My Drug is You -54 by Remruati Bawitlung (Haylor)

CHAPTER -54

"khawiah nge Asher a awm? " ka tih takah chuan a awm dan chu a han thlak danglam nghal vata,ngeiawm zeta nuih suk pah hian "password ka hria a ka duh hun hun ah ka lut thei...a lan dan chuan Asher hian a password hre turin a ring tawk lo che niin a lang... "
"hahh....password hi kan mamawh ve lo... min hmuh a duh chuan kan in ah min rawn pan mai zel,ka sawi awmzia chu a nu leh pa te in ah ..." ngeiawm zet in ka lo chhang let ve ngat a,min melh rûm ngei mai.

"lo hlim viau suh... naute i neih veleh an pet chhuak lo ang che tih tunge sawi thei... han in en ta che nang ang mi hi Asher kawppui i ni thei lo hrim hrim"
"haha....i ngaihtuah thui hle mai,Asher an a bân tawh che ani tih hi i la hrethiam thei lo niin a lang" ka tih takah chuan a haw kher mai,"hmeli " tih pahin ka kawr ken lai chu a rawn pawt pawp a, kei lah in ka thlah duh bik der lo.

"chhuak rawh.... heihi Asher nen a kan in anih hi... "a ṭawngkam chuan min khei zâk mai, chu chuan min ti luhlul zual sauh bawk.
"a kawr pawh hi khawih hlek suh... "

Chutia ka lo in chuh buai lai tak chuan kawngka a rawn inkhar ri rak a, Asher âw in a chhunzawm zat bawk.
"Coco.... " pawnah ka car a hmuh avangin rooma a rawn luh hma hma chuan ka hming a ko thei nghal. Chutah Asher aw Lily in a hriat rual rual chuan  ṭe nghal tuarh pahin chhuatah a tlu der nghal tawp anih chu !!  ka mak ti lutuk chu ṭawng ngaihna pawh ka hrelo .

" Coco... engthil nge maw i tih le? " tih tuarh pahin Lily chu a rawn kai tho nghal vata,kei erawh chet ngaihna ka hre der lo.
" ka... ka tih ani lo... "
"duh tawk rawh... " min rawn vin nghal hluk avang chuan insawifiah in awmzia a nei lo tih ka hriat avangin sawi belh ka tum tawh lo.
"Asher....henu hi ramhuai anih hi" Asher kuah tlat pah chuan min rawn nuih suk a,a awmah chuan a han bei vel a, engmah sawi belh lovin room aṭangin a chhuahpui nghal daih bawk.

Ka rilru na lutuk ngahtuahna mumal pawh pu lova ka din khawng reng lai chuan Asher chu a rawn lut leh a,min tih dan avang khan ka lungawi lo takzet.
"naktuk lawk hi trail ani tawh a engvangin nge Lily hi ila hmuh cheu...i chunga a thil tih zozai te hi i hre ve lo em ni " ka thinrim lutuk chuan ka ti chhuak nghal phawng phawng a, ani erawh a ngawi reng thung.

Room aṭanga a chhuah daih avang chuan ka zui chhuak ve nghal vata,ka insum thei lo chuan couch a throw pillow chu ka paih nghal pawp ringawt.
"harh chhuak tawh rawh... Lily hian a bum che ani tih hi ngatinge i pawm theih miah loh... "
"ka hria lawm...."zaidam diam a a rawn tih sap avang chuan mak tih hmel zetin ka melh nghal haw ringawt.
"Lily hian min bum ṭhin ani tih ka hre daih tawh...chuan he thil ah hian dawtin min puh ani tih pawh ka hria mahse kei pawh hian thil sual ka ti ve tho " a sawi tum ka hre nghal, ni e... Lily nen an inhual laiin a phatsan a chutah a ṭhen zui bawk.

"ka thil tih sual avanga hetianga awm hi ani a.... amah ka hmuh apiang hian ka inthiam lo takzet"
"mahse.... case nei lai in ni a thil ṭha lo zawk a thleng dawn asin... "
"ka buaina ah hian rawn in rawlh suh... Lily hi awm tir mai mai rawh "
" maw!! "
"naktuk ah pawh i hmel hmuh ka duh lo ,rawn kal suh ang che " tih hmuk pahin room ah min luhsan leh hmak bawk .
__________________________________________

Asher min tih dan avanga lungawi lo zet chung chuan ka haw leh hnak hnak a,
"kal ka chak bik reng reng lo... " tih nung nung pahin car aṭang chuan ka chhuk thla a, kan inah kal ka duh tehreng nen Rachael in rawn haw vat tura min tih avangin ka haw tlang ta zawk a.

Thawk halh pahin thil engmah thleng lo ang maiin inchhungah chuan ka lut a,Hunter ka hmuh thut avang chuan pen nga pawh ka pen hma in ka ding nghal chawt ringawt!!
"Coco i rawn thleng hma hlauh chu a tihzia lutuk ....lo ṭhu rawh,lunch pawh ka peihfel ṭep tawh... " Rachael in wine rawn lei tura min tih avangin ka wine pawm lai chu min rawn laksak nghal sawk sawk a,ka hlauhthawn em avangin inthup nachang pawh hre lêk lovin Hunter chu ka en reng ringawt.

Ka awmdan hrilh hai zet avang chuan Grace chuan, "Coco.... Hunter hi baptist thar tur te zinga mi anih hi " alo ti nghal zung zung a, Hunter lah chuan ngeiawm zetin min rawn la nuih vur vur lehnghal.

Ngawi rengin rum zeta melh pahin Hunter ep chiah ah chuan ka ṭhu ve nghal thak a,Samuel leh Grace te chu an hlim mai bakah an lo biak siam siam avang chuan rum zet hian ka va melh leh khai ṭhin a, thil tum nei lo se chuan hetiang hian lem a rawn chang lo tawp ang.

Midang zawng dinning room ah an lut fel ziah tih in Hunter chu ka pawt let a,midangin min rawn hmu nge hmu lo tih enfiah pah chuan,"eng nge hetah i rawn tih dawn? " nelawm loh zet hian ka han ti sup a.
"baptistma chang turin mawle... "
"i nihna ka puan chhuah vek hma hian he in hi chhuahsan rawh "
" hahh... engtin nge ka tih chuan ang, ka thil duh min tihsak duh bawk si lova keiman ka tih mai angai anih hi " dar tih kan ak pahin ngeiawm zet hian min rawn nuih suk a, a hmaia ben nghal pawp ka chak takzet.

" ngawi hmak rawh...chutiang chu ka thlen tir dawn reng reng lo "
" hahh.... nangmah hian i kut ngeiin min pe dawn mawle"
"i hresual let der anih chu " ka nuih let ve kher a, mahse ka chhungril erawh in a thil tih theih zia a hriat ve kur avangin ka hlauthawng takzet.
"lo ngai reng mah rawh chu chu ka la thlen tir dawn ...."

" Coco.. " kan awm dun lai Rachael in min rawn hmuh chuan kan in la hrang nghal vata, Hunter pawh min rawn siai suk pahin dinning room lamah a lut nghal bawk.
" umm... ka rawn kal " engmah thleng lo ang mai a kal tlang daih ka han tum na in ka ban rekah a rawn vuan nghal chawt mai.

"Engthil nge thleng...? "
"engmah ani lo "
" Coco.... min hrilh dawn lo maw? "
"ughh... Rachael pawi ka ti lutuk khapa kha ka hmelhriat ania chuan a chanchin hi sawi ka duh lo... "
"mahse i hlauthawng hmel ka hmuh hian nuam ka ti lo... "
"engmah ani lo...tunah chuan inzawmna kan nei tawh lo "
"a ṭhat chu... mahse buaina a awm anih chuan min hrilh zel rawh, i kiangah ka awm reng ania " duat takin ka samah a rawn chul a, ka lo bu nghat bawk.

Lunch kan ei lai chuan "nupui te i nei ve tawh em? " tiin Grace in a zawh chuan,min rawn melh kher pahin min tih chhan zet hian,"aih mahse fa dang min pai san erawh tawrh a har khawp mai " a han ti kual vela,a thusawi engkim mai chu an awih vek bawk si a inhum ruh ṭun chungin chaw ka ei phah.

Awm nuam lo zeta ka ṭhut ve reng lai chuan Freddie an min rawn call hlawl avangin lawm ru tak si hian, " min lo hrethiam rawh u... " tih leh thawh ka rual nghal a, chhuanlam siam tur ka neih hlauh avangin ka lawm hle bawk.

" Coco... tunah kan inhmuh angai "
" maw!!  ka chhuak thei lo "
"finfiahna ka nei tawh "
"Engmaw!!  i ti tak tak em? "
"aw...tunah park ah khan lo awm rawh ka rawn thleng vat ang "
" aw le... "

Tumah hrilh lova chhuah daih ka hreh avangin Rachael alo kham ve chiah bawk nen ka chhuah tur thu chu ka hrilh ta ringawt a, ani pawhin lungmuang taka kal turin leh chhuanlam min siam sak tur thu min hrilh nghal bawk .

" mahse engvanga hmanhmawh em em nge i nih a? "
" i hria em? Freddie an finfiahna a hmu tawh alawm... "
" ani maw!! " a phur lutuk au chhuak tur chu a kâ ka lo hup sak nghal vata,
"tumah lo hrilh suh... naktuk trail na ah kan surprise dawn nia... "
"aw le "
"anih chuan ka kal "tih leh tlanchhuah ka rual nghal bawk.