ZERO-58 (Last) by Remruati Bawitlung (Haylor)

Chapter-58

Arden chu inthiamlohna pawh nei hauh lo in ka bulah chuan a rawn ṭhu nghal thak a,engvanga kal bo tum si kha la kal lo cheu nge maw anih le.
"darkar khat hnu ah i chhuak thei tawh dawn a damdawiin ah i awm reng angai tawh lo ang " tih paha ka sam rawn hui a tum lai chuan ka lo hawisawn nghal hmak ringawt.
" ughh.... englo ania, Ethan an man tawh a " a tih takah chuan ka han maimichhing vang vang a, kha thil thleng avang khan zanah ka mu thei lo a, mahni chauha awm ka ngam bawk hek lo engtik lai pawhin hlauhthawnna hlir in ka khat renga chuvang chuan engtik lai pawha awmpui reng ka ngaih phah ani.

"kalbo rawh... " ka ṭawngchhuah takah chuan mak tih hmel takin min rawn melh nghal kawk mai,ni e....hun rei tak chhung a bulah ka ṭawngchhuah tawh loh avangin mak a ti pawh hi a awm lo lo e,amaherawhchu ka pa bulah erawh chuan ka ṭawng chhuak zeuh zeuh tawh thung.
"i ṭawngchhuak tiraw....?" min rawn kuah nghal thlawp ringawt, a hmela hlimna nasa tak rawn lang hi keimah vang nise ka ti takzet.
"hmuh che ka duh tawh lo "
"mahse ka hmu duh che lawm...."
"Arden.... Brad a rawn kal ania ,i kal vat angai"Natalie chu hlauhthawn hmel tak hian a rawn tlan lut nghal vata, Arden pawh a tho nghal vat bawk.

"kan inhmu leh dawn nia.... "tih pahin ka hmuiah a rawn kawp zeuh a,hmanhnawh takin a tlan chhuak nghal vat bawk.
A ngai te bawkin ka thinphu pawh a rang leh tawh kher mai,hepa bulah hi chuan hetiang hian ka awm reng mai dawn chu anih hi, mahse maw amah ka hmuh apiang hian thil thleng tawh te chu min ngaihtuah chhuah tira chhungril ah hian ka na takzet thung.
Arden hi ka pa hian a huat em avangin a rukin min hmu turin a rawn kal ṭhin a,vawikhat phei kha chu ka pa in a hnek hial anih kha,ka tih hun lai khan khumah mu in engmah hmu thei lo mah ila ka rilru kha a harhfim em em a, an thusawi engkim hmaih nei miah lo in ka hre thei vek bawk.

Arden kal hnu reilote ah ka pa pawh a rawn lut nghal vata,min hmuh rual rualin min rawn nuih nghal sang bawk .
" kan kal tawh dawn mi niang.... "a tih chuan ka lo bu nghat a, diktak chuan damdawiin hi ka kham tawh takzet ka ban chiah na mahse thi tur ang mai min enkawl a, room aṭanga chhuah hrim hrim hi ka chak tawh takzet bawk.
"Nate.... Tina hi i rawn hruai thla dawn nia,  motor ka lo zuk la chhuak ang " tih pahin bag chu a khai nawlh a, a chhuak nghal nal nal bawk.
"Tina... Arden chungchang hi i pa i hrilh lo ang tiraw? " tih pahin ka ban ala nat deuh avangin min rawn kaitho a,ka ban hi awrh reng mahila ala na takzet ka duh ang pawhin ka chet ṭha thei lo.
"hmuh ka duh tawh lo " tih ringawtin ka lo phun sap ringawt.

________________________________________

In kan thlen rual rual chuan ka room lamah ka pa in min chohpui nghal vata, kawngka a hawn chuan ka hnuk a ulh tlat anih chu!
Ka room ka hmuh lohna thla hnih chuang alo ni ta reng mai,engkim mai chu a hmun ngaiah ka dah dan ang thlapin alo la awm veka, engkawl tih hriat takin a fai hle bawk.
"Nate in nitin i pi room nen a ti fai ziah ṭhin a.... i duh chuan i mu hahchawl nghal thei ang bedsheet pawh a thar vek a pahsak che kha "
"awle.... " mut ka tum avang chuan ka pa pawh chu chhuah nghal mai a han tum a, "Pa... " ka koh chuan a rawn hawi rang kher mai.

"inneihni kha sawn hla suh u.... " keimah vangin an inneih ni tur sawn hlat an tum ani tih ka hriat ruk avangin ka dan ngei angai.
"a pawi hleinem... han dam fel phawt la "
" pa.... ka tihpalh " ka miittui a rawn far fap ringawt."Krissy mit a hmuh hian a rilru a na thei ngawt ang " ka tih chuan min rawn kuah nghal vata, ka ban chul hliau hliau pah hian,"A pawilo...a tan chuan a fanu rawn tho leh ang mai i ni"
"min haw lo ang tiraw? "
"ka fanu hi tuin nge haw thei ang"a rawn fiamthu avang chuan ka lo khi suk ringawt.

Nitin mai chuan ka room tukverh bulah thu in ka inngaihtuah ngawt ngawt ṭhin a, a chang leh Hailey ka tlawh zeuh zeuh ṭhin bawk a chhanchu a mal lo ani tih hi hriattir ka duh vang ani. Hailey khan rilru lama harsatna nasat tak alo nei reng kha alo ni a, mahni chauha awm hlauhna te, midang chan hlauhna te leh mal ngawih ngawih a inhriat na te chu amah tibuai ber tu ani. Hmu tura ka kal apiang hian Arden a dam nge dam lo tih hi min zawh hmaih ngai loh mai bakah hmuh a chak ṭhin thu min hrilh ngat phei hi chuan Arden hi ka haw ngawih ngawih ṭhin a chhanchu Hailey awm ang chiah hian ka awm ve vang ani. Nitin mai hian hmuh ka chak em em ṭhina, amaherawhchu tu chungah pawh natna bak a thlen ngai lo.

Keini chauh nilo hmeichhe dang pawh a in duh tir a, tumah a ngaihsak loh mai bakah a kawp duh loh avanga rilru na ka hmuh hian ka haw ngawih ngawih.A duh lo anih chuan ṭha takin a hnawl thei amaherawhchu min kalsan duh si lo hian hmeichhe dang a be reng bawk si a chu chuan min ti thinrim in amah min huat tir ngawih ngawih bawk.

Tukverh lam thlir vauh vauh paha ka lo ṭhut mai mai lai chuan Natalie chu lehkhabu nen hian a rawn lut a, ka bula rawn ṭhut pah hian, "Tina... pangpar hi a var nge a pink ṭha ang, han en chhin teh" tih pahin lehkhabu a pangpar chi hrang hrang chu min rawn hmuh tir a, a hmel a phurna leh hlimna chu tih chhiat sak ka duh loh avangin nuih sang pah hian, "a var hi a nalh zawk ang " ka lo ti vat bawk.
"anih chuan a var hi ka order ang.... chuan i kawr hak tur pawh a rawn thleng tawh a i ha chhin duh em?"
" umm.... " karleh nilai ni hi inneihni anih tawh avangin ka pa pawh a phur tawh hle a,chu chuan min ti hlim takzet.
" anih chuan rawn chhuk thla la... i duh ber i thlang dawn nia " tih pahin phur takin inhnuai lamah a chhukthla nghala.

Room ah ka tawm rei tawh bawka mahni leh mahni inti phur chawpin inhnuai lam ka pan thla chhat chhat a, mahse tumah an lo awm miah lo ,an vai mai chuan kawtah an lo ding khawm ṭhap a thil thlir nei te pawh an ang zawk.Mak tih hmel takin an thil tih hriat tum chuan ka va pan hnai ve nghal vata Natalie in min rawn hmuh rual rual chuan, " Tina... engmah ani lo lut ang "
" mahse....engthil " ka sawi zo hman lo,ka pa in Arden a hnek lai ka hmuh rual rual chuan ṭawng chhunzawm nachang pawh ka hre tawh lo.Ka pa in rawn kal a phal loh avangin dan a tum na lamah a hnek ani tih hai rual anilo.

"hmela.... rawn in lan tawh lo turin ka hrilh ngun tawh viau che ani lawm ni" ka pa in a kawr nghawnga a ṭham pawh chuan tih let a tum miah lo, duh chu nise ka pa hian a vawikhat khawih pawh a dawl dawn lo tih a chiang reng.
"pa duhtawk rawh.... " inneih buaipui dang ho chuan min rawn en nghal thap a,an hlauthawng ani tih chu hai rual ani lo.
"Arden hi biak ka duh "
"hepa hian.... "
" a pawilo... " ka tih takah chuan a kawrnghawng a ṭham na chu a thlah pawp a,Natalie chuan midang ho chu inchhungah lut turin alo ti nghal vat bawk.

"Eng nge hetah i rawn tih dawn? "
"hmuh che ka duh ani....ipa in phal lo mahse hetiang ringawt hi chuan ka awm thei tawh lo "
"midang i kawp tawh a, engvangin nge min hmuh chu ila duh cheu a"
" Enga!! " amah zawk hian midang a kawp ani tih a hriat loh hmel zawk.
" hman zanah pawh dinner in ei dun kha "
" nilo....  ka kut enkawl tunu doctor kha maw i tih chu... hahh" a kut enkawl tu doctor lek maw lo ni a!!!
"i duh ang ngeiin treatment ka la alawm... mahse Mason nen a in doctor biak pa kha chu ka hmu duh lo " hepa tak hi chu aw.... Mason vanga hmu duh lo ani tih ka chiang.

"mahse ka mamawh lai che in min kalsan ani lawm ni "
"duhthlan tur dang ka neih loh vang ani "
"nang hian midang tih nat bak tih i nei lo "
"Tina....a hma ang khan awm leh ang, hawh inah haw ang " min rawn khawih a tum chuan tawlh hnung hrut pah hian, "min khawih suh.... hmuh che ka duh tawh lo " ka lo ti nghal vat a, chungril ah erawh ka na takzet thung.
"khatiang thil kha ka thlen nawn tir tawh lo ang..."
"min en ta che... heng thil zawng zawng hi nangmah vanga thleng vek anih hi" ka tih chuan inthiamloh hmel takin ka ban chu a rawn melh zeuh a .
" nangmah vangin Krissy a thih phah a, nangmah vangin Hailey pawh rilru lam enkawl na ah a awm mek asin....chuan nangmah vang vêkin kei ngei pawh hun harsa tak ka tawh laiin i hlimna tur chauh maw ilo buaipui a!! " 



" i hria em nangmah vang hian ka pa in zantin mutna damdawi a ei ṭhin asin,chupawh duhtawk loin kei thlengin khawngaihna nei hauh lovin min tibuai asin,zantin mangchhia avanga mut theih loh te , hlauh ngawih ngawih reng te leh rilru nat te hi pawi ka ti lo mahse nangmah avanga ka hmangaih ten an tuar lai erawh ka hmu thei tawh lo " 
"ka duh reng vang ani lo" 
"a thlen tur ang chu a thleng vek tawh chuvang chuan a thlen nawn leh tawh loh nan kei leh ka chhungte lakah hian inthiar fihlim rawh,thlamuang takin min awmtir tawh rawh " ka pa lungngai hmel hi hmuh leh ka duh tawh lo. 
" keimah vangin thlabar takin in lo awm ani maw? " a rilru a nat hmel kher mai. 
"hmuh che hi ka duh tawh lo...." ka tih takah chuan a sam ṭham pahin a hmui chu a han pet vang vang a, nuih suk pah hian," awle a ṭha e.... " a han ti chuai raih a, rawn hawi let tawh lo in bike ah a chuang vat a, chak zetin a tlan nghal vang vang bawk. 

Ka rilru na hle mahse amah avangin ṭah ka tum tawh lo mahila insum hi thil harsa tak ani, tunah chuan ka mipa duh leh hmangaih chu ka chan ta!!  ṭah chhuah hawm hawm ka chak takzet. Luh tuma ka hawi let chuan ka pa hian kawngka aṭang chuan min lo thlir renga, biak pawh be lo in melh zeuh pahin inchhungah ka luhsan daih a, tunah hi chuan keimah chauh a awm ka mamawh takzet. 
"Tina.... kawr chu i rawn ha chhin dawn mi niang " 
"awle... nakin deuh ah " pangngai taka ka ṭawng chuak thei chu mak ka inti hial zawk, za lo zeta nuih suk pahin ka room lam ka pan nghal vata, ka room kawngka ka khar chiah tih chuan ka insum thei tawh lo, ka ṭap chhuak nghal hawm hawm ringawt. 

Arden nen a kan inkar a tawp takah chuan min hmu turin a rawn kal tawh ngai loh mai bakah a chanchin hriat tur a awm leh tawh ngai lo. Kei erawh a ni telin chhiat lam ka pan zel emaw tih mai tur hian engthil mah ka ei thei lo a, ka mutthilh theih loh mai bakah engthil mah in min ti hlim thei tawh lo. 
Ka pa leh Natalie te bulah erawh engmah thleng lo ang maiin awm ṭhin mah ila ka room ah ka awm tawh hi chuan ka ṭap lo thei ṭhin lo. Kumkhua a Arden nen a kan in ṭhen tur hi ka ngaingam thei thlawt lo, a chang leh ka suangtuahna te kawm in mi â ang maiin ka khawsa a, Hailey hmu tura ka chhuak tih loh hi chu ka room ah ka tawm deuh chawt reng mai. 

__________________________________________

★ WEDDING DAY★ 

Tuipui kamah an innei bawka, midang an lam sup sup lai chuan wine dawm chungin lungpui chungah chuan ni tla tur thlir in ka han ṭhu vang vang a, thli thaw heuh heuh te leh tuipui fawn hlawp hlawp te chuan min ti zia sawng sawng mai. 
"i lam ve dawn lo em ni? Jade pawh a lam nasat em saw..." tih pahin Dylan chu ka bulah a rawn ṭhu thak a, "mipui zi nuai nuai ka tlanchhiat san zawk mawle " ka tih chuan a nui chhuak hak ringawt.
"boruak chu a nuam kher mai....zanin hi Arden te inbeih zan kha ani tawh ania, i kal ve dawn lo em ni? "
" Dylan... a chungchang sawi tawh lo teh "
"a chanchin ka sawi loh pawhin i hlim phah pawn ka hrelo"  

"hlim lo mah ila min ngaihsak lo tu hming hi hriat pawh ka hre peih lo " 
" hahh....nikhaw hrelo a i awm lai pawha i kianga awm reng ṭhin ,a practice kar lakah pawh i chanchin min rawn zawt ziah ṭhin tu, i pa in hmuh che a phal loh lai pawha i room kawta nghak fan fan ṭhin tu che hian a ngaihsak loh na che ka hrelo " 
" maw? "
" i awih em?  i pa in hmuh che a phal loh avangin a chapo na te dah ṭha in a mangang lutuk in i chanchin min rawn zawt asin.... i awih bik lo ang Arden an hetiang thil a ti hi " 

"Amah vanga tuar ka nia... a tih ve tur reng alawm " 
" anih Krissy thattu Hailey takngial pawh nangmah vangin a va tlawh ṭhin tih hi i hria em? " chu zet chuan min ṭhawng takzet, ni e... Arden bulah Hailey a tih na thu te leh midang rilru tih nat bak a tih ngai loh thu ka hrilh ngei alawm mahse a thil tih diklo te siamṭhat tuma Hailey a va hmu ṭhin chu mak ka ti takzet, a chhanchu a hmangaih ber thattu hmuh hi thil awlsam tak ani hauh lo. 
"engmah i hrelo niin a lang.... a awm tho e i beng i chhu ngawng tlat alawm " ka ngawi reng ringawt, han sawi mai tur pawh ka hrelo. 
" ok.... Saw Katie in min rawn melh rum tawh emai kan kal leh tawh mai nge "nuih vur vur pah chuan a rawn ti a, keipawhin ka lo nuih let suk bawk. 

Mahni chauha awm chu thil eng eng emaw ka ngaihtuah zel avangin party na ah chuan ka let leh ta ringawt a, ka nu leh a pasal hual mai bakah ka naute pahnih pawh an rawn kal ve avangin an bulah chuan ka zuk ṭhu ve nghal vata, ka pa leh Natalie te lam lai chu kan en ṭhap bawk. 
"nui ve ta che... i pa nupui ang sawn " ka nu ṭawng hi chu ngaiah ka nei tawh, a thik vang leh a sual vang pawh ani lo a ṭawngkam ve hrim hrim anih hi. 
"va lam ve zawk rawh ru... " 
"nilengin pheikhawk sang ka bun a.... ka ke hi a durh lo chauh " 
"keipawh... " 
"i pa tana kan tawrh ve theih chhun ani miau sia lawm le " a pasal hual melh pah chuan a nui hawk hawk ringawt, ka nu tak hi chu fiamthu a duh bawka a bulah hi chuan a lungngaih theih loh. 

Chutia lam kan lo thlir reng lai chuan ka pa chu ka bulah rawn kal hnai in ka hma ah tak a kut rawn dawh pah hian, "min lampui thei angem?" a han ti sap a, "tehreng mai tih pahin ka kut ka lo pe nghal vat bawk ". Ka pa lampui hi ka thil chak ber anih mai bakah an inneih ni a ka lampui thei hi ka lawm takzet bawk.
" i mittui a tla dawn ania..." 
" ka hlim lutuk a, ka duh lo chung pawhin a rawn tla zel tho"
" i hria em? i tet lai aṭang tawh in i tan pa ṭha tak ni ngai lo mah ila i hlim hi ka duh ber ani asin" 
" pa ka hlim lutuk alawm.... i hlim hmel ka hmuh hian ka hlim takzet bawk"
"mahse... i lungngaihna te thup tuma i nuih hian min ti lungngai ṭhin asin, tunah pawh i nui hmel ka hmuh ka lungngai takzet" 

" pa...."
"tun aṭang chuan lungngai taka i awm hmel hi ka hmu duh tawh lo ...i pa hian i hlim theih nan chuan engpawh ka ti ang " 
"ka lawm e... "ka pa chu ka kuah nghal thlawp a, ka pa diktak kha a rawn let leh tawh avangin ka lawm takzet. 
"Ka lampui ve thei tawh angem?" ka pa ka kuah lai chuan Arden aw ka hre ta thut mai!! mak tih hmel takin ka pa chu ka en nghal vata ,ka hnung lam melh paha hawi let tura min rawn mitmei zeuh avang chuan ka hawi phei rang kher mai. 

Ka awih thei lo, ka thil hmuh hi a tak chu ani ngei bawk si .Arden chu suit nen min rawn nuih vur vur pah hian alo ding reng anih chu,a hmelṭhat ngaiin ala hmelṭhat mai bakah a suit ha lai ka vawikhat hmuh na a nih vang nge pawh ka hrelo a chhelo takzet. 
"pa ...." ka pa ka melh rual rual chuan ka mittui a rawn tla nghal zung zung ringawt. 
"i hlimna tur anih phawt chuan engkim ka ti ang ka tih tawh kha,i mittui hi hru hul rawh i nuih khan i hmelṭha daih zawk ania " tih pahin Arden bulah chuan min kai phei a, "i tih ṭah leh chuan jail ah ka khung tawh ang che... hre reng rawh Zero ang nilo in Arden ang zawkin duat takin enkawl ang che " ka pa hian Arden chungchang alo hrechhuak vek tawh anih hi,engtin nge a hriatchhuah le?. 

Ka pa chu kan piah deuh lawkah Natalie nen an lam lehnghal a,  diktak chuan kan awmdan hi a lai deuh ṭut tawh han sawi mai tur lah ka hre miah lo lehnghal. 
"min lampui dawn lo mi?" tih pahin ka kut chu a rawn vuan a,a kut lehlamin ka kawngah a chelh tlat bawk. 
"heta i rawn kal chhan hi sawi i tum miah lo em ni? " 
" ughh.... i pa in nimin ah min hmu turin a rawn kal a " a tih takah chuan thil thlen dan chu ka man thiam nghal vek. 
"mahse MMA kha" a hmai vung deuh lak te leh pem la tharlam tak te chu ka hmuh hmaih hauh lo. 
" naktuk ah news ah i en mai dawn nia "a awmdan aṭang chuan a champion ani tih hai rual ani lo. 

"nghal leh lutuk mai... tlang deuha min hrilh loh te chuan engtin nge ka hriat theih anga " ka tih rual rual chuan lungchim takin min rawn fawp nghal vawng vawng a,a ngai te bawkin ka thinphu pawh a rang leh tawh kher mai.
"KA HMANGAIH CHE capital letter in ka sawi ania...tlang deuhin ka hrilh che anih chu " 
"hey.... " 
"Valentina...  ka fiamthu lo ka hmangaih che, ka hmangaih takzet che " mak tih hmel zetin ka en reng ringawt, Arden thusawi hi a dik tak tak ani em?  ka awih thei lo, vawikhat pawh min duhthu sawi ngai lo khan min hmangaih thu min hrilh anih chu !!! hei zet hi zawng fiamthu emaw sawi mai mai a ni thei tawh lo. 

Chhan ngaihna pawh ka hrelo, mahse hei erawh ka hre chiang hle thung tuna ka mipa lampui, hmelṭha leh chhelo zet mai hi ka hmangaih ani, ka thinlung zawng zawngin ka hmangaih takzet bawk. 
"ka... keipawhin ka hmangaih che " tih pahin duhthawh takin ka han fawp vawng vawng a , a khawih te, a fawh te leh a rim te thleng hian ka ngai tawh lutuk hi engtik lai pawha a bula awm reng mai hi ka duh. 

"khawiah emaw kal i duh em? " 
" maw!! " 
" i hre mai ang "tih pahin a bike lam panin kan in kai phei nghal dawr dawr a, kawrfual ka hak mai bakah pheikhawk sang ka bun bawk nen kal pawh ka kal ṭha thei tawh lo.
"khawiah nge kan kal dawn? " 
"tui cheng turin mawle.... kha helmet hi khum rawh " tui maw!!  a sawi tum chu ka hre nghal, hmana tui khawh thla awmna hmun a min hruai na kha ani tih ka hriat avangin ka phur hle nghe nghe. 

"helmet ka khum te chuan ka sam a chhe vek anga sin " 
"a pawilo..." tih pahin ka sam darkar khat dawn uluk zeta an set ṭhat sa vek kha second khat chhung lekin a rawn phelh nghal vek anih chu.  " ti kha chuan i khum thei tawh ang " ngeiawm zetin a ti zui kher bawk. Arden an bike a tih nung hlat hlat hnu chuan ka kawr fual pawh chhoh pahin chuan mai ka han tuma thil ka hriat chhuah leh hnuhnawh avang chuan lungawi lo tih hriat zet hian, "i Doctor nu nen khan washroom ah khan eng nge in tih " ka han ti leh kher a. 

" a kawr hnung zipper zip sak ka tum mawle "
" engvangin? " 
"huizz.... dinner ei laiin a in phelh alawm, chuang rawh chuti lo chu ka tlan san ang che " 
" ka pa thusawi kha hre reng rawh " fiam pahin rem lo zet hian ka chuang nghal vata,a kawngah nghet takin ka kuah nghal thak bawk.A tlan chak dawn ani tih hre tho mah ila, "tlan chak suh aw... chu ti lo chu.... " ka sawi zawh hma hma in min runluih deuh pah bawk nen chak zet hian a tlan chhuak nghal fua a ka au phei nghal rawng rawng bawk.

THE END

IG-@remruati_b

Fb- Remruati Bawitlung /Haylor Sept