ZERO -57 BY Remruati Bawitlung (Haylor)

Chapter-57

"Tina.... Tina tho rawh " ka hmai chu a rawn ben thek thek a, meng lo mah ila Hailey aw ka hriat chuan ka han khap deuh sawk sawk a engmah ka hmuh fiah thei chuang lo.
"Tina.... " Tui a min rawn theh sek sek takah chuan tlem tlemin ka khaw hmuh pawh a rawn fiah ve leh telh telh a, room bang vela Arden thlalak intar khat vek chu hmu fiah ṭha thei lo mah ila thil thleng kha ka mi ti hrechhuak nghal uai uai mai . 
" Lalpa leh!! Tina ...." ka meng fiah deuh takah chuan Hailey chuan min rawn kuah nghal thlawp a,kuah let ve ka han tum nak chuan ka ban ka ti che thei ta hauh lo,chair ah che thei lovin min lo phuar bet reng chu niin.

"Hailey... eng nge awmzia? "chhuah tumin ka han tal aih aih a, Hailey erawh inthiam loh hmel zetin a ding reng thung. 
" he room ah hian lut lo turin ka ti che ani lawm ni.... ka thu i awih duh lo a hetiang hi kan thleng ta anih hi.... " 
"Krissy leh Tristan te kha i thah ani tiraw?"
"nilo....nilo.... Ka duh vang renga ti ka nilo" amah leh amah a inpuan takah awm ngaihna pawh ka hrelo ka ṭhiannu mah nise amah hlauhna in ka khat nghal vek.
"mah...mahse i that tho alawm" ka ti chhuak thei hram. 
"Krissy kha na lo te in ka nam ringawt a chuan ....chuan inchung aṭangin a tla anih kha....ka tum reng vanga ti ka ti lo, amah biak ka tum mai chauh ani. Tristan pawh Krissy thih dan chungchang a hriat khan ngawi mai mai se chuan a thi miah lo ang ama thiamloh anih kha"

Hailey chu inthiamlohna leh hlauhna hlirin a khat veka, a khur nasat mai bakah a awmdan a dik tawh lo hrim hrim,a â vek tawh ni mai hian ka hria. 
" Tina...khatiang mi kha ka ani lo asin, duhthlan tur dang ka neih loh vang ani " tih pahin min rawn kuah a han tum a, " min rawn hnaih suh" ka lo tih nghal hmuk avang chuan a rilru a nat hmel takzet. 
" tih nat che hi ka tum lo asin....ka thu i awih duh loh avangin hetiang thil hi ka ti ta ani " 
" mah... mahse engvangin?  Engvangin nge Krissy kha i thah? " 

"Arden chungchang ah biak ka tum mai chauh ani, mahse ka thusawi a ngaihthlak duh loh avangin na lo te a nam thluk mai chu ka tuma mahse ka tum loh deuhin a tla thla ta ani.... i hria em? nang leh Krissy in Arden a in hmelhriat hma daih tawh khan ka lo hmangaih daih tawh asin" ka mak ti lutuk chu ka mengphawk nghal kawk ringawt. 
"ka duh thu ka hrilh mawlh mawlh pawhin chhanna ka dawng ngai lo, mahse pawi ka ti ngai lo a chhanchu ka pian tirh ata tawh mi hnawl leh duhloh kha ka ni miau alawm. Mahse maw ka ṭhian kawmngaih ber Krissy leh Arden te in hmangaih lai lo thlir tawp kha chu thil harsa tak ani, kei nilo in ka ṭhiannu zawk a duh a chuvang chuan duhsakna hlan a kal bo mai kha ka tum asin, mahse amah aia Arden ka lo hriat hmasak avang khan min thik in ka thusawi pawh a ngaithla duh lo a khatiang thil kha a thleng ta ani,khatih hun lai khan ka hlauh em avangin ka tlanchhe ta mai ani" 

Hetia Hailey in a sawi takah chuan a mipa hmangaih chungchang min hrilh ṭhin kha ka hre chhuak nghal uaih uaih mai.Kha mipa naupang kha Arden hi maw lo ni a!! 
School ah midang hmuhsit rawn anih avanga school kal a hreh em em ṭhin thu te, midang zawngin an tih duhdah a an kawm duh loh lai pawha mipa naupang pakhat in midang laka a chhan ṭhin thu te leh chupa chu tun thleng pawha ala hmangaih thu min hrilh ṭhin te kha ka hrechhuak nghal uarh uarh a mahse khapa kha Arden ani ang tih rin ngaihna pawh ka hrelo, nilo....ka ring pha ngai lo hrim hrim zawk. 

" khapa kha.... " 
" ni e... khapa kha Arden hi ani asin...Tina ,in in kawp avang hian ka vui ngai reng reng lo ,Arden hlim hmel ka hmuh kha chuan ka lawm tawk em em tho mahse Krissy leh Tristan te chungchang hi khawngaih takin min thup sak rawh "
"ngatinge a tirah khan min hrilh mai loh " 
" ka hlau ani.... he khawvelah hian ka ṭhian neih chhun i ni a, min kalsan daih hi ka hlau ani.... nilo,  mal taka awm ka duh tawh lo Tina... a hma ang khan inkawm leh ang " 

" Engvangin nge ka kalsan ngawt ang che....ka ṭhian ṭha ber ini a, i ni reng bawk ang mahse i thil tih hi a dik lo ani hun ala awm lai hian police khutah inpe zawk rawh " 
" ka thei lo... " tih pahin a ding thut a,"hei leh chen hi ka thup tawh a, ka thup hlen thei ngei ngei ang " 
"hlauhna chhete i nei ve miah lo em ni? " 
"hlauh a!!  haha.... zantin ka mumangah ka hmu ziah ṭhin asin, nitin mai hian hlauthawng reng rengin hun ka hmang ṭhin.Ka inthiam loh em avangin vawitam tak Arden a call a thil engkim hrilh vek ka tum ṭhin a mahse a pickup duh ngai lo, hetiang anga ka tih loh hi chuan ka hmachhawn ngam thlawt lo ani. " anih chuan Arden rawn call ziah ṭhin tu kha Hailey maw lo ni a!! thil thlen dan hian ka lu a ti hai takzet, ngaihtuah chian erawh chuan a mak hle thung. Kei, Arden, Krissy, Hailey leh Natalie thlengin engkim hi chhan nei veka thleng ni mai in ka hria, engkim mai hi a inzawm veka, heng thuruk tamtak inthup zawng zawng te hi haichhuak vek turin kei hi Sacramento ah hian ka kal ni hialin ka inhria. 

"Hailey.... min en rawh, ka thusawi hi chiang takin ngaihthla rawh, i thil tih hi sual ani i thil sual tih man chu i hmu phawt tur ani dawn lawm ni " 
"nilo.... ka duh lo, jail tan ka duh lo.... ṭhian nei lova mahni chauha awm ka duh tawh lo "
"kumkhua in i thup thei dawn chuang lo, jail ah i tang emaw tang lo emaw khawi hmunah pawh awm la ka kalsan ngai lo ang che... engtik lai pawhin i tan ka awm reng ang." 
"i ti tak tak em?  police hnenah in pe pawh ni ila min kalsan lo ang tiraw?"
" aw.... engtik ah mah ka..... " tukverh aṭangin tuemaw hian silai in min rawn tin ani tih ka hmuh rual rual chuan ka ṭawng tawp nghal chawt a,ka dar ah tak min rawn kap nghal ṭhuai bawk. 

Ka chet theih loh mai bakah a nat em avangin ka awmah min hnawh tlat a, thawk lak kawk kawk pahin ṭhuthleng chawpin chhuatah ka let nghal tawp a,Hailey in mangang taka min au lawm lawm ri chu a hla telh telh bawk. 

Ka harh leh chuan" thisen a hlauh hnem tawh lutuk kan zai vat angai " an ti ri chu ka hre ruai ruai thei, tumah ka hmuh fiah theih loh avangin ka han khap fak fak a ,a hma ai chuan thawk a nuam deuh tawh oxygen min pek vang te pawh ani mahna. 
"Ethan... " tukverh phena Ethan hmel kha chiang taka ka hmuh avang chuan midang hrilh ka han tum ve tak na chu ka hliam a nat em avangin ka ṭawng ri zo tawh lo.Ka chau em avang chuan ka han maimichhing leh siai siai a ṭawng ri takngial pawh ka hrezui tawh lo. 

__________________________________________
★1 Day later★

"Tina.... "Arden aw ka hriat chuan mang lam aṭangin ka harh chhuak zawk mai, amaherawhchu ṭawngri engkim hre thei vek mah ila meng chhuak tur erawh ka awmlo thung.Ka kut nghet taka a vawn rual chuan a fawp zeuh ani tihte chu ka hre thei vek mahila ka che thei lo a, ka mit lah ka meng thei hek lo .Engvangin nge hetiang hian ka awm tak?  Engvangin nge khawvel tak ni lo in ka suangtuahna ah ka cheng zawk tlat mai le? 
"hetiang hian i mu reng thei lo ang " 
*"ka mu reng reng lo, ka harh reng alawm"* ka tih lawm lawm pawhin a hre thei miah lo,ka tal nasat mai bakah ka au nasat em avangin ka chau zo vek tawh. 

"Kalbo tura ka hrilh lai che khan min ngaithla ni la chu hetiang hi i chungah a thleng lo tur,keimah vang vek ani" a rawn tih takah chuan kalbo tura min hrilh lai vel te kha ka hrechhuak nghal uarh uarh mai,
" Arden.... kan tlai dawn nia " hmeichhe aw ka hriat rual rual chuan ka thinlung hi sah sawm vek angin maiin a rawn na nghal zawk zawk mai. 
"mangṭha le, tun bak chu hmu tur che in ka rawn kal tawh lo ang chuan keimah vangin i tuarh leh tawh lo ang " a tih hnu deuh lawkah kawngka in khar khap ri ka hre zui zat bawk. Hetiang em em hian nimaw min kalsan i lo duh a, min en ta che ka che thei lo a ka hmu thei bawk hek lo tun ang hunah hian ka bula awm turin ka mamawh takzet che asin. Mahse nang chuan ka kianga awm a hnekin hmeichhe dang lakah min kalsan i thlang zawk amaw!! 

Arden a chhuak chiah tih chuan ka thawk a rawn buai nghal der, ka thin ah a hnawh tlat avangin boruak chu ka han hip lut kawk kawk a,a nat em avangin ka harh chhuah leh theih pawh ka inring tawh lo.
"tunah 3,2,1 " Doctor in a tih rual rual chuan ka awm insep lawp lawp chu defibrillator chuan a rawn dep kang lawp lawp a , vawithum vel min deh hnu chuan ka meng nghal kawk a, ka thaw chhuak nghal siai siai bawk. 
"a tawk... " tih pahin ka mit chu light hian a rawn chun zeuh zeuh a, "a ṭha tawh e... " a ti zui sap bawk. 



"bawihi.... " hun rei tak hnu ah ka pa aw ka hriat leh avang chuan ka mittui a rawn luang ngiai ngiai mai. Che thei lo mah ila ka pa ka kiangah a awm ani tih ka hriat avang ringawt pawh hian ka thla a muang ngal huai mai. 
"Doctor... ni khat lai a liam tawh a engvangin nge ka fanu hi hetiang hian ala awm ?"
"ṭawng engkim a hre thei veka, engkim a hmu thei vek tawh bawk amaherawhchu a taksa a chak loh mai bakah ala hlauthawng bawk nen amah hi thlamuang taka a awm phawt angai ani " Doctor sawi tak ang hian kei hi chu hlauhna avang ringawt pawh hian ka nun a buai nghal vek thei,ka mumang ah ka hmuh loh leh mahni chauha awm hlauh ngawih ngawih na ka nei ṭhin bawk. 

__________________________________________

★1 week later★

Kar khat a ral meuh chuan ka ṭha sawt tawh hle ,ka ṭhu chhuak thei tawh a ka tei kual ka kual thei tawh bawk mahse silai a kah hliam ka nih avang leh ka thil hriat leh tawn te kha a rapthlak em avangin tun thlengin ka la ṭawng chhuak leh lo.
"i hliam kan dressing hma in i sam khuih phawt ang aw... "tih pahin Natalie chuan min rawn nuih sang a, chhang lo in ka melh ngai ka melh reng tho. 
"i hre tawh em?  Hailey khan rilru lamah buaina alo neih reng avangin tunah hian enkawl mek ani a, dam leh vat turin duhsakna a hlan che asin " a tih chuan ti lang lo mah ila ka lawmpui takzet.

Natalie in duat taka ka sam min khuih sak heuh heuh lai chuan Arden a rawn lut hlawl ringawt, a hmel ka hmuh zawng ringawt pawh hian ka  awm zawn chu a rawn na nghal zawk zawk a, ka mittui a rawn tling nghal pam bawk.Natalie in Arden a hmuh rual rual chuan a tho nghal vata ,"Hailey chungchang takngial pawhin awmzia a nei lo " tia a hrilh sap ri chu ka hre vek a, hriatthiam hmel takin alo bu nghat bawk.

(ADVERTISEMENT page hnuai lam ami khu click theuh ang u aw)