May 12, 2020
CHAPTER-2
" you can't blame gravity for falling in love "
" Pathian hian a haw bik riau che aniang " phur tawh loh sa nak alaiin min rawn la ti zui .
" Hmangaihzual "
" haha...UNathan pawh a haw tawh , E...taka thil hriatchhuah ka nei asin "
" Eng nge ? Min han hrilh vat teh "
" UNathan bialnu hlui chu Mapuii alo ni reng alawm "
" Dr. Mapuii saw maw ?" Ka lo ti nghal hu a, ṭawng ring lo turin min khap nghal vat bawk .
" aw ...keipawhin a mak ka ti rap Mapuii hian a vil peih ka ti reng a ni engpawh chu nise Tluang'an min nghak tawh ka kal dawn"
"UNathan i star tih Tluanga ka hrilh dawn " a chhuah hma chuan ka fiam zui zat a.
" a hre daih tawh " tih pahin min bye bye chungin a chhuak nghal.
Henu tak hi chu aw...bialpa neih reng chungin mi dang dang hi a star kual a ,a tawpah Tluanga bawk hi ṭha a tih ber thu a sawi ziah lehnghal.
Lab coat ka hak mawlh mawlh lai chuan Mapuii a rawn lut hlawl mai mahse midang an awm ve avangin an rawn ri nghal luih luih a ,rang takin duty room chu ka chhuahsan nghal vat a .
UNathan nen an lo inngaihzawn tawh vang aniang nimina ka chunga a thinrim vak nachhan kha. Khatiang mi kha a nih ka ring lo thikthu chhiatna avang bakin khatiang khan a awm lo tawp ang.
Dr. Noel ka hmuh peih loh avangin pehhel tumin damlo lo mu reng bulah chuan ka va kal a .
" Engtia a tih nat nge a?"
A chawn kak duai mai kawh pah chuan amah lo buaipui tu doctor intern chu ka zawt a. A hna thawh laiin amah leh amah chemin a in vai palh thu leh a kak thuk loh thu te chu min lo hrilh nghal mawlh mawlh a .
" I ṭhui duh angem?" A rawn ti ta mai ka lo nui ringawt .
"Ai ...ka la thui ngai lova ka duh lo "
" a ṭhat hlauh chu kan lo pui ang che,ti ve chhin reng reng rawh " ka bula nurse Apollo atanga rawn duty chuan alo ti ve bawk a, a ṭhiante pahnih lah chu an lo bu nghat bawk.
" mahse ka kut a khur nasa lutuk asin " ka han ti leh a ,a ruk tak chuan hlau viau mah ila tih ve ngei ka duhna a lian zawk .
Glove ka bun lai te chuan ka kut chu a khur ṭan nghal der tawh , chutah a enga mah hma in tray a gauze chu han thlauh nghal ringawt a ,a zam theih rem rem khawp mai .
" a pawi lo ,a dang ka va la leh ange " pakhat chuan a lo ti nghal vata ,nimina ka duty pui te nen kha chuan inang lo tak an ni .
Nurse pathum te chuan zaidam tak leh dawhthei takin a tih dan tur chu min lo hrilh zel a ,ka kut a khur nasa lutuk tih mai loh chu felfai takin ka zo thei hram, hmun ruk laiah ka chilh lehnghal .
" I ṭhui nalh hle mai " tiin min fak nghal sap sap hlawm a ,nalh vak lo mahse ka lawm ve em em tho .
" ka pu hei nalh deuhin a ṭhui sak che ania i vannei hle mai " a kawr hma badge a Lalduhawmi tih inziak chuan damlo hnenah chuan a ti a ,chupa pawh chu alo lawm thiam kher mai .
Vawiin tlai zet zawng nidanga ka la tih ngai miah loh ka ti a ,ka huphurh ang aiin nuam ka ti leh hnuhnawh.
"Hliam ṭhui hi kan peih lo thei lutuk a i lo awm hlauh chu min rawn chhanchhuak a ni ringawt " Duhawmi chuan ka bulah chuan a rawn ti sa sa a ,min fak a tum na nge an thil tih peih loh min tih tir avanga min hrilh mai mai a ni tih pawh ka hrelo .
" keichu a nuam ka ti ka vawikhat tihna a nih vang aniang " ka lo ti let nghal vat a.
" Dar 9 thleng em ni i duty dawn ?" Pakhat chuan min rawn zawt ve leh a .
" aw ...nangni in duty dawn lo em ni ?"
" keini chu dar 5 thleng chiah, zawh vat vat ka chak ka ning tawh " a tih rual chuan sana ka han en vata ,darkar khat chiah an lo nei tawh chu niin, an awm loh chuan a nuam awm lo.
Damlo an tam lo bawka Dr. Noel pehhel na tur pawh ka nei tawh lo, eng ang pawhin bihruk tum teh mah ila ka hmachhawn angai leh tho tho dawn a nih hi.
" Tete, hetah hian lo ṭhu ru " Senior nurse Nu Sangpuii chuan kan din reng avangin ṭhutna min lo kawhhmuh a ,midang chu an ṭhu nghal dial a kei erawh hreh tak chungin Dr. Noel hnaih berah ka ṭhut angaih hmel .
" A BP leh RBS hi lo check rawh " Dr. Noel an a tih chuan midang chu ka han enkual nghal a ,a ṭawng ring lo bawka keimah chiahin ka hria a ni maw.
" aw le ...Sir " tih pahin rang takin Sir bula damlo ṭhu ngui bar bulah chuan Sphygmomanometer (BP check na) leh Glucometer keng chung chuan ka va ṭhu phei ve nghal a ,nimin a thil thleng kha hria ang pawhin a awm lo.
" Ka pu a rei lo ang I kawr ban hi hlim lawk ang aw " a hriat tawk lek chuan ka ti a .
" Be ring deuh rawh "
Dr. Noel chuan thil ziah mawlh mawlh pahin en pawh min rawn en lem lo hian a rawn ti sap a, damlo beng hi a ṭha tawh lo a ni tih ka hrethiam nghal.
"Ka Pu i BP check ang aw " ring leng lawng hian a beng bulah chuan ka ti a , Dr. Noel chu alo nui vur vur ringawt .
" Ni e ,han check teh ka lu te hi a hai muai muai maia ka chau em em mai lehnghal, zanin hi ka thusawi zan alo ni lehzel bawk nen a mangan thlak asin " ka ṭawng ri a hriat takah chuan alo ti nghal bawrh bawrh a ,pa fel leh ṭawng duh tak a ni in ka hria .
"Bial pawh ka fang hleithei lo reilovah ka chau nghal zel a kan nu phei chu a hlauthawng teh asin " A BP ka check lai chuan a lo ti ti siam siam a , a ṭawng reng vang nge pawh ka hrelo vawi thum ka tih nawn hnuah pawh a pulse ri ka hre thei miah lo lehnghal.
" Ka hre thei miah lo "
" digital hi hmang mai rawh " Dr. Noel chuan a ti ta ringawt a .
" ka palpate mai ang " Digital aiin palpate hian a dik zawk.
Stethoscope ka hman theih miau loh avangin ka kut in a pulse awmna lai chu ka han hmet vang vang a, reilote ah awlsam deuhin a BP ka hmu nghal mai.
"BP- 150/100 mm Hg chuan RBS -99 mg/dl " ka sawi rual chuan card-ah chuan a ziak lut nghal mawlh mawlh a ,a serious hmel ka hmuh hian a hma ai zawngin a hmelṭha in ka hria .
" Ka pu i BP a sang deuh a ,a tih hniam nan damdawi ka chawh ang che aw " a aw a thum bawk sia a ring mawh ngei mai.
" E...aw le , min han chawh teh khai ,dam var hi ka chak tawh teh mai ania ,keini tar ho hi zawng damdawi ei te hi kan hre thei tawh lo khawp a " a lo ti duah a ,an pahnih hian an inhmeh takzet .
" UPC pastor i ni tiraw?"
" aw ni tehreng e "
" a nih chuan i damchhung in Cinod hi ilo ei tawh dawn nia " a tih chuan ka nuih a za ngei mai , BP sang damdawi ah Cinod (Cilnipidine) hi a awm tak tak lehnghal .(Synod ti a lam tur)
" Engtik thleng maw ka ei dawn a ?" A han ti leh a , Dr .Noel chuan ring leng lawng hian ," Pathian lo kal leh hma zawng zing i thawh veleh ilo ei ziah tawh dawn nia " a ti a ,a nui duh miah lo lehnghal .
Ka nuih za lutuk insum thei lo chu lehlam ka hawi vat a ,a rukin ka nui nghal chur chur ringawt.
Duhawmi te ho chuan an haw hma in thil ei phawt an duh bakah ka ril a lo ṭam ve bawk nen eitur kan chah ho a , duty dang an awm nual avangin inthlahrung hauh lovin duty room ah chuan kan eikhawm ham ham a .
" Keichu Sir saw a chhelo ka ti " pakhatin a rawn tih rual chuan kei chauh hi chhelo ti awmchhun ka ni lo tih ka hre nghal .
" I hrelo a nih kha kan vengah phei chuan a luck zia , amah hi a invawng bawk sia alo hmelṭha lehzel bawk nen " Duhawmi chuan thil hmuam ṭun chung chuan a ti a ,kan lo ngaithla ve ṭhap tho .
" Taka in veng a inang tiraw ?"
" Kan in inkarah in pakhat chauh a awm mawle "
" an sawi dan chuan a pa pawh doctor an ti " Ziri chuan a rawn ti sa sa a ,Dr. Noel chanchin engkim mai hian ka beng a verh vel vek .
" Niang chu... Tuna Medicine HOD hi a pa alawm .In ti duh unau pathum an nia doctor vek alawm an nih "
" Ehe ...nimaw ?" Ka lo ti ha ringawt .
" An upa ber hi Dentist ania Dental clinic pawh a nei chuan UNoel û chiah hi kan MO hi ania .UNoel pawn Dawrpui ah khuan clinic a nei a " kan lo ngawi ṭhap mai, sawi hmasak ber tur pawh kan hrelo , Doctor chhungkua an ni ringawt alawm.
" Bialnu a nei angem le ?" Mawi Mawii chuan ka rilru a awm tak min zawh khalh hlauh.
" ka hrelo , a hmel hi en ula hmu zo lo hmel a pu em ni ?"
Ni e ,mipa hmelṭha leh tlem a han rintlak ve deuh hi chu hmeichhe chhelo leh hmelṭha ho hian an lo chang zo vek tawh zel .
Ka kawm ve deuh ber te ho an haw zawh vek hnu chuan keimahin chair ah chuan ka ṭhu reng a ,phone khawih dawn lahin signal ka nei miah lo lehnghal.
Chutia tih tur hre lova ka ṭhut reng lai chuan male nurse Pu Thangpuia chuan puan hi alo vial mawlh mawlh a, engthil nge a tih dawn tih hriat tumin ka va pan vat a .
" Pu Thangpui kha kha engtin nge i tih dawn ?"
" a dar hi a pelh a ,kan siam dawn a nih hi "
Ka vawikhat hmuhna tur a ni bawka ka mit a la nghal zar mai.
An tih dan vel chu ngun takin ka lo en reng a , puan chu damlo zak hnuaiah chuan an vet a chhak lam aṭangin intern Dr. Ruatpuia chuan a theihpatawpa na hian a han pawt ṭang ṭang a chutih lai chuan Pu Thangpuia chuan damlo ban chu alo pawt ve ṭang ṭang bawka ,an siam ṭha lawk thei lo lehnghal .
" le vawikhat leh aw " tih pahin an han pawt leh tak tak mai chu ka thaw hi a lo chham ṭep ṭep ,damlo pa hi a tawrhchhel mai pawha vai chu nise an ṭap pur leh tawh ang .
" Tete ..a in vuah dik nge dik lo han khawih lawk teh " Pu Thangpuia chuan a rawn ti ta mai ,engtin nge a in vuah ṭha chu a awm tih pawh ka hre reng reng hleinem.
" aw le "
Ngawi rengin a dar chu ka han khawih chhin vel a ,a hma in la ti ngai miah lo mah ila a in vuah fuh leh fuh loh chu a hriat ve lutuk .
" a dik ṭep " ka ti takah chuan a aia na in an han pawt leh vak a ,thlan tla phunga an pawh hnu chuan a rawn in vuah fuh khap mai .
" a dik...tunah khan a in vuah fuh chiah " a dar khawih pah chuan ka ti nghal vat a ,Pu Thangpuia pawh chuan a han en dik ve leh a ,a dik aniang engmah a sawi lo.
" Pu Thangpui POP (Plaster of Paris) hi ka lo vuah sak dawn em ni ?" Tihsak ve hrim hrim hi ka chak ,ka vawikhatna tur mah nise.
Pu Thangpuia puihna in damlo banah chuan POP chu ka bel saka ,a har vak lo bawka kut a var duh tih mai loh chu a nuam ka ti .
Thil thar ka tih ṭeuh avangin ka hlim ru veng veng mai ,bakah tlai lamah hi chuan OPD an khar tawh avangin damlo an tam ṭhin a doctor ho pawh an in daih ngai lo an tih ang tak tak in reilovah ER chu damlo in an khat leh hmur tawh a Dr. Noel pawh a buai leh tawh char char hle.
Mak ka tih deuh chu ui seh, zawhte seh leh pum na hi an lo awm tel ve ngei ngei ,tunah pawh ui seh chiu tur pahnih ka nei .
Ka chiu tur pakhat phei hi chu hmeichhe naupang kum7 mi chauh a ni lehnghal ,a tal nasa leh mai dawn sia chiu leh loh mai te ka duh mahse IM tal hi chu tih ve ngei ngei ka duh leh lawi bawk sia.
"Man beh angai dawn em aw ?" Syringe ka hnunga thuhruk tlat pah chuan ka han ti te te a ,alo hlau ngang mai a ṭap nghal .
" ka pi a ke hi lo kherh bet tlat rawh aw " ka tih chuan ka sawi ang chuan a fanu ke chu a kher bet tlata mahse chiu ka tum chiah chu ṭah pahin a tal ta vak vak mai a nu meuh pawhin a man bet hneh lo ,ka vih sual ka hlau ve bawk nen kan beidawng ṭhak .
" ka pi lo kuah bet tlat mai rawh a ban a chet loh chuan a tawk mai " ka han ti tak na in a man bet hneh leh dawn chuang lo tih ka hre reng.
" ngawi lawk rawh midang kan ko mai ange " ka ti leh ta zawka .
Lo man bet tu tur koh ka tum lai tak chuan ka hnung lam aṭangin Dr. Noel chuan naupang chu a rawn pawm kang nghal dawrh a ,a lian bawka a hneh ngang mai.
"Tihian rawn vit rawh "
Che thei lovin naupang chu a pawm bet nghal tlat a,kei erawhin mak ti takin ka lo en reng ringawt .
" Vat .." A rawn ti leh a ,naupang ṭap nen lehlamah na tuar an lo rum ve bawk nen thaw a ipik takzet.
" aw ...aw le " tih sap pahin buaina awm miah lovin ka jection a , ka thlan te hi a tla phung tawh mai.
" Pawnah reilote va chhuak rawh " Chair a ṭhut pah chuan a ti bung hmut a ,a ngaihna ka hre lo hle.
" Engvang chuan maw ?"
" Thawk va la kawk kawk la i rawn lut leh dawn nia "
Ni e, kan vei suau suau a kan ri hut hut bawk nen rilru mumal pawh ka pu thei tawh lo , injection na tur damdawi ka siam mawlh mawlh laiin a dang tam tawk an rawn dah leh ṭawk a ,damlo na tak tak an rawn luh belh zel bawk a ,kei takngial pawh ṭhu hman lo khawpin ka buai.
Pawna chhuah pahin sana chu ka han thlek zeuh a darkar khat lai ka la nei ,ka haw hun tawh se ka ti takzet .
Minute 2 pawh ka awm hman lo ang tih in tlangval pakhat berh zet mai hi a nu niawm tak tar ve tawh deuh hian a rawn kalpui hnak hnak a, chupa lah chu zu rim a nam huam lehnghal.
" ka pi a eng nge na ?" Ka va pan nghal vat.
" hei a kut hi a zai a , ka puan in ka rawn hup sak tawp mai a nih hi " a aw aṭang ringawt pawhin a hlauhthawn zia a hriat theih.
" hetah hian card lo la la ka lo va hruai lut ange " a kut puana a hup na chu ka hup sak nghal a ,inchhungah ka luh pui nghal .
Khum kil berah chuan ka mut tira chupa lah chuan rui deuh phel phual hian ," ka nupui in min duh loh chuan ka thi anga ni mai alawm , hmangaih ber te chan ai chuan thih pawh ka ngam sak" ala ti ham ham zui.
En tur ṭul ang ang ka en fel hnu chuan card ah ka ziak thla nghal vek a ,angai te bawkin doctor ho zawng zawng chu an buai vek bakah Dr. Noel tho an zawh leh dawn avangin ka va pan ta nge nge a .
" Ngatinge i rawn luh leh ?" Alo ti thum dut mai .
" Sir ,i lo en lawk thei angem? Amah leh amah a inzai a" ka tih chuan a tho nghal vat a , chupa chu khawiah nge a inzai , ṭhui angai em ? Tih nen lam a endik nghal zung zung a, kei erawh in a kut zaina chu ka lo tihfai sak mawlh mawlh thung.
" ṭhui angai ang , heng ho hi a chhungte lei tir la ,i ṭhui zawh ah NS ,RL leh D5 hi i khai sak dawn nia a kulcho a nih hi chuan vitamin hi hetah hian telh bawk ang che " a ti nghal zung zung a ,lehlamah an lo ko ve bawk nen rei pawh a awm hman meuh lo a kal lehnghal.
Dr. Noel sawi ang chiahin a rawn hruai tunu chu leitur list chu ka pe a ,a tar ve tawh ang reng sia ka khawngaih ru takzet .
A thisen tihtawp ka tum lai chuan a kut lehlamah doctor intern ve tho Reuben leh nurse pakhat chuan venflon an lo vuah sak mawlh mawlh a,kan buai em em laiin chupa lah chuan ," thih ka duh ,ka nupui ka neih theih dawn loh ai chuan ka thi mai ang " a lo ti thul ,kan chhangchhe ngei mai .
" A nu kha ala rawn let lo em ni ? " Reuben chuan min rawn zawt a .
" aw ...a kal rei em mai ka va en ange " tih leh tlan chhuah ka rual nghal .
Canteen ah a intlar a nih ka lo rin laiin pawn ṭhuthlengah a lo la ṭhu heu mai ,leitur list ka ziahna paper keng va chung chuan alo ṭhu kun lap a ,hrilh ngai lovin thil diklo a awm a ni tih ka hrethiam nghal .
" ka pi eng nge ni ta ? Kan lo nghak reng che asin " kan ti sap a, a engkim mai hi ka lainat vel vek .
" mami hei aia tlem hi a lei theih loh em ni ?"
" ka pi kan ziah thlak ho hi lei ngei ngei angai " a pawimawhna te leh lei ngei ngei angaih na chhan te chu ka hrilhfiah nghal zung zung a mahse buaina ala awm cheu chu chu leina tir pawisa a nei tlat lo hi a nip .
" i chhungte ka phone sak dawn che mi ?" Ka han ti leh a .
" tumah an awm lo ,a nupui in a chhuahsan a ka hlawh chhuah ve apiang lah hi a zu manah a zo zel mai si "
Ka pa hi zu heh ve tak a ni a a sawi engkim mai hi ka lo hriatthiampui ,a hrehawm zia pawh lo tawng tawh tu ka nih avangin ṭanpui ngei ka duh .
" hetah hian lo awm rawh " tih pahin leitur ziahna lehkha chu ka la a ,canteen lam panin ka tlan thla nghal .
" catgut kha 2-0 aw chuan D5 kha pahnih i dah tel bawk dawn nia "
TT ,drip khai tur bakah vitamin tih vel lei tur a awm nual avangin ka in seng ve ṭeuh a ,haw na tur pawh ka nei daih tawh lo mahse Muani ka in hruai tir mai ang .
Khawmuang hman ka nih loh avangin hmanhmawh takin ka tlan chho lehnghala, NS chu an lo khai sak nghal mawlh mawlh bawk.
" Tete ...a hma in i ṭhui tawh em?"
" aw "
" anih chuan nangman ṭhui mai rawh Reuben hian damlo dang saw lo va en mai rawh se " nurse duty U Tluangpui'in a tih chuan a hma in ka lo ṭhui tawh avangin ka hreh lem lo .
Tlemin la khawr deuh mah ila UTluangpui in min pui bawka rei lovah ka zo vat mai.
" Tete ,haw ila taxi kan la mai dawn nia " kan Receptionist Nu Lk-i chuan min rawn sawm a ,kan veng a in an avangin kan duty rual chuan kan haw dun mai ṭhin.
" umm...Nu Lk zanin chu pawisa ka nei lova, lo va haw hmasa mai rawh Muan'in min rawn hruai mai ang " kan in ngam bawka tlang takin ka lo hrilh nghal mai a .
' I nau in a rawn hruai dawn tho che chuan ka lo va haw mai ang "
" aw le , a ni pawh a rawn thleng vat mai ang " ka ti sap a ,a ruk tak chuan rawn thleng har ka ti tawh hle .
Noel's POV
Dar 9 a rik tawh avangin min duty thlak tur te ho pawh an rawn thleng kim vek tawh a, kan buai zualpui pawh a reh tawh nghe nghe .
Kan haw hma in kitchen ah Reuben nen chuan intih thawven pahin zial kan han zu leh te te phawt a, kan zu ru e ti lo chuan Jennifer'in min rawn man leh chat tawh.
" Noel ka zawng che alawm ,i chau em?" Dr. Jennifer hi min rawn thlak tu tur a nia, ka zial zu ru lai hi min man fuh ziah lehnghal .
" kha heihi in rawh " tih pahin keimah chiah coffee min rawn pe a, Reuben nen chuan kan in melh hruk ringawt.
" Maam ka lawm e " intern ka tih lai aṭang tawha thawk tawh a nih avangin tun thlengin Maam tiin ka la ko.
" tikhan min ko ziah suh ,Jennifer min ti mai rawh "
" ok...ka û te inah kal ka ngai ,ka kal mai ang mangṭha le " tih pahin ka chhuak nghal daih a ,Reuben pawhin min rawn zui ve nghal .
" uNoel Maam khan a ngaizawng chiang che "
" ka hria alawm " khik suk pahin Duty room aṭang chuan ka chhuak nghal a .
Dr. Jennifer hian intern ka tih lai aṭang tawhin min ngaizawng tawh, hmeichhe chhelo leh hmelṭha tak a ni , kei aia a upat leh upat loh ka care lo mahse hmeichhia hi ka duhzawng te an nih loh chuan ka buaipui peih lo.
Pawna ka chhuak tur chu pitar pakhat hian min lo ko ding a ,ka hawi let nak chuan nichina ka damlo mahni leh mahni inzai pa nu kha lo ni rengin.
" ka pi eng nge ni ta ?" Ka ti vat a .
" Doctor , nichina ka fapa enkawl tu nula kha ka hmu leh ta miah lova lawmthu min lo hrilh sak thei angem? " a tih chuan Pharmacist intern ti nu kha a ni tih ka hre nghal ,mahse a hming erawh ka hrelo .
"Aw le " ka bo deuh hu mai .
" damdawi man zawng zawng min tum sak veka a ni kha awmlo se chuan ka fapa nen hian buaina nasa tak kan tawk ngei ang ,lawmthu min lo hrilh sak theih chuan ka lawm hle ang " tih pahin inchhungah a lut leh hnak hnak a .
Kha pitar thusawi kha ka rilru ah a cham reng mai ,khatiang thil kha tuman tu chungah mah an ti ngai lovang kei ngei pawh hian ka la ti lo .
Haw ka tum zet tawh na in kha Pharmacist nu khan haw na tur pawisa a neih loh thu leh a nau in a rawn hruai tur thu a sawi rik lai vel te kha ka hrechhuak thut a ,ER-ah bawk chuan ka let leh ta nge nge a.
" Reuben khawiah nge Pharmacist intern nu kha a awm ?" Ka va ti thawr a, mak a tih hmel em em lehnghal .
" E...Tete-i kha maw ? A haw tawh a ni lawm ni "
" a nih chuan angai leh lo mai, mangṭha le " tih leh chhuah ka rual nghal, tihtur dang nei miau hek lo .
Nimin ah lah khan kha nu kha Doctor intern emaw tiin ka vin hrep lehnghal ,a thinrim hmel kha tun thlengin ka la theihnghilh thei lo chu a nih hi .
Ka û OP-a te in ka thlen chuan ka car chu garage-ah ka dah fel te te a ,keimah ni in ang mai ah ka ngai leh hmiah tawh .
Inchhung ka luh rual rual in ka û nupui Apuii chuan min lo nuih nghal sang a , kan upa ber Joseph-a nupui nen chuan inang lo tak an ni .
" khawiah nge naupang ?" An fate pahnih an lo awm loh hi chuan a nuam lo .
" an mu tawh... OP pawhin ala nghak che"
" ok...coffee ka duh aw " tih zui zat pahin living room lamah ka lut phei nghal a .
" Noel , i hlawh tur chu i account ah ka thun tawh " a damloh avangin hlawh neiin a ai ka kala, tlai tin ka ning thu ka hrilh ziah ṭhin bawk .ER kher kher hi chu a ninawm hut hut em a tin ni .
" i va ti ṭha ve Op-a nge nge "
Kan tetlai aṭang tawha û duh lo ngat kha ania tun thlengin ka û loh phah .
" naktuk chiah i kal tawh dawn bawka i lawm em? Ngatinge zanin chu i nin thu iva sawi lo ve " a tih takah chuan ka ngawi vung vung a .
" Op... Kar hnih chhung chauh ka kal sak leh ang che "
Kei ngei pawhin ka kã aṭanga chhuak a nih ka ring bik lo .
" Engmaw ?"
" lungngai suh ,a thlawnin ka lo kal ang ...ka hna ka zawm hma " ka tih phei chuan a mak ti lutuk chu a mitmu a tla lo chauh .
" thil ei sual i nei em ni ? I chiang chiah amaw ?" A rawn ti nawn leh ngat a .
" Chiang bik nang "
Ni e ,engvanga kalsak duh thut nge ka nih pawh ka inhre bik lo ,ka rilru ah a rawn lang thut a ka sawi chhuak ve mai mai aniang .
"Thil dang a awm a ni maw?"
" nangmah ka ngaihtuah vang che a nih kha ,in enkawl ṭha rawh "
Ka û vanga kal duh thut ka ni lo tih chu ka inhrechiang mahse engvanga ER a kal duh leh thut nge maw ka nih ni ?
(fakna kha aw..)
0 COMMENT:
Post a Comment