My Drug is You-34 by Remruati Bawitlung(Haylor)

CHAPTER-34

"awle... a ṭha e " tih chuai raih pahin room ah ka lut nghala, kawngka ka kalh nghal vat bawk.
Hepa lak aṭang hian engtik ah mah ka duh ang chhanna ka dawng ngai lovang chuvang chuan alak aṭang hian ka inthiar fihlim vat tur ani. Reilo te chhung pawhin ka rilru a nem in ka danglam hman takzet mahse tun aṭang chuan chhel takin ka awm tlat tur ani, chu bakah ani tello pawh hian naute hi ṭha takin ka enkawl thei ani tih ka hmuhtir bawk ang.

Chhuatah ṭhu in khum mawng lam ngheng chuan ka inngaihtuah vung vung a,ka rilru na lutuk hi ka mittui a tling pam thei nia mawle, ṭap duh chiah si lovin ka in sut leh hraih ṭhin a, ka thinlung hi chhem te a vih nawk nawk ang maiin a na takzet. Mipa avangin hetiang hian ka la awm ngai loh avangin ka tuar na in ka thik takzet.

Light off thim vek mah ila light house aṭanga eng rawn phe zeuh zeuh chuan room chu a rawn kâp êng leh zeuh ṭhin a,tunah tak hian nu emaw ṭhian emaw ka lungngaihna te min ṭawmpui tu tur awm se ka ti takzet.
___________________________________________

Freddie an walk turin zingkarah min rawn kaihthawh luih tlat avang chuan phur lo zetin kan inzui chhuak ta nge nge a, mahse ka rin ai daihin dil bul vela han tlan chu alo nuam kher mai.Khua a thiang in sava hram ri nawk nawk te chu hetiang ang hian a mawi ang tih ka ring pha ngai lo.

"i mu ṭha lo mi... i va chau hmel ve " ni e, nizanah ka inngaihtuah nasa lutuk a ka mu mang reng reng hleinem.
"ka mu theilo a.. "
"tinge min hrilh mai loh? " tih pahin tui min rawn pe a, ka lo in nghal khawlh khawlh bawk.
Dil bula kan ṭhut hahchawlh lai chuan Freddie chuan ban pher meuh hian, " morning Asher " a tih takah chuan ka hawi let nghal vata ,ka rin ang ngeiin Asher chu Lily nen an lo walk dun leh tawh, men pual ralh pahin lehlam ka hawi nghal hmaka hmu ang pawhin ka awm duh lo.

"Lo hahchawl ve rawh u "Freddie an a tih chuan Asher chu ka piaha ṭhuthleng ah chuan a ṭhu nghal hnawk a, Lily pawh loh theih loh in min rawn melh ralh pah chuan a ṭhu ve nghala, a hmel aṭang sawn kan lak aṭanga kal bo vat vat duh hmel a pu.

"ka lo va tlan ange"an thawhpui dangte an rawn thlen sup sup bakah Asher leh Lily hmel ka hmuh peih loh avang chuan ka tho nulh a,a theih hram chuan hemi te pahnih hi pehhel hram hram ka duh.
"ding lawk teh " tih pahin Freddie chuan ka tlan tur chu min pawt let a, ka hma ah tak a khup lehlam ṭhingthi in ka pheikhawk hrui chu a rawn suih ṭha nghal mawlh mawlh a,en ngam chiah si lovin Asher chu ka zuk mitsir zeuh a, a thinrim hmel leh a tum hmel chu hmuh nuam lo tak ani, hepa hian min haw viau emawni le?

"ka lo hmu lo lawm"
"anih chuan kal ila.... Guys kan kal nghal mai ang "
"nangni pahnih hi in in date em ni? " an zinga pakhat in a rawn tih chuan Freddie chu alo phur ngang mai ,ka kawnga rawn dawm pah chuan, " maithei " alo ti let nghal vâr a, ka lo khi suk ringawt,a fiamthu ani tih kei chauh hian ka hria niin a lang a chhanchu midang hian an la thutak takzet.

Ka kal daih avang chuan ,"nakin ah kan inhmu leh dawn nia " tih lauh lauh pahin Freddie chuan min rawn umzui ve nghal vata, ani hi awmlo ta se tunah hian room ah keimah chauhin ka indawm kun reng ngei ang.
" an sawi kha i lo hria maw kan in date anih chu... "
"haha... engtin nge an awih thei zawk le? "

"Coco... "
" ummm... " ka tlan tlai chu min pawt ding a, ka mit ah tak chiang taka en pah chuan,"helai hmuna kan awm lai ngei hian chhuahdun ka duh"
"khawiah hian maw?"
"i la hre mai ang" a tih chuan ka lo bu nghat a, diktak chuan khaw te reuh te anih mai bakah han chhuah vak na tur a awm loh avangin ka nuih a za takzet mahse khawiah nge min hruai dawn tih erawh ka hre chak hle thung.

Freddie nen chaw ka dawh lai chuan, "khawi ka lo keng ang " tih pahin ka thleng chu min laksak nghal daih a, a kalpui nghal daih lehnghal.Kan awm ve nual avangin mi tlawmngai ten rawng min bawl sak mai ṭhin a chuvang chuan chaw kan ei ho vek zel.

" ka lo keng ang " ka tih pawhin a kal lui zela a tawpah Asher leh Lily te chaw eina dawhkan chu a va kil nghal chat ringawt.Diktak chuan midang pawh eipui lo in an pahnih te chauh in an lo ei ve em em a, thik viau mah ila va tihbuai hi nuam ka ti chiah lo, chutah Asher thinrim hmel hi ka hmu peih hlawl lo chuvang chuan tibuai lo ila a fuh zawk.

" a pawi em lo ang tiraw? "
" hahh... a ho lutuk " mawihnai takin Lily chuan alo ti nghal vata, a rilru takin sawi lo mahse Freddie lah chu a  ṭhu hmak anih chu!!
" tho rawh... hmun dangah ei ang " a hriat tawk lekin ka zuk ti sap a, ani lah chuan min lo la pawt  ṭhu ang deuh deuh a, phur lo zetin ka kil leh ta nge nge a.

Tumah inbe lo in kan kun ngur hlawm a, a tawp a tawpah Freddie chuan min rawn en pah hian,"Coco... tlangah khian kan trek dawn mi niang.. chawhnu kan awl bawka "
"naupai i nih kha hre reng rawh " ka chhan hma hma chuan Asher an min rawn chhan khalh kher anih chu!! amah lah chu hawi pawh rawn hawi chho lo in thil ei chung chuan a kun ngar a,a awmdan hi a ngeiawm takzet.

"ughh... trek te chu ka duh alawm " ngeiawm zetin ka lo tilui ve kher a, min rawn melh ralh ringawt.
" a  ṭhat chu.... Lily min rawn zawm ve duh angem? " Freddie an a tih chuan  Lily in Asher chu a han ngaichang deuh a,"helai hmunah hian nuam tawl turin kan kal lo " alo tih hmuk avang chuan Lily tan aw tina chi ani tawh lo.Engvanga hetianga awm hmuk hmuk nge maw anih le?
_____________________________________________

Free clinic mah nise veng hrang hrang ah pahnih emaw pathum te te in an insem darh zela, a chhanchu mipui te tan pan a awlsam zawk nan.Vanduai thlak takin Freddie nen kan awmdun lo mahse midang hmelhriat nei lo mahila Asher leh Lily bula ka awm loh chhung chuan ka lawm tho tho.
"Dr. Julian.....Masie nen hian kan awmna kan han in thlakthleng ange? " Freddie an a tih chuan kan en  ṭhap hlawm a, a lan dan chuan ka kalpui tur nen hian in awmthleng a dil niin a lang.

" Freddie buaina a awm em ni? "
" awmlo e.... Hmeichhe hlang dah ai chuan mipa pakhat hi awm tel ve se a  ṭha lo maw? "
"awle Maisie ,Freddie nen hian in awm thleng mai rawh u " Dr Julian an a tih takah chuan Freddie chu ka bulah a rawn kal nghal vata,a phur em avang chuan ka lo nuih ringawt.

" kal ila... " kan hmanraw mamawh ho khai pah chuan ka thil khai lai pawh chu min rawn laksak ve nghala,kan kalna tur hi motor pawn minute15 vel tlan an tih avangin Van awmna lam pan chuan Freddie nen kan inzui phei hnak hnak a, kan group a awm ve pakhat erawh Van ah a awm tawh aniang ka hmu miah lo.

"kan kalna tur aṭanga hla vak lo ah hian thil hmuh tir tur che ka nei a, kan zawh veleh kan kaltlang mai dawn nia "
"awle...mahse engthil nge?"
" Trekking mawle.... " hepa hi trekking chu a duh tak tak emawni le?  Min zawh lai khan Asher chu awmlo se ka hnial ang, mahse aw ka lo ti ve laklawh tawh bawk sia ka kal ngei chu a ngai dawn anih hi.
"a nuam viau ang " tih paha Van an hawng chiah chu Asher alo ṭhu run mai!! mak kan ti bawk aniang Freddie nen chuan mak tih hmel zetin kan en reng ringawt.

"mihring in hmu ngai lo mi?"
thum leh nelawm loh zeta a rawn tih takah chuan kan thil ken lai chu kan dah
ṭha nghal sawk sawk a, ka hriat dan kha chuan kan ruala rawn kal tur chu Dr.Cassie ani sia engvanga Asher hi heta awm nge maw anih le?

" lo ding teh u..." Dr. Cassie chu hmanhmawh takin a rawn tlan phei nghal hlawk hlawk a, kan bul a rawn thlen chuan, " ka bag ka theihnghilh a, in kal tawh emaw ka ti hman alawm " tih pahin Van seat a bag chu a la lawk a, kal leh daih a tum ta mai.

"Cassie.... kan ruala rawn kal tur ini lawm ni? " ka rilru a zawhna awm tak Freddie an a zawh chuan ka beng chu ka lo chi nghal hra a.
" nia... mahse damlo zâwn ngai leh tawhkhirh deuh hlek an awm thu an rawn report a.....Asher nen kan in thlak ta anih kha" tih pahin a tlan let leh nghal dawr dawr a,
 " chunu mai mai chu... " Freddie chu a phun nghal nang nang bawk.

Asher chu seat hnungah a ṭhut tlat avangin Freddie an a khalh dawn a,kei erawh heta thawk sa senior nurse a rawn kal tel dawn a,a hma a ṭhut nulh na chi anih loh avangin hrehtak chungin Asher bulah chuan ka va  ṭhu zal zal a, hmu lo ang maiin ka awm lui tlat bawk.

Inbiak chu sawi loh in en takngial pawh kan hreh bawk aniang mahni ṭhutna bula tukverh ve ve lam chu kan hawi tlat a, engvanga rawn kal ve kher kher nge maw anih le?  awm a ti nuamlo zo vek.

In entirna tur hmun kan thlen chuan hmanhmawh takin kan insiam fel nghal zung zung a,ka rin aiin hnathawk tute hian min ngaihsak daih mai, engkim an lo peihsa mai bakah min pui nasa takzet, an puihna zarah reilote hnuah kan ṭan nghal vat bawk.


★4 hours later★

Chun chawlh lawk kan nei chiah tih chuan "hetah hian ṭhu rawh " Freddie chuan chair dup ah chuan min pawt ṭhu a,darkar4 zet ka ṭhut tawh avangin leh ka hnungzang a na bawk nen ka lo hnial lo chiang kher mai bakah kan buai bawka tumah inbe hman pawh kan awmlo.

"i chau tawh em?"tih pahin ka dar chu a rawn massage nghal bawka, ka zia nghal huai in ka hria.
"nangmah zawk kha i chau em? damlo zawn ngai an tam ropui sia, keichu ka ṭhu ringawt a engtin mah ka awmlo "
"anih chuan min massage thei" fiamthu titak deuh hian a rawn ti a,nuih vur vur pahin a kut chu ka lo hmehsak ve mai bawka, an thawkrim bawka an chau ngawt ang.

"Doctor hetah i rawn kal lawk thei angem? " an rawn koh avang chuan hmanhnawh takin Freddie chu a tlan chhuak nghal dawr dawr a, ṭhut hahchawlhna hun em pawh a neih loh avangin ka enzui nghal vawng vawng bawk.

" kha... " dawhkanah Apple juice a rawn theh thlak avang chuan ka hawi chho nghal haw a,Asher hmel rûm lutuk ka han hmuh chuan ka hawilet rang ngei mai. Engtin nge hetiang hian a awm thut theih le?  damlo a enkawl lai kha chuan a ṭawngkam a  ṭha in a nui sang sia, khatiang ang khan min be thei thlawt lo emawni le?

"helai hi... a diklo, hetah hian ziak zawk rawh " ka bula rawn  ṭhut pah chuan ka ziah dik loh lai chu min hrilh nghal zung zung a, hnial lo in ka lo siam ṭha nghal zung zung bawk.
"juice hi in rawh... tui i in tlem lutuk " chhang lo in ka in ve mai bawka, ka bulah a  ṭhat tak thut avang hian ka ngaih a ti  ṭha lo zo vek.
"dark circle i nei ania... i mu ṭha lo em ni? " hahh.... amah vanga mu ṭha lo ka nih laiin chu chu min zawt amaw!!
"chu chu i tan a pawimawh viau mi?"
"pawimawh e... naute ṭhat leh that loh thu ka hriat hi a ṭul alawm"
"ngaihtuah suh a ṭha" thil ho te ah kan inti buai lehnghal ringawt tawh,mahse a tello pawhin ka ṭhat zia hriattir ka duh avangin hetiang hian ka awm angai.

"Coco... hei lunch, i chau em? " Briana chuan dawhkan ah eitur chu a rawn dah nghal zung zung a, engmah ti lo ber hi min duat ber nimaiin ka hria.
" aih... chau love ,ka rawn la thei reng alawm" Kan in hnial buai laiin a rawn lang hlauh chu a tihzia teh e.
"hahh... Freddie an a ngaihtuah deuh che niang rawn pe tur che in min tia ....chhuah miah suh mipa ṭha tak ani" Asher melh zeuh pah chuan ka han nui lui kher a,ka ngaihbel nge pawh ka hrelo a awmdan aṭang hian a thinrim riau in ka hria.

"in zawh veleh tihtur dang i nei em? "
" aw... Freddie nen kan chhuak dawn a...eng nge nita?"
" ughh....Freddie nen hian dinner kil pui turin sawm cheu ka duh a, mahse in la awm dawn chauh a chhuak zawk rawh u "

"Briana ...midang min pui tu tur an rawn thlen belh a,ilo va pui lawk thei angem? " Senior nurse kan kalpui khan a rawn tih chuan hmanhmawh takin an inzui chhuak nghal a, a chhuak chiah tih chuan Lily pawh a rawn lut hlawl mai, ka hmuh thut avang chuan phawk fe hian ka melh nghal kawk a,
" hello....bawih" ka hmuh lai ngaiin Asher chu a va fawp kher a,lehlam hawi pahin ka inhum ruh nghal tawn bawk diktak chuan an hlim dun lai hmuh hi na ka ti takzet ,ka thinlung hi pawh sawm vek ang maiin a na.

"hi!!  Lily " Vanneih thlak lutuk in Freddie a rawn lut hlauh, ka bula a rawn  ṭhut rual rual chuan "min lo hrethiam lawk rawh... " ka zun a chhuah mai bakah boruak rit lutuk aṭanga inthiar fihlim ka duh avangin ka tho nghal ṭuih ṭuih a, ka kawng ana ngei mai.
" i ṭha maw? " ka thawh  ṭhat thei loh avangin Asher chuan ka kut chu a rawn dawm nghal vata, ka lo thingthla rang ngei mai.

Ngeiawm zetin Freddie kut chu ka vuan lui kher a"khawiah nge i kal dawn? "tih pahin min lo pui nghal bawk, zun ka duh thu ka hrilh chuan ani pawhin hrethiam nghalin leh chhuah alo duh ve tho avangin kan inzui chhuak leh ta nge nge a,vawikhat pawh ka hawilet lo.

Nileng deuh thaw a Asher melh mang lova ka awm thei chu mak ka in ti zawk hial, bakah a theih hram chuan a hmuh theih loh ah hian awm ka duh mahse amah bawk hian beiseina diklo min pek leh ṭhin avang hian ka haw takzet, hetiang anga min ngaihsak reng te chuan engtin nge ka hlat theih ang, a tawpah keimah bawk ka na leh tho si.

Ka hmai phih sawk sawk pahin darthlalang ah chuan ka in en renga, theih chu nise ṭah hawm hawm hi ka chak ve tho mahse chak lo takin ka awm thei bawk si lo.
"naute... eng chen nge ka chelh theih dawn che, lo chhuak vat vat la i nu hi buaina thlen sak tawh suh " ka pum chul pah chuan ka han ti sap a, a ruk tak chuan ka lo paitlang kher kher hi ka inchhir takzet, hetiang ang natna hi min thlen dawn ani tih hre lawk ila chu ka lo ti tla daih tur ania.

"Coco... i  ṭap em ni? " Freddie chu hmeichhe washroom ah rawn lut in ka hnung lam aṭangin nghet tak hian min rawn kuah a,"i bulah ka awm reng ang, ka kalsan ngai lo ang che" ka beng bulah a rawn tih sap takah chuan ka mittui a rawn far fap ringawt.
He khawvel ah hian natna te, beidawnnate leh tawrhna te nilo in ngaihsaknate leh hmangaihnate hian ka hnuk an ti ulh leh ṭhin mi mak tak zawng ka ni.

"Naute hi ngatinge ka lo tihtlak mai loh...hetiang hian a na dawn ani tih hi hre daih tawh tur ka ni asin"
" shh.... chutiang sawi suh, engkim a  ṭha leh vek mai ang " tih pahin ka hmuiah chuan a rawn fawp nghal vawng vawng a,"tuma hmuh theih loh turin kan chhuak daih dawn mi? " ka mittui hruk pah chuan min rawn nuih suk a," Asher tello pawhin i hlim thei ani tih ka hriattir ang che " tih pahin min kai chhuak nghal dawr dawr bawk .