ZERO-56 BY Remruati Bawitlung (Haylor)

Chapter-56

Kawngka in hawng ri rak ka hriat rual rual chuan ka harh nghal zawka,khum bawh chungin ka lo muhil reng chu niin, ka mutthlih lai pawh ka hre lo reng reng.Khua a eng uarh tawh avangin phur lo zet hian ka tho nghal ṭaih ṭaih a, nizana thil thleng kha chu ngaihtuah pawh ka ngaihtuah duh tawh lo, chuti lo chu ka mittui a rawn tla leh nghal ṭuam ṭuam mai ang. 
Muang changin ka hmai chu ka han phifai sang sang a,ka ṭahna lamah ka mit te pawh a bui vek tawh. 

'He in aṭang hian ka chhuak tur anilo' tiin keimah leh keimah chu ka in fuih mawlh mawlh a, engmah thleng lo ang maiin awm han tum teh mah ila ka engthil tih mah a tui tak tak thei chuang lo. 
Engang pawhin rilru na in kun tlawk tlawk mah ila school kal tur chuan ka insiam ta tho a, hetia mahni chauha inngaihtuah ngawt ngawt ai chuan midang zi nuai nuai karah awm ila a ṭhat ka rin vang zawk ani. 

Ngawi rengin room aṭang chuan ka chhuak phei chhat chhat a, couch ah Arden lo ṭhu reng lai ka va hmuh chuan ka phu chiang teh e,ka ding nghal chawt bawk. 
A rawn hawi mai loh avang chuan a thil tih lai chu ka lo thlir renga, a kut tuam tumin alo buai ve hle chu niin, a tuam fuh thei lo ani tih ka hmuh chuan puih tumin a bulah ka zuk ṭhu nghal thak a, a kut ka tawh rual rual chuan a la sawn nghal hmak anih chu! 

" khawi... i tuam thiam lo anih kha " tih pahin a kut chu ka pawt nghal pawp a, ka pawt na deuh aniang a ner nghal sawk bawk. A mahin a tuam thei dawn lo ani tih a hre ve pawh ani mahna ṭha deuh hian a rawn dawh ve leh mai bawka. 
"chhuak turin..... " 
"min hruai angai lo.... keimah in school chu ka kal thei " ka lo ti nghal zung zung ringawt, diktak chuan a sawi tum chu ka hre ve tho mahse hetiang thil hi sawi chhuah ka duh loh mai bakah sawi na hun pek ka tum bawk hek lo engpawh chu nise kan inkar hi a hma ang khan ka siam ṭha leh ngei tur ani. 

"Breakfast i ei tawh em? " min chhan loh avang chuan,"mawh" ka han ti leh kher a, mak tih hmel zet hian min rawn en reng ringawt. 
"ka tuam zo ta.. " Ka tuam zawh rual rual chuan a ṭawng ka hlauh em avangin ka tho thut a, kitchen lamah breakfast siam turin ka kal nghal vata a rukin ka mittui rawn tla tur chu hruk hul zeuh pahin ka nui lui nghal suk bawk. 

"bacon aw.... E... toast pawh i duh tiraw?" tih pahin ka han siam nghal zung zung a, a ṭawng ka hlauh luatah ka ṭawng duh hle nghe nghe . 
" coffee i duh tel em? " 
" duhtawk rawh.... " a rawn ti sap ri ka hriat chuan ka ṭah chhuah loh nan ka hmui chu ka han pet fan fan a, ka mittui a rawn far nghal fap bawk. 
"ka siam zo ṭep ....lo ṭhu rawh chair ah khan " a sawi hrelo ang mai chuan ka ti lui leh ngat a, ka mittui a hmuh loh nan amah hnung chhawn zawngin ka ding tlat bawk. 

" duhtawk rawh ka tih chu.... " ka fian ken lai paih pawp pah chuan min pawt her nghal sawk a, ka ban a hmer nat em avangin ka ṭang thei lo hrim hrim. 
"a na ania...." 
" ka hrilh nawn leh ang che.... ka hmuh theih ah rawn in lan tawh suh.... a rang thei ang berin Sacramento hi chhuahsan vat rawh...." 
" ka duhlo.... khawiah mah ka kal dawn lo, he in pawh hi ka chhuahsak dawn lo" 
" ka tih rual rual chuan a thinrim insum zo lo chuan silai in min rawn tin nghal pawp ringawt!! chet chu sawiloh thawk pawh ka thaw ṭha ngam tawh lo. 

"ka hmu leh che anih chuan keimah ngei in ka that ang che... chuvang chuan hun ka pek lai che hian kal bo vat mai rawh " tih pahin ka kut chu a paihtha sawk a ,a chhuak nghal nal nal bawk .
Ka hlauhthawn em avangin ka din ngai chuan ka ding khawng renga ,ka ṭawng chhuak thei tawh lo hrim hrim. Lalpa leh!!  ka lungphu hi a rang em avangin a puak keh mai dawn in ka hria. Ka awm a nat em avang chuan ka han dawm vang vang a, ka insum rei tawh bawk nen a tawp a tawp ah ka ṭap chuak nghal hawm hawm mai. 

Nilengin school pawh kal loin kitchen ah chuan ka ṭhu ngawi ta renga ,ka phone ri rang rang chu hre mah vek ila ka melh ngai chu ka melh ngur ngur a chet pawh ka tum eih lo .
'engmah ani lo.... vawikhat chiah tum leh rawh i beidawng mai tur ani lo' tiin keimah leh keimah chu ka la infuih fan fan tho amaherawhchu Arden hmel leh mitmeng rum lutuk ka hmuh khan beiseina ka nei tawh lo, mahse vawikhat chiah.... vawikhat chiah ka tum leh tur ani. 

Ka phone chawl lova a rik tak reng avang chuan ka tho ta nge nge a, Mason a call anih avangin a pawimawh ani tih hria a ka pickup nghal vat bawk. 
" Tina.... thu lawmawm deuh hrilh tur che ka nei.. tunah hian kan inhmuh vat angai "
"mahse..... " 
" Dr. Shin kha ka rawn hruai thei dawn a, he hun hi ka bawhpelh thiang lo " 
" awle.... " tih sap pahin phone chu ka dah nghal vat bawk. 

Phur lo hle mah ila Dr. Shin ka hmuh theihna tir anih chuan ka kal ngei tur ani.Mason hian Doctor thiam tak Arden enkawl tu tur hmelhriat a neih avangin biak pawh tumin karhnih dawn chu kan bei tawh , mi thiam tak anih mai bakah Chinese anih avangin biak pawh a har in email pawh vawitam kan thawn tawh a, appointment a lo ngah ve bawk nen list ah kan hming a chuang hnung hle bawk.Mahse vanneih thlak takin Mason hmelhriat alo ni hlauh a, helai hmun thleng thleng hian min rawn pan ta ani. 
_________________________________________

Chutia Dr. Sin leh Mason te nena kan lo ti ti mawlh mawlh lai chuan Arden ka va hmu hlawl mai amah chauhin ani lo lehnghal, hetiang hmunah te hmeichhia nen eng nge a rawn tih le? nge an in date zawk? 
" Tina... " ka hming an lam takah chuan ka phu zuk ringawt, thil dang daih ka lo ngaihtuah avang chuan an thusawi pwwh pakhatmah hriat ka nei lo. 
" maw!! " ka lo ti hu ringawt. 
"Lungngai suh u.... MMA hma a treatment a lak chuan nasa takin a pui thei dawn ani " 
" anih chuan.... a nat belh phah lo ang tiraw? " 
" chu erawh ka hrelo.... amah hi ka hmuh phawt angai ani " 

Arden leh chunu chu washroom lam panin an kal ani tih ka hmuh rual rual chuan engmah ngaihtuah lo in ka tho thut ringawt, Dr. Shin an mak tih hmel zeta min rawn en avang chuan nuih suk pah hian, " umm.... min lo hrethiam lawk rawh u... washroom ah kan kal lawk ange " tih leh tlan ka rual nghal. Hmanhmawh lutuk in hmeichhe lam ah chuan ka tlan lut nghal vata,tumah hmuh tur reng reng an awm lo. 
" khanu kha khawiah nge maw a kal daih le?  hetah hian awm tur ani asin" an pahnih a an bo tak daih avang chuan ka chhuak lehnghal hna hna ringawt. 

Mipa inthiarna zawn ka thlen chuan thawm ri rawk ka hriat avangin ka ding nghal chawt a, ngaihthlak chian pawh ngai loin, "Arden zip vat vat teh.... " hmeichhia in a ti ri chu chiang taka ka hriat avang chuan ka sa nghat zawk mai, vawikhat pawh inngaihtuah nawn lovin kawngka chu ka nam hawng nghal ṭhuai bawk. 
"hahh.... " za lo zetin ka nui chhuak hak ringawt, kan rin ang ngeiin ka hmuh rual rual chuan chunu chu alo insiam ṭha nghal sawk sawk a, a kawr hnung la inzip phui lo pawh chiang takin ka hmu thei. 



Min hmuh rual rual in chunu chu a tlan chhuak nghal vata, sawi hmasak ber tur pawh ka hrelo. 
"eng nge hetah hian i tih? " pangngai taka ka ṭawng chhuak theih avangin ka in awihlo hial zawk,ani erawh inthiam lo hmel pawh a pu eih lo. 
" i hmuh ang khan.... " 
"ngatinge hetiang thil hi ka chungah i tih? " 
"kha heihi la rawh.... " tih pahin envelop hi ka kutah a rawn hmeh bel a, San Diego a letna tur air ticket lo ni rengin. 
"ka kalbo chu i va duh awm ve... ticket thlengin min lo laksak nghal vek amaw?"

"zing dar1 a chhuak tur ani a....naktuk ah chuan i bungrua ka hmuh tawh lo ngei ka beisei.... " tih pahin chhuah nghal daih chu a tuma, a ban a man pahin, " dar 11 thleng ka lo nghak ang che ....i rawn kal lo anih chuan kumkhua in ka kal bo tawh ang " ka han ti zui sap a, hria ang pawhin a awmlo ka kut thing thlak pahin vawikhat pawh rawn hawi let lovin a chhuak nghal hmak bawk,tilang lo mah ila ka rilru na lutuk hi ka mittui takngial pawh a far thei tawh lo ,pawh sawm nawk nawk ang mai hian ka thinlung hi a na takzet . 

Dr. Shin kan hmuh zawh hnu chuan Mason an hna alo nei ve bawk nen ina haw ta lo chuan Hailey in lam panin ka kal ta ringawt a, saw inah saw chuan kan pahniha sulhnu bak hmuh tur a awm loh avangin intih harh hmasak phawt ka duh.
"ngatinge a nat em em mai le? " tih sap pahin Ticket chu ka han en vang vang a, ka rilru tawt lutuk tih reh tumin ka han thawchhuak leh halh ṭhin a, awmzia a nei thui lo kher mai. 

Hailey bula ka awm chuan ka rilru hahna te pawh a kiang ve deuh ringin ka pan ta ringawt a, a in luah ka thlen chuan kawngka a lo in hawn avangin doorbell pawh hmet lo in ka lut tlang ta ringawt a, inchhung ka luh chuan a lo reh ṭhiap ringawt. 
" Hailey.... " tih pahin sana chu ka han melh zeuh a, dar8 chauh ala ri bawk si a party na ah chuan a kal lo tawp ang. 
" Katie.... " Hailey in Katie a awmpui avang chuan ani pawh chu ka han ko leh a, min chhan a hnekin a reh ṭhuap ringawt. 

Kawngka an kalh lo bawk nen an pahnih in dawrah an kal anih ringin Hailey room a lo nghah mai chu ṭha in ka hre ta zawka, koh chhunzawm lem ta lo chuan room lam panin ka chho nghal hnak hnak bawk.
A reh em avang chuan ipod chu la chhuak in hla ngaihthlak chu ka han tuma, chhuatah ka thlauh nghal pawp ringawt. Ka ipod ngei pawhin min kalsan dan tur a zawng tawh anih hi,  chhar tuma ka kun lai tak chuan lehlam chu ka han melh zeuh a, ka sir a room kawnga tlemte lo inhawng chuan ka mit a la nghal zar mai. 

Rang takin ka hawi kual nghal vata,ka mit a lak em em nachhan chu Hailey hian he room hi engtik lai pawhin a kalh tlat ṭhin a,luh a phal loh em avang hian luh hi ka chak zual sauh emaw tih mai tur ani. 
"ka hmu ani tih ka zep tlat mai ang " tih sup pahin kawngka chu ka han hawng ṭhem ṭhem a, ka rin dan mai mai chuan an chhungkaw thil inrochun, kawr emaw, thil hlui tak tak a dah khawmna hmun anih te ka ring mai mai ṭhin a ,a takin ka hmu thei dawn ta hi ka phur ru hle bawk. 

A thim vek avang chuan ,"Hailey ka tihpalh " tih sap pahin light ka on chiah chu ka kâ hup pahin ka bag ka thlauh nghal tawp a, mak ka tih em avangin chet pawh ka che thei tawh lo,ka thil hmuh hi ka awih thei lo ,ka mumang anih hial ka ring.
Room chhung chu Arden thlalak in alo khat vek anih chu!! thenkhat ah phei chuan thisen in eng eng emaw hi alo in ziak rang nuai bawk, chu aia mak ka tih zawk chu Arden thlalak zingah chuan Krissy, Tristan leh ka thlalak chu liantak leh chiang takin alo in X kulh anih chu!! 
Chiang zawka en ka duh avangin kal hnaih ka tum chu hnung lam aṭangin tuemaw hian ka lu ah na takin a rawn vaw nghal pawp a,ka lu a hai em avangin ka tlu tawp a, ka muhil nghal siai siai bawk.