My Drug is you -55 by Remruati Bawitlung (Haylor)

CHAPTER-55

Motto- Dream Bigger 

Ka phur bawka park ah chuan ka thleng rang khawp mai, Freddie a la rawn thlen mai loh avangin a hma a kan ṭhutna bawkah khan a langsar thei ang berin ka han ṭhu a, ka lawm em avangin mi zawng zawng hi hrilh vek mai ka duh.

Ka tum aia Freddie a rawn thlen har avang chuan sana ka melh deuh chhen a, damdawiin lamah a buai thut anih loh vek pawhin traffic zam ah a tang pawh ani mahna.

Darkar khat zet ka nghah hnu chuan ka ka call ta ringawt a, chutah phone a la lâ thei lo lehnghal.

"eng em em nge maw a tih le? " phun nung nung pahin ding chung hian ka han hawi kual vela, Freddie hmel reng reng hmuh tur a awm lo.

"vawikhat chiah ka call leh ang " ka han call leh a, a la thei lo anih chuan damdawiin ah emaw a in a kal ka tum tawh mahse vanneih thlak lutuk in a pickup hlauh.

" khawiah nge i awm... i va rei ve... " a ṭawng hma hma chuan ka lo ti nghal hluk a mahse thaw chhuak hak ri bak ka hre zui lo.
"ughh....pawi ka ti lutuk, hemi phone neitu hi a accident a , tunah Royal hospital ah kan awm mek ..."
"maw!!in a accident a!!"
"biak mai tur ka hre lova... i rawn call hlauh chu a tihzia takzet" mipa pakhat in a rawn tih chuan sawi tur pawh ka hrelo, mak ka ti in min ṭhawng takzet.
" ka... ka rawn kal nghal " tih bah nuaih pahin car lam panin ka tlan nghal hlawk hlawk a,ka tai leh ka pum alo na ve deuh bawk nen ka duh ang pawhin ka che thei lo.

Damdawiin ka thlen chuan khapa kha ka call leh nghal vata, a awmna room min hrilh lam panin ka tlan nghal vat bawk.
"khawiah nge Freddie chu a awm? "
"tunah an zai mek...."
" a... a ṭha ang tiraw? "
" a ṭhat ngei ka beisei mahse a hliam na khawp mai... " a tih phei chuan ka hlauthawng lutuk chu ka mittui a rawn tling nghal pam a, engvanga hetiang thil hi a chunga thleng nge maw anih le?

Ngawi rengin chupa nen chuan kan ṭhu dun kar a, sawi tur a vang duh khawp mai, chu mai bakah thil tamtak ka rilru ah a rawn lut nghal zung zung a, ka rilru hi a buai vek ani ber.

"tunge su...? "ka tih thut avang chuan mak tih hmel tak hian min rawn en ha a.
" ughh...ka hre bik lo , kawng laiah an lo hnutchhiah tawpa, car chhe tawh takah a tan avangin paramedics ka ko nghal vat a an ni ho chuan an rawn la ta ni " thil awmdan vel chu ka mitthla thiam nghal mai, tuemaw in a su anga an tlan chhia aniang mahse tunge ni ta ang?
" ka lawm takzet... "
"a accident na hmun kha mi awm lohna lai tak alo ni bawk nen tum loh deuh a khami kawnga ka tlan hlauh kha a tihzia khawp mai "

Chutia ngawi renga ka inngaihtuah vung vung lai chuan thil hrechhuak thut niawm tak hian ka tho chhuak nghal vut a,"tih tur ka nei a ... an zai zawh hunah min rawn hrilh mai rawh aw"
" aw le... khawiah nge i kal dawn? police pawh an rawn thleng ṭep tawh sin" amah chauh a police lo hmachhawn chu a hreh deuh niin a lang.
"a chhungte ka be tawh a, an ni pawh an rawn thleng ṭep tawh ang "
" ka hrethiam e... " thlamuang takin a ṭhu ve leh mai a, kei erawh hmanhmawh takin ka tlan chhuak thung.

Chutia finfiahna ber a bo takah chuan rinhlelh ka nei nghal, he thil hi Hunter tih ngei ani a hma pawh khan min vo tawh bawka he thil vang hi alo nih dawn hi.

Ka rilru a hah mai bakah ka thinrim bawk nen ka mit te chu a sen vek tawh a, ka mittui lah a tling pam bawk.

Freddie hriselna pawimawh rual rual in finfiahna ka ngaihtuah lo thei lo, a chhanchu aman a kawl vek miau a.

Rachael in Hunter a haw tawh thu min rawn hrilh avangin a in lam panin ka tlan nghal vata,thil eng eng emaw ka ngaihtuah a ka inhum ruh nasa hle bawk.

Hunter kawngka chu a password ka hriat avangin kik lovin ka tlawh hawng nghal ṭhuai a, engthil pawh thleng dawn se ka hmachhawn ngei ngei tur hi ani ringawt.

Khawi room mah enkual lovin music lo chhuah na bathroom lam chu ka pan nghal vata, ka rin ang ngeiin bathtub ah wine nen opera ngaithla chungin alo maimichhing leh duar duar tawh.

A hla play lai off pah chuan ,"engvangin nge Freddie lehzel i tawrh tir i tan hlawkna tur engmah a awm lo... "
"hahh...i va che rang ve, i chhuak chiah emaw tih nak alaiin... "
"duhtawk rawh...hetiang em em a nunrawng hi i lo ni maw!!" duhlo hle mah ila ka mittui chu a rawn far fap a, rang takin a hmuh hma in ka hru hul nghal zeuh bawk.

" aw.... Coco, vin lutuk teh suh i tan thil ṭha deuh ka nei ania... "
"i duh duh ti rawh mahse midang erawh ti buai suh... ka ngen a che"
" e taka... i la hria em? i kut ngeiin min la pe ang ka tih kha....ka tum aia hma in min pek mai angaih hmel "
"engthil nge maw i sawi le... "
"finfiahna ka nei mawle... Naktuk ah i bialpa chak tura i duh chuan i tih tur chu i hriat kha "

"i thil tih man hi i la hmu khawp ang " tih pahin thinrim takin ka chhuak nghal hmawk hmawk ringawt.

Diktak chuan tunah hian police hnena report bak ka rilru ah a awm lo, mahse buaina ngai bawk finfiahna ṭha tawk tak a awm loh chuan police pawhin an man thei ringawt bawk si lo.

Car steering bawh ngawih ngawih pahin ka ṭhu renga, engthil nge ka tih leh hmasak ber tur pawh ka hre tawh lo.

__________________________________________

★Samuel's Pov★

Coco ba ka pek tlak sak hnu chuan hlim takin leh lungmuang takin inchhung ah ka lut chhat chhat a, room a ka luh rualin rang takin Grace in min rawn zui lut vat bawk.
"duhtak... i ti mah mah lo maw,Joel in hmun hralh sak in engtin nge a man ba rulh nan i hman theih zawk ... "
"an ni ai chuan Coco in a mamawh zawk... " ni e...khang mi ho khan vawitamtak an vau lai ka mit ngeiin ka hmu a, a tawrhna te hi ka hmuhhmaih bik hauh lo, he thil hi ngun taka ka ngaihtuah hnu ah Coco in a mamawh zawk avangin a ba ka pek tlak sak ta ani, amaherawhchu Coco hrilh erawh ka tum hauh lo.

"i thil tih hi an la hrechhuak vat ang "
"Coco i hrilh lo ang tih min tiam tawh kha...a hriat ka duh lo "
" chu chu a pawimawh ber lo...i fapa hi i ngaihtuah ve miah lo em ni "
" Joel chuan inhmun dang ala nei alawm... chubakah he in hmun hi chu ka hming in ala awm a, Joel ka la pe reng reng lo "
" duhtak... "

"Grace....Coco in a tawrh nasat zia hi ilo hmu ve ṭhin em?  vau na, endawng na leh hnuaichhiah na te hi nitin in a dawng ziah ṭhin asin chuti chung chuan chak takin a awm angai a ,thlamuang taka zan khat tal a mut ve theih nan thil ho te tal kan nih sak ve thei lo em ni?" ka tih chuan Grace chu a han insut hraih a.
"a rawn lan aṭang hian kan chhungkua engkim mai hi a buai zo vek in ka hria mahse ka pawm lo thei si lo "

"a landan ringawt hi ani hleinem... en ta che Asher inthlak danglam nasat zia te hi, mawhphurh na la ngam khawpin a puitlin tak hi... " keipawhin Coco hi a tirah ka pawm bik hauh lo mahse vawitam tak Pathian rawn chungin ka ṭawngṭai a, ka in ngaihtuah nasat em avanga zan mut theih loh lah ka ngah amaherawhchu Pastor ni chung pawh a thutlukna siam har tak, Pathian rawn chung pawha pawm har ka tih em em ka fapa kawpui aṭan mite hmuhsit rawn , hmeichhe awm ṭha duh lo chu pawm turin thutlukna ka siam tawh a, ka siam sual lo reng bawk.

" keichu pawm har ka la ti tho asin ...duhtak min ngaidam rawh ka fapa tan hian henu hi ka duh thlawt lo ani... " Grace pawh hian pawm turin a bei nasa in en hran loh pawh a tum nasa amaherawhchu a fapa a hmangaih luah avangin pawm a harsa deuh pawh ani mahna.
"Grace.... pawm kher hi angai hleinem, hmangaih na tamtak i pe a, ṭha takin i enkawl bawka chutiang bak bak Coco pawhin a beisei reng reng hleinem... "
"aw.... hmeichhe khawihthlak awm tak ava ni em?"

Thim hma in kawta hnahthel thla phiat fai tura ka insiam lai chuan Joel thawm ka hriar avangin room aṭang chuan ka chhuak nghal vat a, Joel leh Rachael te awmdan aṭang chuan in hmun ka hralh tih an hrechhuak tawh ani tih a hriat theih.

"ka pa...engtin nge in hmun hi i hralh theih zawk? "
" ni e... i inhmun roh ber ani sia " Rachael pawh chuan alo ti ve vata.

"ka awih thei lo.... Coco ba pek nan i hmang lehnghal amaw? " a tih chuan Rachael chu ka melh nghal vata, a awm dan atangin a hrilh ani tih ka hrenghal .
"khatiang thil kha Coco hriat laiin sawi chhuak reng reng suh ang cheu... "
"henu hi engvanga buaipui em em nge i nih a, i fapa in hmun i hralh phah lehnghal "
" Joel...ka ram ka hralh... " chiang fek fawk chuan ka han ti a.
" chupawh chu nise... keima tan i dah ani lawm ni... "
"in hna buaipui tawh rawh u... chuan he thil hi Coco in a hre tur ani lo a, he inchhung ah hian a ri nawn leh tur ani bawk hek lo "

Thinrim tak chungin inchung lamah an nupa chuan an chho tau nghawng nghawng a, hetiang anga ka fa te rilru ka tih nat hian ka awm a nuam bik hauh lo amaherawhchu ka rin Pathian in ti tura min tih chhung chuan engpawh ka ti ang.

Ka chhuak tur chu Coco pawh zawi tak leh rilru hah hmel tak hian a rawn lut chhat chhat a, min rawn hmuh rual rual chuan hlim hmel min rawn hmuh nghal sang bawk.
" Samuel... i rilru a hah hian engtin nge i awm ve ṭhin ..." a rawn tih takah chuan thil engemaw a thleng tih a hriat theih.
"karawh kan sawi dun dawn mi niang... " ka tih chuan alo bu nghat a,hetiang anga buaina a tawh apiang hian min hrilh duh lo mahse Pathian thu emaw a thil la hriat ngai loh hrilh nan ka hmang ṭhin a, kan in biak apiang in a inthlak danglam mai bakah a rilru put hmang pawh a dang ve telh telh bawk.

(fakna hmeh in minute 1 tal enkual tur aw)