I Love you 3000- 4 by Remruati Bawitlung( Haylor)

Chapter-4

"Lord, save me, my drug is my baby"

" UNathan min thlah lo mai rawh bus in ka haw thei tho "

" Mission vengah ni lawm ni in awm ,Khatla ah kan awm tho a kan haw na a in ang tho alawm " UNathan chuan a ti tlat a ,a thlawna haw te chu ka duh ve tho mahse han inthlah tir em chu ka inthlahrung ve deuh.

" a nih chuan khi dar 3 a pel tawh a" sana en pah chuan ka ti zeuh a ,a ni lah chuan thil ala ti laklawh em em lehnghal.

" ka zo ṭep ,duty room ah min lo va nghak rawh " a tih chuan ngawi rengin duty room ah chuan ka phei a, intern ho chu an lo ri nak nak hlawm a Mapuii ka hmuh phei chuan haw vat vat ka duh.

" Tete ...hei wai wai bawl hi lo ei ve rawh " Irene chuan min rawn ko a mahse Mapuii a awm bawk sia ," ka ei chak lo " tiin ka chhang ta zawka.

Engvanga hetianga awm ve ringawt nge maw ka nih le ,tihsual pawh ka nei tawp si lo.

ER -a ka duty aṭang hian ṭhian aiin hmelma ka in siam a ni ringawt , Dr. Noel ngat phei hi chu star ru viau mah ila tunah tak hi chuan a hmel pawh ka hmu peih lo.

" Tete kal ila "

U Nathan'an a rawn tih takah chuan Mapuii melh zeuh pah chuan ka chhuak nghal a , a ni chauh nilo a ṭhiante thleng hian min rawn melh rum nimai hian ka hria.

" i ril a ṭam em ?"

" ṭam love ,rawngbawl ka ngaia kal vat vat ang " ka nawr sek a,a ni pawh a nui tawp.

" aw le , aw le ...Boss rawn chuang rawh " a tih chuan nuih ver ver pahin ka chuang ve nghal mai a ,bike seat hnung sang chi ang kha ani bawk nen ka chuang ût mai.

" ka chuang fuh thei lo " ka kekawr a nal bawk nen ,UNathan lamah chuan ka duh lo chung ka tawlh thla nghal pur pur ringawt.

" a nih chuan ṭhu ṭha rawh " tih pahin ER kawtah chuan a ding ta ringawt a, ka ṭhut ṭhat ngial pawhin ka ṭhu nuam thei chuang lo .

" Aaa...kal mai ang ,a tlai tawh em mai " ka ti ta ringawt a .

" a hrehawm viau chuan i rawn sawi leh mai dawn nia " tih pahin a tlan chhuak nghal a ,ka hawi pah chuan ER tukverh aṭangin Dr. Noel an min lo thlir reng a ni tih ka han hmu thut mai !! ka ṭim nghal uaih thei ,a tum lian lutuk a a hlauhawm zawk .

In ka thlen chuan alo la in kalh khap , ka chhungte tumah an la haw lo aniang .Ka pa hi traffic police a ni a ,ka nu erawh DC ah LDC angin a thawk thung. Ka nau hian BA 5th semester a zir mek a ,tlai lamah class a kal ta emaw tih mai turin a rawn haw har thei hle bawk .

Rang takin chaw ka chhuang nghal sawk sawk a , minute tam pawh a ral hma in Muani pawh a rawn haw ve hlawl mai ,a rawn haw hma lutuk a a damlo a nih te ka ring hial.

" I tho ã ta mi ?"

" nangpawh " tih pahin a bag chu dawhkhanah a theh thal tawp ringawt .

" keichu UNathan'an min thlah alawm ,min rawn pui ve nghal rawh "

" i tih kha ka ring rengah " phun nuah nuah pah chuan anṭam chu min rawn thenfai puia ,a mood a fuh loh hmel ang aiin ka thu a awi phian .

Chutia kan thenfai mawlh mawlh lai chuan inla thutak fe hian," Enteh Muan.." ka ti sap a .

" Eng ngeeee , ninawm " a lo ti vin hlar mai .

" UNathan hian min duh aniang a ,nichin ah pawh khan min rawn thlah asin " phur zet hian ka hrilh a ,engah teh vakah mah alo ngaih hmel loh .

" a play che a nih chu " alo ti hmak ringawt .

" mipa chungchang ka hrilh apiang che in an play che a nih chu i ti ve ziah "

" alo ni tak tak zel bawk sia lawm "

" vawikhat chiah a nih kha " ka ti leh hram .

A hma in kan class a mi nen hian inngaizawng ni si lo in hun rei tak chhung kan in bia a mahse a hnu ah bialnu alo nei ru reng a ni tih ka hre chhuak leh ta sia khataṭang khan Muani chauh nilo ka ṭhiante pawh hian mipa chungchang ka sawi apiangin an play che a nih chu tih bakin min chhang tawh ngai lo.

" an duh tak tak che chuan bialpa i nei daih tawh ang chu " ngeiawm zet hian a rawn ti leh a ,ka lo ner nasa mai.

A hma in bialpa la nei ngai lo mah ila milim ka ni bik lova min duh anga lo in ngaihbel chang te chu ka nei ve tho alawm mahse UNathan hian min duh loh pawhin ṭhian kan ni tho alawm .

" bialpa ka la neih loh avang hian i ngaih ang em em a luck lo ka ni bik lo aw , min be tu te chu ka nei ve ziah tho "

" kan la hria ang chu " a ti duh lek chauh.

Henu tak hi chu aw... A û zawk mah ni ila min dah zero thei mah mah.

Kan chaw eikham thleng ka sil lai chuan Muani chuan ring leng lawng hian ," UTete lo kal vat vat rawh ka pa a chatthla leh tawh " a rawn ti lang lang a , hrilh chawp kher ngai lovin ka tihtur ka hrechiang hle .

Ka pa hian zu a duh ka tih tawh kha ,a chang phei chuan in em pawh thleng zo lovin kan in chhukna step ah hian alo chatthla leh tual zel ,chu chu kan nufa thum hian ka zawn chho leh mai ṭhin.

Minute 10 dawn kan beih hnu ah ka pa chu couch ah kan mut thei hram ,a rit bakah alo zawi tawh bawk nen beih fe hi angai leh ṭhin .

Rang takin Muani chuan tui lum leh towel hi a rawn la nghal vata ,keiin a pheikhawk ka lo phelh saka ka nu in a kawr alo phelh ve thung. Kan vawikhat tihna a ni tawh lo bawka zei tawh tak kan ni .

" Muani a kawr hi lo va su rawh chuan Tete nangin a ke hi ilo sil sak dawn nia " kan intih buai loh nan ka nu chuan kan tih tur a sem fel lehnghal thlap tawh .

Ka pa hi rui nawi thei viau e ti lo chuan ka nu vang liau liau hian mualpho takin ala awm ngai lo. Kutthlak bakah ruih thinrim tih vel hi a nei ve ngai lova , thinrim a hnekin a harhfim hnu hi chuan a inthiam lo letling zawk ṭhin mahse a nghei pah chuang hlei lova.

" ka pa hi a rui renga ka ning " Muani lungawi lo chuan a ti bai bai a ,ka dem hran lo .

" a nih awmlo ta se engtin nge kan awm anga ?" ka tih chuan a ni lo ang takin a ngawi hmak mai.

Engang pawhin buaipui ngai khawpin rui ṭhin mahse ka pa tello chuan engmah kan ni lo .

Mut hma in Dr. Noel bakilh min hman tir kha dawhkanah ṭha takin ka dah a ,chutah instagram lamah story ka han post leh te te phawt a , thlalak post khat viau e ti lo chuan Ig story lamah erawh ka active hle thung ,thil eng eng emaw hi ka post deuh reng mai.

Ka ṭhiannu hnen aṭanga ka korean drama lak thar ' Crash Landing on you ' chu thatchhe zeta mut pah hian ka en a, reilote chauh ka la en emaw ka tih laiin khua alo var dawn der .

" dar 4: 30 chauh ala ri tho dar 6 ah ka mu mai ang "

Ka morning dawn a ni tih hrechang tawh lek lovin ka en chhunzawm zela,dar6 a rik meuh chuan Zual'in min rawn call ral ral a ,phur lo zet chung hian ka pick up a.

"Kan chhungte an thi a ,vawiin chu ka lo kal thei dawn lova UNathan min lo hrilh sak mai rawh " tih te mai hi a sawi .

" keipawh ka kal dawn lo ,va call mai rawh "

" ngatinge i kal dawn loh?"

"ka evening dawn alawm "

" maw ! I morning dawn a ni lawm ni? Vawiin te chu kan pahnih a kan duty dun ni alawm " a ti ta mai ,rang takin duty roster chu ka en nghal vata ka morning dawn a ni tih ka hre ve chiah .

" Ehe...Ka la mu reng reng hleinem ,ka dah dawn darkar 1 tal mut ka duh " min chhan leh hma chuan ka dah daih a ,mutthilh thut tum leh chu a harsa takzet.

Traffic a zam nasa bawk nen damdawiin ka thlen meuh chuan dar 10 a lo ri ṭep tawh ,ka tlai apianga ka tih ṭhin dan ang bawkin inchung aṭang chuan ka hel leh a ,duty room ah chuan tlai lo niawm tak hian ka lut leh zal zal tawh.

Pa Chhantea chauh a lo awm avangin lab coat hak pah chuan Bruno Mars hla The Lazy song chu ka sa al al a ,mutchhuak miah si lo hian ka chau ru hle thung.

" 🎼Today I don't feel like doing anything,
I just wanna lay in my bed" ham bai bai paha ka sak lai chuan hnung lam aṭangin Dr. Noel hian ," i va tlai ve " a rawn ti ta thut mai ,ka phu chiang asin .

Hepa bawk chu ngatinge kan duty hun hi a inan theih em em mai le? nge keiman ka duty hun ka hai zawk .Nilo ,vawiin hi ka morning ni a ni ngei bawk sia mahse kan la duty dun char char ,ka awih em em tawh lo .

" umm...ugh ,ka tho tlaia " ka tih bah nuai ringawt ,chhuanlam ṭha tawk tak siam tur ka ni asin, mawl lutuk.

Min vin leh hrep dawn emaw ka tih laiin min rawn en a ,a nui nghal vur vur ringawt .Ka hmaiah thil a kai emaw tiin ka hmai chu a lo nuai nghal vat bawk .

" Hmanni pitar damdawi i lei sak khan lawmthu lo hrilh tur che in min ti a "

" aw ,ugh a nih chu engmah a nih loh kha " ka lo ti liam puat a, Dr. Noel'an min rawn biak avang hrim hrim pawh hian ka awm a ti nuam lo.

" a lehpek ah chuan rawn tlai lutuk tawh suh "

" aw le ,Sir " ka tih rual chuan a kal nghal daih a mahse kawngka bul a thlen chuan a rawn hawi let leh kher ," hospital ah chuan i sam kha thlah tawh suh " tih chiah a sawi ,a kal lehnghal daih ringawt .

Vawiin chu eng nge maw a hriat le ? A awmdan kha a mak takzet .

A kal liam rual rual chuan rang takin darthlalang ah ka in en nghal vat a ," ka sam ka ṭawn tawm vek bakah ka hmaiah engmah a kai si lova " ka ti nuah nuah a, ka bakilh lah chu nimin a bakilh pink zet min pek mai kha a ni sia han nuih vur vur nachhan tur a awm lo.

Damlo serious deuh an awm loh avangin tih tur a tam lem lo ,hun te hi a kal muang ta riau emaw tih tur a ni, ka mut a chhuak bawk nen ka ṭhu mai mai te hi ka hnar dawn in ka hria .

Emergency case nilo chu OPD lamah an tir chho zel a chutichung chuan zinga Zuali kal loh tur thu ka hrilh bak kha chu UNathan biak na hun pawh ka nei lo ,a awl ve dawn chauh a Dr. Noel'an a tir lehnghal zel, a chau tawh viau ang .

Nitin mai hian ER ah hian thisen khai ngai hi pahnih tal an rawn kal ziah thin ,khai chhung lah chu darkar5 vel te a ni ṭhin lehnghal .Ka tih ve theih tur awm ang a awm loh em avangin chung ho chu ka lo vil deuh chawt a ,nilo an bulah ka lo muthlu a ni zawk mah. Thlak angaih veleh min rawn kaihtho ve leh mai zel bawk.

" Tho rawh " ṭawng ri ka hriat rual rual chuan ka phu lutuk chu ka harh nghal kawk mai ,ka han hawi chhoh nak chuan Dr. Noel lo ni rengin .

" kha in rawh " tih pahin lasi hi min rawn pe a ,mak ti takin ka lo en reng ringawt .

" ka lawm e "

" darkar 2 i mu tawh, tho ve tawh em em rawh " kal pah chuan a rawn ti leh kher a ,ka bulah damlo an awm ve bawk nen ka zak takzet.

" a thinrim miah lo mawle " tih sap pahin lasi chu ka han in a , thinrim a hnekin lasi te min pe lehnghal .

Hepa hian eng nge maw a hriat le ?

Ngaihdan diklo ka pu hman ṭep tihin ka han hawi kual vel a duty ho chuan lasi no chu an lo dawm far hlawm a, Dr. Noel an keimah chiah min leisak emaw tia ka lo hlim ruk ve tawh nen ka nui tawp hmak mai .

Engthil nge maw ka ngaihtuah le, min duh ve anga ka lo ngaihtuah ve ringawt pawh hi a zahthlak zawk, ka tihngaihna hre lo chu ka lu te ka hiat ta vel mai mai .

Chutia thlamuang taka ka lo ṭhut delh delh lai chuan nu pakhat hi an rawn zawn lut a ,an ri nghal huk bawk .

" Eng thil nge thleng a ?" Ka bula damlo thisen khai lai chuan min rawn zawt a .

" ka hre chiang bik lo ,a lan dan chuan a kang in ka hria "

Khuma an mut rual rual chuan rang takin a mutna chu midang hmuh theih loh turin parda in an zar hliah nghal vek a ,parda an zar takah chuan a serious a ni tih ka hre nghal .

Rang takin ka tho a ,ka va bih thlak hnu chuan ka rin ang ngeiin kang a lo ni tak tak .

"Ka pu engvanga kang nge ?"

UNathan chuan a rawn kalpui tute zinga mi chu a zawt nghal vat a .

" bawlhhlawh petrol in a hal a ,thli in a rawn beng thut a ,a rawn hliau ta alawm mawle. Vairangte aṭanga rawn kal kan nia ,mamit damdawiin a kan kalpui hnu ah doctor ten min rawn tir thla anih hi " a ti nghal zung zung a .

" drip an lo khai sak cheu em ?"

" aw ...a kut a kan nasat em avangin a ke ah an khai "

" a nih chu ...ka pu lo va chhuak la kan lo buaipui mai ang ,Amawi Sir va ko lawk rawh " UNathan chuan a ti nghal zung zung a ,kei erawh tihtur hre lovin ka lo ding leh reng tawh ,ka vawikhat hmuhna a ni bawka ka rap takzet.

Dr. Noel pawh chu a rawn lang rang kher mai , record hlui en pahin chunu chu a han endik vel a .

" hetah hian 80% kang angin an ziaka mahse 40% chiah a kang a nih hi ,hlauh tur a awm lo " a sawi zawng chuan min rawn en a ,ka rap tih a hria pawh a ni mahna mahse a thusawi hian min hnem takzet.

Damlo na deuh pakhat a rawn luh tawh chuan a dang in a rawn zawm zat ṭhin an tih ang tak tak in mipa pakhat puan nuam a kuh hlun hi an rawm nawr lut a , a khawi lai nge na tih hre lo mah ila thisen erawh a far nasa hle thung .

"A ke ah hian venflon vuahna tur in lo zawng mai dawn nia " tih pahin Dr. Noel chu damlo dang buaipui turin a kal lehnghal .

Senior nurse rualin a ke leh chal velah vein an han zawn ngial pawhin a hma in an lo vih nual tawh avangin engmah hman tlak a awm lo.

" a nghawngah a theih loh em ni ?" Intern pakhat hian a rawn ti a .

" a kang vek ,central line-ah a ngai ang " Nu Sangpuii chuan alo ti sap a .

" Nu Sangpuii Pu Thangpuia nen duty room ah Dr. Noel an a ko che u " Nurse Ivy chuan hmanhmawh tak hian a rawn ti a ,a tlan let leh lehnghal .

"Tete lo kal ve rawh " Nu Sangpui'in min sawm avangin ka kal ve nghala , Duty room kan luh chuan duty dang ho pawh an lo awm ṭhap tawh .

Engthil nge maw thleng teh thut le ,hetiang hian an ti ngai si lova .

" Noel sawi vat la damlo in min nghak reng tawh ania " nurse Ivy chuan kan kim takah chuan a han ti sap a , midang erawh a ngaihna hre lovin kan lo hawi ã hle.

" Damlo pakhat a chhaka kan mut hran tir bik saw accident avangin a malpui leh mawng vel a thler veka " a han ti dek dek a Pu Thangpuia chuan ,"a thisen kan tih tawp hnuah OT lam call ila ani mai alawm " a lo ti sam et a ,midang pawh an lo bu nghat mai.

" aw chu chu kan ti ang mahse..."

Damlo in min nghak ṭhup a ,Pu Thangpuia chu a lo hmanhmawh ve bawk nen rang tak hian ," thil harsa vak a nih loh chu in koh khawm nachhan tur a awmlo " tiin a lo pawtchat leh a .

" ka koh khawm nachhan cheu chu HIV positive a nih vang a ni " Dr. Noel'an fiah fai taka a tih rual chuan phawk fe a in melh kual pahin second thum vel chu kan reh nghal duk a ,a hnuah kan phun lehnghal mur mur bawk .

" Ivy , Pu Thangpuia nen min puih angai ang "

" ngatinge kei kher? " nurse Ivy chu a ṭap ṭep in ka hria mahse a dem awm hran lo a huphurh awm ve em a tin ni.

" keiman ka lo pui ang che " senior nurse tih takah Nu Sangpuii hian a hna a hlen ṭha takzet .

" chhuat a thisen far pawh saw in lo nawt fai leh vek dawn nia damlo dangin an rap palh ang " nu Sangpuii bawk chuan a han ti leh a, thil tifai ṭhin ho pawh chu an inpe zo hlawm takzet, an fakawm thlawt.

" Kang saw central line ka tih sak zawhah ka rawn kal ve nghal ang chuan damlo chungchang a ruka lo sawi sep sep emaw a positive avanga lo en hrang in awm chuan in haw thei ang ,damlo dangin engmah an hre tur a ni lo " Dr. Noel serious hmel hmuh tawh hi chuan a thinrim te pawh a ang zawk .

Dr. Noel chuan intern ho chu an tih tur a sem kual nghal zung zung a ,a tawpah keimah chiah ka bang lel mai .

" Sir " a kal tur chu ka ko ding a .

" Eng nge ka lo tih ve ang ?" Tiin ka zawt zui zat bawk.

" nang chuan damlo dang saw ilo enkawl dawn nia chuan chhak lamah sawn kal pawh rawn kal hnai suh ang che "

" mahse midangin an enkawl vek tho sia "

" ka sawi ang chuan awm mai rawh, thu i awih loh chuan ka hnawtchhuak ang che " a ti vin nghal hlur ringawt.

Engvanga HIV + bul hnaih a ka kal pawh chu phal lo em em nge maw a nih le ?

Midang an buai hut hut lai chuan ngawi rengin duty room aṭang chuan ka chhuak hnak hnak a, tlangval pakhat in thla a lo la kual mawlh mawlh lai ka va hmuh chuan rang takin ka va pan nghal .

" min lo hrethiam la helai hmunah hian thlalak phal ani lo " tih pahin thlalak phal loh tih in tarna chu ka kawk a ,chupa lah chuan ka ṭawng chu hrelo ang hmakin a awm a nih chu ! ,a rui lehnghal emawni?

" ka pu ..." Tlangval keimah ang rual vel ni mahse ka pu tho .

" hey ! ṭawngkual duah lovin room hran chu min pe vat mai rawh , minister tupa ka nih hi"

" maw !" Ka lo ti ha ringawt.

A sawi awmzia pawh ka hrelo ,ka hriat zawng chu a kut ,ke leh hmai vel a pilh phung a ṭhui ngai erawh a awm lo tih zawng a ni .

" VIP ka nih hi " rui viau e ti lo chuan min melh kur a ,a ruk tak chuan ka hlau .

" min lo ..." Ka ti dek dek a ,Amawia chuan min lo pawt hrang nghal vat a .

" Eng nge ?"

" Tete ...buaipui lo law law rawh , minister tupa ania room hrana enkawl a phut a nih saw "

" a nih chuan Sir kan hrilh ange " tih leh kal ka rual nghal.

Dr. Noel chuan kang kha alo buaipui zo chiah a ,ka va nang hman hlauh .

" Sir , minister tupa in room hrana enkawl a phut a "

" A englai nge na?" Glove bun mawlh mawlh pah chuan min chhang a.

" a accident na aniang ,a ke leh ban leh hmai a pilh a ,a bak na a nei lo "

"Dressing la ,TT pe bawk la kal tir rawh "

" Sir ,VIP ..." Ka ti dek dek a ," hmun dangah kal mai rawh se " a lo ti hmak.

Kutbenga haw tir leh ngawt ai chuan tiin TT tal a jection tum chuan ka va kal leh a ,a lo duh lo ngang mai .

" TT-a i inchiu loh a sakawr ek hrik i kai chuan tih damna a awm tawh lo ania, dressing i duh loh pawhin TT tal hi chu la rawh " hrilhfiah ka tum ngial pawhin a duh tlat lo .

" ka pu a hlauhawm loh ,inchiu ai chuan Sakawr ek hrik kai a hlauhawm zawk "

" room min pek hma loh chuan ka duh lo ,VIP ka nih hi " a tih chuan ka lo thaw halh ringawt .

VIP bawk chu , midang chu nise a intih nat dan anga na hi chair ah kan ṭhut tir ang mawle ,a ni phei chu khumah a mu zawk lehnghal.

" min ngaithla teh ..." Ka ti chiah chu min rawn beng thle nghal sawk ringawt .

" room chu min pe vat mai rawh u" a rawn kalpui tunu ,anu niawm tak chuan a fapa chet dan chu zahpui a hnekin a lo thlawp a nih chu !! Hahh..Mihring pawh an ni lo.

" keiman ka lo ti ang " UNathan chuan ka syringe ken lai lak pah chuan a rawn ti nghal vat a," midang lo va pui rawh " a tih takah chuan kal pahin chupa chu rum zet hian ka melh leh kher bawk .

Sawi chhuak lo mah ila ka rilru chuan F*ck you a ti nghal char char .

Noel's Pov

Ka damlo buaipui lai OT lama ka thawn chhoh meuh chuan dar 4 alo ri ṭep tawh , ka buai atalang in Tetei haw lai pawh ka lo hre lo. Intern pakhat in min hrilh dan phei kha chuan damlo kut a tuar lehnghal a ,hmuh ngei ngei ka duh asin le .

" Lalṭhian vawiin chu i va rei ve " Rinhlua chuan uang zet hian a rawn ti a .

Rinhlua nen hian MBBS kan zir dun a ,a ni erawh PG ti lovin falkawn damdawiin ah a thawk daih thung ,chutichung chuan falkawn atangin gym kal dun turin min rawn la sawm ṭang ṭang.

" hetah hian i awm rei tawh em?"

" darkar chanve chu ka lo nghak tawh che ,tinge?"

" a nih hmeichhe pakhat bakilh senno kilh i lo hmu em ?" Ka zawhna avang chuan a nui ringawt .

" eheu , chunu chu tunge?" Min chhaih leh dawn tih hriata lo zawh lek loh tur .

" kal vat ang " min zawh thui hma in ka car ah ka lut nghal daih ,a ni erawh in ka hnungah bike in min rawn zui thung .

Gym ah rei pawh kan awm hma chuan Mamawii pawh a rawn lang ve nghal .

" UMamawi thil te te ka hria ania" Rinhlua tak hi chu ,ka lo zawt kher kher a ni .

" Eng nge ?"

" Noel chungchang mawle "

" Maw! Hmeichhia an awm em ni ?"

An ṭan leh dawn ta , MBBS ka zir ṭan tirh aṭang khan ngaihzawng ka la nei leh miah lova ,chu chu min chhaih nan tak an hmang.

Ka hmuh zawh loh vang nilovin an duh anga ka ngaihsak hman loh avang zawkin.

" ER -a duty bakilh senno kilh "

" Lalrinhlu " tih pahin bottle chuan ka vawm pawp a , a phur zual sauh emaw tih mai tur a ni .

" Chuvang chu nimaw vawiin ah Dr. Kevin nen in in duty thleng nachhan , chuan keipawh in duty thleng puiah min sawm alawm chunu nen chuan an duty tlan theih nan "

UMamawii hian min man chiang lutuk a sawi tur pawh ka hre lo ka nui ringawt .

Tetei te duty roster a rukin ka check a ,kan duty dun theih nan midang nen a in duty thleng puiah ka sawm kual vek tawh .

" busted " Rinhlua chuan a rawn la ti ang deuh deuh a