ZERO-55 BY Remruati Bawitlung (Haylor)

Chapter-55

"ka mangang hman lutuk asin"
" ngatinge min rawn call mai loh"
"ka phone a thi daih a alawm"
"i ṭha tak tak tiraw? na i nei em?"
"aih neilo.... " a ṭha a ni tih ka hriat chuan ka thaw nghal huai mai,mahse thil thlen dan hi ka hrethiam lo takzet.
"hetah lo kal rawh... " tih pahin min kai nghal dawr dawr a, ngawi rengin ka zui ve mai bawk.
"pu Jimmy hian a ke a ti na a... damdawiin ah kan hruai nghal vat angai" tih pahin bang kil a pa pakhat kum50 bawr vel lo ṭhu reng chu a zuk buaipui nghal vata,ka phone light tih
en bak êng dang awmlo mahse thisen a kai hnuang ani tih ka hmuh hmaih lo nasa.

Rang takin chupa chu ka zuk buaipui nghal vata, engtin nge hetiang thil hi a thlen theih tih bak ka ngaihtuah thei tawh lo.
"Rawng ah a tawlhthlu a... a rimchhe em em mai lehnghal "
"Tina... rawng nilo in.... "
"kal vat ang u... Tina kawngka lo va hawng rawh " ka sawi zawh hma hma in chupa chuan min lo pawtchat nghal vata,sawi chhunzawm tawh lo turin min rawn mitmei nghal zeuh bawk.
"aw... awle.... " tih pahin a theih ang tawkin a tlan phei nghal hlawk hlawk bawk. 

"i ṭha em? " tih pahin ka kuah tho nawlh a,ka kalpui nghal nal nal bawk.
"thisen ani tih hrilh miah suh.... thisuk a nei in ka hria... " ka hriat tawk lekin a rawn ti sap a, mak tih hmel takin ka en nghal haw ringawt, chu mai bakah thil thlen dan hi ngaihdan pawh ka nei lo.

Zan a rei tawh bawk nen emergency ah kan luhpui ta ringawt a,thisen a kai nasat mai bakah a thang huam mai bawk si a damdawiin a lo awm ve te chuan min en duh hle nghe nghe.Doctor ten a ke an endik lai vel chuan pawnah kan lo nghak ran a, Tina erawh a rilru a hah bawk aniang a ṭhu hle hle thei lo ani ber.
"ṭhu rawh...ke tliak mai mai anih saw.. "
"i tan chuan engmah ani lo maithei mahse ani chuan kan school tifai chungin a chhungte a chawm asin.... " meng pual ralh pahin ngeiawm zetin ka thaw chhuak hak ringawt. Room ah khan an tang dun rei bawk aniang an hming, eng nge an thawh ṭhin tih te thlengin an lo sawi dun hman vek alawm.

"a ṭha vat mai ang "
"rawn kal lo la chu zankhua in ke na chung khan a awm dawn chu ani sia"
engvanga a hmel hriat ngai pawh nilo hi ngaihtuah em em nge maw anih le?
"engtin nge school ah khan kan awm tih i hriat? "
" mawl lutuk....tun ang hunah i rawn haw loh te chuan school ah lo khawiah nge i awm chuan anga "
"ani ve tho mai " a tih zui nang nang avang chuan a rukin ka khi suk ringawt.Hetiang ang em em a hmeichhe rilru ṭha ,mi ring hma leh bum nuam hi ka la hre ngai lo, thisen pawh rawng an tih chuan zu an awih hmaka mawle.

Chupa chu thil thlen dan zawng zawng zawh vek ka duh avangin room ah chuan thil tifel turin keimah chauhin ka lut a, Tina erawh pawnah min lo nghak turin ka hrilh thung. Room chhunga ka luh chuan chupa chu tlanchhiat tumin a lo biru zak zak tih ka va hmuh chuan hnung lam aṭangin khumah chuan ka pawt ṭhu pawp a, midang in min rawn hmuh loh nan curtain chu ka pawtthla nghal vek bawk a,chuan a au chhuah hma in a chal darah tak silai in ka tin zui zat bawk.
"tu nge tir che?" hepa hi a tir aṭang tawh khan Ethan tirh ani tih ka hre daih tawh mahse amah ngei hi inpuang se ka duh vang ani ,chumai bakah Tina kha chu awmlo se chuan ka khawng thluk na a rei tawh ang.

"ka ...ka hrelo...message ka dawng a, min hrilh angin ka ti ta mai ani... "
"pawisa vangin tunge a nih tih pawh i hriat loh thu chu i zawm amaw!! engtin nge thisen hi i kai theih engkim min hrilh vek rawh "
"ka message dawn ang chuan Tina chu thisen leih tum chuan ka kal ngei a mahse amah pawh ka hmuh hma in ka che sual ta ani, ka tawlhthluk na lamah ka ke ka ti tliak palh a, min buaipui tu tur ber lah thisuk alo nei bawk nen rawng kai angin ka insawi ta ani "

"Engtin nge nang ang putar mawl leh dawih lutuk hi khatiang thil ti tur khan a tirh zawk che le? "
"mawl min ti pawh ani mahna... mahse an zingah i tel ve ani tih hai tur erawh chuan ka fing lutuk tlat "
" ngawi hmak rawh... "
"tihnat i duh a.... i ngaihtuah avangin i rawn zawng leh bawk a....hahh...khanu kha mifel tak ani, a rinna che hi ti chhe suh"
"hmela ....i lu ah silai mu thun luh i duh loh chuan i ka chip hmak ang che ....hre reng rawh ka en zui reng dawn che ania" tih pahin silai chu ka dahthla a,curtain pawh phei pawp pahin ka chhuak nghal nal nal bawk.

" haw ang.... " tih pahin Tina chu ka kai chhuak nghal dawr dawr a, a ngaihna a hriat loh hmel takzet.
"mahse... pu Jimmy kha "
" a chhungten an rawn hruai mai ang "
"zan a rei tawh bawk si a.... kan hruai haw thei mai lo em ni? " a tih rual rual chuan a kut chu ka thlah nghal hmak.
" i ngaihtuah anih chuan va hruai haw la ti nia....ka lo va hawsan ang che... " tih pahin car ah ka luhsan nghal hmaka,a engine han ti nung hlat hlat mahila a ruk tak chuan a kal tak tak ka hlau hle.
" mahse.... "
" anih chuan rawn lut rawh.... " amah  chauh chuan a thlah thei dawn lo ani tih a hriat avang chuan a rawn lut ta nge nge a, a ruk in lehlam hawi chungin ka lo khi suk ringawt.

In kan thlen chuan car pawh hung ṭha lo chuan ka luh san daih a ,kha putar phiangsen thusawi 'a rinna che hi ti chhe suh' tih khan kawng tluanin ka rilru a mawlh tlat peka,engthil mah ka ngaihtuah thei tawh lo.
"Arden.... "
"Chhuak rawh... " room a rawn luh rual rual chuan vin zet hian ka lo ti nghal tuarh ringawt, chhan pawh awmlo a ka thinrim khum thut avang chuan a hawihai ngei mai. A rilru tih nat sak hi ka thil duh lo ber ani mahse engtin nge ka tih chuan ang vin tuarh tuarh mai loh hi chu hnawl dan kawng dang ka hre thlawt lo ani.




"chhuak rawh ka tih chu.... " a phu nghal zawk ringawt, mahse chhuah a hnekin min rawn pan hnai ta zawka.
"ka... ka kuah thei che ngem?" a hmela min hlauhna te leh thlabarna te chu thup tum eng ang mahse ka hmuh hmaih hauh lo, hetiang ang dinhmun ah hi chuan hmeichhe dang chu nise min hlauh avangin min tlan chhiatsan tawh ngei ang ,ani erawh chuan khur zawih zawih chungin min rawn la pan hram hram thei nia.
"va mu tawh rawh " sawi tur ka hriat loh hi chuan ka ti leh ringawt zel.
"i awmdan hi ka hrethiam lo takzet.... beiseina min pe reng chungin min pehhel dan kawng i zawng char char a, i duh duh hunah min thinrim khum loh leh engmah sawi lo in i bo daih zel bawka... a chhan enge maw tal min hrilh loh te chuan engtin nge ka hriat anga "

Duhthlan tur dang ka nei ta lo, engpawh thleng dawn mahse Tina hi ka ṭhen thei lo a ka kalsan thei bawk hek lo chuvang chuan amah hian min huat a min ṭhen angai ani, heihi a him theih nan a ka thil tih theih hnuhnung ber ani tawh.
Ka huaisenna zawng zawng sawm khawmin ka thil tih hreh em em mai Krissy leh a nu thlalak dun na chu khumah chuan ka theh thla tawp a, thlalak a lak kan rual rual chuan,"Natalie maw!! " a ti nghal sap bawk.
"Krissy leh a nu a nih kha.... "
" maw!! " a mak ti lutuk chu a kut a khur nghal dar dar mai.
"mah... mahse engvangin nge min hmuh tir...? "
"a phen ah thil tamtak i hriat loh a in phum ruk vang ani"

"thil in phum ru a!! "
"ni e... thil tamtak, Krissy mit hmangin vawin ni ah hian khua i la hmu ve ṭawk ṭawk ani tih thlengin mawle" a mit aṭanga mittui rawn chhuak tur a dang hram hram ka hmuh hian ka thinlung hi vih zawt zawt ang mai hian ana takzet,theih chu nise nghet taka kuah vawng vawng mai ka duh.
"I huat em em i pa leh Natalie te hian nunna thar an pe leh che ani,Nu chuan a fanu thi tawh mit chu a fanu thar tur tan a pe anih chu!! ani lah chuan engmah hre lovin alo haw em em mai bawk si a... mawi i ti em?  heng zawng zawng hi ka ruahmanna vek ani" Tina hi a pa bulah a him ber rih avangin a haw let leh angai, chuvang chuan Natalie leh a pa a huat tawh loh nan leh keimah min huat nan engkim chu ka ruahman na vek angin ka sawi ta mai ani.

"mahse engvangin? "
"Krissy vangin mawle.... tuin nge a hmangaih ber mit chu midangin nuam tawl nan hmang se duh ang, chuvang chuan i thih hi ka thil duh ber ani..... i hria em?  a tir aṭang tawh khan bum i ni,engkim hi a lem vek... kei ,heng in zawng zawng te nen lam hian.... chuvang chuan zahngaihna ka lantir lai hian kal bo vat mai rawh .....Nilo, Sacramento aṭang hian chhuak rawh chuti lo chu Krissy chunga in thil tih ang chiah hian nang leh i chhungte chungah ka ti ve ang ka nihna chu i hriat chian kha" ka tih chuan min chhang tur reng reng a awm tawh lo, ngawi rengin a ding khawng renga ṭap chhuak lo turin a inhum ruh ṭang ṭang bawk, hetiang anga a awm lai hmuh hi a hrehawm takzet, hetiang reng hi chuan ka insum zo lo in ka kuah dawn takngial a ka hriat avangin," mitdel leh i duh te anih loh chuan naktuk zingah in hi lo chhuahsan tawh ang che " tih hmak pahin ka chhuak nghal nal nal bawk.

___________________________________________

★Valentina's POV★

Arden thusawi mal tin te chuan chemte ang maiin min chhun zâwk zâwk a, a nat em avangin ka tuar zo lo mai ang.Chhuatah khum sir ngheng chung chuan ka melh ngai melh ngur ngur pah chuan ka thu ngawi renga, ka mittui tla zawih zawih mahse ka ṭap chhuak thei tlat lo. Ka awm dawm chunga ṭhut tlawk tlawk mai loh chu chet ngaihna ka hre lo. .
"dawt a sawi.... dawt vek ani a sawi... " ka thil tawn rapthlak lutuk kha ka mumang nise, harhchhuak ila ka ti takzet .

Anih na takah chuan Arden hian ṭawngkam ṭha in min be ngai lo a min ngaihsak ngai hek lo mahse chung chu pawi tihna pakhatmah ka nei lo a chhanchu a mitmeng leh che zia in dawt a sawi ve ngai lo vang ani.
Tunah pawh khan ka chungah ṭawngkam chhe tak tak hmangin min
thah a duh thu hial sawi mahse dawt a sawi nia hriatna ka nei tlat a nih chu !! chu chuan hnual a hnekin beiseina min siam a, huat a hnekin amah hnaih duhna thinlung min pe zawk a ni, ka awmdan hi ka in hre thiam tawh bik lo.

Tunah hian Arden hmeichhe hmangaih ber mit ringin khawvel eng ka la hmu ve ṭawk ṭawk ani a hmangaihtu tan chuan ngawi renga thlir ava harsa dawn tak em.
Krissy khan a mit min pe lo ta se chuan Arden hi ka tawng lo anga chuan hetiang ang natna pawh hi ka tawng lo tur, lawm tur ka nih laiin ka vui takzet, ni e... a vawi khat nan he mit avang hian ka vui takzet.

Nilo, engthil nge ka ngaihtuah tak hi hetiang ang hian tlusawp mai mai tur ka nilo ,a eng zawngin ka thlir hram hram tur ani.Kum kha leh chen kha a thim zawnga thil thlir reng reng in hun ka hmang ṭhin a, khua ka hmuh theih tawh loh avangin damchhan neilo ang hialin ka in hre ṭhin, thih vat vat ka chaka nitin in ka ṭap ṭhin anih kha, khatiang ang kha chuan ka awm tawh tur ani lo chuvang chuan Arden an eng thil pawh sawi mahse ka hmangaihna hi a dik anih chuan min hmangaih let hun ala rawn thleng ngei ngei ang, chumaibakah min that duh chu nise kan inhmuh hmasak ber ni khan min that daih tawh ang.

Krissy in min hmu se chu nep min ti ngawt ang, anih loh vek pawhin Arden enkawl turin a ai awh turin in min tir pawh alo ni maithei asin. Mahni leh mahni infuih chawp in ka mittui te ka hru hul a, ka beiseina la alh ve teng teng chu chhem hlum mai lovin meipui ah ka siam zawk tur ani.
 Krissy mit aṭang hian mittui ka ti tla tur ani lo ,keimah leh keimah chu inti chak turin ka inhrilh mawlh mawlh a, Arden hmachhawn tur hian ka chauh tawh lutuk chakna ka nei tawh lo takzet zet.