May 11, 2020
I LOVE U 3000
(I Love you three thousand)
By Remruati Bawitlung (Haylor)
(ka thawnthu ziah ho hi a vaiin lehlin ni lovin keima îr awm chhuak ngeia ka ziah te vek an ni)
Prologue
ka ṭhian ṭha ber leh naktuk maia kan inneih na tura ka best man tur ni bawk Rinhlua chuan min rawn ben thurh pah hian a rawn ti a.
" nangpawn fa pahnih i nei tawh a engah nge ka neih loh bik ang " kum41 ka tling dawn tawh a amak viau na pawh ka hrelo.
" hahh...i damchhung in tlangval senior i nih kan lo ring vek hman tawh kha ania ,engpawh chu nise Mamuani chuan in room tur chu i duhthusam in a chhuah thei em?"
" umm...Interior designer unau nu i lo nei hlauh chu ka hlawkpui ta ber a nih hi "
" Noel....heihi i wardrobe ah ka dah dawn nia "
Designer tuxedo mumbai aṭanga kan order ngat chu ka nu chuan ka room lamah a khai chho nghal a ,kei meuhin nupui ka neih dawn takah chuan kan vai mai hian kan buai luih luih ni mai hian ka hria.
"Sangsang " kan florist hire chu ka ko a.
" ka sawi ang khan i ti ta em?"
" aw ...lily var vek ka hmang ,thil pakhat a senno pawh a nalh viau asin in room atan bik hian ka hmang duh angem?"
" ai ...a var vek a duh kher kher Lal ti kherkher-a hian " Rinhlu'an min lo chhan khalh.
" a sawi ang chuan " ka kekawr ipte zen pahin ka lo nui ringawt.
" Noel, lo kal lawk teh " Mamuani chuan min rawn ko a.
" Lo han kal rawh mikhual ho ka lo va buaipui ange " tih pahin Rinhlua chu a kal nghal a keipawh ka room lam panin ka chho ve nghal.
" I sawi ang khan parda ah hian satin offwhite ka hmang a ,a ruka rang kher kher kha i duh bawk sia hei chiah hi ka hmu a a pawi em?" Mamuan'in a tih lai chuan uluk takin parda chu ka khawih a ka duhthu a sam hle .
" Closet pawh hi darthlalang leh LED light a tam thei ang ber i sawi ang khan ka dah a, duhthusam loh lai a awm anih chuan siam ṭhatna hun ala tam ania " hawi kual pahin ka nupui walk-in closet tur,kar hnih ngawt kan buaipui tawh ah chuan kan pahnih chuan kan kal kual vel a ,engkim mai chuan ka lung a dum hliah hliah .
" sawisel tur ka hre lo " ka tih takah chuan Mamuani pawh a thaw huai mai alawm.
" a tir aṭangin i uluk bawka, ka kutchhuak ah chuan ka chhuan pawl tak aniang mahse nang anga client khirh erawh an la awm lo " kan in ngam bawka engah mah ka ngai lem lo .
" E...taka Noel heihi khawiah nge ka dah ang " tih pahin box dum lian vak lo hi a rawn la chhuak a ," dawhkan ah khan dah mai rawh " tih bakin ka chhang lo.
Mamuani a chhuah hnu chuan box dum melh ngut ngut chung chuan couch ah ka ṭhu renga ,engthil nge a chhungah awm tih kei aia hrechiang an awmlo.
Rei tak ka rilru a insual buai fe hnu chuan thawk chhuah hawk pahin box chu ka hawng ta nge nge a, engdang nilovin kum10 kalta a ka thil dahṭhat te vek kha an ni .
A hmasa berah bakilh senno hlui tawh zet mai hi ka la chhuak a,thil hriatchhuah ka neih avangin ka lak chhuah rual chuan ka khi nghal suk a.
A dawt leh ah chuan thlalak , lipstick bakah lehkha them pakhat hi ka la chhuak nawlh mai! chu lehkha them a thil inziak chu kut khur dar dar chung hian ka han keu a ka chhiar rual rual chuan ka inrin hma in ka mittui chu a rawn tla nghal sawk a !
Thu inziak chu engdang ni lovin hei mai te hi
' I LOVE YOU 3000 '
-----------------------------------
CHAPTER-1
"I want to be the girl you fall for when everybody else is falling for you "
•Tetei's POV•
☆CIVIL HOSPITAL, AIZAWL☆
Vawiin ni hi Emergency Room (casualty) a ka duty ni hnihna tur a ni a , ka kal tlai mai bakah intern chauh ka ni bawk nen ER (Emergency room) a lut tlang kher lovin inchung lam aṭangin ka hel ta ringawt a, chuta ṭang chuan duty room a pawh nghal
vang a ni .
Tlai lo niawm ang taka lan ka duh avangin thawm dim thei ang berin duty room ah chuan ka lut zal zal a ,vanneih thlak lutuk in tumah an lo awm lo hlauh .
"Hmangaihzuali hi engvanga phone la thei miah lo nge maw a nih le ?" Phun bui bui pahin ka coat var chu ka ha sawk sawk a ,rack ah ka bag fel taka ka dah hnu chuan zung turin zun in lam ka pan nghal a.
Kitchen Kawngka ka hawng chiah chu zial rim ka hre nghal chutah a khu in a rawn zui nghal bawk.
" no smoking ti na nã na "a khu vai kian pah chuan ka ti kher a .
ER ah hian inthiarna hi mipa leh hmeichhia a awm hran lova , mipa ho hian zial zuk ruk nan an hmang ṭhin bawk nen a ninawm takzet.
Inthiarna chu a pahnih chuan alo inkalh ve ve a, zun chhuak ṭeuh chung hian rawngbawlna bulah chuan ka lo nghak ran a ,zial an zuk zawh hma chu ka nghah ala angaih hmel .
A tawpah phei chuan ka nghak thei tawh thlawt lo ,thinrim ṭun chungin kawngkhar kik tuma ka kut ka lek kang chiah tih chuan a rawn in hawng ta thut mai !
" ka rei em?" Tih thum dut pahin mipa pakhat hi a rawn chhuak nghal a, a hmel ka hmu chiah chu ka khawng nghal vek ringawt .
Ava han hmelṭha chiang tak !
"Sawi miah suh " kal pahin a zial ken lai chu bawlhhlawh bawmah a paih nghal zeuh a,ka en zui vawng vawng mai .
" a van chhe lo em em , tunge a? Ka thinlai nghal " Zuali pawh a rawn thleng ve ta nge nge alawm.
" ka hre bik lo a hmelṭhat zia kha " ka ti sap ringawt. A aw kha mipa ah pawh aw thum chi ani bawk a zûn a nei bik hliah hliah.
ER ah hian kan awm thar ve chauh avangin intern leh nurse tlemte bak hriat kan la nei bik lo ,nikhat chhung lek pawhin Zuali erawhin kan Emergency technician chu a duh hlum lo chauh leh tawh kha.
" a sang bawk si ft6 a tling hrim hrim "
" engpawh chu nise ka zun a chhuak " tih pahin luh nghal daih ka tum a .
" keipawh a chhuak ve tho " Zuali pawh chu a rawn lut ve nghal a ,kan pahnih chuan a chep a chep in kan zung dun ta ringawt a.
Damlo an la awm loh avangin Zuali nen chuan ngawi rengin kan ṭhu dun kar a , MBBS intern pahnih Mapuii leh Amawia leh Ayush intern ti lai Irene te erawh keini aia lo awm rei tawh an nih avangin receptionist bulah titi pahin an ṭhu phei daih thung .
" Pharmacist intern pahnih te kha hetah rawn kal teh u "
Emergency technician U Nathan an a tih rual rual chuan kan in perh tho nghal , U Nathan hi en mai pawh hian ala naupang tih a hriat alo berah kum26 vel chiah aniang.
" heihi in attendance register tur ania nitin hetah hian in sign dawn nia. Zuali eng nge i hmingpum ?"
" Hmangaihzuali " UNathan chuan register ah chuan a ziak nghal a .
" Tete ...nang?"
" C. Zomuansangi " ka lo ti vat a.
" Attendance ah hian ka strict dawn a kal loh mai mai phal a nih dawn loh avangin damloh tih vel kha chhuanlam a tling dawn lo ania ,in duty roster pawh ka tar nghal ang"
UNathan hi Pharmacist intern ho bik incharge a ni a ,min buaipui tu ber a ni bawka ka nel ber bawk.
" Damlo an rawn kal hunah pawh tuman ti turin an ti dawn lo che u chuvangin ṭhahnem ngai ula tih tur in lo chuh ve vat vat dawn nia ,in tih hnem leh in thiam hnem a ni mai "
Kan pahnih chuan ka bu nghat a , thuawih lo viau ṭhin mah ila tun ṭum erawh kan zia kan thup dun chiang hle, midang hi awmlo se chuan Zuali nen chauh pawh ṭawng kan in chan ngai lo.
Minute 5 pawh kan ṭhut hma chuan pa upa tawh lampang hi hmanhmawh takin an rawn zawn lut a ,an bengchheng bawk aniang kan vai mai chuan kan tho nghal suau a .
" pakhat in pawnah sawn card lo va la ula,mi pakhat chauh in a awmpui theih a dang zawng chu chhuak vek rawh u " UNathan chuan alo ti nghal zung zung a, doctor intern ho chuan damlo vital chu an lo lak sak zung zung a ,Zuali nen erawh tih tur hre lovin midang tih dan chu kan lo en reng ringawt .
" Ngatinge? A khawi lai hi nge na ?" Damlo awmpui tu chu a zawt a .
" A hna thawk lai inchung aṭangin a tla a,a nak leh a ke hi na a tia "
" ka pu na dang i la nei em?"
Damlo biak pahin UNathan chuan a endik nghal zung zung a.
" UNathan SpO2-85" Mapuii chuan oximeter damlo kut aṭanga phawi pah chuan a ti a .
" O2 (oxygen) kha rawn pe rawh "tiin a chhang nghal bawk.
Damlo nak duk raih te leh a ke ruh tliak niawm tak te chu hmu tho mahse Doctor a nih loh avangin engmah a ti thei bik lo ,engkimah Doctor order nghah phawt angaih vang a ni .
" Nu Sangpui khawiah nge Sir hi ?" UNatan chuan senior nurse chu a zawt ta nge nge a .
Ni e, vawiin a MO (Medical officer) duty tur hi zing aṭang khan ala awm miah lo .
"Intern ho sawn an ti thei lo em ni ?" Zuali chuan alo ti nghal vata .
" Ai...intern ho chuan engmah an la hre tak tak lo MO guide na tel lo chuan a hlauhawm lutuk " Nu Sangpui meuh pawhin tih ngaihna a hre bik lo.
" Damlo chu eng na nge ?"
Aw thum dut mai kan hriat rual chuan ka hawi rual nghal ṭhawt a ,rin loh lutuk maiin tukin zinga kan mi hmuh chhelo leh hmelṭha zet pa kha lo ni rengin .
"Sir, Inchung aṭangin a tla a ,a nak leh a ke hi na a tia ,a nak hi a duk deuh tih loh chu thisen chhuak erawh a awmlo " UNathan chuan a hriat ang ang chu a hrilh nghal mawlh mawlh a.
" Vital ?" Tih pahin stethoscope chuan a awm vel chu a ngaithla kual a.
" BP- 130/90 , SpO2 - 85 , PR- 75 , RBS-99 chuan a khua a sik a ,a temperature hi 101°F " Male nurse duty ve tho Pu Thangpuia chuan alo ti ve bawka .
"Dinglam ah hian a lungphu ri ka hre miah lo , Intern pakhat khan X-ray ,ultrasound leh test tur dang kha lo va ziah sak ula, patient dang saw a ṭhen khan lo va buaipui rawh u " a tih rual rual chuan an phe nghal suau a, midang an buai em em laiin Zuali nen erawh tih tur hre lovin damlo bulah kan lo ding reng ringawt.
" Pneumothorax (chuap leh awm inkara boruak leak awm) a niang a" UNathan an a tih chuan Sir chuan a kutṭang hmawr chuan damlo nak chu a han chhu keuh keuh a.
" hemothorax (thi tling ) a nih hi ,kan confirm phawt dawn nia "
Avan hre thei em em, a confi em em lehnghal !
" Tete Syringe va la la ,Zuali nang spirit ?" UNathan'an a tih rual rual chuan thil hote mah nise kan chiai nghal der , Zuali aiin ka chiai nasa zawk lehnghal .
" kha...kha syringe chu " hriau chhin hawn pah in khur dar dar chung chuan Sir chu syringe pek mai ka han tum a chhuatah ka la thlauh zui .
" a dang va la leh rawh " nel awm loh zet hian a ti hmuk ringawt .
Naaa....hriau chhin kha ka lo phawi kher kher a ni ,adang lak leh angaih phah.
" aw le " thuawi takin Syringe la tur chuan ka tlan lehnghal.
Syringe a vawihnih na tur chu thlauh miah lovin ka pe thei hram.
" Spirit-in rawn hru vat ta che u " engmah ti lova kan en ṭhup ringawt avang chuan a rawn ti vin hlur ringawt . Avan thinchhe reuh tak.
Rang takin Zuali chuan damlo nak ah chuan spirit chu a hru kual nghal sawk sawk a , Sir in syringe chu a vit lut nghal a a sawi ang tak tak in thisen a hip chhuak ! A awmzia chu Hemothorax tihna.
" Nathan....OT (operation theatre ) lam han bia la engkim an test zawh hnu ah result azirin emergengy a zai angai ang ,Pa Thangpui angai dang chu i lo buaipui mai dawn nia "
Damlo chu test chi hrang hrang ti tura an zawn chhuah hnu chuan ka thawveng nghal huai in ka hria, khatiang ang damlo kha awm reng ta se chuan thawchham in ka tlu thei mai ang.
" Tete ...Sir hming saw ka hre tawh asin " Zuali chuan a rawn ti su su a.
" Tunge?" Ni e,ka hre ve chak tho alawm .
" Dr. Noel ...nurse duty ho in an sawi ri ka hria a ,a luck hmel lutuk "
A awm ve tho a chhelo em a tin ni , helai ER a duty te ho hian ka star ṭhup nimai hian ka hria , ani erawh a buai in kan awm ve tih hria ang pawhin a awmlo.
" Damlo pumna leh luak saw Pantop, Difen leh Emigo lo zuk leitir rawh " Sir ṭawng ri ka hriat rual chuan ka hawi phei nghal vat a,min lo en kûr ringawt .
" kei...keimah maw?" Ka la ti hu zui .
" aw nangmah " amah hnaih berah ka awm avangin min tir tih hriat reng reng .
Lehkha themah chuan inti Pharmacist tawkin Pantop pawh ti duh lovin Pantoprazole ka ti kher a, Difen pawh Diclofenac ,Emigo pawh Ondansetron tiin ka ziak kher bawk .
" ka pi heihi lo zuk lei rawh aw " a rawn kalpui tunu chu lehkha them chu pek mai ka han tum a. Sir chuan register-a thil ziah mawlh mawlh pah chuan ,"syringe i leitir dawn lo em ni ?"a rawn ti ta mai!
Naa...engvanga theihnghilh nge maw ka ni le?
Lehkha ah chuan 10cc leh 5cc ×2 tih ka ziah belh leh a , rawn sawi lo phei se chuan a zuk kal nawn leh angai dawn tihna a ni. Pawilo a awm ve tho e, ka ni hnihna chiah ani tho tiin kan in hnem ta vel mai mai.
" Tete... i IV (Intravenous Injection) ve duh em?" Zuali chuan duhsak takin min rawn zawt a mahse vein vih hi ka la tih ngai loh avangin ka huphurh hle .
" ai ...tunah lo , IM (Intramuscular) ka ti duh zawk " tiin ui seh damdawi Abhayrab chu ka la a .
" IM te chu dressing ah pawh i tih ṭeuh tawh kha , kha ...ti ve chhin rawh " Zuali hi chu MLT a zawh hnu ah Pharmacy diploma ti leh hnuhnawh a nih avangin injection te mai mai chu hnehsawh tak a ni ,zir leh pawh angai tawh lo.
" ka lo pui ang che "
UNathan meuh in a tih takah chuan ka hnial ngam tawh lo, huphurh tak chungin syringe chu ka la a, hreh nak alaiin Pantoprazole ala ni zui 10ml lai a ni lehnghal .
" khawi ui seh chu ka lo va chiu ange"Zuali chuan ka anti-rabies ken lai chu a la a,a kal daih lehnghal.
UNathan chuan damlo pumna avanga mu reng ban chu a han en vela, ka vihna lai tur vein chu duhthusama vih nuam tura puar hian min hmeh saka chutichung pawh chuan ka zam lutuk hi ka kut te a thlan vek tawh.
" hetah hian " ka vihna lai tur chu a han khawih a ,chil lem dak pahin ka lo bu nghat a .
" ka...ka vit dawn nia " thawk chhuah hak pahin hriau chuan ka han tin a, ka kut chu a rawn khur ta dur dur mai,ka kut ai mahin ka lungphu a rang zawk.
"A hlauhawm loh " min bengdaih tumin ka kut khur nasa lutuk chu a rawn hum a, " muang changin i vit dawn nia ,a dik loh pawhin a hlauhawm loh "
IM aiin IV hi a hlauhawm loh zawk tih hre tho mah ila ka kut khur nasa lutuk erawh a reh thei chuang lo .
Ka tih ngei ngei angaih avangin mit siai deuh chung hian ka vit ta nge nge a ,ka kut a khur azarah ka duh na laiah pawh ka vit lo lehnghal .
" le...tlemte pull rawh le " a tih chuan IM ang tho in tlemte in ka han hip let a, vanneihthlak lutuk in thisen ka hip chhuak ,a dik hlauh !!!
" a dik...haha...a dik " tih pahin muang changin damdawi chu ka han kap lut zal zal a mahse ka kut a khur nasat em avangin a vein chu a rawn puar ta mai !!
" lawk...a puncture a nih hi "
" ka phawi dawn em ni? " ka tih chuan UNathan chu a bu nghauh a ,mahse phawi leh ka tum lai tak chuan damlo chuan syringe chu chhuatah chuan a rawn vai thla pawp ringawt .
"Hetiang thiamlo lutuk vih ka duh lo ,midang khan min rawn jection rawh u " damlo thinrim chuan ring zetin a ti ta lung lung mai , ER a awm zawng zawng chuan min rawn en nghal ṭhap a, Dr .Noel pawh a bang bik lo.
" kal rawh ka tih chu i jection ka duh lo "
" Tete ...lo va kal mai rawh ,heihi chu ka lo ti mai ang "
UNathan'n a tih takah chuan ka kut khur nasa lutuk hum beh pah chuan duty room ah ka tlan lut daih a,ka zak bawk si thinrim bawk nen ka ṭah te hi a chhuak zawk.
Midang hmuh ka hreh avangin duty room ah chuan ka awm renga, a nihna takah chuan Dr .Noel ka hmuh hreh vang a ni mah zawk.
Duty ho chuan chhun thingpui in paha an ṭhut khawm ṭhap lai chuan kei erawh thingpui no keng chung chuan ka vei deuh chhen renga ,an vai mai hian ka zah ngawih ngawih ka ngaihbel vang nge pawh ka hrelo thil thleng chungchang kha engmah sawi lo mahse min en duh ta riau hian ka hria .
" Dr. Noel khan hemothorax a ni tih a hre nghal mawle " Mapuii chuan ngaihsan hmel tak hian a ti lawng lawng a.
" Surgeon a ni alawm " Nu Sangpuii chuan alo ti vata .
" Specialist maw?" Amawia chuan mak tih hmel tak hian a rawn ti haw bawk .
" Cardiac Surgeon a ni tih in lo la hre ve nange a zir chhuah hnuah private hospital ah kum1 a thawk tawh a mahse hetah hna a hmuh avangin thla thar aṭangin a rawn ṭan ang " kan rin aia a lo bawn daih avang chuan kan vai mai chuan kan meng buai nasa mai.
" ER ah a duty tawh reng hi " Amawia bawk chuan a zawt leh a .
" A û an zai avangin a ai a kal hrih mai mai alawm " Pu Thangpuia'n a tih chuan kan in en ha hlawm mai .
A û MO maw ni a , an uau in Doctor an ni amaw ? An va bawn bik ve .
" mahse a thinchhe emai nichinah pawh min vin hrep intern ti lai engmah hrelo kan nia min hrilh tur zawk ania"
Kalna pawn en lek lova ka rel zuah zuah lai chuan Dr. Noel chu a rawn lut ta thut mai!! Ka su chawrh a chu aia pawi zawk chu ka thingpui ken lai chuan a coat var sar chu a ti ṭial vek a nih chu !!
" awi ....Sir ,ka tilui miah lo ania " ka kut chuan kan han beng thuak thuak a,a aiin a ṭial nasa zual .
" Engthil nge maw i tih le ?"
Emergency ward-a Nurse duty thinchhe zet mai ,a thinchhiat avanga ṭeki an tih mai chuan min rawn vin nghal hlar a, U Ivy vin nih hi ka duh lo asin le .
" a pawi lo ,engmah a nih loh hi" rin loh deuhin Dr. Noel an a tih takah chuan U Ivy pawh a thinrim ngam bik lo ," kal ila " zaidam thluam hian a han ti leh a, an pahnih chuan Emergency ward lam panin an inzui chhuak nghal a.
" Tete ...lo kal lawk teh " thingpui ka in laklawh lai chuan UNathan an min lo koh avangin laklawh pawh sawi lovin ka tlan phei nghal hlawk hlawk a.
" Eng nge ni ta?" Inla polite fahran hian ka ti a, damlo jection na tur damdawi alo siam mawlh mawlh chu niin .
" min lo pui lawk rawh ,a ban saw hmeh angai a "
" aw le "
Damlo vein chu hmehpuar tumin ka han hmer ngial a ,tlangval sek ve tak alo ni bawk nen ka ṭang bawka ka thlan a tla hluam mai .
" ka tihdan hi ngun takin lo en la engmah hlauhawm a awm lo ania"
Zaidam tak hian a ti a, tunah tak khan UNathan aṭanga ka lo hmuh ngai miah loh Zuali chiahin a lo hmuh ṭhin a ṭhatna chu ka hmu thiam ve chiah.A zaidam in uluk takin min hrilh zela midang anglo takin kan thiamloh hi a hlau hliah hliah zawk .
Reilote ah awlsam deuh hian a chiu zo nghal mai a , a ni ai ai in ka lo hlau zawk hriau hi ka ngaina lo ve em bawk a ni.
" kan paih nghal ange " rang takin syringe chu paih turin ka la nghal a, inchiu ai chuan hriau destroy ka thiam zawk .(Hriau hman hnu hi electric destroyer ah an hal chhe vek ṭhin )
" ding lawk teh " mak ti takin ka hawi let vat a .
" i thlan a tla a nih hi " tih pahin a rawmawl chuan ka thlan chu a rawn hru ta mai!! ka lungphu hi vuak pawp pawp ang mai hian a tlir nghal zawt zawt in ka hria.
Damlo natna chi hrang hrang serious vak lo ho chu intern leh nurse te chuan Dr. Noel tih dan tur zawt reng chungin an lo buaipui nghal zung zung zel a , Dr. Noel erawh medical certificate eng eng emaw atana rawn dil ho chu an in tlar ṭhup avangin a karlakah chung ho chu alo buaipui thung.
" a kil bera mu kha Labetolol lei tir rawh u "
Sir chuan medical certificate rawn dil ho buaipui pah chuan a rawn ti a,rang takin Irene chuan a lo bawhzui nghal. Zuali nen hi chuan kan che ve hman meuh lo.
" Noel ....mipa pahnih bike accident an rawn kalpui dawn a ,pakhat zawk hi a serious viau a ni awm e " Pu Thangpui'n a sawi zawh hma hma in tlangval la upa lo tak hi an rawn zawn lut nghal a ,a thi hnuang lehnghal.
UNathan leh doctor intern ho chuan alo buaipui nghal vat a ,Dr. Noel erawh ala buai em avangin hawi pawh a rawn hawi hman meuh lo .
A hnu lawkah pakhat zawk chu an rawn zawn lut ve leh a , rawn kalpui tu an tam mai bakah damlo dang an lo awm ve neuh neuh bawk nen kan ri luih luih a ,thaw a ip pik takzet.
Chutah mahni thu a kalpui tlang ngam leh thiam tumah kan awm bawk si lo engkim ah Sir kan ti vek a, a ni lah a buai in damlo en tur an la ṭhu tlar ṭhap mai bawk si zaidam tak leh chiai miah lova ala awm thei hi a mak zawk.
UNathan leh health worker ER a thawk ve tho Nu Maremi te chuan damlo awmpui tur nilo ho zawng chu an lo hnawtchhuak nghal zung zung a.
Pumna ,luhai leh ui seh tih vel an lo kal ve reng bawk nen an in tlan pel suau suau hlawm a, kei ve thung chu hetiang hi ka vawikhat tawnna a nih avangin tih hmasak ber tur pawh ka hrelo ,ka nep takzet.
Chutia rilru mumal pawh pu hleithei lova ka din reng lai chuan ka hma a naupang pakhat na tuar a vial vial chu ka en renga ,midang lah an buai bawk nen tumahin an ngaihsak hman lo.
" in beng dai rawh " inhum ruh pahin ka han in ti paukhauh a, midang an buai avang ringawt in lo chiai ve zel tur ka ni lo .
" mama... I eng nge na?" Zam tak chung chuan ka ti sap a, ka theihtawp ka chhuah tak meuh meuh tawh a ni e.
" a pum hi tukin zing dar 10 vel aṭang khan na a ti tawh a , na chhawkna ka pe a a reh theih mai loh avangin ka rawn kalpui tawp a nih hi " a nu niawm tak chuan min lo chhang nghal vat a .
" a luak em?"
" aw...vawi hnih a luak tawh "
" khawiah nge in card...Thil huat ei a nei em ni ?" A BP chu ka check saka, a normal vek.
"Ei a neih awm ka hre lo"
A BP leh thil pawimawh dang chu an card ah chuan ka ziah sak a mahse damdawi ka lo chawh ve ringawt theih loh avangin a buai lo ber a ka rin leh ka ngam tlak ber Mapuii chu ka ko ta ringawt a.
Mapuii'n a en lai chuan kei erawh Zualin min lo koh avangin ka kalsan daih a.
" kha lo IM zung zung rawh " tih pahin syringe ,damdawi awm sa vek tawh chu min rawn pe a.
" i tih leh kha ka ring rengah " ka lo ti sap ringawt .
Mi an buai hut hut laia lo awm mai mai hi a nawm bik loh avangin ka tih ve theih ang apiang chu Zuali hian min tih tir ve zel a , awm lo phei se chuan a hrehawm viau ang .
Chawl khawmuang lovin chiu tur awm ang ang chu ka chiu nghal zung zung a ,ka zawh hnuah pawh chuan nichina naupang bawk kha a chanchin ngaihven leh tumin in Mapuii bulah chuan ka va kal a .
" Puih i ngai em ?"
A jection na tur damdawi chu alo siam mawlh mawlh a ,naupang a ni bawk nen man beh te angaih takin tiin ka va zawt a .
" a tal maithei a i lo ban bet dawn nia " a tih chuan ka lo bu nghat a.
" kha kha eng damdawi nge ?"
" Trama " min chhang bung hmut mai.
Maw ! Tramadol maw !?
" naupang kum 9 mi chauh Tramadol in i chiau dawn amaw ?" Zawi sap hian ka zawt tha leh ngat a ,inrin tawk hmel takin a lo bu nghat bawk .
Ka hriat sual loh chuan Tramadol hi naupang kum 12 hnuai lamah an hmang ngai lo, a san deuh hlek avangin bakah a pum lo na viau pawh nise nachhawkna dang a tam sia ngatinge Tramadol kher ?
"A nih chuan a dose ti hniam deuh la "
Ka hlauhthawnpui avangin midang hriat hlau tak si hian ka ti sa sa a, mahse ka thusawi chu a lo helh ngei mai .
" Doctor in ka chawh a i lo sawi ve a ṭul lo " a ti ta hmuk mai ! A huat tur ang pawhin ka sawi miah si lova, hlauhthawnpui lo ila chu ka hrilh miah lo ang mawle.
" Pharmacist ka ni a damdawi diklo hi ka chawh tir dawn bik lo che " ka ti ve hmak.
Ni e ,Pharmacist ka nih angin mipui te damdawi diktak leh damdawi dose diktaka ei tir hi ka mawhphurhna a ni a, Doctor pawh lo si sawmsarih rawh se ka dikna ah chuan ka tlawm dawn bik lo .
"I va zak lo ve ,kal sawn rawh " min vin hrep pah chuan min rawn nek sawk a, ngawi rengin ka en liam mai mai thei bik lo .
"Naupang tan sawn a hlauhawm thei asin ,a dose ti hniam tal rawh khawi i tih peih lo pawn ka lo tih sak mai ang " tih pahin a syringe ken lai chu ka laksak a ,ani pawh tlawm a lo tum bik hauh lo a thinrim chuan min rawn nam nghal dawrh a syringe thlauh pahin damlo mu reng chu ka bawh nghal rawp rawp a ,ER a awm zawng zawng chuan min rawn en nghal ṭhup mai .
"Hmeli phiangsen chu " tih sap pahin ka tho nghal vat a ,chu aia pawi zawk chu ka bulah Dr. Noel a lo awm reng chu niin!!
Hrawk then kharh kharh pahin syringe chu ka la nghal vat a, midang ho pawhin an tih tur an ti lehnghal char char tawh.
" min rawn zui rawh " tih hmuk pahin Dr. Noel chu duty room lamah a kal nghal a keipawhin hreh tak chungin ka zui ve nghal.
Duty room-a ka luh rual rual chuan ," Sir eng nge ni ta ?" Tiin ka zawt nghal vata, min lo melh rum ngang mai .
" In buaina chu ka hrelo mahse i thil tih kha i hria em? Engang pawhin chau in thinrim mahla damlo bulah thinrim hmel i pu tur a ni lo , hetiang thil ho te pawh i ti thei lo a nih chuan i nihna hi bansan mai rawh "
A thusawi chuan ka ngeng a chhun nghal zak mai !! Ka thiam loh pawh nilo ah ka nihna hi ka bansan ang maw? Teuh lo .
" Ka nihna hi ka bansan ang maw? Damlo in damdawi dik tak leh dose dik tak an dawn hi Pharmacist ka nih anga ka mawhphurh a nih angin khatiang thil kha a thleng nawn leh a nih pawhin khatiang tho khan ka ti leh ang " ka ti let ve sak.
Kan Sir a nih leh nih lo pawh ka care tawh lo, thinrim ṭun chung chuan rack a ka bag dah chu ka pawt thla pawp a ,ka chhuak tau nghal hmak bawk.
Mapuii kha doctor pawh ni mahse tihsual te chu a nei ve thei a, a dik zawk ka hrilh avang khan ka thiam lohna a awm lo , amah ti mualpho zawng phei chuan engthil mah ka ti lo hrim hrim mahse Dr. Noel an keimah chiah khatiang zawnga min hauh bik avang khan ka lungawi bik lo.
ER a let leh chu ka tum tawh lo ngang mai ka haw hmak, chutah in ka thlen rual rual in group-ah ka thiante ho chu ka hrilh kual nghal char char a, Pharmacist rual an lo ni ve bawk nen reilote ah group icon pawh 'Doctor's enemy' tiin kan thlak nghal .
Ka room-ah mut mai mai pahin Chinese drama 'A love so beautiful ' tuiral zawih zawih khawpa ka lo en lai chuan ka nu chu hlauhthawn hmel tak hian a rawn lut a .
" Tete...i nau a la rawn haw lo ania ,biak han tum ve chhin teh " a rawn ti ta mai ,sana ka han en vat a dar8 alo ri ṭep tawh chu niin.
"A rawn haw ve leh mai ang a bo bik lovang " ka nu tih chiai ka duh loh avangin ka lo ti sam et a mahse ka hlauthawng ru hle thung .
" I pa rawn haw hma in biak tlang ngei ngei lo tum rawh keipawhin a ṭhiante biak kan tum ange" tih leh chhuah a rual nghal a, Zomuanpuii vangin ka drama en lai pawh ka tui loh phah vek.
" A chak dawn lo " tih sap pahin ka phone nen living room lamah ka chhuak phei nghal a ,ka pa a rawn haw hman vaih chuan a pawi dawn lutuk .
Rei pawh ka ṭhut hma in Muani chuan kawngka chu thawm dim thei ang ber hian a rawn hawng ṭhem ṭhem a ,ka lo hmuh reng avangin ka lo melh kur ringawt.
" Khawiah nge i kal ? Ka nu in a rawn hmuh hma che in han inthlak vat rawh ,leng rei thei lutuk mai " zawi te hian ka lo ti sap a.
" i ninawm " tih vin hlar pahin a room ah luh nghal mai chu a tum a mahse ka mood alo off ve bawk nen vin zet hian ," Zomuanpui min chhang zawt zawt suh" ka ti let hlar a .
"Ka nu bulah min lo hek leh zawt zawt tawh ang chu i ṭawngthei ropui si "
Enga !! Ka nu leh pa te bula ka ṭan avanga vuak la tawk lo mai mai zawk a ni tih a in hre lo a ni maw!
"Heihi i vawikhat rawn haw tlaina pawh a ni tawh lo a lehpek ah chuan ka chhan tawh miah lo ang che "
" I chhan pawh ka ngai lo , mind your own business " a rawn ti khanglang a nih chu !!
Ka thinrim lutuk insum zo lo chuan ",ve khawnglanga" tih pahin a sam ah chuan ka pawt nghal dawrh a , a ni pawh alo duai bik lo ngang mai nghet chet chawt hian min rawn kek ve nghal bawrh bawrh mai .
Keiin " Zomuanpui " ka ti a ,a ni lah in Zomuansang min ti thul ,unau pahnih lek mah ni ila kan heti bawrh bawrh leh ṭhin.
" Duhtawk rawh u" vin tuarh pahin ka nu chuan min rawn pawt ṭhen nghal sawk a," in zak lawm ni ,tunah bathroom ah kal nghal vat rawh u" a tih takah chuan ngawi rengin kan pahnih chuan kan in melh hrak ringawt .
Kan tet lai aṭang tawh in kan in tihbuai apiangin ka nu hian bathroom ah min ṭhut tir ziah ṭhin a ,kan in rem hma loh chu kan chhuah a rem ti ngai lo .
Kan pahnih chuan sam thur bum in bathroom ah chuan ka ṭhu tum bar a ,a ninawm ber zawk chu in tihbuai lai pawh a inhawi tawn chunga ṭhut reng ngai hi a ni.
Darkar 2 dawn ngawi renga kan ṭhut hnu chuan a upa zawk tih takah a tlawm zawkah ṭangin ka va be hmasa ta nge nge a .
" ka pa a rui reng bawk sia nang tal hi chuan ka nu rilru ti hah tawh suh "
"Nang fanu fel leh thuawi a nei tho che lawm " ngeiawm zet hian a rawn ti kher ringawt.
Muani nen hian kan mizia a in let thawk ti ila ka sawi sual lovang, keiin ka nu leh pa te rilru tih hah ka hlauh em em laiin a ni erawh in engmah a care ve lem lo.
"Min ti thinrim reng lo teh vawiin ah lah Sir in min hau lehnghal ,naktuk ah kan duty ho loh ngei ka beisei "
"I dawih ropui si ,thi dawn pawh ni ila i enkawl kher kher hi chu ka duh lo "
" Sawi ve lo mai teh, min hrilh vat teh I rawn haw tlai nachhan "
" Jacob nen kan leng a chuan kan inti thiam lo a ,ke in ka rawn haw lawm " a sawi zawh rual rual chuan ka nui ri nghal hak ringawt.
" nang chuan i hrethiam ve lo ang bialpa pawh ila neih ve tawp loh kha "
Ni e ,a sawi dik Muani hian ka neih ai zawng zawng min neih kep vek, a ni chuan chhiar sen loh a nei tawh ang mahse a ngaihzawng pakhat pawh ka lakah a zep ngai miah lo thung .
---------------------------------
Ka evening ni a nih avangin dar3 ah chiah chiah ER ka thleng a ,Zuali a morning bawk nen kan duty hun inang lo chu kei aia thinrim an awm lo ang .
" I haw tawh dawn mi ?" Zuali chu ṭap chungin haw lo turin ngen mai ka duh .
" aw ...nangchu zan dar 9 thleng i awm angai dawn sia ka peih loh pui tawp che , Dr .Noel a duty lehnghal"
" maw?"
Ka meng phawk nghal kawk a , hmuh ka hreh nak alaiin kan duty hun alo inang leh kher kher chuan min ti phur lo zual.
0 COMMENT:
Post a Comment