May 18, 2020
Chapter-6
“I swear I couldn’t love you more than I do right now, and yet I know I will tomorrow .“
-Leo Christopher
Engtin nge maw a tih bik ni?
" haw ang ,ka khel peih tawh lo " tih pahin ka tho thurh a ,hepa hian min ti phur lo zo vek .
" Noel ....Noel "
Min rawn auh pawhin ka hawi let duh tawh lo ,a tawpah min rawn zui leh hnak hnak tho.
" Lalṭhian i hmanhmawh lutuk a nih kha muang chang muang changin han ti phawt mai teh , engpawh chu nise hetiang anga awm tir tu che hi ka la hmu em em ang mawle"
Rinhlua hian thil ni lo lo a rawn ti leh ang tih a hlauhawm ,college kan kal laia a tih flop ang kha chuan ka thlen nawn tir tawh dawn lo .
____________________________________
PICNIC
Resort ka thleng ve meuh chuan Dar 11 alo ri dawn tawh , ka thleng tlai ber maithei a ṭhen chuan tui an lo cheng daih tawh a ,a ṭhen in basketball an khel bawka mahni hlima tur zawngin an vai mai chuan an buai hle kei erawh Tetei zawng reng reng in hun ka hmang leh tawh.
Ka rin ang ngeiin Tetei chu Nathan nen an lo inzui leh chawt tawh, kal lo phei ila chu saw pa sawn hma a la hrim hrim ang.
" Sir ,i rawn kal tawh dawn lo emaw kan lo ti asin " intern pakhat chuan min rawn be nghal chat a ,nuih suk pahin Nathan te awmna lam panin ka phei san daih.
" Noel i rawn thleng thei maw ?" Nathan chuan min lo nuih a ,ngawi rengin an ṭhutna ep chiah ah chuan ka ṭhu ve nghal.
" Sir, kha ei ve rawh "
Tete'in a thil ei lai ei ve tura min rawn tih chuan ka phu deuh zawk.
" ai ...ka ei peih lo " ka lo ti hmak , ka ei peih loh chu thuhran an pahniha ka hmuh dun hian ka luak te pawh an ti chhuak.
" anih chuan tui cheng ve ila " Nathan bawk chuan a rawn ti leh a.
" Car-ah ka thawmhnaw ka dah vek ,ka cheng peih lo " tih pahin beer vawt zet chu ka han lem khawlh a ,chutichung pawh chuan ka dai thei chuang lo ka thin a rim tulh tulh mai .
Chutia ngawi renga kan ṭhut ho lai chuan intern pakhat hi a rawn kal a ," UNathan i evening dawn sia dar 1 velah i haw angai ang a " a rawn ti ta mai, rang lutuk in ka sana ka zuk bih nghal .
" nia ...darkar 2 vel tlan a ni sia ,Tete... Saia pawh ka be tawh i rilru ti hah duh suh "
Engmaw Saia a!! Engthil nge Saia chu a hrilh ?
Engpawh chu nise Nathan dar1 ah a haw dawn a ni tih ka hriat rual rual hian ka dai nghal sawng sawng a ,khua te lah hi a thiang sawt bawk.
" Nathan tui chen i duh a ni lawm ni ?" Ka zawt let leh ngat a , a lo bu nghauh bawk.
Tetei bulah a awm loh phawt chuan a ṭha a ni mai .
★ Tetei's POV ★
Dr. Noel tui cheng lai chu ngun takin ka lo en reng a ,a hmel ang chiahin a taksa pawh a nalh takzet , en ringawt pawh sawn a awm mai mai lo tih a hriat.
" Hmm...Dr. Noel nupui chu a vannei ngawt ang " Ruatdiki chuan Dr. Noel en vawng vawng pah chuan a ti sap a ,Zuali phei chu rawn kal ve se chuan a tuiral vek tawh ang.
"A hmeichhe duh nih ringawt pawh a chakawm " ka lo ti ve sap bawka ,kan pahnih chauh hi hetianga rilru pu hi kan ni bik lo.
Dr. Noel abs leh V-line ka hmuh ringawt pawh hian ka mur deuh sung sung in ka hria, sawmi a taksa ngei mai sawn min kuah kha a nia ,ka mumang te pawh a ang zawk .A perfume rim te kha ka hnar ah ala cham veng veng mai.
" Enteh Tete ...Nunpuii sawn Dr. Noel saw a vil deuh tawp nimai hian ka hria " Ruatdik'in a rawn tih sa sa takah chuan a vil deuh chawt tak tak , a kalna apiang ah a kal ve zel a ,ka ngaihbel vang nge pawh ka hrelo kuah phet te saw a tum in ka hria.
" Mapuii pawh a bang bik hleinem " ka lo ti ve nghal .
" UNathan lah a hauh ropui sia tunah Dr. Noel a ti leh a "
Hmeichhe pahnih an awm dun tawh chuan mi an rel ngei ngei tih ang zawng zawng kha kan nei zo vek .
" tui i cheng ve duh em ?" Kan rel thui hma chuan ka ti ta ringawt a .
" aw ...va inthlak la keichu tihian a ni mai "
" min lo nghak rawh aw ka kekawr hi ka va thlak lawk ang " tih pahin ka tho lawk a ,inthlak turin ka tlan nghal nal nal a.
Hall ka luh chuan a lo reh duk a ,Kira movie te pawh kha ka hrechhuak nghal uai uai mai.
Hlauh zahzelah zai rat rat pahin inthlakna room ah chuan ka lut nghal a, ka kekawr ka phelh fel chiah tih in thawm ka hre ta thut mai !!
Hawi kual hruk hruk pahin hriatchian tum chuan ka han ngawi deuh vang vang a vawilehkhatah kawngka chu a rawn in hawng ṭual ṭual mai !
"Nang ramhuai "
ṭe tuarh pahin ka pheikhawk chuan ka vawm nghal pawp a ," Aiah ...!!" Ti ri ka hriat rual chuan ramhuai nilovin mihring ka vawm fuh a ni tih ka hre nghal .
Chu aia pawi zawk chu Dr. Noel kher kher a ni lehnghal .
" ka...ka tihpalh " ka kekawr pawh ha hman lo chuan ka va buaipui nghal vat a ,a mit ah ka vawm fuh aniang a hup nghal vang vang mai .
" tun ang hunah ramhuai a awm i ring emawni le ?" Min lo vin lehnghal hlur tawh.
" i rawn lut thut a nih kha " ama thiam loh zawk a ni reng sia .
"Midang pawh an rawn kal dawn i kekawr va ha phawt rawh "
Rang lutuk in ka in en nghal vata ,kekawrte nen chauh ka lo la awm teu mai !!
" mihur pa " tih leh inkhuh ka rual nghal ,a ni erawh thawk halh pahin a lo meng kual ralh thung .
" chhuak rawh ...chhuak vat rawh " min en kur reng avang chuan ka lo vin let hrep a .
" ka hmu vek tawh " tih nuah nuah kher pahin a chhuak a nih chu !!
Ka zak lutuk hi haw vang vang a, in kawngkhar zawng zawng kalh vek hnuah blanket hnuaiah vawi sarih lei chhuah ka chak.
Tui cheng tur ka nih angin kekawrbul ka ha a, inthlakna room aṭanga ka chhuah chuan Dr. Noel chuan min lo en leh kur tawh , a hma ai zawngin ka zak tlat peka mahse midang an lo awm ve avangin ka ti lang lem lo .
" Tete...dawrah chuan kan va kal lawk dawn mi niang " UNathan chuan ka chhuak tur chu min rawn zawt a .
Dawr hi minute 20 vel leka hla ah a awm a, zing chaw ka ei lo bawk nen ka ril a ṭam thu ka sawi kha alo la hre reng aniang .
" a pawi hleinem, chaw kan la ei har dawn sia thil lo ei lawk ka duh "
" ka kal ve duh " Dr. Noel chu a rawn ding hluai ringawt .
" i leng hleinem bike-in alawm kan kal dawn " Nathan chuan alo ti vat a.
" ka car in kal ang u ,keipawh ka ril a ṭam " tih pahin a chhuak daih a ,amah leh amah a rawn in sawi lut ve ringawt .Zah tawh sa nak alaiin engthil nge maw tih a tum le ?
" Sir ,i khalh thei tak tak ang maw?" A mit ka vawm fuh avang khan ka zawt nawn leh kher a, vawm na vak lo mah ila a mit ko erawh a vung deuh .
" Noel ngatinge i mit chu ? Engtin nge i tih nat? " UNathan an a zawh chuan kan in melh hrek hrek ringawt .
" ka khalh dawn hleinem "
UNathan zawhna chu hre lo ang hmakin ka zawhna chiah chu a chhang a, a awmdan avang chuan mak ti takin kan lo en ha ringawt .
" rawn kal vat ta che u "tih pahin a car cahbi chu Nathan a pe a ,driver seat bulah a ṭhu nghal hmak bawk.
Kan zinga a ṭawng duh ve deuh ber a hnungah min ṭhut tir daih sia kan ṭhu ngawi ṭhap hlawm mai.
" Dar1 a pel tawh sia ka tlai deuh dawn a nih hi " UNathan chuan a ti dek dek a
" anih chuan kal vat ta si che " Dr. Noel chuan a lo ti leh nghal hlur tawh .
Vawin chu hemi te pahnih hi eng nge an hriat pawh ka hrelo thil ho te te ah an in hnial nghal zel , ka ei tur man pek ringawt ah te zu han in hnial nghal zela mawle.
Resort-a kan let leh chuan Nunpuii chuan Dr. Noel chu a rawn target leh chat tawh .
" Sir Hetah lo kal lawk teh " a rawn ti nghal huam huam a , awmzia awmlo viau mahse ka lo melh rum ngang mai .
" ngawi rawh ka hman lo "
" lo kal lawk la " tih pahin a kai nghal dawr dawr ringawt .Ka hman lo a ti reng sia tihluih kher angai emawni le?
Nunpuii awmdan cheng chung hi a engkim mai hi ka ning vel vek .
" Tete ...ka kal nghal mai ang , i haw na tur Saia pawh ka biak sak tawh che ka tih kha aw .."
UNathan ruala ka haw thei lo tur hi ka ngaih a ngam zan lo mahse haw na tur dang ka nei miau lo ,ka duh tho tho angai .
" i thlen hunah min rawn hrilh dawn nia " haw kawngah engpawh thleng thei anih avangin min rawn hrilh leh ngei se ka ti hle bawk.
Thil ei nuah nuah paha ka tei kual vel mai mai lai chuan thlang lampanga Lily senno par chuan ka mit a la nghal zar mai .
" Lily a nih khu " tih pahin hnim karah chuan thei leh thei lo hian ka chhuk thla a ,ka vanneih phei chuan in lama phun theih turin ka hawn daih ang.
Chutia rem leh rem lova ka tawlh thlak hrut hrut lai chuan tu emaw hian ," khatah khan eng nge i tih ?" A rawn ti thut ringawt .
" pangpar ka lo dawn " tih pahin hawi chhoh mai ka han tuma mahse ka thingṭang vawn lai chu a tliak rawp a ,ka duh aia chakin ka lum thla ta mai!!
Ft 5 vel chiah lum mah ila ka khup leh kiu erawh na ka ti hle thung.
" Eng nge hetiang tiang ah te i tih ?"
Dr. Noel pawh a rawn thleng thla rang kher mai , Nunpuii te bulah khan a awm sia engtik lai khan nge min lo hmuh hman pawh ka hrelo.
"Na i nei em ?" A han ti leh a .
" ka duh ai in ka thleng hma " ka lum dan kha ka ngaihtuah let a ka nuih za lutuk chu ka lo khi nghal ver ver ringawt .
" mawl lutuk " tih pahin ka lu ah min rawn kuk nghal fawk a , zo zetin min kaitho nghal lawp bawk.
" i khup leh i kiu tih loh na dang i nei em ?"
" ka hnungzang a na " ka tih rual rual chuan ka kawr chu a rawn keu nghal tawp tawp ringawt .
" Engthil nge maw i tih le ?" Ka kawr chu ka lo pawt thla nghal vat a ,"ka endik " alo ti sam et mai.
" a pilh deuh a nih hi , eng nge heng laiah te i tih reng reng ? " a ti leh a.
" pangpar saw lawh ka tum a ?" Tih pahin Lily chu ka kawk a ,a ngaihna awm lo min tih hmel takzet.
Lily pawh lo ta lo chuan min chhoh pui daih a, a car ah min ṭhut tira ka khup leh kiu pilh vel chu damdawi min hnawih sak bawk .Ka pem a tet ang aiin a hlauthawng ,hetiang aia rapthlak a hmuh pawhin a chiai ngai miah si lova.
" pangpar kha i duh viau em ni ? Rawn hmu lo ta che ila i thi daih mai tur asin " a sawi dead rem rem , khatiang lekah kha chuan ka thi bik lovang.
" Lily kha maw? A var phei chu a nalh rapthlak ,khawvel ah Lily aia pangpar nalh ka la hmu lo " ka sawi uar mah mah em aw ...a awm tho e Lily hi chu ka pangpar duh ber a nih mai bakah a var ngat phei hi chu ka en ning thei lo .
" Lily var maw ?"
" umm...Lily var in a entir chu thianghlimna ania , amah nen hian a inhmeh asin "
" a lehpek ah chuan ka chhar tawh lo ang che " tiin min chhang daih.
Kan ti nek nek a chaw kan ei kham meuh chuan alo tlai ruih tawh mahse ka hmanhnawh vak lo Muan'in ka nu leh pate mitthi inah an kal thu leh an rawn haw har tur thu min hrilh tho.
Chaw kan ei kham hnu chuan haw turin kan inti fel sap sap hlawm a , ka haw na tur ber Saia chu ka zawng nghal ruai bawk .
" Reuben , Saia i lo hmu em ?"
" Jenny nen an haw tawh "
" Maw !!"
UNathan khan Sai'an min thlah haw tur thu kha min hrilh ngei sia.
" Engtik ah ?"
" Nichin deuh khan , Mapui'in haw na tur i neih thu a hrilh a ...Jenny nen an in phur ta mai a nih kha "
Mapuii hming a lam rik rual rual chuan thil thlen dan chu ka hrethiam nghal mai , engthil nge maw ka tih a ka chunga hetianga a awm tak mai le ?
Engtin nge ka tih tak ang ? An vaiin phurh tur an nei vek sia in zeh dan te a awm lo emawni le ?
"Haw na tur i nei em ?"
Mangang taka ka awm lai chuan Dr. Noel a rawn lang hlawl mai , hre lawk sa te pawh a ang zawk .
" ai " ka ti tawi tap mai .
" anih chuan tumah phurh tur ka nei chuang lo ,ka rualin i haw dawn nia "
Lalpa leh ! Ka lawm lutuk hi puak hial te ka nap , theih chu nise kuah nghal vawng vawng mai ka duh.
" aw ....aw le "
" i in pack fel tawh chuan kal nghal ila ,i chhungten an lo ngaihtuah tawh ang che "
Midang aia kal hma kan tum avangin car lam panin kan in zui phei hnak hnak a mahse car awmna kan thleng chiah tih in ka phone ka theihnghilh a ni tih ka hre ve chiah .
" ka phone ka ak miah lo , chaw ei na ah khan ka theihnghilh aniang " tih leh tlan let ka rual nghal a , Dr. Noel pawhin min rawn zui ve nghal.
Ka chaw ei na te leh ka kalna tur awm ang ho chu kan han zawng kual vela ka phone reng reng hmuh tur a awm lo .
" call ila a hriat theih ka ring " ka tih chuan rang takin a phone chu min rawn pe a ,ka han call nak chuan dawhkan hnuaiah alo tla lek chu niin .
" a thim tawh bakah ka phone a dum bawk sia " zahzel ah ka ti nuah nuah ringawt .
" ak nghal rawh i thlauh leh ang " kal pah chuan a ti nghal mawlh mawlh a , a rukin a phone number min rawn call na kha ka save te te a ,a sawi ang chiahin ka bag ah ka ak nghal.
A car dahna kan let leh chuan rin loh lutuk maiin Mapuii leh Nunpuii te chuan min lo nghak reng a nih chu!! Ka hawi â nasa mai .
" in haw ve dawn em ni?"
Dr. Noel a awm bawk sia ṭha deuh hian ka zawt a .
" niang chu " an lo ti sam et mai , a sawi dan kha chuan a rualin tumah an haw dawn si lova, dawt a sawi ka ring lo hemi te pahnih hian an mahni thu in rawn haw ve ringawt an tum aniang.
" keipawh " tih sap pahin Dr. Noel chu ka han melh zeuh a ,kei aiin mak a tih hmel zawk mahse engmah a sawi lem hlei lova.
" kal ang u "
Mood off hmel zet chuan a ti sap a ,a ni ai ai in ka lawm lo zawk.
" ni e ...ho kal ang u " Nunpuii chuan a hma kawngkhar chu a han hawng rak a ,Dr. Noel chuan ," Tete a hma ah ṭhu rawh " a rawn tih hmak takah chuan a khar leh zal zal mai .
Kawng tluan deuh thaw in Nunpuii leh Mapuii chu an ṭawng char char a ,kei erawh sawi tur hre lovin ka lo nuihpui vel mai mai a ,Dr. Noel erawh a tum tluan zak.
" Sir , kan veng a inang tho sia Tetei thlah hmasa ber la " Nunpuii chuan tum nei ran hian a rawn ti a ,ka ning lutuk chu ka lo meng pual ralh ringawt .
Hetiang em em a hmeichhe zaktheilo hi an lo la awm ve hram hram a nih hi .
" Kan veng lam aṭangin kan kal dawn nia " Dr. Noel chuan alo ti ve hmak mahse hemi te bulah hian ka awm pheih tawh thlawt lo .
" Min thlah hmasa ber rawh , ka hmanhmawh deuh a " ka ti ta ringawt a ,ka tih tlat takah chuan ani pawhin min hnial lem lo.
Kan in kan thlen chuan Dr. Noel pawh chu car atang chuan a rawn chhuk thla ve kher a , car hnung lampang chu a hawng rawk rawk a Lily par nichin a mi ngei mai kha a rawn phawrh chhuak ta mai , pot ah a in phun thlap lehnghal!!
"i duh a ni lawm ni ?" Min rawn nuih vur vur a.
Engtin emawni hian ka awm tlat a nih chu ! Ka taksa te hi a rawn ṭek nghal chuai chuai in ka hria.
" engtik lai khan nge i lo lak hman a , pot te hi "
" resort enkawltu pa kha ka dil a "
" ka lawm e "
" kal tawh rawh "
" in i thlen veleh min rawn hrilh dawn nia " tih paha kal ka tum chu Mapuii chuan car kawngkhar chu a rawn hawng thut a ,pot chu leiah ka thlauh keh nghal chuai mai !! Ka thinrim lutuk hi a sam a ṭham pawp mai ka duh rum rum hman .
"Oh !! Tete ka tihpalh lutuk " a rawn ti kher lehnghal .
" a pawi lo " tih pahin pot tel lovin a pangpar chauh chu ka la a ,kan in lam panin ka tlan thla nghal nal nal bawk .
In ka thlen rual rual chuan Lily chu tuiah ka chiah nghal a ,ka nu leh pate an rawn la haw loh avangin Muani room lam ka pan nghal chat bawk .
" Muan enteh " tih paha kawngka ka hawng chiah chu a beer in ru tur lai tak hi ka zuk man a nih chu !!
" Zomuanpuii kha kha eng nge ?" Ka awki a sang vat vat hle .
" Zomuansang thawm rawn nei hmasa ta che ,min ti phu alawm " a rawn ti ve ngat .
" ka nu in a rawn hmu che nge " tih pahin a room kawngkar chu ka khar nghal vat a .
" hmu lo ang ,an rawn haw har dawn ka tih kha ...i duh ve em ?"
" aw ..." Ka lo ti then mai ,ka thinrim lai tak a ni bawka in ve hrim hrim ka chak .
" maw ? I ti tak tak em ?" Min zawt nawn leh ngat .
" tak tak e " tih pahin ka han lem pap a ,a kha lutuk chu ka ner nghal nawng nawng mai alawm .
" khawi aṭanga i neih nge ?"
" ka ṭhiannu min rawn hawn , Engpawh chu nise engthil nge thleng ? Kan Mari berin beer a in tak mai ?" Ngeiawm zet hian min rawn nuih a .
" enteh ...Dr. Noel hian min duh in ka hria ,vawiin ah pawh min ngaihsak lutuk.. " Ka sawi zawh hma hma in alo thaw halh ringawt .
" i in ngaihbel mai mai a nih kha, mipa hian an play mai mai che ka tih tawh kha "
" tun ami chu a danglam lutuk "
" hahh...Stephen nen pawh kum 2 kan ni a a hnuah min kawp leh tho alawm , engmah hi awi loh tur ,a rukin hmeichhe dang a be tho ang "
Ni e ,a sawi dik ve tho...Dr. Noel hi eng mi nge a nih ka hriatchian loh bakah hmeichhe dang alo be reng thei bawk .
" amak lutuk min duh ve ang tlata hriatna ka nei "
" nangman i duh vang a nih kha , engpawh ti se i in ngaihbel zel tho ang. A duh tak tak che chuan a hrilh daih tawh ang che " a sawi engkim hi a dik lutuk a ka in ngaihtuah vung vung ringawt . Dr. Noel pawh hi ka duh avangin ka in ngaihbel leh mai mai aniang .
Vawithum vel lek ka lem hman ang tih in ka nu hian kawngka chu a rawn hawng ta thut mai !! Min man chiang lutuk a phawk fe hian kan in melh reng ringawt .
" Engthil nge in tih hi ?" Tih pahin beer um chu a la daih a ,kan lo ṭawng tui lutuk a a thawm pawh kan lo hre lo.
" kawngka i kalh nange ?" Muani chuan a rawn ti sap a .
" Zomuansang , Zomuanpui rawn kal teh u " ka nu in vit zeta a rawn tih chuan room aṭang chuan kan chhuak zal zal a .
Ka nu chuan beer chu bucket ah a leih lut a sauh sauh ,tui no lian thum vel hi a leih lut leh a chutah fiante min rawn pek pah hian ," hawp zo vek rawh u ,in hawp zawh hma chu in mu lovang " a ti ta mai,kan huphurh lutuk chu kan in en ringawt .
" ka nu ..."
" zu in in duh ani lawm ni , hei zu rim a nam hi " tih pahin kan ṭhutna ep chiah sofa ah chuan a mu ar ar a , eng ang pawh leih buak ruk tum mah ila min vil tlat sia kan hawp ngei ngei angai.
Dar 12 ah pawh kan la hawp tlak tlak a,hawp zawh hma leh mut hma .Ka nu lah hian a rilu a thlak duh der bawk si lo .
" i hawp tlem bik " kan in ti kan in ti tawh mai.
Kan hawp zawh meuh chuan ka puar bakah kan zun a chhuak hlur tawh mai alawm , Muani chungchang hre lo mah ila keichuan ka sim chiang hle .
" ka zun chhuak a reh thei lo "
Ham bai bai pahin khumah chuan ka let nghal tawp a, ka phone ka hmet eng chiah chu Dr. Noel miscall pakhat alo awm tak tak !!
Ka lawm lutuk chu hmui hup chungin ka ke chu ka leng nghal vak vak a ,nichin khan a ngaihthla liam puat emaw ka tia alo la hre kar a nih hi .
(ka net a chhia ka rawn tlai zo vek)
0 COMMENT:
Post a Comment