Rainer Black-24 by Remruati Bawitlung (Haylor)

CHAPTER-24

"How many nights have you wished someone would stay?"- Infinity🎵

Ka zah rual rual in ka thinrimna chu a nasa zawk!

Ngawi rengin ka sam ka benga zeh ṭhat pahin ka tank top chu ka ha nghal mawlh mawlh a, chumi chhung ringawt pawh chuan ka rilru a kal thui hman hle.

Rainer hi mi danglam tak emaw ka lo ti ṭhin a mahse mipa dang ang tho a ni, Derek nen pawh danglamna an nei chuang lo.

A mizia, a ṭawngkamte leh a chezia vel aṭang ringawt pawh hian hetiang thil hi a thleng dawn a ni tih hrelawk tur ka nih laiin hetianga mualpho taka keimah leh keimah ka la insiam fo mai hi mak ka in ti tawp thei lo.

Engvanga â nawn mawlh mawlh reng nge maw ka nih le?

Ka chhanna nghak chuan min la melh kur reng a,ka ṭawng chhuak hleithei tawh lo chu a nih ber hi!!

Rainer hmel ka hmuh zawng ringawt pawh hian ka rilru a na ngawih ngawih,a chungah rilru put hmang danglam tak ka neih avanga hetianga awm hi ka ni tih engvanga hrethiam duh miah lo nge a nih? nilo....hepa hi ka duh tur a ni lo, keimah min hmangaih tak tak tu chauh a ni ka phu ni.

"i ṭap em ni?" ka kun tlat avang chuan a ngaihṭha lo chuan a rawn ti sap a, min rawn khawih a tum pawhin ka lo hawi sawn nghal hmak.

"Sadie....hey !!" ka dara rawn vawn pahin zaidam tak hian a rawn ti diam a, a aw ah tihderna a awm lo.

"min nuihzat dawn a nih pawhin midang bulah chuan sawi suh... " thinrim insum tih hriat tak hian ka nui lui sak a, pangngai takin ka sawi chhuak thei erawh mak ka in ti hle.

"eng chu maw? "
"tuna thil thleng kha"

Ka sawi zawng ringawt pawhin ka hmai chu a rawn sen nghal ṭawn ṭawn a, ka thin te hi a rawn vung ta emaw tih mai tur hian min hnawh ut ut lehnghal.

"engvang chuan maw? "

Chik zet hian min rawn zawt leh ngat a, thil hrethiam lo niawm ang ziazang a a rawn tih leh kher takah chuan ka ngeng a chhun nghal zâk !! ka insum thei ta lo.

"hmeichhe sihhnip tak angin min ngai a nih chuan i ti sual der!! ka thianghlim avang hian min hmusit in min nuihzat mahla pawi ka ti lo... " ka rilru a awm ang ang chu ka chhakchhuak nghal tawn tawn a,hmun reh taka awm kan ni bawka ka aw chu a ring kher mai.

Rainer chu chiang zet hian ka en chho nghal kar a, ka mittui rawn tling nghal pam mai a hmuh rual chuan inthiamlo hmel a pu nghal a, rilru buai tak hmel te pawh a pu tel in ka hria .

"ka nuihzat che ilo ring amaw?"mak tih hmel zet hian min rawn en nghal haw a, ka lo buk nghat avang chuan nuih chhuah deuh hak pahin a jacket ipte chu a han zen a, thinrim nui a ni zawk mah ang chu.

"ka nuihzat reng reng lo che... i la thianghlim avang hian inchhuang zawk tur i ni asin... " chal chuar deuh nâng hian a rawn ti a, ka rin loh lam daih a min chhan avang chuan mak ti takin Rainer chu ka melh nghal kawk a, ka taksa tawt lutuk pawh kha a rawn zia nghal hawk mai.

"i vanneih zia hi i in hria em,in sit tawh reng reng suh " a rilru tak tak in a sawi nge ka zah a hlauh avangin hetiang hian min hnem mai mai zawk ?

"mipa khawlo deuh ka lo ni lo hlauh a... mipa dang chu nise khawih chhiat che an tum tawh ang... " thu ṭha min hrilh nge amah a infak zawk pawh ka hrethiam tawh lo.

"mahse engvanga thinrim nge i nih?" ka tih chuan thawk lak deuh hrawih pahin inthiamloh hmel zet hian min hnungchhawn zawng chuan a ding nghal daih a.

"tih nat che ka hlau a tin ni... " a ti zui sap a.

"engvang chuan maw? " ka lo ti ha a, engvanga min tih nat hlau leh si nge a ni tih hi ka hriatthiampui pha lo.

"umm....hmeichhe thianghlim hi ka la tawng ngai lova min ti hamhaih hman alawm... "

A nghawng tuai thuak pah chuan min hmachhawn zawng hian a rawn hawi let leh a,"engpawh chu nise na i tih kha? " thutak deuh hian a rawn ti zui zat a, a kut ṭanga thisen tlemte kai khang tawh chu a zuk melh kher bawk.

"kha kha i en tawh lo thei angem? "

"engchu maw heihi maw? " tih pahin a kut chu min rawn la hmuh ang deuh deuh a,rang lutuk hian a kut chu ka lo ben thlak sak a, ka zak lutuk hi khuk ral daih ka chak.

"a na tawh lo tiraw...?"

Ngaihṭhat loh hmel zet hian min rawn zawt leh ngat a,engmah lah hi sawi hreh a nei si lova a ṭawngkam avang hian ka lo ip chawih chawih zel.

Ka lo buk nghat avang chuan rawn khik deuh suk pah hian a han thaw deuh huai a," puih i ngai em? "tih pahin ka ṭhutna bul a ka bra let bal chu a rawn la thurh a, a rawn khai chhuah rual rual chuan ka lo pawhthlak sak nghal sawk a,ka hnung lamah ka thukru nghal vat bawk. Ka bra pawh ha lovin ka tank top chauh ka ha a ni tih pawh ka lo in hre tawh lo.

"oh!  C'mon.... hetiang hian awm tawh lo teh " mit chet kual ralh pahin ka hnung lamah a rawn zen lut nghal a,ka bra min rawn chhuhsak rual chuan chiang deuh a en pahin a mit ko chu a han kân nghal âk a, ngeiawm deuh a awm hi a thiam ve ngawt mai.

"umm... ka... ka kal dawn " tih leh kal ka rual nghal, hepa bula ka awm tawh hi chuan zak deuh hian min siam ziah.

Pawn ka chhuah chuan ruah chu alo la tla cherh cherh a, Rainer an min rawn zui ve nghal mai ka rin avangin inkuangkuah chung in kawngka lian zet bulah chuan ka lo nghak ran a, ka thawmhnaw a hnawm deuh chuap lehnghal a ka khur der der bawk .

Car alarm a rawn rik ṭat ṭat rual chuan Rainer pawh chu a rawn lang nghal mai a, min hmuh lawk loh avang chuan a han hawi kual nghal vat vat bawk a, min zawn ve hrim hrim avang ringawt pawh hian ka lawm leh em em tawh.

"rawn lut rawh... "tih pahin ka lam pawh rawn hawi lo in car ah chuan a lut nghal daih a, engtik lai khan nge min lo hmuh leh hman tawh pawh ka hrelo.

Ngawi rengin car ah chuan ka lut ve nghal thak a, seat belt ka hren mawlh mawlh lai chuan a ṭhutna bul lawka ka bra a dah fel than chu ka zuk hmu thut mai! rang lutuk tak mai hian ka la lehnghal zawt a, khatiang em em khan ka la che rang ngai lo.

Ka chet dan chu alo hmuhhmaih lo nasa, nuih vur vur pah in tukverh ah chuan a kiu chu a han nghat a, a hmui liah zeuh pahin tukverh lam chu a hawi nghal daih bawk a, ka hmuh theih loh turin a rukin a nui tih a chiang reng.

Kan in kawngka ka hawn rual chuan light pakhat chu ka on nghal vat a, ruah a rawn sur leh tak vak avangin car aṭanga kan in ka tlan chhung lek pawhin ka huh leh hman vek.

"lut turin min sawm dawn lo em ni? " Rainer aw ka hriat rual chuan ka hawilet nghal vut a,a lo ding far tluk tluk lai ka hmuh chuan mak ti takin ka melh nghal kawk a ,mangṭha tih pahin ka tlan chhuak nghal daih sia min rawn zui tih pawh ka lo hre lo.

" ka tihpalh... "inchhunga luh pahin kawngka chu ka han hawng zau deuh a, ka û a awm lo bawk a reilote rawn awm lum mahse pawi tihna ka nei hran lo.

" i in angin ngai rawh... " hawihhawm taka ka lo tih avang chuan nuih tut tut pah hian a han hawi kual vel a, a apartment angin changkang lo mahse kan in hi ka thlang zawk tho tho.

" inhruk hul na tur ka rawn la ang "hrilh chawp ngai lovin ka lo ti nghal zung zung a, towel lak tumin inchungah ka tlan chho nghal vat bawk.

Ka closet a ka towel thleh fel sa thlap chu thimthanah chuan ka han dap kual dan dan a, ka hmanhmawh bawk nen ka thawmhnaw thlehfel sa ho pawh ka hai hnawk nuai mai.

Towel ka dap fuh rual rual chuan ka pawt chhuak nghal zawt a ,hmanhmawh taka ka inher rual chuan ka room kawngka bula Rainer alo ding rûn lai ka va hmuh chuan ka phu chiang kher mai!! thawm enge maw rawn neih ve tal tur ania.

Thawk lak kawk pah chuan ka awm chu ka han dawm vang vang a, "min ti phu alawm.. " ka lo ti nghal vat bawk.

"ramhuai ka ni lo ania... " tih pahin room chhungah chuan a rawn lut nghal a.

"kha inhru fai rawh... sawtah sawn bathroom a awm ang " towel pek pahin ka khum bula light dim ruai chu ka han on nghal a.

" nangman i mamawh zawk ang... " a sam hnawm chap chu a han hru hul thuak thuak a, a jacket leh kekawr huh far tluk tluk hian ka mit a ti kham takzet.

"ka rawn let leh vat ang " tih pahin room aṭang chuan ka tlan chhuak nghal hlawk hlawk a, ka û room ah lut nghal in a tshirt leh a pajama chu ka zawng nghal a, sawtiang renga a awm a nih chuan a damlo thei mai ang bakah ka û hian thawmhnaw a ngah bawka a hriatchhuah ka ring lo.

Ka û thawmhnaw keng chung chuan ka room ah ka let leh a mahse Rainer a thawmhnaw leh pheikhawk vel chhuata lo let bal ka hmuh chuan ka ding nghal chawt a, room ah alo awm tawh loh avangin bathroom ah a awm ka ring nghal.

Minute 5 hnu lekah Rainer chu bathroom aṭangin towel chauh veng chung hian a rawn chhuak a, a abs te leh a pian in khai thli thlarh ka hmuh rual chuan ka chil ka han lem khawlh a,a chhelo takzet!!

"i rawn let tawh elaw.... " a sam huh hlap chu a han tuai thuak thuak a, a taksa la hruk hul loh tih hriat tak mai te chuan a ti chhelo zual emaw tih mai tur a ni .

"ughh.... kha heihi i ha haw thei ang " buai nuai hian ka lo ti a,ka û thawmhnaw a hmuh chuan mak ti hmel a pu.

"ka duh lo " hmm.... a thawmhnaw a huh veka hnar turin duhthlan tur dang a nei pawh a ni tawp si lo , lawm hle tur a ni zawk asin.

" maw?! "
" ka thawmhnaw a ro hma loh chuan ka haw dawn lo... "
"enga!! zankhua a pho angai alawm "
" a nih chuan hetah ka riah a ngai dawn a ni chu... " a lo ti sam et lehnghal.

" nilo.... i thei lo "
"engvang chuan maw? " tih pahin ka khumah chuan a zuang phei tharh a, ngeiawm zet hian min rawn la nuih zui.

"ka û in a rawn hmu ang che... haw vat zawk rawh... " ka rilru a awm ang ang chu ka chhak chhuak lehnghal vek tawh.
" chuan? " enga!!?  hepa hian hlauhthawnna chhete pawh a nei ve miah lo em ni?

"bakah ka. .."
" relax... hlauthawng viau ṭhin teh suh ,i û chu a hma berah dar10 ah bak a rawn haw dawn lo "

hahh!  engmah a hre tawp si lo, Kendra in zaninah a rawn hruai chhuak maithei tih hi hria se chuan rawn riah a tum hauh lo ang.

"thlamuang deuh khan awm rawh...ka mut a chhuak teh ania" a ham zui bai bai a.

" nilo.... heihi ha la kal vat la a ṭha zawk " tih pahin ka û thawmhnaw chu ka va theh phei kher a, Lockup ah a riah ngun tawh hmel bawka kei aiin a hre daih zawk dawn tih chu hre tho mah ila in khata Rainer nen a awm hi a dik lo, nilo... engkim hi a dik lo vek tawh zawk.

Ka thawmhnaw lak chhuah pahin inbual turin bathroom lam chu ka pan ve nghal a.

ka luh hma chuan hawi let leh kher pah hian ," ka rawn chhuah leh hunah chuan i awm tawh loh hram ka beisei " tih kher pahin bathroom kawngkhar chu ka khar zui nghal a.

Ruah eng eng pawhin sur tam mahse a haw dawn phawt chuan ka pawi sa tawh lo, buaina a chhuah ai chuan Rainer chungah hian sual taka chet pawh ka thlang zawk.

Ka inbual pah chuan ka mut dawn apianga ka nu min sâk sak ṭhin Angels watching tih chu ka sa pah rat rat bawk a, khawpui ri rum rum te leh kawlphe kara inbual ka nih avangin ka in bual zo rang kher mai.

Kekawr bul hak nuam tak leh top mawlmang tak mai hi bathroom aṭang chuan ka ha chhuak a, ka sam hruk pah chuan ka zai chhuak leh rat rat a, ka rin ang ngeiin Rainer chu alo la awm.

Tukverh bulah dingin hma lam chu a melh ngur ngur a, tshirt la ha lo mahse ka pajama pek kha alo ha tawh a, engpawh hi a inhmeh em em zel mai chu a nih hi.

" Rainer... " thil diklo  awm a ka hriat avangin ka va pan hnai  a, a dar ka khawih rual chuan a rawn hawi nghal vat a, a hmel ka hmuh chuan lungngai tak hmel a pu, hetiang em em a a lungngai hmel hi ka la hmu ngai lo.

" i ṭha maw? "
" kha hla kha... " a rawn ti sap a.
" Engchu maw? "
"tuna i rawn sak chhuah kha... "
" Angels watching tih kha maw... hahh... ka nu in min sak sâk ṭhin a... "

" sa leh rawh.. " min ngen pawh a ang lo thu min pe a ni zawk mah in ka hria.
"maw!!  tunah hian maw? "
" aw... "

Nichin kha chuan awlsam deuh khan ka sa mai sia, sa leh tura min tih takah hian sak a har ṭalh mai.Thawk deuh halh pah hian tukverh lam chu ka hawi ve nghal a.

"Angels watching e'er around thee, all through the night " aw khur dar dar chung chuan ka sa a, thawk ka han la leh deuh kawk a .
" Mightnight slumber close surround thee "

" ka nu in min sâk sak ṭhin " ka zai lai chu min rawn pawt chat a, ka hriat sual loh chuan Rainer hi a mittui a tling nimai hian ka hria, engvanga he hla hian ti lungngai em em nge maw a nih le?

" Ms Samantha in maw? " ka han ti leh kher a, a lan dan kha chuan an in ngeih lo viau in ka hria.
"aw.... Samantha Walker" ka lam rawn hawi pahin za lo zet a nui suk a, Rainer rilru na hmel ka hmuh hian ka lo na ve ringawt.

"nu fel tak a ni dawn chu... " ka sawi tur hre lo chuan ka ti ta ringawt a.
"ni e... tlemin a chhungkua ngaihsak ve deuh se chuan... "

Hriat chhunzawm chakawm lek hian a tawpsan leh daih a, chhungkaw thil a nih avangin aman min hrilh tawp te a nih loh chuan ka zawt ngam bik lo. An chhungkaw chanchin hi hre vak lo mah ila Rainer awm dan aṭang hi chuan buaina thuk tak a nei tih a chiang reng.

" i sak chhunzawm leh thei angem? "

 Tunah ṭum erawh thu min pe lovin min ngen ve tak tak tawh. Chhang buai lovin min ngen ang chuan ka han sak chhunzawm leh a.

" soft the drowsy hours are creeping"

chil lem dak pahin ka han melh cho a,ngun takin min lo en reng a ni tih hre tho mah ila ka han hmuh meuh chuan ka mur nghal sung sung thei.

"hills and dale in slumber sleeping... "

" tunah hian fawh che ka chak takzet "

Ka mit ah tak en reng chung chuan min rawn pawt chat a, ka chhanna pawh nghak buai lovin lungchim tak hian min rawn fawp nghal vawng vawng a, Rainer a fawh hi chu a danglam bik takzet, duhtawk hun hi ka nei thei ngai lovang.

( chhiar chiah duhtawk mai lovin chhuar zawh veleh a hnuaia fakna khu hmet vek ang u aw )