May 21, 2020
Chapter-9
“I choose you. And I’ll choose you over and over and over. Without pause, without a doubt, in a heartbeat. I’ll keep choosing you.“
Maktak maiin ka rilru na lutuk chu ka awm zawn ah a rawn na chhuak nghal vawng vawng a, duh lo turin ka inveng viau emaw ka tih laiin ka thik hle thung, min rinawm loh san daih ang maiin ka thin a rim hle bawk.
" ka bialpa pawh a ni tawp si lova " tih sap pahin ka let leh hna hna a ,ka nau leh ka ṭhian ten a chhaih vel mai mai che a nih kha an tih lai te kha ka hrechhuak nghal uarh uarh mai .
Haw viau mah ila Carine hmelṭhat zia leh chhiat loh za hre tute zinga mi ka ni a ,Dr. Noel kawppui atan chuan a ni chiah hi a tling zo ang ,min duh ve anga ka lo suangtuah ve ringawt te kha ka zak letling zawk .
" Ani kha lunghlu ni ta se kei chu thirchhia ang vel ka niang " tih nuah nuah pahin Ayush intern tilai Tapuii leh Esther te titi na bulah chuan ka va ṭhu ve a , an thil khel lai chuan ka beng a verh nghal zar mai .
" Tumaw Medical Superintendent fanu chu ?" Tiin ka zawt nghal haw a .
" kha ER-a nurse rawn thawk thar kha " Tapuii chuan min lo hrilh nghat vat bawk .
" Carine kha maw?"
" aw ... I û rual a nih kha ,û rawh " Esther chuan fiamthu deuh hian a rawn ti ve leh bawk a .
Anih chuan Medicine HOD fapa leh Medical Superintendent fanu te inngaizawng chu thil mak pawh a ni ta love , thil ka hre tam telh telh a ka insit tulh tulh .
" Dr. Noel ex an tia ,an inhmeh tiraw ?" Esther in a tih chuan ka lo bu nghat a .
" Ex tih mai mai tunah an nih tawh loh te chuan a ho emai" Tapuii chuan a ti nghal bai bai a , an inngaizawng mek a ni tih hi sawi pawh ka sawi peih lo .
" bakah an chhelo dun...." Esther chuan a han ti leh dek dek a ,Tapuii chuan " ngawi rawh u ,saw Dr. Noel a rawn kal a nia "tiin a lo pawt chat nghal vat a ,ka hawi phei rang teh e .
" kha i coffee " min rawn nuih vur vur pah hian coffee chu min rawn pe a ,engmah sawi lovin tum bur chung hian ka lo la hmak thung.
" i va lungawi loh hmel ve " a rawn tih leh chuan ka ṭhutpui te chuan mak ti takin min lo en ha a, a chhanchu ṭul lovah intern ho hi a be ngai tlat lo.
Ka ṭhutpui te melh hrek hrek pah chuan ka han nui lui sak a ," a nih chuan ka lawm e " ngeiawm zeta tih kher pahin ka tho hmak a ,ka kal nghal nal nal bawk .
" Tete ..." Min rawn umzui nghal .
" i awm a nuam lo em ni ?" Tih pahin min rawn khawih a tum rual rual chuan a kut chu ka paih thla nghal sawk a ,"min khawih suh " ka lo ti vin nghal hlar a ,ka duh aiin ka vin .
Mak ti taka min en reng takah chuan ka awmdan chu thlak danglam nghalin ka han nui lui leh hnuhnawh a.
" umm...ka tih palh midang ka va pui ange " zaidam deuha tih pahin kal nghal daih chu ka tum a mahse min dang leh tho .
" Ngatinge hetiang hian i awm thut ?"
" Engtin maw ka awm a ?"
Ka hrelo der tlat, ani pawh ngatinge hetiang hian a awm ? Min ngaihsak niawm taka awm vel hi a ṭul kher emawni le ?
" i thinrim alawm ,ka chungah i thinrim a ni lawm ni ?"
Naaa...thup ṭhen ve deuh tur ania hetiang teh tawpa in zawt lo hian .
" min ngaihsak thut a amak em alawm " ka nui der vela ," ngaihtuahna ṭhalo ka pu hman ṭep a ni ,ughh Engpawh chu nise midang ka va pui ange " tih leh tlan ka rual nghal.
Muang changin Dr. Noel pawh chuan ka hnungah min rawn zui ve nghal a ,a theih chen chen pehhel ka duh avangin nurse Sangtei bulah chuan ka va kal nghal a .
" u Sangte ka lo ti dawn em ni ?"
Naute ek tang kah ek a lo tum lai tak chuan ka va ti a , alo lawm hle nghe nghe .
" hei glove aw , jelly hi kan lo hmet chhuak ange " a lo ti nghal vat bawk.
Glove chu ka bun nghal mawlh mawlh a , liquid glycerin suppository hmawrah chuan a luh awlsam nan lubricating jelly chu ka han tat te te phawt a .
" a mawngah ka vit lut dawn nia aw ,lo vuan nghet deuh rawh " tiin naute nu chu vuan nghet turin ka hrilh a .
Ka vih luh rual rual chuan naute chu tal chungin a ṭap nghal uar uar a ," a zo ṭep " ti chungin damdawi tui chu ka hmet lut zela ,ka zo ṭep tawh tih in naute chuan ka kut chu a rawn tlawh pit ta thut mai,min rawn phuh nghal tuarh ringawt!
Suppository leh naute ek them inpawlh chu ka kawrah chuan a kai tuarh a , a rim ka hriat rual rual chuan ka uak nghal tuarh bawk .
" ka pi , ek in ah hruai nghal rawh a ê vat mai ang "
Uak tuarh tuarh chungin toilet ah ka tlan lut nghal a ,rang takin ka lab coat chu ka phelh nghal vat bawk .
" Hemi pawh hi a uih a nih hi , engtin nge ka tih tak ang? "
A hnuaia ka kawr hak lehzel pawh a rimchhe tel vek , ka phelh chuan hak tur ka nei dawn lova ka hak erawh chuan zankhua in ek rim ka nam dawn bawk si .
" Ashhh....zanin ber kher ,ka che chhe tluan leh zak dawn a nih hi "
Chutia tih dan tur pawh hre lova ka insil mawlh mawlh lai chuan Dr. Noel chu a rawn lut hlawl mai ! Buaina ka tawh apiang hian a rawn lang hmasa ber zel .
" kha heihi ha rawh " tih pahin kawr hak tur hi min rawn pe a ,mahse ka la duh bik lo .
" ka nau hnenah min rawn pe turin ka hrilh mai ang " ka lo ti ve hmak .
" tun ang zan rei tawh ah hian maw ?"
Dar 11 ri tawh mahse a kawr hak ai chuan ka hrilh zawk mai ang .
" aw "
" ã viau suh ,heihi ha la rawn kal vat rawh "
" hetiang hian awm tawh suh "
A chungah ka lungawi loh em avangin ka rilru a awm chu ka hrilh phawng a ,min ngaihtuah ang taka a awm hian ka rilru a ti na daih zawk .
" Engtin maw?"
" min ngaihsak ang tak hian lan tum tawh suh ,ka ril ṭam leh ṭam loh pawh min zawh angai lo .Hetiang thil i tih hian engah mah ngai lo mahla keichuan min hria angin awm lo la ka duh zawk "
Ka sawi lai te chuan chiang zet hian min en kalh a , a mita min ngaihtuahna leh min ngaihsak na niawm tak ka hmuh te hian min ti thinrim zawk .
" ka ngaihsak ang che ni a i hriat chuan i hre dik chuvang chuan heihi ha la ,rawn chhuak vat rawh " tih ringawt in min chhang a nih chu !!
A chhanna kha ka va duhkhawp lo tehreng em ,ka hriatthiam theih turin sawi ve tal tur ania.
A kawr ken lai chu min rawn hmeh bel chawt a,a kal nghal daih bawk.
" kan inngaizawng pawh a ni tawp si lova engvanga a chunga khatiang thil kha sawi nge maw a nih le? Aaa....avan zahthlak tak " tih nuah nuah pahin a kawr min pek chu ka han pharh a ,ama kawr ngei a ni tih ka hriat chuan ka khi suk mai .
"He tshirt hi a hak lai pawh ka hria" tih sap pahin ka han hnim vang vang a ,Dr. Noel rim ngei a ni he perfume rim hi ka dam chhungin ka theihnghilh thei tawh ngai lovang.
A kawr min hak tir chu a len em avangin ka kekawr ah ka thun ta ringawt a ,ti hi chuan tumahin Dr. Noel kawr ka ha tih an hre hauh lovang.
Toilet aṭanga ka chhuak chiah chu pi Hmangaihi chuan chaw ei ve nghal turin min lo hrilh a ,ek bawk kha ka hrechhuak leh tawh .
" umm...han ei zo vek phawt se a tawpah ka ei ang " ka ti ta ringawt a.
" aw le ,ka lo hrilh leh mai ang che"
Ka chhuah phei leh chuan a lo thawl hawk tawh ,midang in chaw an la ei avangin intern pahnih, nurse , kei leh Dr. Noel bak awm kan awm hrih lo chuan kei tih loh chu damlo enkawl in an buai hle bawk .
Ka rilru te te chuan nurse Carine ka hmuh loh danah EW lamah a duty anih ka ring , Dr. Noel nen an awmdun lo bawka ka thaw deuh huai bawk.
" Tete ..."
Dr. Noel'an min rawn ko leh tawh ,pehhel hram hram ka tum asin .
" aw .." Tih pahin ka kal vat a , hnathawna hmun anih avangin ka rilru put hmang hi lanchhuah tir ka tum hauh lo .
Ka kawr hak lai en pah chuan min rawn nuih suk a ," khi laia damlo khi belt hi lo hreng tir ta che " a ti zui sap bawk .
Ngawi rengin Abdominal belt chu ka la a ,chhak lama damlo an mut hran tir tumah buaipui tu nei lo lam chu ka pan nghal vat a, ka pa te ang rual vel a nih ka ring .
" ka pu ,khawilai nge i tih nat a ?" Tih pahin a mutna bula chair ah chuan ka ṭhu a .
" hei ka nak vel hi ka sawh na a "
" Ngatinge ? heihi hreng lawk rawh aw"
" kan accident alawm mawle "
A thawh theih loh avangin thei leh thei lo hian ka hreng tir a ,na a ti hle nghe nghe .A nak ruh a tliah loh pawhin a khi aniang .
" khawiah nge i chhungte ? Nangmah chiah in em ni i accident ?"
" pawnah an awm ang , ka fapa nen kan nia ani erawh a thin a sawh thler avangin an zai mek "
" a dam leh vat mai ang ,nangpawh i drip khai lai hi zo se an haw tir nghal che ka ring " tiin ka hnem a ,a chau hmel em avangin ka be vak duh lo .
Ka tih tur hrelo chair a ṭhut ka tum lai tak chuan damlo pakhat ,silpaulin a tuam vek hi an rawn zawn lut a midang an la buai vek avangin rang taka thawh pahin ," hetah hian rawn mut rawh u ,pakhat khan pawnah card la bawk ula " ka lo ti nghal zung zung a.
An mut fel chiah tih in Sphygmomanometer keng chung chuan ka kal ve nghal a ,a BP check tumin an tuamna silpaulin phelh pah chuan ," Eng na nge ?" Tiin ka zawt nghal bawk .
Damlo satliah mai mai emaw tiin Silpaulin hnuaia an tuam na puannuam ka hawng leh chiah chu a kut a lo bung chu niin !! Ka phu chiang kher mai ! Min ṭhawng lutuk a ka thil ken lai pawh ka thlauh ṭep.
" an sangha man na ah Gelatin in a kut hi a thlawh palh alawm mawle " a tih lai te chuan ka vai ruai hian ka hria ,ka tawt nghal up up bawk.
" Sir ,damlo serious an awm " tih pahin midang in an rawn hmuh ve loh nan a mutna chu parda in ka zar hliah nghal vek a ,ka huaisenna zawng zawng sawm khawmin a ban na lo lampang ah chuan a BP chu ka check sak nghal bawk .
Kut khur der der in a vital sign ka ziah lai chuan reilote ah senior nurse Pi Zampuii chu a rawn lang vat a ,ka thaw nghal huai mai .
" Kan lo dressing sak ange ,nangin a kut lehlam ah khan venflon i lo vuah sak dawn nia " a ti nghal zung zung a , rang takin venflon ka va la nghal vat bawk.
" pi Zampuii Dr. Noel saw ka va hrilh dawn mi?"
" ka hrilh tawh , ala buai deuh a mahse engmah hlauhthawn tur a awm lo,tunah chuan drip khai a pawimawh ber "
Damlo awm leh ban te chu a si per in a kang nual bawk a ,a sa viau ang amah pawh a rum hlat hlat mai .
" ka pu i ban lo ti che tawh suh venflon ka vuah dawn " a ban a tih chet reng avang chuan ka ti sap a ,ka ṭawng a hria a ni ngei ang a dah hle hle a .
A vein ṭha lai zawngin a kut chu ka han hmer kual vela , a kutṭang ka khawih sak chiah chu a kutzungte chu a lo per vek chu niin!! Ka au chhuak lo chauh .
" pi Zampui a kutzungte pawh hi dressing angai ang "a hmuh hmaih ka hlau avangin ka hrilh nghal vat a .
Vanneih thlak lutuk in a vawikhatna ah venflon chu ka vuah fuh hlauh , drip chu ka khai sak nghal veka ,TT pawh ka pe thlap bawk .Pi Zampuii erawh dressing tur a tam deuh avangin ala buai hle thung .
Paraffin gauze chu a awm kang lai ah te chuan ka lo bel pui a , midang pawh min rawn pui turin an rawn lang nghal ṭak ṭak hlawm a ,chutia midang an awm ve takah chuan a thaw ip pik thlak em avangin ka glove chu ka phelh sawk sawk a ,ka kal nghal daih.
Damlo dang ka buaipui leh hma in intih thawven nan nichina accident pa bulah bawk khan ka han kal leh a ,a drip khai lai chu a zawh tawh avangin ka thlak sak bawk.
" ka pu hemi nilo pakhat chiah khai tur i nei tawh "
" ka haw thei ṭep tawh a nih chu " tih pahin min rawn nuih var var a ,pa nelawm tak a ni in ka hria.
" haha ...i vannei e ,Pathian in a veng che aniang "
" Sir, damlo kã aṭangin thisen a rawn chhuak "
Tapuii au thawmah chuan ka hawi nghal vat a ,nichin lawka O2(oxygen) an khai sak pa kha lo ni rengin , a chaw kawng a cancer avangin ICU awmna tur an zawn mek lai a ni lehnghal .
" ka pu nakinah ka rawn kal leh ang " tih pahin engthil chiah nge thleng hriat tumin ka tlan phei nghal a ,Dr. Noel pawh a thleng rang hle .
Dr. Noel chuan a han endik nghal zung zung a ," a thisen zam a puak keh a nih dawn hi, a thaw ri pawh ka hre thei lo rang takin intubation tih angai " a ti nghal zung zung a.
" Ngatinge a thisen zam chu a puah ?" Carine chuan a lo ti ve bawka .
"thisen zam chaklo leh vung ah hian hetiang hi a thleng ṭhin alawm " Dr. Noel chuan zaidam tak hian a chhang let a ,hun lo viau mahse an awmdan ho te te hian ka mit a ti kham takzet .
" Sir ,a kâ aṭangin thisen a rawn chhuak hnem lutuk a intubation ka ti thei lo " pakhat chuan a rawn ti ta mai !! Anih chuan a thaw tawh bawk si lova Dr. Noel hian tihian a thih tir ringawt mai dawn em ni ?
" SpO2 pawh 60% ah a tla hniam "
Esther chuan a rawn ti ve bawk, kan vai mai chuan tih dan tur kan hriat loh avangin Dr. Noel chet hun chu kan nghak ṭhup mai .
" a nih chuan tracheal incision ka tih angai dawn a nih chu , rang takin hmanrua la nghal rawh u "
(Tracheal incision chu hrawk zai hawn a ,thawkna tur pipe vuah luh hi a ni )
" Noel i â ta em ni? hetah hian i zai ringawt thei lovang " Carine chuan Dr. Noel chu a pawt hrang nghal vat a.
" Hun a awm tawh lo a thi mai dawn asin " tiin alo chhang let nghal vat thung .
" a hlauhawm zia i hria em? Thil kalsual ta se an khing dawn che asin . Hetah chuan zai suh a risk a sang lutuk ,OT lam ka han call ange "
" Carine hun a awm tawh lo , engpawh thleng dawn se damlo hi ka chhan ngei ngei angai"
Carine thusawi pawh ngaithla lovin glove chu a bun nghal mawlh mawlh a, a thil tum hi ṭhulh leh a tum tawh loh hmel hle .
"Noel ,He thil hi ti miah suh ,in vaiin hre reng rawh u he thil hi a kal sual a ,in in hnamhnawih ve anih chuan mawhphurhna in lak vek angai ang " Carine in a tih chuan kan ngawi ṭhap hlawm a ,tuman mawhphurhna lak chu kan duh bik lo .
" pakhat tal in min puih angai ,tunge min pui dawn ?" Dr. Noel 'an a tih pawh chuan tuman keimah kan ti ngam tawh lo.
" Damlo hi hetiang hian in thih tir ringawt dawn mi ?"
Vin zet hian a han ti leh a ,damlo hmel ka hmuh hian ka khawngaih takzet dam lehna chance vawikhat a neih laiin ka dawihzep na avangin heti ringawt hi chuan ka thih tir thei lovang .
" keiman ka pui ang che " ka ti chhuak hlawl mai !!
Dr. Noel hi ka ring tawk ,a thil tih tumah hian a chiang a ,a hlawhtling ngei bawk ang .
" Tete .." Carine in min rawn koh pawhin a ṭawng hrelo ang maiin glove chu ka bun ve nghal a ,thisen lo chhuak apiang hru nghal zel turin gauze lian ṭha telh tawlh chu ka la nghal bawk .
" i chiang chiah maw? " nuih vur vur pahin Dr. Noel chuan min rawn zawt ṭha leh ngat a, " ti vat vat rawh " ka lo ti hmuk thung .
Dik taka sawi chuan ka hlau ve tho ,ka che buai leh vak ang tih pawh ka ring mahse midang pui tu tur a neih miau loh avangin ka tih ngei ngei turah ka dah hmiah.
Dr. Noel chuan a hrawk bawk lai bawr vel chu a han hmet kual vel a.
" Sir kah hihna tal kan pe dawn lo em ni ?"
" ai , na engmah a hre tawh chuang lo "
Lalpa leh !! Hetiang thil ka ti dawn ta mai hi ka awih thei lo .
Dr. Noel chuan a khawih fuh ta maw tih in scalpel hriam zet chuan a hrawk chu a han zai thler a ,thisen rawn chhuah tam zia chu ka chiai hman ṭep .
Rang lutuk in gauze chuan thisen chu ka hru nghal vat a ,ka thlan dup tawh mai .
Chutah forcep chuan a han kar kau leh tawk a ,en pawh ka en ṭha ngam tawh lo ka rin hruk vel mai mai tawh .
" kha le " trach tube chu Pi Zampuii chuan a rawn pe nghal vat a , Senior nurse tih takah tlanchhiat a tum bik lo aniang.
Dr. Noel chuan trach tube chu awlsam deuh hian a vuah nghal mai a ,ambu bag kan pump chiah chu SpO2 pawh a rawn sang nghal awk awk mai alawm ,ka thaw nghal huai bawk.
" i ti ṭha hle mai " Dr. Noel chuan min rawn nuih leh vur vur tawh ,thawk hak pahin duty room ah ka luhsan nghal daih thung .
Thawk chhuah hak hak pahin duty room ah chuan ka vei kual chhen a ,ka hlauthawng lutuk hi ka thinphu pawh a mumal thei lawk lo .
" ka lawm e " ka hawi let nak chuan Dr. Noel leh bawk .
" engmah ka tih loh kha ,bakah damlo kha a damchhuak angem ?" Aw khur dar dar chung chuan ka zawt a .
" umm...ICU an thleng ṭep tawh ang " a tih takah chuan ka hahdam sawt .
" lo kal teh " tih pahin ka kutah chuan a rawn dawm thut a ," hahdam tawh rawh " zawi te hian a ti zui sap bawk .
" umm...chaw kan ei ve tawh ange " rang lutuk in ka kut chu ka la let nghal vat a , kitchen ah ka tlan lut daih ringawt .
Chaw ka ei kham meuh chuan zing Dar 3 alo ri der tawh , ka chau bakah ka ham bai bai tawh .
Intih harh tumin ka ha ka nawt a ka hmai chu ka phih nghal sang sang bawk , zing dar9 thleng duty tur chuan ka tlin ka ring tawh lo , ka khum ka ngai tawh takzet .
Damlo chi hrang hrang an rawn la kal belh zel a ,OD , pumna leh accident te pawh an bang chuang lo .
" ka pu khi ka en leh phawt anga reilote ka mu ang " tih sap pahin nichina putar accident bulah chuan ka va kal leh a , thei leh thei lova alo thaw ṭawk ṭawk lai ka hmuh chuan thil diklo a awm tih ka hre nghal .
" Sir ,Sir ....damlo hi a thawk a buai ania " tiin ka au nghal tuarh tuarh a.
" ka pu ...ka pu " tih harh tumin ka au nghal mawlh mawlh bawk .
Doctor rawn kal hma chuan a rawn meng siar siar a ," ka pu ..ka pu ka ṭawng i hre thei em ?" Tiih a hmaiah chuan kan han beng thek thek a.
" ka kal tawh ange " tih sap pahin a maimichhing ta riai riai mai, ka tawlh hnung nghal hrut a ,bang kilah ka ṭhu nghal hnawk bawk .
A accident na ah khan internal bleeding alo nei reng a ni maw! Zan a rei tawh em avangin ultrasound takngial pawh a tih theih si lova, a tuar tlawk tlawk chu a ni sia .
Dr. Noel an a theihtawp chhuahin chhanchhuah leh tuma CPR a tih lai te chu ka lo thlir renga ,awmzia a awm tawh lo tih ka hriat avangin ka mittui a rawn tla nghal zawih zawih mai .
" a kal tawh ,a kal tawh " keima hriat tawk lek chuan ka phun sap sap a ,Dr. Noel pawhin ," a thih hun dar 3: 45 " a ti zui sap bawk .
Rang takin EW lamah chuan ka tlan phei nghal hlawk hlawk a,ka khawngaih mai bakah khatiang thil kha ka vawi khat hmuhna a nih avangin ka insum thei tawh thlawt lo ,ka ṭap chhuak nghal hawm hawm mai .
Chutia Corridor kil khata ka din reng lai chuan hnung lam aṭang hian tuemaw hian min rawn kuah nghal thlawp a ,a rim atangin Dr. Noel a ni tih ka hre nghal .
" a tuar thei tawh thlawt lova a kal tur thu min hrilh asin " insum na tel hauh lo chuan ka ṭap nghal zawih zawih a ,ngawi rengin nghet takin min lo kuah tlat thung.
★Noel's pov ★
Dar 5 a rik meuh chuan in phih harh turin duty room ah ka lut a , Tetei ka va hmuh chuan ka khi nghal suk ringawt .
Tetei chu couch ah remlo zetin amah chauhin tui tak hian alo muhil sak sak a, a vawt ti chu a tawm chawih chawih mai .
Ngawi rengin ka jacket chu ka sin tir a,amah thlir dauh dauh pahin a hma dawhkan ah chuan ka ṭhu a ," i chau viau a nih dawn ni " ka ti zui sup bawk .
Nizan ah ringawt pawh khan a chungah thil a thleng hnem takzet , khatiang em em kha chu a phu bik lo asin .Hmeichhe rilru ṭha tak a ni a ,a ṭap lai hmel hmuh kha ka thil hmuh tawh ah chuan tawrh harsa ka la ti ber hial ang .
Nuih vur vur pahin a sam tla chhum chu a bengah ka zeh saka ," ka chhungah thinrim tawh suh ,a hrehawm emai" tih sup pahin a hmuiah chuan ka fawp vang vang a , ala harh chuan loh avangin ngawi rengin bathroom ah ka lut nghal a .
0 COMMENT:
Post a Comment