk hi ka ngei tlat " 

Lalpa leh ! Ka ngaithlak chhunzawm thei tawh thlawt lo ,tunge a nih pawh an hriat hma hauh in ti khawp khan an rel nasa a nia ,tunge a nih hre ngat se chuan min rel phar thei ang .

He thil hi a thleng dawn tih ka hriat lawk vang alawm damdawiin ah hi chuan zep tlat ka duh nachhan.

Dar thum a rik hnai meuh chuan darthlalang ah ka in thlek deuh chhen tawh a ,a khat tawkin ka va in hnawih paw sek bawk chutah a lipstick min pek ngeimai kha ka hnawih tai vat bawka , a lawm leh ngawt ang chu.

" Tete ...vawiin chu i va tai leh tawh ve " Pu Thangpui'an min lo chhaih leh hmanhmawh tawh,chiang fakin hre lo mahse min ringhlel erawh tih ka hria ,mahse ka lungngai vak lo a sawi chhuak dawn chuang lo .

" awiawm loh e , catheter i vuah dawn em ni ?" A catheter ken lai ka hmuh chuan ka ti nghal zung zung a ,ka zahzel a ni zawk mah .

" Aw ...sawlai damlo saw vuah sak angai a " parda inzar hliah vekna chu a va melh zeuh a. 

" anih chuan ka lo vuah mai ang " 

" puih i ngai angem?" 

" ngai lovang a harsa hleinem " tih liam puat pahin a catheter ken lai chu ka laksak a ,Dr. Noel rawn thlen hma in ka vuah zo hman chiah chiah ka ring ,lo ṭhut mai mai ai chuan a ṭha zawk .

Parda ka keu chuan tlangval keimah ang rual vel hi a lo ni a ,min hmuh rual chuan a zak aniang alo in hup ṭat ṭat mai .Keipawh zak ve tho mah ila damlo zawk a zah avang chuan zak angin ka awm duh bik lo .

Inla confi zet hian ," i kekawr lo phelh rawh aw " ka ti ve tak na in ka zam ru hle ,a ni pawh huphurh tak chungin phelh pum chiah si lo hian a kekawr chu a pawtthla zal zal a.

Catheter hi mipa ah vuah tawh mai ila naupang vek an nih avangin puitling ah hi chuan ka zak ve deuh.

Glove bun mahila a mipatna ka vawn sak rual chuan a rawn mar ṭual ṭual tih ka hre thei ,a awmdan avang chuan kei chauh nilo ani pawhin hrehawm a tih hmel hle .

" a na lovang lo tuar ṭang ṭang rawh aw " hnem pahin catheter chu ka thunlut zal zal a .

Boruak tih ziaawm nan " 🎶 Awm lo ta la, ka hlimna a chuai anga " tia ka zai rat rat lai tak chuan Dr. Noel a rawn lut thut a nih chu !! 

Kan pahnih chuan phawk fe hian kan in melh nghal kawk a ,keilah in chupa mipatna chu ka la hum ran mai bawk si , thlah thut chi lah a ni tawh bawk si lo , phawk fe hian ka in melh reng ringawt .

Rang takin Dr. Noel chu a insiam ṭha nghal vat a ,pangngai takin ," i zo ṭep tawh em?" Tiin min zawt mahse a lungawi loh hmel hle thung. 

" Aw ...ughh, ka zo chiah " tih pahin saline chu ka kap lut sawk sawk a , kan awmdan kha sualna engmah chu awmlo mahse a nuam miah lo.

Car ah min lo nghah tawh avangin rang takin garage ah ka chho ve nghal a ,car-ah ka ṭhu lut chiah tih chuan thawk hulh pah hian ," i kut i sil em?" tih min lo zawt hmasa ber. 

" aw ...tinge ?" 

" i thil tih kha i hria em ?" Vin zet hian a ti nghal hluk a , catheter chungchang kha a sawi tih ka hre nghal .

" damlo ka enkawl chuzawng chu ka ti " ngaihna awmlo tih hmel zet hian min rawn en a , a tihngaihna hre lo chuan a sam a han tuai leh phawk ṭhin.

" A ...." A ngawi vung vung a ," i hum saka " a ti leh ringawt a ,han sawi fak chu a duh bik lo aniang .

" a ho e ,a vawikhatna pawh ni hleilo " runluih nan ka lo ti ve hmak .

" Eng...engmaw?" 

"Nangpawn i hmuh ve tawh tho kha " Huat tur a awmin ka hrelo ,ani pawhin hmeichhe serh te chu a hmu ning hlei hlui ve tawh tho ang chu. 

" Keite chu kei ka ni alawm " 

" keipawh kei ka ni ve tho alawm " 

Kan inchhang tawk hmak hmak khawp mai.

" Tun aṭang chuan hmeichhia lo chu catheter vuah phalsak i ni tawh lo " ti deuh bur, a thikthu avan chhe reuh tak. 

" aw le, nangpawh khatiang khan min vin vak vak tawh suh " 

Diktak chuan keimah zawk hi vin leh in hauhna ṭan hmasa tu zawk ka ni ziah sia, ani ve thung chuan a thiamlohna ni lo ah pawh ngaihdam min dil leh nge nge ṭhin.

" mipa dang hum sak tawh lo la nimai " nuih vur vur pahin car seat hnung lam aṭang chuan white Lily bouquet lian zet hi a rawn la chhuak a ,ka lo mengphawk nasa mai! 

" ka hmangaih che " tih pahin ka chalah a fawp nghal zeuh bawk .

" ka ...ka lawm e mahse Engtin nge i lei hman zawk ?" 

" hun ka ngah alawm " a ti tak na in a ngah loh zia hrechiang ber tu ka ni ang .

Kan monthsary apiangin pangpar min pe ziah ṭhin a , Rose sen leh Lily senno min pe tlangpui. Tun ṭumah erawh Lily var ,ka pangpar duh ber mai dawn erawh a dan a dang takzet .

" a mawi takzet ,ka lawm lutuk aw " pangpar chu ka kuah ngawih ngawih mai ,a nalh bawk em a tin ni .

" tun aṭang chuan Lily var hlir ka pe tawh ang che " 

Ka kut chu a rawn hum vang vang a ,min duh thu leh min hmangaih thu hi sawi kur dup lo mahse a chetzia aṭangin a lantir thung .Ka thusawi hote pawh hi a lo vawng ṭha leh kar zel. 

" keipawh thil pek tur che ka nei asin " nidangah ka pe ngai lova tun ṭum erawh ka inbuaisaih nasa hle. 

" Tada ..." Tih pahin ka kut chu ka pharh a ," couple ring a nih hi" 

A nui nghal var var mai ,a ring lawk bik lo aniang a meng bial hman in ka hria .

" naupang chhia ti mahla phelh miah suh ang che" a kutzungte û ah chuan ka bun tir a ,Rolex sana a bun a silver zungbun Rs 250 man a bun leh daih a , ka insit ru chem chem mai .

Nilo , a pahnih hian Rs 500 man ania ,keima pawisa ngeia ka lei ania a hlu lo bik chuang lo. 

" ka thil dawn tawh ah chuan ala hlu ber ang " a lawm thiam takzet , min bun tir ve nghal a hetiang couple thil vel hi chu a ti dawn lo tih ka hriat avangin ka kutah ka dah deuh tawp.

Kan monthsary kan lawm hnu chuan in thleng min thlah leh thlap a ,min thlah han tih hian kan inah rawn lut in ka nu leh pate chibai a rawn buk thlap ṭhin .Him takin min thlah ngei a ni tih an hriat vang pawh hi a ni mahna Dr. Noel bula ka awm tawh hi chuan an thla hi a muang em em zel .

Naktuk conference na ah presentation a neih dawn avangin minute 20 bak kan in be hman meuh lo .Mumbai leh Delhi aṭangin surgeon chi hrang hrang rual an rawn kal khawm a chung ho hma a presentation nei tura thlan chhuah ngat chu ania ,hmel chang ni lovin a thluak pawh a ṭha.

Conference neih hma in min hmuh ngei a duh tlat sia ,dar 8: 45 ah chuan ER ah ka vei thauh thauh tawh .

Min rawn call rualin inhmuhna tura kan sawi lawk na hmun midang tam vak lohna ah chuan ka tlan chho vat a . Kamis leh necktie nen alo inthuam ap a ,a inhmeh dan chu sawi pawh ka sawi thiam lo ,ka mit hi a tlai khawp mai .

" i va rawn kal har ve " alo ti leh hmanhmawh ,Lalhmanhmawh-a hian .

" Ka rawn tlan chho vat alawm ,ṭha deuhin ti rawh aw " tih pahin a necktie chu siamṭhat ka tum ve ngeia ,ka pawt sawi daih .

" nizanah min ṭawngṭai sak tawh kha ka ti ṭha em em ang " 

Confi thei sia ,nia ...nizan mut dawnah phone aṭangin ka ṭawngṭai saka , mi zai tur a neih apiangin ka ṭawngṭai sak ziah ṭhin bawk .

" i necktie hi ka ti nalh lo vek " 

" a ho lutuk , ka kal hma in min fawp phawt rawh " 

Ka lo theihnghilh leh ṭhin ,a tawpah min dil leh nge nge zel .

Nuih ver ver pahin a hmuiah ka han fawp zeuh a ,tun thleng hian hetiang em em a mipa hmelṭha hi ka ta a nih ka la ring thei lo. 

Noel's POV 

Ka presentation tih tur chu a tawp nan ka enfiah leh a , Mizoram aiawh a ding tur ka nih angin ka tihsual a thiang lo .

" Noel i zungbun chu ava nalh ve "

Dr. Madin'in a tih chuan Tetei nena kan couple ring melh zeuh pah chuan ka khi suk a , henu ka nei hi khawvela mipa vannei ber ka ni ang.

" nanghi bialnu i nei em ni ?" 

" umm..." Laptop en reng chung chuan ka ti liam puat a .

" Tunge ? Ka hriat zawng a ni em?" 

" aman sawi a phal lo " 

Keichuan mi zawng zawng hnenah Tetei hi ka ta a ni tih hriattir ka duh mahse Tetei hian zep a duh a ,a thil duh chu ka zahsak mahse Hmeichhe dang in min zar buai ve chhen hi ka ning a ,Tetei hming a lan loh chhung chuan bialnu ka nei tih erawh zep ka tum lo.

" Noel , i hman dawn tawh em ? Lut ila " Maam Jennifer chuan ka darah a rawn chul thuak thuak a ,hetiang hian Tetei hian min ti ve se chuan ka hlim viau ang .

" lo va lut rawh " 

" lawk , i necktie a sawi a nih hi " tih pahin ka necktie chu rawn siamṭhat a tum a, engmah ka sawi hman lo a kut chu ka benthlak sak pawp a ,mak ti takin min en ha mai .

" a ngai lo " ka ti hmuk a ,ka laptop ah bawk ka bur lehnghal .

Tetei necktie min siam sak hi a nalh emaw nalh lo emaw midang siam sak ka ngai lo .

(Fakna khu chhiar zawh veleh hmet ang u aw ...xoxo)

Fb - Haylor Sept 

Ig- @remruati_b