Rainer Black-26 by Remruati Bawitlung (Haylor)

CHAPTER -26

"Her world is like a rainbow whilst mine is Black & White " 

★Rainer's POV★

Ka restaurant ngainat berah breakfast kan ei zawh hnu chuan ngawi rengin car lam panin min zui phei hnak hnak a, han biak ve te hi duh viau ṭhin mah ila sawi tur hi ka haihchham leh tlat ṭhin.

Car ah ka lut fel chiah tihin Sadie chu rawn lut ve ta mai lo chuan pawnah a ding tlat a, chahbi rawlh luh pah chuan tukverh ah ka kiau ka han nghat chhuak a.

"rawn lut rawh... "tum loh deuh hian ka lo vin leh hluk ṭhin.

"lo va kal hmasa rawh "

"eng nge i tih dawn? "

"umm... police station ah ka kal dawn " a tih chuan lehlam hawi pah hian ka chêk zui tlak a.
"kan tlai dawn!! i û chu vawinah a chhuak em em ang"vawi engzat nge ka hrilh tawh pawh ka hrelo.

"Kendra ka biak theih loh mai bakah thuthar engmah min rawn la hrilh bawk si lova...ka kal ngei ngei angai "

"engmah tih theih i nei lo chuvang chuan alo chhuah hun tur lo nghak tawp mai rawh " ka thusawi hi helh hle mahse dik a ti ve tho a ni tih a hmelah a hriat theih mahse lo ngai reng mah rawh min hnial leh tho ang.

"kal zawk rawh...bus in ka rawn kal mai ang " kha maw!!  hahh...henu hi chuan min hnar reng mai dawn a nih hi.

"i thu thu le... mahse minute 10 vel tal i nghah angai ang... traffic zam nen phei chuan a rei viau ang le ... " ngeiawm zet a nuih suk pahin car chu ka han ti nung hlat hlat a, tunah hian a in ngaihtuah mek tih ka hria mi â te a nih ngawt loh chuan minute2 chhungin car ah a rawn lut ang.

"fine..." vin deuh hlar a tih pahin car hma lam chu a hel nghal a, a ruk in ka lo khi suk ringawt. A tet tet nen hian a vin zek lehnghal.

"ka thu awih la a ṭha a nimai " a rawn luh rual chuan ka lo ti kher a, min rawn melh rûm leh tawh nang mai!!

 A huatzawng sawi te hi ka tum dan pawh a ni bik lo mahse mak tak maiin a bula awm a han chhaih vel hi nuam ka ti tlat pek a,a lai hmel te leh a zak hmel hmuh hi a nuam ka ti.

" project buaipui tur nei lo ila chu bus ka nghak ang... "
" ka tih pui ang che... " ka lo ti vat a, ka ti tak tak bawk.
" Enga!!  hahh...ka lawm e mahse partner ka nei tawh... " a tih rual chuan ka nui tawp nghal riai riai a, tu phiangsen nge a partner chu ni ta ang?

"tunge? "
"ka partner lehzel engvangin nge ka hrilh ngawt ang che..." mipa pakhat a kawm ve ziah pa kha a nih ka ring nghal.

"ka pui ang che ka tih kha... "
"Rainer... i thil tih hman loh tur min offer suh " hahh... hnar dan mawi hnai tak a ni.Hreptak chuan...

"bullshit... " ka hriat tawk leka phun sup pah chuan car chu ka khalh chhuak nghal dawrh a,chhanglet pawh ka tum tawh lo mahse a partner chu tunge a nih? tih bak ka rilru ah a awm lo thung.

In hre ngai lo ang maiin kan ṭhu ngawi leh kar tawh a,Sadie in tukverh lam hawi daih paha crisps a ṭhial rik rep rep bak thawm hriat tur a awm lo.Breakfast kan ei zo chiah a thil dang a ei lehnghal thei a nia engang pumpui nge maw a neih bik ni?

Kawng peng pahnih kan thlen chuan college kawnga tlan lovin ka apartment awmna lamah chuan ka peng ta zawk a,Sadie pawh a rawn in rawlh nghal .

"college kawng helam hi a ni lo... "
"ka in thlak ve phawt angai alawm " ka tih chuan min hriatthiam hmel tak hian a lo bu nghat a, ka thawmhnaw hi a hnawm deuh chuap a thlak vat ka duh.

"i rei lo ang tiraw? " tih pahin dashboard a sana chu a han melh nghal zeuh bawk a,hmanhmawh viau mahse kha pa nen khan an awmdun leh mai mai dawn tho kal hma vak a ngai in ka hrelo.

"ka hrelo... " ni e, ka hre miau lo ka rei viau maithei.

Car ka park fel hnu chuan ka room lam panin lift ah kan chuang chho nghal a, kawngka hma takah chuan kekawr ipte zen chung chuan ka ding run a,a ni erawh ka bulah zâm hmel takin a kut a kheuh niap niap thung.

"ṭawng rawh... "
" maw!! " mak tih hmel tak hian min rawn melh chho nghal ha a.
" ka sawi awmzia chu tikhan awm reng lo teh...tual that tu ka nih loh hi " tih pahin ka ipte a cigratte chu la chhuak in ka pet nghal vu a.

"a ṭha lo a ni tih i hre awm tho sia...khatiang thil i zuk khan cancer a thlen thei a ni tih i hre lo em ni ? "
"ka hria lawm... "
" i hriat chuan tawpsan ta si che... " ka meng phar deuh âk a, ka mei zuk chungchang ah hauh vawikhat ka tawh na. Tumah in bansan turin min la hrilh ngai lo a,thu ṭha tumah in min la hrilh ngai hek lo.

"zuk chhan ka nei maithei asin... "
"cancer vangin ka pa ka chan tawh a...i nu leh pa in cancer vangin an chan ve loh hram che ka beisei.. "
"i pa pawh khan zuk chhan a nei tho ang... " nuih suk pahin ka han pak khu leh talh a.

" a nih engvangin nge i zúk... " zawi sap hian min rawn zawt leh a, lift kawngka a rawn in hawn avangin pen chhuah pah chuan, " hun awl hnawh khat nan mawle " ka ti zui sap a.

Hetiang chungchang hi tumah in min la zawt ngai lo, tumah in min ngaihsak bawk hek lo chuvang chuan ka nun awhawm loh zet leh ruak tak mai hi tlan chhiat san tumin khawvel ka chen a ni tih hi tumah in min hriatthiam pui lo.

" zu tawh suh... " thupe tak hian a rawn ti a, a serious hle bawk. Ka chhanna nghakin min melh kar avang chuan ka tih ngaihna hre lo chuan ka sam tuai thuak pah in a hmui ah chuan ka zuk fawp zeuh ringawt a, a mak ti hmel leh hawihai hmel ka hmuh hian ka insum thei ṭhin lo, a ruk hian ka lo nui leh vur vur ṭhin .

Ka room password ka hmeh zawh chuan ka han hawng ri rak a, inchhung kan hmuh ruala Sadie mak ti hmel ka zuk hmuh chuan awm lo ka ti hran lo,
A rawn kal hmasak zawk khan kitchen light dim ruih bak a in on lova hetiang hian a ruak a ni tih a lo hmu lo pawh a ni mahna.

Ka in rawn tlawh tu apiang in hetiang chiah hian mak ti hmel an put ziah avangin ngaiah ka nei tawh .

He flat ah hian kum3 vel cheng tawh mah ila ka nun ruak tak ang chiah hian ka inchhung pawh hi a ruak .

 He inchhung zau leh lian tak ah hian kitchen lian ṭha tak rawng bawl ngai lohna tih hriat tak mai te,couch lian ṭha zet pahnih leh Tv lian tak hma a video games leh gamepad in zam hnawk nuaih mai te, excer lakna hmanrua dumbbell tih vel loh chu ka khum a awm leh deuh tlawng a ni mai a bak chu bungrua han lakluh emaw han chei ve eih pawh ka tum lo.

"ramhuai i hmu em ni ?" a awm a nawm loh hmel em avang chuan ka han fiam a,engtik lai aṭang khan nge henu ngaihdan hi ka lo care ṭan ni, tih hlim phet ka tum ta ziah mai hi ka in hrethiam thei lo.

Sadie in min chhan hma chuan pa lian thlerh thlawrh la upa lo tak kum50 pawh la tling lo,jeans leh sweatshirt simple taka ha hi kitchen aṭang chuan a rawn pen chhuak thauh thauh a, hepa hi vawi li chiah la hmu mah ila ka pa a ni tih ka hai lo .

"hello...nula maw ?"

Min nuih sang pah hian a rawn ti nghal vâr a," Muhammad ka nia... " tih pahin Sadie chu a chibai nghal bawk .Sadie pawhin a hming hrilh pah chuan tunge a nih pawh hre lovin a lo nuih let nghal sâng a, keimah ang tho in mak ti hmel pu mahse pangngai takin a awm lehnghal.

"engtin nge hetah i awm theih? " zawhna atthlak tak a ni,engthil nge i duh?  tiin zawt ila a finthlak zawk. Ka car te ,apartment te hi ama min pek vek a ni a ka password te lek lek hi chu a hre vek ang mawle. Mahse heng thil te hi a thlawn in min pe reng reng lo ka puih vang chauh a min pe a ni.

"Nashville ah hian software thar kan launch dawn mawle..mahse ka mamawh chu i hriat kha " a mamawh chu ka puihna!!  a sawi har ka ti reng a ni, ka hming sign tel lo hi chuan software pakhat pawh a launch theilo chu a nih hi.

"i hmei khan a pui thei ang che chu..." Sadie a awm ve avangin a sawi ṭha duh lo a ni tih ka hre ve kâr,ka puih mamawh em em si hian engvanga min mamawh lo anga lan tum tlat nge maw a nih ni?

" umm... balcony ah ka lo va chhuak ange " Sadie inthlahrung chuan a rawn ti ta ringawt a.
" a ngai lo... khawiah mah kal angai lo " ka lo tih ve tlat avang chuan a chhuak mai ngam bik lo, ka hnungah chuan inthiam loh hmel takin alo ding ngawi kar ringawt.

" Rainer... luhlul chhuah duh suh kan in mamawh tawn a ni tih i hriat kha..."
"Samantha in hetah i awm tih a hre tawh em? "
" i nu hmuh hi thil awlai tak a ni hleinem" za lo zet hian a nui lui suk a.

"zaninah i hman chuan dinner kan kil dun dawn nia...address ka rawn thawn ang che " tih pahin ka dar a rawn hmer zeuh a, kal pahin Sadie chu a nuih deuh suk a "kan inhmu leh vat dawn nia " tih pahin inchhung aṭang chuan a chhuak nghal a.

Ka nu leh pate hi kum 5 mi lek ka nih laiin ka pa in ngaihzawng dang a neih avangin an in ṭhen a,dan anga an in ṭhen lawk theih loh avangin in aṭangin ka nu nen chhuak tawh tho mah ila a ngaihzawng nu nen chuan an in neih theih lawk bik lo avangin chu nu chu a hmei angin hun rei tak chhung a awmpui a chuvang chuan 'Hmei' tih bakin ka ko ngai lo.

Ka pa leh a hmei chuan fa pathum an nei a , a upa ber pawh keimah aia kum 2 leka naupang a ni nghe nghe a awmzia chu ka pa hian ka pian hnu deuh lawkah midang lakah fa a nei tihna a nih chu !!

Kum13 ka nih in UK aṭangin America ah ka nu in min pem pui ta daih a.UK a kan awm chhung zawng khan ka pa nen hian vawikhat bak kan in hmu lo.

 America a ka awm hnu hian company ah share ka ngah em avangin ka puihna a duh avang chauh in vawi thum lai min rawn hmu turin a rawn kal tawh a , vawiin nen chhiar tel in ka pa nen vawi nga kan in hmu tawh tihna a nih chu.

Inhmu khat ta ngang chu min rawn ngaihsak lo bawk nen kan in nel lovin inhuatna pawh kan nei hran lo, amaherawhchu ka mal em avang hian a fate pathum bula a awm lai ka hmuh hian ka thik in ka awt ve ṭhin .

A company hi a thlawnin ka pui ringawt bik lova, ka nu hriatloh in a rukin thla tin pawisa min rawn thawn ṭhin turin kan in rem siam a,amah avang chauh a ka nu lak aṭanga tal chhuak thei ka nih avangin puih hrehna ka nei lo.

(A hnuaia fakna khu hmet vek ang u aw ,naktuk zanah chhunzawmna a awm ang...xoxo)