June 09, 2020
Chapter-19
" I've never been so scared of losing something in my entire life , then again nothing in my life has ever meant as much to me as you do "
Noel nen kan inṭhen na pawh karhnih lai a ni ta ! Ig , Facebook , whatsapp leh a block theihna apiangah ka block vek a ,Carine nen an buai bawka kan inhmu leh tawh lo hrim hrim.
Mi rilru lian leh luhlul tih takah vawikhat pawh ka mittui far tir ka tum lo , he mi tenawm pa hian ka mittui hi a phu hlawl lo .Nidanga ka nunphung ang chiahin engmah thleng lo ang hmak in ka awm a ,ṭhiante zingah pawh tuar angin ka awm ngai lo mahse keimah chauha ka awm veleh thil kaltawh chu ka ngaihtuah let ngut ngut ṭhin a ,pawn lamah tilang lo mahila chhungril ah ka na ngawih ngawih thung.
" Nanghi i van tawrh loh hmel tak " Zuali chuan min ti bawng bawng a , phone khawih pahin nui lui ver ver chung hian ," Tawrhna chhan tur ka nei hleinem " ka lo ti hmak .
" Carine chu awmlo se in la ni reng ang mawle "
" A nihna diktak ka hre tawh a kan inṭhen hi ka lawm zawk , kawp nih ka duh teuh lo "
" Dr. Noel hian a tuar ve angem le ?" A rawn ti leh a , kei ngei pawh hian ka hre chak mahse a awmdan aṭang khan a tuar hauh lovang chu chuan min ti na takzet , a thinlung ah hmun pakhat tal chu chang ve ila ka ti takzet .
" ka buaina tur a awmlo , uNathan an min rawn bia a nih hi " phone kheuh nuap nuap pah chuan ka ti zui zat a , Zuali erawh in ka tuar vak lo hi min lawmpui hle thung.
Mipa ka tawn ve apiangte hian min chhaihkual bik reng mai chu a nih hi .Zomuansang harhchhuah a hun tawh .
UNathan hian Zuali aṭangin kan inṭhen tih alo hria a chutaṭang chuan min hnem tumin min rawn be char char ṭhin, kan inah pawh a rawn leng ngun malh malh khawp mai. Keipawh in tumah be lova indawm kun ngawih ngawih ai chuan ka rilru lak pen nan ṭha takin ka lo be ve mai bawk.
UNathan an RIPANS ah ka Mpharm tih leh na tur application min thehluh pui a ,haw lamah Chopstyx Restaurant ah thil ei turin kan inzui lut a mahse rin loh lutuk in Noel leh Carine te pahnih chu ka va hmu thut !!
Ka ding nghal chawt a Noel pawhin min rawn hmu ve nghal , min hmu thut chu mak a tih hmel takzet !! An pahnih chauh nilo in vai pahnih leh hmeichhe pakhat pawh a tel ve.
Kan inṭhen hnua kan vawikhat inhmuh lehna a ni a ,rin ang ngeiin Carine nen an lo awm dun leh tawh. Ka inti paukhauh viau emaw ka tih laiin ka thinlung hi vih sawk sawk ang mai hian a rawn na nghal zawk zawk .
" Hmun dangah kan kal mai dawn em ni ?" uNathan chuan a rawn ti nghal vat a mahse Noel vang ringawt a inhnuhdawh ka tum bau lo .
"A ngai lo helai ah hian a tui alawm " hlim ber niawm fahran in ka nui lui vel a , va hmu chiah lo mah ila ka che vel engkim chu min en reng tih ka hre thei .
" Eng nge i ei dawn ? Keichu Schezuan Chow ka duh chuan soup ka duh tel bawk" Ka ṭawng siam siam reng a ,ka rilru a na tih hi ka tilang dawn lo reng reng.
"Keipawh i ei ang ka lo ei ang " a ngaih a ṭhat loh hmel takzet , ka hlim der tih hi a hrethiam pawh a ni mahna.
UNathan nen chuan eng eng emaw kan sawi a ,za vak lovah pawh zat hmel deuhin ka nui lui vak vak zel .Noel pawh ka mitsir deuh reng, Vai ho an titi lai te chuan rum zet hian min rawn en kur reng a chu chuan runluih duhna min pe nasa sauh.
" Toilet ah ka va kal lawk " thil kan ei zawh veleh intih thawven lawk ka duh avangin ka ti ta ringawt a, chhungril ah hian ka tawt up up.
" aw le "
Toilet-a ka luh rual rual chuan thawk ka la nghal kawk kawk a ,he thil hi ka ti thei tawh thlawt lo . Ka ṭah te hi a chhuak a ṭah hawm hawm pawh ka duh mahse Noel nilovin keimah bawk ka na leh dawn chu chu ka thlen tir dawn reng reng lo.
" Engmah thleng lo angin awm tum hram hram rawh " keimah leh keimah ka inhnem mawlh mawlh a ,theih chu nise Noel leh Carine te pahnih bula va kal a ṭawng khum piap piap ka chak.
Ka in siam ṭha sawk sawk a ,nuih luih sak pahin hmeichhe toilet aṭang chuan ka chhuak a mahse ka kal tur chu Noel an mipa toilet lamah min pawt lut nghal dawrh a ,kawngka a kalh nghal hmak bawk.
" min thlah rawh " amah melh kar chungin ka ti vin nghal hlar .
Ka ban puamah nghet takin min vuan a , a rim ,a khawihte leh a engkim mai hi ka ngai takzet amah hi ka thlahelh ngawih ngawih .
" inbe lawk ang " a ti vawt raih a ,a aw pa lutuk leh thum dut mai pawh hi a zûn a uaina tham .
" sawi tur engmah kan nei lo " tih pahin a kut chu ka vaithla nghal pawp a mahse a ngaihdan alo ni lo ngang mai.
" Inbia ang ka tih chu " min vin nghal tuarh a ,bangah min nam bet chawt a a thinrim lutuk chuan bang a beng ri nghal bur bawk .
Ka phu chiang kher mai !
Ka meng bial nghal kawk a , a thinrim lutuk hmel ka hmuh hian ka hlau letling zawk !! Hetiang em ema a thinrim lai hi ka la hmu ngai lo .
" min nawr lui miah suh " chiang zet hian min melh kalh a, a rawn kun hnai bawka a thaw lum ham ham pawh ka hre thei.
"Heihi hre reng rawh Carine nen kan inkarah engmah a awm lo " chiang fiah kelh kawlh in a sawi a mahse ka la thutak duh lo .
" hahh...dawt min hrilh thei ani maithei mahse ka thil hmuh erawh dawt a ni ve lo" ka ti ve hmak , ka zam dawn bik reng reng lo .Min chhaih kual hnem tawh bawka min tih nat dan ang chiah hian tih nat ve ka duh .
" min ring rawh , engmah ...."
" kan pahnih inkar hi a tawp vek tawh , i tel lo pawh hian ka awm thei min rawn tibuai tawh suh " tiin ka lo pawtchat nghal vat a ,a thinrim a sosang phah hle .
Na zet in a kut khingkhat in ka biang lehlam lehlamah a sawk tawk a , min kuai dak vah bawk .
" ka tello in i awm thei tih hi sawi tawh ngai suh ang che" a ti sup a , duhthawh zet hian min rawn fawp nghal tawn tawn a ka theihpatawp in a awmah ka lo nam ṭang ṭang thung.
Thil hrechhuak thut niawm takin min thlah thut a ,a inlak hran rualin a hmaiah ka beng nghal sawk ringawt !!
" ka tihpalh " a ti sap a,a chetdan avang khan a inthiam lo lehnghal .
"Ka hmuh theih ah awm tawh suh "
" nawr luih che kha ka tum dan a ni lo " a hmai chu a kutpahnih in a han tuai thuak a, a inchhir hmel hi hmuh a hrehawm takzet .
" Hma lam ka pan tawh , Carine nen in in karah thil a awm leh awm loh ka pawisa tawh lo " tih pahin kawngka chu ka hawng rawk rawk a ,ka kal nghal vang vang .
Diktak chuan Noel lakah ka thikthu a chhia in ka huat a ho thei em em a tunah pawh ala danglam chuang lo .A ni hi ka thinlung zawng zawng in ka hmangaih takzet mahse na nawn reng turin chakna ka nei tawh lo .
" Tete i va rei em em ve ?" UNathan chuan min lo zawt nghal vat a, engmah thleng lo ang hmakin ka awm thung.
" nia...ka duh aiin ka rei "
" kan kal tawh dawn mi niang? "
" aw...aw le " rang takin helai hmun hi chhuahsan ka duh chuan Noel hi hmuh leh ka duh tawh lo .
UNathan chuan a bike chu a ti nung hlat hlat a ,ka chuan ve hma in Noel bawk chuan min lo dang leh tawh .Ka ban puam ah nghet takin a vuan a ," kal suh " a ti sap ringawt .
Engtik lai khan nge min lo umzui hman pawh ka hre lo ka hriat zawng chu a uang mai mai lova tuna a thil sawi pawh kha a thutak hle tih a mit aṭangin a hriat.
Chhan ka tum zet a mahse Carine a rawn lan ve takah chuan ka rilru ka thlak rang hle .
" min thlah rawh " tih hmuk pahin min vawnna chu ka phelh a ,Noel hmel pawh en lovin bike ah ka chuang hmak .
A ni telin Noel ka ngaihna chu a zual zel a ,a chang phei chuan kan in bulah min lo thlir reng ang tlat te hian ka hre ṭhin. Duh hle e tilo chuan ka chapo na leh luhlul na te hian engahmah ngai lo turin min nawr lui a , ka thinlung in let leh duh mahse nat leh a hlau leh lawi bawk si.
A chang leh min rawn biak ringin second 10 lek te hi ka han unblock a , a hnu lawkah min rawn biak avang hian ka rilru a let leh ka hlau a ka block leh thul , chutiang reng reng chuan hun ka hmang a thla 1 chu alo liam leh der tawh .
" Ehe...Noel an Heart Transplant kha a zai hlawhtling a nih hi " Muani chuan Vanglaini bih nauh nauh pah chuan a rawn ti chhuak hlawl ringawt .
Mizoramah a vawikhatna a ni bawka Vanglaini hialah a lang hi a awm lo hran lo .
" a ni maw? Hmanni ah pawh zan rei deuh tawh ah min rawn call a ka la duh lo , i chungchang bawk min zawt leh anga" Zuali chuan a ti bai bai a ,ka block miau a ka ṭhiante ho ka chungchang a zawh thu hi ka hre ta fo mai .
" la miah suh ....awlsam deuha let tir min tum a mahse kha lehchen kha ka tuar char char tawh a ,a tawpah ka man chhuak a tlawm deuhin let leh ka tum tawh lo" Noel chungchang kan sawi tawh hi chuan ka in seh ruh ṭun zel .
" i va luhlul tak , an inkarah engmah alo awm lo maithei asin a tirah pawh an project vang chauhin an thawk dun i tih kha "
" ka mit ngeiin ka hmu alawm " ka ti vin nghal hlur a .
Ka ṭhiante ho pawh Noel lamah an ṭang zo vek tawh mahse ka nat ang hian na ve ta se awlsam deuhin an let bik ka ring lo.
Tlai thim thet thet tawh ah UNathan chuan min la bazar pui a , vawiin chu RIPANS ah entrance ka va in exam na in Mizoram ah luh ka tum tawh lo , hmun dangah awm ila Noel ka hmu ngai tawh lo bawk anga ka move on vat theih ka inring .
" UNathan bus a tlan ṭep rawn hmanhnawh rawh "
UNathan nen chuan hmanhmawh takin bus ah kan tlan lut a ,ṭhutna la awmah chuan kan ṭhu vat a ,ka chau bawk aniang ka mut a chhuak hlui mai .
" ka darah hian mu rawh " Ka ham bai bai reng takah chuan a dar ben thak thak pah hian a rawn ti a .
" ai, kan thleng vat mai ang "
" i inthlahrung anih kha " nuih vur vur pahin a darah chuan min bei luih tira , ka chau ve bawk nen ka lo hnial hran lo .
Mi â ka ni bik lova ka laka Nathan rilru put hmang hi ka hria mahse ṭhian ang bakin ka en theih loh thu fiamthu titak deuhin ka hrilh tawh a chutichung pawh chuan ka kiangah a awm reng ṭhin , a chang phei chuan ka ṭhianṭha ber Zuali ai pawhin ka ring zawk.
Chutia ka bei hle hle lai chuan kan bus chuanna bula car dum ka hmuh rual chuan ka hawi chhuak nghal vat a , a khalh tu hmu hman lo mah ila khatiang car chiah chiah kha Dr. Noel pawn a nei ve .
Urhh...Noel ...Noel ngatinge engtik lai mai pawh hian Noel hlir ka ngaihtuah le ? Ka rilru put hmang hi ka duhlo takzet .
UNathan chu ka nawr luih tlat avangin an veng Khatla ah a chhuk thla hmasa a , bike a keng lo lehnghal a kan veng thleng min thlah tur chuan a inthlahrun awm letling zawk.
Bus stand aṭangin inkhai bawr luai chung hian kan in lam chu ke in ka pan hna hna a ,nichina ka car dum hmuh ang bawk kha kawng sirah ka hmu leh tawh !!
" he car hi ava common tak "
Phun sap in kaltlang ka tum a mahse car aṭang chuan Dr. Noel a rawn chhuak hlawl ringawt !! Nichina ka car hmuh kha a car alo ni reng a ni maw !
Engmah sawi lovin a car ah chuan min nawr lut nghal dawr dawr a ,ka inkhai bawr bakah tum loh deuha hmu thut ka ni bawka ka hamhaih chiang hle .
" Engthil nge maw i tih le ?"
" Nathan darah khan engvangin nge i bei ?" Tiin min rawn zawt nghal tuarh a ,min lo hmu reng a ni maw !
"A chhan i hre duh tak tak em ni ?" Ka nui lui ngat a .
" khapa kha hnaih tawh suh ang che "
Tu ah nge maw a inngaih le ?
" chu chu ka ti thei lo em ni ?" Ngeiawm zet hian ka ti a ,"Engvangin maw ka hnaih lovang ?" Ka ti leh kher.
" a chhanchu ka ta i nih avangin , mipa dang nena hmuh dun cheu hi ka ngaithei lo "
" khatiang thil sawi thei dinhmun ah khan i ding reng reng lo "
" thei e , min ṭhen mahla keichuan ka ṭhen ve lo che " a ti hmak , chhan ngaihna pawh ka hre tawh lo.
" ngawi hmak rawh , ka kham tawh lutuk che " ka ti vin hlar a, car chhung zim te ah chuan duh aiin a ring lek lek .
" Tete... Ka mize ṭhalo lam hi hmuh tur che in min nawr lui hlek suh , khapa kha i hmu leh a nih chuan ka awm mai mai hauh lo ang " a thinrim inhrosa hi ka hlau ther te lo, mahse a thusawi chu a ti tak tak ṭhin tih erawh kei tluka hrechiang an awm lo .
A awmdan leh a ṭawng duhdan avang chuan ka sa hle , hetiang em em hian min hauh ang tih ka ring pha ngai lo.
Ngawi rengin kawngkhar chu ka hawng rawk rawk a ,ka tlan chhuak nghal nal nal .Hepa hi ka Noel kha a ni tawh lo , ka Noel kha chu mi zaidam leh dawhthei ,ka bulah chuan lungawi lo pawh nise nui vur vur reng ṭhin a ni .
" ka lo pui ang che " ka chhan hma hma in ka thil khai lai chu min rawn chhuhsak a ,min rawn zui tih pawh ka hrelo.
" Ngatinge min rawn zui ?" Ka zawhna pawh chhang lovin a kal daih a ,ka thil lei a khai tlat sia keimah zawkin ka umzui dawr dawr mai.
" mawh? min chhang rawh " tih pahin a kut lehlam zawka a thil khai chu ka pawt sawk a .
" i hmuh ang hian ka pui che " kan in chhang tawk tek tawk khawp mai .
" haw leh rawh " a kut lehlam ami chu laksak leh ka tum a ,mahse a lamah min pawt hnai thut ta zawka , midang an awm lo hlauh.
" hetiang hian ka hnaih loh na che a rei ta hle mai " a ti chuai raih a , lungngaihna tamtak a pai tel bawk .
"Ngatinge maw thil hi i tih harsat em em mai le ?" Zaidam tak hian a ti a ,Ka sam chu ka bengah a zep a ," ka tihpalh ,engkim avang khan "
Ka mittui a rawn tling nghal pum mai, nilo khawngaihin tla lo hram rawh ṭap thei dinhmun ah pawh i din loh hi .
Chhang lovin ka inla hrang nghal vat a , kun lap chungin hma lam ka pan lehnghal, a hmel ka hmuh leh chuan ka ṭap thei mai ang .
" ka tihpalh min ngaidam rawh " a rawn ti leh a ,ka ding nghal chawt ringawt.
Ka hawi let a ,rang takin ka appy khai lai pakhat chu ka la chhuak sawk sawk a , a kutah ka hmehbel chawt a angaihna alo hre lo hle .
" leih bawh rawh " mak ti takin min rawn en a ," Leih baw rawh ka tih chu " ka tih leh takah chuan thuawih takin appy chu a leih bua a .
" ka tihpalh tirawh " a ding khawng renga, ka awmdan avang chuan a hamhaih hle.
" ka tihpalh tirawh " ka ti leh a.
" ka tihpalh "ka sawi ang chuan a ti ve leh mai a .
" anih ka tihpalh i tih khan i rut leh thei em? Mawh ! Angai angin i dah let leh thei em?"
A ngawi renga , a thil tihsual a inhrechhuak pawh a ni mahna ," Noel , ka tihpalh i tih avang khan engmah i siam ṭhat phah lo , engmah hi angai ah a let leh thei tawh lo " ka hawi let rualin ka mittui chu a tla nghal sawk a , ser nung min siam sak tawh a ka tihpalh tih ringawt hian a thai reh thei tawh lo.
1 week later
Ka nu leh pa te chu zan khat riakin kawnpui ah lungphun na ah an kal daih a , ka nau class kal angaih avangin ka awmpui thung, zanin chu Muani nen bawk kan awm leh dawn ta !!
" Lehkha va zir rawh karleh ah in exam tawh dawn kha " Muani chu Phone khawih chungin nihawichi a chip mial mial renga, ka thusawi hria ang pawhin a awmlo .
" i fail dur chuan i nui lo chiang viau ang "
" ka zir dawn min lo nawr ve chhen suh " henu tak hi chu , a rilru chak mahse a zir peihlo ve em a tin ni .
" ka pa awmloh lai hian zir ṭeuh tum ta che , a rawn haw hunah chuan kan karaoke leh reng dawn a nia "
" a awm loh lai tak hian awm thawven ve ka chak alawm , kan exam dawn leh dawn loh pawh hi a ngaihtuah ve lo reng reng "
" va zir la anih chu " lukham in ka vawm a .
" ninawm " tih pahin a room ah a lut tau nghawng nghawng , ka lo nuih ver ver ringawt .
TV en paha ka mut zal ar ar lai chuan tu emaw hian kawngka a rawn kik dawt dawt a , Muani ṭhiannu Evelyn a nih ka ring nghal. Evelyn hi an exam a hnai tawh hi chuan note copy turin a rawn kal ziah ṭhin.
Kawngka chu ka va hawn nghal vat a , Evelyn alo ni awzawng lo Dr. Noel chuan min rawn bawh nghal thlawp a , ka tlu ṭep !!
" Hey !!" Tih pahin ka han beng thek thek a zu rim a nam huam lehnghal , hetianga rui hian engtin nge helai hmun thleng thleng a rawn kalh thlen theih zawk .
" ding rawh , i zak miah nange " couch ah ka ṭhut tir hnawk a , a lian si a rit bawk si min ti hah takzet .
" Noel , harh teh " a rawn meng diar diar a, zu a in ngai si lova engvanga in thut nge maw a nih le ?
" Tete ..." A nui nghal vur vur a , a bula ṭhu turin min pawt pawp ringawt .
" Carine nen kan inkarah engmah a awmlo " tiin a phun char char renga , chu thil pawh chu engvanga vei em em nge a nih ?
" Tunge a ?" Kan thawmah Muani chu a rawn chhuak a ,Noel a hmuh rual chuan thlarau hmu ang maiin a mengphawk .
" Eng ...eng nge hetah a rawn tih ?"
" ka hre bik lo , engtin nge hetiang khawpa rui chung hian a rawn thlen theih pawh ka hrelo " tiin ka lo chhang vat a .
" Thla hnih dawn in in ṭhen tawh a let leh i tum tawh miah lo em ni ?"
" umm..." Ka ti chuai raih a ," zanin chu hetah riak mai rawh se " ka ti ta ringawt a ,hetiang chung hi chuan tir haw chi pawh a ni lo.
" lo buaipui ve tawh mai rawh lehkha ka zir dawn " tih leh a room a luh a rual nghal , unaunu ngaihsam deuh neih te pawh hi ṭhatna mual mual a awm a nih hi .
A thlan nasat em avangin towel huh in ka hrufai a ,a pheikhawk ka phelh sak bawka a bulah ṭhu in ngun takin ka thlir reng ringawt .
A hmel chu a ṭhat ngaiin ala ṭha reng mahse a cher deuh a nih hi ! Ka nu leh pate an awm lo hlauh chu a vannei takzet .
" chaw te i ei ṭha em ? I dam ṭha maw ?" A sam tuai pahin ka phun sap sap a , zep lo chuan ka ngai tawh takzet .
" Carine nen kan inkarah engmah a awm lo " tih bawk chu a khat tawkin a rawn phun leh sup ṭhin a ,tak tak nise ka ti takzet .
" Ngatinge i rawn kal ? Hetianga min zar buai reng te chuan engtin nge ka theihnghilh theih ang che "
Ka huat rual rual in min ngaihsak turin ka duh a , min ngaihsak leh ka ringhlel a ka awmdan hi ka inhre thiam tawh bik lo .Ka duh ber chu Noel hian tuar let ve se tih chauh hi a ni tawh in ka hria.
Ka harh chuan couch ah ka lo mu fel than a , nizana Noel ka sin tir kha ka lo sin daih tawh .Rang lutuk in ka ṭhu chhuak a , Noel erawh alo awm tawh lo .
" a haw tawh " Muani chuan a lo ti sam et a , a haw lai pawh ka lo hre lo.
" a ṭhat hlauh chu " min rawn hmasa lova a haw daih chu ka lungawi lo ru takzet .
" hepa hian a hmangaih takzet che tih ka hre thei , let leh pawh ni la i inchhir lovang " Muani takngial pawh a lamah a ṭang tawh a ni maw ?
" ka â tawh dawn bik lo "
" i chapo na avangin i let duhlo a nih chuan â ka ti tho che " min ti hmak , teh thlawt a .
Keichuan dik nia ka hriat ka ti mai chauh a ni , Noel pawh Carine bulah a let anga keichu hun han liam deuh se ka rilru na te hi chu a liampui ve mai ang .Third wheel nih reng hi ka tum bik lo.
Noel's Pov
" ṭhianpa harhchhuak tawh rawh rui reng lovin "
Rinhlu'an kan ina rawn kal meuh in min rawn zilh .Nia , Tetei nen kan inṭhen aṭang khan ka rilru na te lakpen tumin zu ah ka ṭuan a , thil âtthlak tak tak Tetei chungah ka ti bawka ka rilru ka hlauh zo tawh .
" ka hria " ka thaw hak a ,tui ka lem nghal khawlh khawlh heipawh ka zu in vang bawk.
" hmeichhe pakhat vang maiin i hna in a tawrh phah a , tuar lo ang deuhin lan tum mah la tupawhin kan hrethiam vek , zu ah i ṭuan ringawt a ...Bro zu i in ngai loh kha "
" Hrilhfiah ka tum pawhin a hrethiam duh hleinem "
Kha project avang khan Carine nen kan thawh dun angai a , engtik lai pawhin meeting an ko reng a , zanah damlo taksa zir chian angaih avangin dar 1 thleng ka men angai a mahse Tetei hnena ka thutiam avangin hna thil nilo engmah kan sawi dun ngai lo .
Kan thlaruk tlin ni pawh khan ka theihnghilh reng reng lo, pangpar pawh ka order sa vek meeting a zawh veleh an inah kal ka tum a ni .Meeting a mi tur file pawimawh Carine in a kawl a , Tete'in min rawn hmuh dun pawh khan file min pe turin a rawn kal a minute 5 pawh a awm hman lo tiin Tetein min rawn hmu a angaihdan tur chu ka hrethiam mahse ka insawifiahna erawh ngaithla tur ani asin .
"Anih chuan pangngai deuhin sawipui la hetianga nangmah leh nangmah inti chhe lo hian "
" Bro , ka ngai takzet "
Chu bak sawi tur ka hrelo , henu hi ka ngai a ni.
Carine nena kan inṭhen lai nen kha chuan danglam tak a ni .Tuar angin lang lo mah ila chhungril ah ka tuar . Thil ei reng mahila ka ei a tui lo, rilru lak pen tumin video game te leh futsal te khel mah ila ka tui tak tak thei lo ,a tawpah ka ngaihtuahna aṭanga lakbo ka duh luatah zu ah bawk ka ṭuan leh ṭhin chubak kawng dang ka hre lo.
"Tetei chuan mipa dang a bel a nang ve zu , ani chu a chhelo tawlh tawlh a nangve hi in en ta che...chaw ei tha la , excer te la rawh indawm kun reng lo khan naktuk pawh mi zai tur i neih kha hrereng rawh"
Min sawisel nge min fuih pawh ka hrelo .
Kalna tur lam pawh hrelo in ka car chu ka khalh chhuak a ,Zu ka in loh chuan Tetei ka ngaihtuah reng a ,ka harh chhuah meuh chuan Tetei te in kawtah ka lo awm tawh .
Sana ka en chuan dar 12 a lo pel vu tawh , angai te bawkin car aṭangin Tetei te in chu ka thlir a , ka ngai takzet a tel lovin ka awm thei lo.
Ka inngaihtuah vung vung lai chuan darthlalang chu Muani hian a rawn kik kerh kerh a , rang takin kawngka ka lo hawn a a rawn ṭhu lut ve nghal .
" I la meng a ni maw?"
" rawn kal tawh suh ka tih che kha "
Nia, ka mu theilo hi tun ang hun velah hian ka kal ṭhin a , khawvar dawnah ka haw leh mai ṭhin.
" min dang thei lovang "
"Tetei hi a rawn let tawh dawn lo, tunah pawh Bangalore ah Mpharm zawm a tum a application pawh a thehlut vek tawh "
" maw !" Hei zet chuan min ṭhawng chiang hle !
" a rilru i hliam sak a keipawh ka ngawi mai mai dawn lo , ka û rilru ti na tu apiang chu ka zuah bik lovang " Muani chuan min vau ti tih tawh , mahse Tetei hian kei chauh hi min duh tih ka hria ka kaltir mai mai lovang .
" i û hi ka nei let leh dawn " inring tawk tak hian ka ti a ," ka hnenah a rawn let leh ngei bawk ang "
Fb- Haylor Remruati
IG- @remruati_b
0 COMMENT:
Post a Comment