I Love you 3000-12 by Remruati Bawitlung(Haylor)

Chapter-12

“But I love you I’m totally and completely in love with you and I don’t care if you think it’s too late. I’m telling you anyway.“

-Natalie Portman

Damdawi a ei hnu chuan a hmel hmuh pawh a nuam ta deuh alawm, nui hmel han pu leh ngat phei se chuan hmuh a nuam lehzual ang .

Damlo chu sawi loh amah dawr tu tur ringawt pawh an la intlar ṭhap a , chau pawh a sawi thei si lova ka khawngaih takzet .

Receptionist URp-i chuan a thil zawrh makeup original ,USA aṭanga a rawn hawn chu dawhkanah a bun raih a ,a man pawh a tlawm lo khawp mai . Hmeichhia ho chuan kan en sap sap hlawm a lipstick ngaina tak ka ni bawka Jeffree Star liquid lipstick pakhat chu ka duh leh hle tawh .

" Tete...la ve la , pawisa i neih hunah min pe dawn nia" U Rp-i chuan thiam takin a han ti vel a .

"Nidangah a ni mai, tunah chuan pawisa ka nei hrih lo " tih pahin a rawng chu ka han thlek vel a ,duh viau mah ila lipstick pakhat Rs 1500 a han lei pawp chu ka hreh ve deuh ,ka hman to ber pawh in Rs500 a pel lo .

" la tawp la pawisa te chu alo awm ve mai zel alawm "

" ka lo inkhawl anga thlaleh ah heihi ila hralh loh chuan ka lo la ang "

" I duh viau chuan ka lo hauh sak deuh ang che , hemi rawng 'I'm shook ' bik hi pahnih chauh ka nei sa hrim hrim a "

Lipstick original chupawh Jeffree star lipstick lehnghal ...awi naktuk aṭang chuan ei leh in ah ka in hrek angai tawh dawn a ni mai. Engpawh nise he lipstick hi ka la nei em em ang.

Reuben chuan min rawn ko a , ka va kal nak chuan a damlo lo buaipui chu mahni chauha buaipui chi ziazang a ni lo. Chunu kutzungṭang chu a lo vung luk a ,a vun a in khawh tuar bakah a hnai a awm deuh zui bawk ,tenawm lamah a kal zawk .En mai pawh hian hnai tamtak a awm tih a hriat .

" Ngatinge a kut chu ?" Tiin ka zawt nghal vat a .

" hling khei chhuah lovin a awm renga ,hnai ala a nih hi ....I & D (Incision and Drainage) i ti tawh em ?" A ti zawm zat bawk .

" vawikhat te chu ti tawh e "

" anih chuan min lo tih sak lawk teh a "

" nangman ti mai la "

" Hey! LalTete ...." Damlo hriat loh in min rawn signal zeuh a ,a uak deuh in ka hria .

Hepa hian a ten a ni chiang ...hahh, Doctor mize mak deuh deuh te pawh hi a awm ve theih a nia.

Chunu kuta hnai awm chu lak chhuah tumin scalpel hriam em em mai hian ka han zai a,a hnai tam a tam dan chu a awiawm loh zawk .

" a na em ? Kah hihna a hman theih bawk si lova " a hnai sawr pah chuan damlo chu ka be reng a ,a tawrh a chhel bawka thawm vawikhat pawh a chhuah lo .

Minute 30 zet a hnai tamtak ka sawr chhuah hnu chuan kut zungte tiah vel hian a kaw hur a ,kei ngei pawh hi ka mur deuh sung sung mai .

" ka pi nitin dressing angai ang "

Betadine gauze chu ka hnawh lut a ,ka tuam sak nghal vek bawk Reuben erawh a lo ner tluan zak.

Damlo a kal liam chiah tih in ," ka thaw huai mai" ala ti zui .

" Reu ...min treat ngei angai ang " nghawk pahin ka ti fiam a .

" tehreng mai, hawh Nestea in ang " a ti zui zat a ,Reuben hi chu a ten chhe bawka hetiang thil a khawih hi chuan thil a ei theih loh phah zel.

" Tete ..."

Ahhh! Vawiinah a vawikhat nan Dr. Noel an min ko ve ngei! mak ka tih tluk zetin ka hlim mahse ka hmelah erawh ka ti lang duh bik lo .

" Eng nge Sir ?"

" Nestea ka in chak zuk lei lawk teh ,chuan i ta tur i rawn lei nghal dawn nia "

Hahh...Engmaw ? A chhiahhlawh ka ni em ni ?

" aw ...mahse " ka tih rual chuan min rawn melh khai a .

" ka damlo a ka in chak ,i kal peih loh chuan keimah ka kal mai ang " a rawn ti hmak , damlo se chuan 'kha kal rawh' ka ti hrim hrim ang mawle.

" Ugh , aw ka zuk kal vat ange " ka ti ta ringawt a , Reuben'an ka nestea tur a chah tawh bawk sia no hnih ka in anga nimai lawm .

Dar3 a ri ṭep tawh tih in UNathan chu min rawn hruai turin a rawn thleng der tawh ,a nihna takah chuan anu birthday gift tur leipui tura min sawm vang zawk a ni .

UNathan pawh chu a rawn ṭhu lut a ,a duty ni lo mahse kan la buai deuh hlek avangin min lo tihpui a .

" ka hman ṭep ,hemi hi ka ti zo anga kan kal thei a ni mai " ka lo ti nghal zung zung a ,nghah reng nih hi ka duh bik lo .

Nathan chuan mi ṭhui laklawh lai a neih avangin duty room ah ka lo nghak a ,ka makeup te siam ṭha in darthlalanga in en meuhin lipstick ka inhnawih lai chuan Dr. Noel a rawn lut ta thut mai ,ka phu chiah teh e .

" vawiin hi i duty tawpa tur a ni tawh tiraw?" Tiin ka zawt ta ringawt a , ER -a hmuh tur a awm tawh lo tur hian min ti lungngai takzet .

" ummm..."

A kekawr iptea a kut zen chung hian ka bulah chuan a ding reng a ," kal suh " ka hriat tawk lek hian a rawn ti sap a .

" maw ?"

" ka rualin haw rawh ,keiman ka thlah ang che "

Ringawt a ,kan veng leh ani veng te chu a in hlat lutuk haw rual ngaihna a awm lo .

" Bazar ah ka kal ..." Ka ti dek dek a ," kal suh " a ti hmak , thu min pe a ni zawk mah .

Chhan ngaihna pawh ka hrelo ,kal suh a tih vang ringawt hian ka kal lo awmlo emai mahse ka rilru chhungril erawh in a ruala haw a duh hle thung.

" ngatinge hetiang hian min tih ?" Ka melh chho kar a ,a hmelah a ti mai mai lo mahse a awmdan engkim hi dawt alo ni reng thei bawk .

" ka damloh hi , chuanpui ka neih loh chuan motor ka khalh laiin muthlu ta ila mawh i phur duh dawn em ni ?"

Hahh...Enga !! A ni mutthilh avang ringawt in mawh ka phur vek ang maw? A fiamthu em ni .

Ka chhan hma chuan min ṭawng khalh a ," garage ah ka lo nghak ang che " tih pahin a kal daih a nih chu !!

A sawi avang ringawt khan ka kal awmlo emai .

Rei lovah Nathan pawh a hman der ,nichin khan Dr. Noel ruala ka haw loh tur thu kha sawi tan tan mah ila tunah erawh ka rilru a phir takzet .Vawiin chiah hi pangngai takin ka hmu thei tawh dawn a ,min thlah na hmasak ber leh tawp na tur a ni tawh maithei bawk mahse UNathan hian nizan aṭang tawhin min rawn be tawh bawk sia ,ka rilru a buai.

" kan kal dawn mi ?" uNathan'an a rawn tih chuan ka lo bu nghat a ,a kal hnuah pawh ka la ding char char, ka la inngaihtuah nasa hle.

" U Nathan " a tawp a tawpah ka ko let ta nge nge a , a vawikhat nan ka thinlung in ti tura min tih chu ka ti ang.

" ih!! Haw hma ka ngai thut a ,ka kalpui thei lo ang che pawi ka ti lutuk "

Dawt sawi kher hi angai em ni ? Nilo ...Dr. Noel rualin ka haw dawn tiin ka hrilh ngawt thei bik hleinem.

" ngatinge ?" Mak ti takin min rawn en phei hi chuan ka inthiam lo lehzual .

" ka...ka nu in rawn haw hma turin min hrilh a "

Dawt pakhat in dawt dang a hring an tih ang zawng zawng kha ka nei vek tawh mahse hmeichhia te chak em em Dr. Noel thlah haw nih chu kei ngei pawh hian ka chak em a tin ni .

"naktuk pawh hun ala awm alawm " a ni pawhin nuam a ti bik lo , a zahzelah a lu a hiat ringawt, a hrilhhai hle bawk.

" naktuk ah chuan ka kalpui ngei ngei tawh ang che pawi ka ti lutuk "

" anih chuan ka thlah haw mai ang che "

" nilo , bus in ka haw mai ang " ka duh aiin ka ṭawng ring .

" aw ...aw le , ka lo va kal hmasa ange " a ti ta ringawt a ,ka awm dan chu mak tih hmel takin min rawn en leh a ,ngaihtha lo zetin a kal nghal a .

Huizz ..khapa vang vek kha ,ka tih loh tur tur ka tih phah .

Garage ah chuan Dr. Noel chu alo la awm ngei a ,min hmuh rual chuan a khi suk a .

" i rawn kal dawn tih ka hria alawm " ngeiawm zetin a rawn la ti zui, ka rilru hi a hre tlang thei aniang .

" rawn lut rawh "

Melh ram ram chung hian ka ṭhu lut a ,na zeta ka khar rik bur rual chuan a phun nghal hluk . Ni e, a car duat em em mai hi hetianga tih hi a phal tawp nang .

" I damloh avangin a tawp nan i rualin ka haw mai mai a nih hi" ka tih chuan min rawn nuih a ," a bul ṭanna zawk a nih hi " a ti ve hmak.

Tunah hian Dr. Noel car ah ngei mai ka ṭhu ve ta reng mai ,ka awi thei lo zawk hmeichhe tam takin min thik viau ang chung zingah chuan nangpawh i tel ve ka ring.

Lalpa leh !! Hetiang rilru ka pu hi ka duh lo takzet mahse a car chhung hi amah a rimtui tluk zetin a rimtui.

Min thlah dawn emaw tia thlamuang taka ka ṭhut der der lai chuan Zarkawt lamah a tlan tlang ta daih mai ,ka hawi let vung vung ringawt .

"Khawiah nge kan kal dawn ?"

Zarkawtah a kual dawn aniang ka la ti fan tho .

" kan inah "

" Enga, in inah maw ?" A bu nghauh a , kei erawh Heart Attack ka nei mai dawn in ka hria .

" Eng ...eng nge kan tih dawn ?" Ka ti bah nuai a ,ka lei te hi a tawt zo vek .

" lungngai suh ka thlah em em ang che "

Nilo , an inah eng nge kan tih dawn tih hi lawm ka hriat duh min thlah tur thu nilovin.

" min hrilh vat rawh chu ti lo chu ka zuang thla dawn nia " ka ti ve ringawt ,ka zuang thla ngam tak tak der si lova, zuang thla turin min tih phei chuan ka chhe vek a ni mai .

" mawh anih loh chuan i car hi ka rap bal dawn nia " ka ti leh daih , a haw viau ang .

" Engmah kan ti dawn lo ,i lawm tawh em ?"

Ai ka la lawm lo , hepa hian min hruai bo te hi a tum a ni lo maw ?

Min hrilh duh lo bawka ,ka thusawi tawh chu ka ti tak tak ṭhin tih entir nan ka pheikhawk nen ka ke chu ka hlang than mai .

" hreptak chuan " a ti zui hlak a ,min hau vak dawn engmaw ka tih laiin engmah a sawi chhunzawm miah lo .

An in kan thlen chuan car a ti ding chiah tih in Pitbull dum pahnih hmelchhe zet hian min lo bauh ta mai! Ka hlau lutuk ringawt ,chhuah pawh ka chhuak ngam lo .

" rawn chhuak rawh a hlauhawm loh " tih pahin an pahnih chuan a chul hauh hauh a ,hlau suh ti eng ang mahse ka hlau tho tho .

" ai "

" anih hei ka thlung tawh "

A ui te pahnih chu a thlung nghal vat a, kawngka bulah a thlung leh tho sia ka lut ngam leh chuang lo .

Heng ui pahnih te hi an hmelchhe ropui sia min bauh ve khanglang lehnghal, ka hlauh zia hi hria se chuan an bawk hle hle ang mawle .

" ka haw dawn " ka ti hmak ,ka kal ngam miau hleinem .

" Lucky ,Blade ...Sit " a han tih takah chuan an ṭhu hle hle mai ,down a han ti leh a an bawk leh thlap .An hmelchhiat ang aiin an fing .

" an va fing ve " ropui tih hmel zet hian ka han nuih a ,hmuhnawm ti takin min lo en reng thung.

" engtin mah an ti lovang che "

" mahse " ka ti leh hram ,hahthlak min tih hmel zet hian a han thaw hak a , a ning ta deuh aniang engmah sawi set set lovin min pawm kang nawlh a min luh pui nghal nal nal. 

(Fakna khu hmet hram hram ang aw)