I Love you 3000 -3 by Remruati Bawitlung (Haylor)

Chapter-3 

Falling In love was never in my plan. Until one day I just realized that I love this person too much.

Rei tak ka awm hman loh avangin ka û Op-a te in aṭang pawh chuan ka haw leh vata ,Dinthar aṭanga kan veng Ramhlun N a haw leh chu a peihawm tawh loh ngei mai .

Ka mut hma in ka han inbual hmasa leh te te phawt a ,nidang ang lo takin thil la tih loh nei ang tlat hian ka in hria .

Ashhh...kha pitar khan lawmthu lo sawi rawh a tih vang vek kha ,ka hrilh hman ta si lova ka rilru ah a cham reng mai.

Mut paha lehkhabu chhiar ka duh ṭhin avangin thatchhe zet hian khumah ka ṭhu thluang duai a ,ka han chhiar dawn zet a ka phone a rawn ri lehnghal .

Ka phone pawh ka bag atangin ka lo la la chhuak lo ,a rik rei em avangin ning zetin ka tho lehnghal ṭuih ṭuih a ,ka phone ka han en nak chuan Dr. Mamawii lo ni rengin.

Dr. Mamawii hi casualty MO tho a ni a, ka ṭhianṭha ber Rinhlua tih lovah chuan a ni hi ka kawm ngeih ber leh nel ber a ni.

Lak loh ka tum zet tawh na in thawk chhuah hulh pah chuan ka pickup leh ta nge nge a.

" Dar 12 a ri tawh dawn eng nge ni leh ta ?"

" Dar 9 aṭangin ka rawn call tawh che ,la vat la chuan 12 ah ka rawn call miah lo ang che" a rawn ti leh tan tan tawh , call lak loh hi a huat tehlul nen a call hi ka la thei lo ve ziah lehnghal .

" ka buai lai aniang, ka chau teh mai ania sawi vat teh "

"Enteh ..."

Enteh tia bul a ṭan tawh hi chuan thil min dil ngei ngei ,engtak ni leh ang maw ?

" naktuk-ah lisence vel buaipui in Kolasib ah ka kal ngei ngei a ngaia in duty thleng ila "

" Nangni ho hian eng nge maw in hriat le ?"

Ka û lahin a ai min kal tir tawh a tunah Mamawii ve thung ,Charity buatsaih tu pawh ka ni lo .

" mawh , ka nau hmelṭha te "a tih chuan ka ngawi vung vung phawt a .

" I morning dawn a ni lawm ni ?"

" aw ...chuan kei ka lo night ve thung ang please please please "

Ka sana chu ka zuk melh leh zeuh a ,naktuk zing chu mut rei ka lo tum asin.

" aw le " ka tih leh ta nge nge, Mamawii hi chu ka la mamawh leh dawn tho tho avangin a thu hi ka hnial ngai lo .

Naktuk-ah ka morning dawn avangin lehkhabu pawh chhiar ta lo chuan ka mu nghal daih a, chau hle e ti lo chuan ka muhil thei miah lo lehnghal .

Khumah chuan ka let ka let a ,kha Pharmacist nu kha ka rilru ah a awm tlat peka ,a thil tih avang khan sual bik ta riau ah te ka in ngai thul . Kei ni ta ila khatiang ang khan ka ṭanpui ve angem?

Duty turin phur lo zetin ka in khalh chhuak leh hna hna a ,nizanah ka mu ṭha lo bawk nen ka chau takzet mahse chhun lamah hi chuan emergengy case hi a tam vak ngai lo bawka a zia hlauh.

Ka thlen meuh chuan dar 9 minute sawm in alo la ri lo.

" Noel vawiin chu i va chau hmel ve ?"

Jennifer chu ham bai bai pahin kitchen-ah a rawn lut phei a, zial ka lo zu khu leh vut vut tawh .Midang chu nise a hau leh hrep tawh ang .

" nizanah ka mu thei lo a " tih bakin ka chhang lo .

" nizan chu accident an awm a pakhat phei chu a boral lehnghal minute 10 pawh ka chhing hman meuh lo " tih pahin thingpui chu a insiam nghal mawlh mawlh a, mipa tan pawh a hahthlak tawh nak alaiin hmeichhe tan phei chuan a hrehawm viau ang .

" haw vat la i mu dawn nia "

" ER ah hian i û aiin rawn awm zawk mai la...taka Dineout chungchang vel kha ilo ngaihtuah tawh em ?"

Kar hmasa khan dineout turin min sawm tak ,a pawimawh loh vang ania nge ka lo hre leh tawh lo .

" ka hman leh hmasak berah kan ti dawn nia " ka ti ta ringawt a ,kan pahnih chauh kan nih dawn avangin ka phur teh chiam lo.

" Noel ka kawr hi min lo zip ṭhat sak teh a in phelh reng a ka ning tawh lutuk " a tih chuan rilru dang pu lem lovin a kawr hnung zipper chu zih sak ka tum nghal mai a mahse chutih lai tak chuan kha Pharmacist nu kha a rawn lut ta thut mai !! Rang lutuk in ka kut chu ka la thla nghal vat bawk.

" Kawngka rawn kik ta che" Jennifer chuan a lo vin nghal hlar a ,a ni erawh ngawi rengin hrehawm tih hmel takin toilet ah a lut nghal daih thung.

" Dar 9 a ri tawh keipawh ka va phei tawh ange " ka zial ken lai chu ka paih rawk rawk a ,Jennifer chu ka kalsan daih ringawt .

" khanu khan min rawn hmu angem ?"

Tih sup pahin awm nuam lo deuh chung hian chair ah ka ṭhu a, khanu khan min rawn hmu angem tih bak ka rilru ah a awm leh tawh lo, min rawn hmuh mawlh mai kha ka hlau.

Rei lovah kha Pharmacist nu kha duty room aṭang chuan a rawn chhuak a, vawikhat pawh min rawn melh eih lovin Nathan bulah a va ṭhu nghal, maktak maiin a awmdan avang hian ka lawm lo hle.

Nidangah a awm dan leh a awm ve tih pawh ka hriat ngai loh laiin vawiin zet zawng a awmdan engkim mai hian ka mit a la vel vek .

Medical certificate leh thil dang eng eng emaw buaipui ngai ho chu an in tlar ṭhup avangin chawl lovin ka buaipui nghal char char a chuti chung pawh chuan a khat tawkin a awmdan chu ka thlithlai deuh reng tho.

" Sir , a BP hi 160/100 ania a lu a hai tih mai loh chu in sawiselna dang a nei lo " Pharmacist nu chuan damlo card chu min rawn pe a, ka lo lawm ru ngang mai ,ka nui lek lek.

" Lasix in i lo chiu dawn nia " tih pahin card ah chuan ka ziak lut nghal mawlh mawlh a ," vawithum a zun hnuah a BP i lo check leh anga chuan min rawn hmu rawh se "

" aw le ...Sir" tih pahin Nathan bawk chu a pan lehnghal ,vawileh khatah ka mood a off nghal vek.

Damlo an awm loh kar lakah an pahnih chuan an ṭhu dun chawt reng a, vanglaini a crossword te chu an thai dun a kei erawh khawvel hran daiha awm ang mai ka ni.

" Tete ...i sam hi i ning em ka lo phiar sak dawn che mi ?" Nathan an a tih lai te chuan ka awm hle hle thei tawh lo, ka awm hmun aṭangin ka lo tum lian hle .

" ning tho e mahse ka thlah laklawh mai mai a nih hi "

Chutia an pahniha an nui dun ker ker lai chu ka hmu thei tawh ngang lo ring leng lawng hian ," Tete ..." Ka ti chhuak thut ringawt ! A rawn hawi rang kher mai .

" eng nge ni ta Sir? " tih pahin ka bulah a rawn kal nghal vat a, sawi tur lah chu ka hre miah lo lehnghal .

" kha coffee min zuk lei sak lawk rawh " tih pahin 100 hi ka pe ta ringawt a, a ãtthlak takzet .Nathan bulah a awm loh phawt chuan a ṭha a ni mai.

Ngawi rengin pawisa chu a la a ,a ruk tak chuan ka inthiam lo leh hnuhnawh.

" ka lo kalpui dawn che mi damlo an awm chuang lo " Nathan chuan a ti a ,hai rual lohin hepa hian a ngaizawng tih ka hria .

" I peih te chuan lo kal ve la " Tete-i pawhin a lo hnial lo ngang mai mahse keiman ka hnial tlat .

" Nathan lo kal lawk teh " file a thil ziah luh mawlh mawlh pah chuan ka ti kher a.

" keimahin ka lo zuk kal mai ang " Tete'in a tih rual chuan a rukin ka lo khi suk ringawt .

" Sir Noel eng nge ?"

Uang zet hian a rawn ti a ,in nel ṭhin viau mah ila vawiin chu ka hmelma en deuh reuh tawh .

" Pa Chhantea (fourth grade)lo pe rawh dar 1 a ri ṭep tawh " tih pahin Rs 600 hi ka pe a ,hrilh kher ngai lovin a tih tur a hrechiang hle .

Certificate leh thil dang dang kan lo siamsak hian pawisa kan la ṭhin a ,chunga kan pawisa tling khawm ṭhenkhat te chu ER-a Stuff hah tak tak te ho thingpui leh chhang man atan kan hmang mai ṭhin .

" Sir ,hei i coffee chu aw "

Tetei pawh a rawn let leh tawh ,theih chu nise ka hmuh theih ah hian awm reng se ka ti takzet.

Huizz Engvanga hetianga awm tlat nge maw ka nih ni ? hnathawh aiin midang thik reng reng a awm hian ka hah daih zawk.

Medicine department lamin min hmuh an duh avangin reilote ka han kal zawk a ,ka let leh lamah chuan pitar pakhat thil zuar hian ," ka pu min lei sak ve rawh" tih pahin rang takin a thil zawrh lai chu min rawn hmuh nghal sawk sawk a ,bakilh leh sawmṭawnna tih vel hi a lo ni a.

" Hetiang hi hmeichhia in an duh asin " a tih lai te chuan Tete-i ka hre chhuak hlawl mai.

" khawi hi maw hmeichhia in an duh a? "

" hei hetiang te hi " tih pahin bakilh senno lian zet mai hi a rawn phawrh chhuak a ,a nalh leh nalh loh pawh ka hre ve lo .

"Engzat man nge ?"

" 150, ka lo tuam sak dawn che mi ?"

" a ngai lo tihian a ni mai " tih pahin ka coat var ipte ah chuan ka dah ṭha nghal a .

Hmeichhia in nalh an ti a ti miau a a rawng senno chu ka la ta nge nge a.

ER ka luh hnu ah rei pawh ka ṭhut hma hauh chuan nu pakhat hi an rawn zawn lut a ,a serious deuh hlek avangin Stethoscope lak pahin ka va kal nghal bawk.

Doctor intern ho chuan a vital an lo laksak nghal zung zung a ,kei erawh in a awm vel Steth a deh pah in ka lo endik thung .

" Kan dawra a awm laiin a tlu thut a ,a thlan tuiin a bual bakah hei amah hi a vawt vek bawk " a rawn hruai tupa chuan alo ti nghal zung zung a .

" na a nei em?" Ka han ti leh a .

" ka hre bik lo " a tih takah chuan chunu pum bawr vel chu ka han hmet a .

" ka pi helai hi a na em ?" Tih pahin ka hmet zela , a tai leh a pum bawr vel chu na a ti vek niin a lang .

" khawiah nge a chhungte ?" A rawn hruaitu pa chu ka zawt leh a .

" ka be tawh a ,an rawn kal mek "

" Sir , BP- 89/40 , SpO2 -78 chuan a Tempt- 104°f " intern pakhat in a tih rual chuan rang takin ," O2 pe nghal rawh u" ka ti vat a .

" ka pu a hma a alo in entir tawh na zawng zawng kha rawn keng vek rawh se ka en vek duh " ka ti zui zat bawk .

Ka rin dan chuan Septic shock a ni in ka hria , rang taka zai angaih ka ring hle bawk.

" thisen ,zun , x-ray ,CT- scan leh thil dang angai ho zawng zawng kha lo ziah sak rawh u " Intern ho bulah chuan ka ti a rang takin an lo bawhzui nghal sap sap bawk.

" Noel a serious viau em ni ?" Nurse Ivy chuan min rawn zawt sa sa a .

" Peritonitis anih ka ring ,û Ivy... OT lampang lo han bia ula emergengy a zai angai ang "

" Test result kan nghak phawt dawn lo em ni ?"

" Result nghah chhungin kan tlai maithei a chhungte... " ka sawi zo hman lo Nathan chuan ," Sir, Cardiac arrest (thaw tawp thut) a nei ania " a rawn ti ta mai ,rang lutuk in ka tlan phei lehnghal.

Sawi ngai lovin damlo dangin an rawn hmuh ve loh nan parda chu an rawn zar kual nghal vek a ," Nathan intubation ti nghal rawh " tih pahin CPR ka ti nghal .

A pulse hmuh let tumin ka theihtawp chhuahin chunu awmah chuan ka han nem vak vak a , ka thlan tui pawh a far zawih zawih mai.

Ambu bag chu Tete'in a hmeh avangin zaidam tak hian ,
" a pulse ka en dawn ania ,ambu bag kha lo thlah miah suh " ka tih chuan a lo bu nghat a , chunu lungphu chu ka han en leh a ala awm chuang lo .

Angai te bawkin CPR chu ka chhunzawm zela ,minute 15 dawn ka beih hnu chuan a pulse a rawn lang hlauh ka thaw nghal huai mai.

"Tete , Moxifloxacin lo pe rawh " Antibiotic pe tura ka tih zawh hnu chuan ka chau lutuk chu chair ah ka ṭhu nghal hnawk ringawt.

" UNathan antibiotic pek angai a,ka la IV ngai si lova min pui lawk thei angem?" Chau nak alaiin Tete'in Nathan hnena a ti ri ka hriat rual chuan ka sa nghal phat .

" Tete min rawn zui rawh " tih hmuk pahin duty room ah ka lut nghal , ka thinrim lutuk chu insum tumin ka inhum ruh vat bawk .

" Sir ..." A rawn ti dek dek a ,vin zet hian " IV injection mai mai pawh i thiam loh chuan engtin nge damlo heng zozai te hi i enkawl theih ang an thi hman mai dawn asin ".

" ka ..ka kut hi a khur nasa lutuk a " ka hre thei chang chang chauh .

" Midang puihna i dil chhung chuan Pharmacist ṭha tak pawh i ni thei ngai lovang ,kal tawh rawh " ER lamah a kal mai dawn emaw ka tih laiin Emergency Ward lamah chuan a tlan chhuak nghal daih a ,kei pawh chu kal ta mai lo chuan kitchen-ah ka lut nghal .

Ka thil sawi tehhrep avang khan ka inchhir leh hnuhnawh ,ka lu dawm vang vang chung chuan ka vei kual chhen a , ka ṭawng na mah mah emaw ni le ?

" Phiangsen chuan "

Ka awm a nawm theih ngang loh avangin ngaihdam dil leh tum chuan EW lamah chuan ka chhuak phei leh ta nge nge a mahse Nathan an Tete-i a thlem mawlh mawlh lai ka va hmu takah chuan ka rilru ka thlak lehnghal ,ka let nghal nal nal bawk .

Tetei's POV

" ka let peih tawh lo e ,ka haw daih mai dawn " UNathan pawh ka zah zo tawh lo ,ka mittui a rawn tla zel .

" I awmna ala rei lova i thiam chak ngawt zawk alawm "

" a dawhthei lo ropui si ,vawihnih min hauhna a ni tawh "

Thil dangah min hau chu nise ka hrethiam mahse ka beih nasat zia hre hauh lova ka ṭhat tawk loh zia min hrilh reng mai hian ka hnuk a ti ulh leh ṭhin .

" phei ang ,i haw daih chuan kal lo angin ka dah dawn che ania " a tih chuan ka lo nui ringawt, Zuali tal awm se chuan a zia deuh tur ,a ni lah hi a night dawn lehnghal.

Hreh tak chungin Dr. Noel hmu peih lo viau mah ila ka let leh hna hna a, a ni lah chu engmah thleng lo ang maiin alo awm leh hmiah tawh.

Hlim hmel put hram hram tumin nula pakhat khup ti kak chu ka va buaipui nghal vat a , a tih kak tirh in a rawn kalpui loh avangin a ṭhui theih tawh loh thung .

" a pun deuh a nih hi ,ngatinge a tirah i rawn kalpui loh " ka ti sap a ,a chhiat loh nen zu rim a nam huam mai .

" aieng ka hnawih a ,a dam nghal mai ka ringa "

" tihian a dam hma loh chu nitin dressing angai ang , a kak tirah khan rawn kal la chuan kan ṭhui anga ni 5 hnu velah a dam daih tur ania " tih pahin ka tihfai sak mawlh mawlh a ,ka kun deuh apiangin ka sam lah chu a rawn tla ve sek a ,glove ka bun tawh avangin ka hui mai thei lo lehnghal.

" Engtik thleng nge dressing angaih ang le ?"

" ka hre lo ,a dam har chuan kar hnih te pawh angai ang " a lo ner nang mai, a ti pun lehnghala thla khat tal angaih ka ring .

" Enteh ṭhiannu " ka beng bulah chuan a rawn ti sa sa a ,zu ṭhing rim ka hriat rual chuan ka uak ṭep .

" Doctor saw ava chhelo em em ,a hming i hria em ?" Dr. Noel chu a kawk a ,hawi pawh ka hawi peih lo .

"Hre lo " ka ti hmuk ringawt .

Chutia a pem vel ka dressing mawlh mawlh lai chuan Dr. Noel chuan ka sam tla chhum ka lo ning em em mai chu a rawn hui khawm phawk a, bakilhin a kilh beh hnu chuan a kal lehnghal daih a nih chu!! mak ti takin ka lo en ha ringawt .

" Eheu ...i hriat reng kha "

" ka dressing zo tawh ,biak i duh viau chuan a bulah i card i va la dawn nia tih dan tur alo hrilh ang che" tih hmuk pahin bakilh pek let tum chuan Dr. Noel bulah chuan ka phei a .

" Sir ,ka hmang zo tawh ...kha "ṭha tak hian ka ti a ,engang pawhin a chungah thinrim mah ila kan Sir a ni miau a ,zah taka ka biak tho tho angai .

" nei rawh " en pawh min en lo hian a rawn ti a , a damlo en lai chu a en chhunzawm reng tho .

" chutiang ringawt in ka nei thei lovang "

" helai velah a awm mai mai tho ,damlo in an theihnghilh aniang i duh loh chuan paih mai rawh ....ka pu zu i in leh chuan i thihpui tawh ang chuvang chuan i nghei angai " a tih chhunzawm zat ringawt .

Tih ngaihna ka hre bik lo ,paih daih ai chuan ka hman duh tho avangin bakilh pink zet chuan ka sam chu ka ṭawn tawm sawk sawk a ,damlo dang buaipui tur chuan ka kal lehnghal .

Authors note :

Mizo story pangngai taka ka vawikhat ziahna a ni a , han tih kual vak duh viau mah ila kan mizo society nena a inmil theih dan tur ber leh a ang thei ang bera ziah ka duh bawk si a ,ka tan chuan ziah a har takzet mahse chhiar tute pawhin chhiar dan tawk min lo thiam sak dawn nia .

Hemi story bik phei hi chu 30% vel hi keima experience atang ngeia ka ziah a ni a ,phuahchawp bakah thil thleng thei leh thil thleng tak tak te pawh a tel nual a ,hlawk phah nan a in lo hman hram ka beisei .

Chuan fakna mawlh mai kha aw Xoxo