My Drug is You-29 by Remruati Bawitlung(Haylor)

CHAPTER-29

Motto- Dream Bigger

Coco hmuh loh hram hram ka duh avangin room ah ka inkalh khum tlata, dinner ei hun tawh ah pawh ka rilru lak pen nan tiin headphone ka vuah tlata, lehkhabu chhiar pahin hla ring zetin ka ngaithla bawk.
A khat tawkin balcony ah ka va teikual leh rih ṭhin a, hetiang ringawt hi chuan a ṭha dawnlo tlat, in dang ka luah ngei angai dawn anih hi.

Chutia Coco pawh theihnghilh lek lek khawpa lehkha ka lo zir lai chuan kawngka an rawn kik ta tlat mai, ka nu anih ringin ka va hawn nghal vata mahse ka rin loh deuh maia Coco ka hmuh thut avang chuan mak tih hmel zetin ka en nghal kawk ringawt.
" hei eitur... i nu in pe tur che in min tia " pehhel tum nak alaiin ka room ah ala rawn lut ang deuh deuh a.
"kal tawh rawh " tih pahin tray chu ka chawi a,chhuah a tum loh hmel kher mai.

"inbual ka ngai alawm... "
"bathroom dang hmang mai rawh "
" mahse thawmhnaw leh ka inhnawih tur ho zawng zawng hetah a awm vek alawm" a flop em avang chuan ka han thaw chhuak halh a, "hmanhmawh ang che " tih sup pahin chair ah chuan ka ṭhu leh ta ringawt a, henu hi chuan min tibuai reng mai dawn anih hi.

Coco chhuah hun nghah pahin Lily nen balcony ah chuan kan lo inbia a, couch a thatchhe zet a ka lo ṭhut ar ar a lai chuan au ri ka hre ta thut mai!!  ka phone dah pahin rang zetin ka tlan lut nghal vata bathroom kawngkhar chu ka chum nghal dawt dawt bawk.
" Coco... i ṭha em? " min chhan loh avang chuan a aia nasa in ka han chum leh a, ka mangang hman takzet.
" hawng rawh.... kawngka hi hawng rawh "
" ngawirawh... " a aw ka hriat rual rual chuan ka thaw nghal huai mai mahse a rawn la hawn lawk loh avang chuan kal mai ka tum chuang lo.

"i ṭha maw? "
" aw... " a tawp a tawpah a rawn hawng rak a, chhuat a thisen kawi niai hruk fai tuma a kun kat kat lai ka zuk hmuh chuan ," engthil nge i tih? " vin zet hian ka ti nghal hluk a,ka thinrim bawk si ka mangang bawk nen ka pawt tho nghal lawp ringawt.

" blade ka rap palh a..." bai nghal aih aih a,a kal ṭhat theih loh avang chuan ka pawm kang nghal lawp a khumah ka ṭhut tir nghal bawk.
"ngatinge i fimkhur theih miah loh le? " first kit box chu la in a pûn loh nan a pem chu ka tifai nghal sawk sawk a,ka thinrim ani tih a hria pawh ani mahna zawi sap hian, " ka tih palh " a rawn ti a,"fimkhur tawh rawh " tih ringawt in ka lo chhang thung.

Damdawi ka hnawih lai te leh ka tuam lai te chuan a ke vung deuh lang te chu ka hmuh hmaih hauh loh mahse hetiang lehzel hi chu hmuh loh der hram hram ka duh, a hlat thei ang berah ka awm tur ani tiin ka inhrilh nghal mawlh mawlh bawk.

"Inthlak la... mu rawh, a tlai tawh"tih pahin bathroom ah chuan ka lut leh a, thisen leh chhuata a sam zai tla niai te chu ka tifai a,Joel takngial pawh ka bathroom ka hman tir phal loh laiin Coco ve thung chuan duhtawk in a ti hnawk ania mahse ka haw chuang lo, hei tak hi a makna lai chu ani.

Bathroom aṭanga ka chhuah chuan thei leh thei lo hian jeans kekawr tight zet chu inthawlh luih tumin alo bei meka, amah a thau tawh mai bakah a dul a len tawh avangin chuti mai chuan a thawlh lut hauh lo ang.Khawiah emaw chuah a tum tih hre tho mah ila a nunah in rawlh zui vak ka tum lo, a rúk tak chuan a kal na tur hre chak hle mah ila zawt lo in ngawi rengin ka lehkhabu leh phone chu la in room aṭang chuan chhuah mai ka tum ta zawka mahse min rawn ko leh hman hram.
"umm... ughh... ummm" a sawi chhuah theih mai loh avang chuan ka lo nghak ran a, a lan dan chuan a thil sawi hreh deuh min hrilh dawn niin a lang.

" pawisa hman lawk tur min pe thei angem? "

"maw!! " chu te chauh chu maw, a lan dan chuan thil danglam tak min hrilh tum hmel a pu.
" ughh.... hna ka hmu a,kal a hun tawh bawk nen gas leina tur ka nei lo a "
Hna a!!!  tun angah hna a thawk ang maw!!  chawl hahdam tur ani zawk asin mahse engvangin nge ka dan ve ringawt ang, a duh ang ang chu a ti thei alawm.Ngawi rengin $30 chu ka pe a,pek tam pawh ka tumlo rawn haw vat se ka duh ber, a jacket hak pahin min rawn nuih suk a, a bai chhuak nghal aih aih bawk.
" sawtiang sawn hna thawh a tum ania? " nuih let suk pahin ka enliam vang vang ringawt,mahse a ruk tak chuan ka ngaihtuah hle thung.

Lily ka hriat chhuah leh hnuhnawh avang chuan inthiamlo zetin ka call leh ta ringawt a,Coco a rawn awm hnu hian min rawn call ngun in ka thil tih apiang hriat zel a duh ṭhin a, tunah ngat phei hi chuan engmah a ti ngai lo emaw tih tur khawpin min rawn be ngun zual. Coco nen engtin emaw kan awm a hlau ni ber in ka hria mahse ka thiamlo lo a chhanchu hmuh theih khawpa ka danglam thu min hrilh miau alawm.

Dar10 a rik meuh chuan ka sana ka melh leh chhen tawh mai, Lehkha han zir chhunzawm ve teh mah ila ka rilru a nuam leh thei tawh lo.
" ava rei em em ve "
Inhnuai ah chhuk in guest room chu ka zuk en dak dak a, ka rin ang ngeiin alo la haw lo.

Chair a ṭhut pah chuan tui ka han lem khawlh khawlh a,ka room a chhoh leh ka chu tum tawh hauh lo. Eng hna tehhrep nge maw a thawh le, hetiang chen chen thawh a ngaih ni.
A awmna ka hriat loh bakah a chanchin engmah ka hriat zui lohna tak chuan min ti bual zual takzet.

Call in awmzia a neih loh avangin a tawp a tawpah ka jacket chu ha in zawng tur chuan ka chhuak ta ringawt a, khawi berah nge a thawh tih hre lo mah ila waitress vel bak a thawh ka ringlo a chhanchu hna dang chu nise zanah a thawk lo tawp ang.

Restaurant inhawng ka hmuh apiangah ka zawt zela,London khawpui a han zawn ngawt chu thil hautak tak ani mahse ka ngaih tih ṭhat nan tal ka zawn chhunzawm zel tho.
"lo kaltir lo tawp tur ka ni asin " a fimkhur lo in a che pawlawh si a buaina alo tawh leh mawlh ka hlau,chubakah ṭanpui ala duhlo khanglang zui anga.

Darkar khat zet ka zawn hnu chuan ka hmu dawn lo ani tih ka hriat avangin beidawng takin ka haw ta ringawt a, hna thawk tura kal mah nise ka thin a ti rim in min ti hlauthawng takzet.
Chutia in lam pana ka tlan haw vang vang lai chuan Coco ni awm tak ka hmuh thut avangin restaurant kawtah chuan car chu ka ti ding nghal tuarh a,pawn aṭang in hmu mah ila Coco ngei ani tih hai rual ani lo mahse amah chauhin ani hauh lo Freddie pawh a awm ve.
An nui dun lai te leh inngeih taka an ṭhu dun lai chu ngun takin ka thlir renga ka hriat loh laiin car steering chu ka lo hum nghet hman hle.

A ṭhat mai bakah buaina a tawk lo ani tih ka hre tawh bawka han koh buai kher ngaiin ka hrelo chubakah kei hi min mamawh lo chuvang chuan keipawhin ka ngaihsak buai kher ngaiin ka hrelo.

In ka thlen hnu ah pawh chhuk ta mai lo chuan ka inngaihtuah vung vung a, Coco awmdan hian ka thin a ti rim in ka hrethiam lo takzet Freddie lo pawh bialpa dang a nei tho si a eng tiang chiah a awm tum nge maw anih le?  chu ai maha ka thin ti rim zualtu chu hna thawk angin a in sawi a mahse Freddie nen an lo chhuak ru reng si a.

Ka room ah lut leh in khumah chuan ka han ṭhu leh vang vang phawt a ,ka awmdan hi a mak takzet Coco in min mamawh lo ani tih ka hriat hian hlim tur ka nih laiin ka awm a ti nuam lo zawk.A nih loh vek pawhin Freddie hi ka thik tihna em ni?!! engvangin nge hetiang hian ka awm tak mai kei hian ka ṭhianpa ,ka ṭhian ṭha ber hi ka thik amaw!!! 
nilo... nilo...  Ka ṭhian ṭha ber tan hian hetiang ang hmeichhia hi ka duhpui lo mai zawk ani,chu chu ka rilru put hmang diktak ani.

Ka chhuah hma in lukham chu ka lukham leisak chuan ka thlak sak a, a bak erawh a hmuh theih turin khumah ka dah lang thung.
"in enkawl ṭha ang che " tih sap pahin guest room lam panin ka chhukthla nghal vang vang a, tun bak hi chu a ṭul te ah lo chuan ngaihsak ka tum tawh lo, Freddie chauh lo pawh amah ngaihsak tu a neih ṭeuh avangin lo in rawlh buai ve chhen ka tum tawh lo.

Khuma mut pahin guitar chu zawi te te hian ka perh mai mai a, kawngka ri khap ri ka hriat hma loh chuan ka mu thei lo, ka ngaihsak tawh dawn lo ani tih inhrilh nawn fo mah ila sana chu ka lo han melh leh zuk ṭhin a, mutthilh han tum ve teh mah ila ka harh tulh tulh mai hian ka hria.
Rei fe thil eng eng emaw ti a ka awmkual ka awmkual hnu chuan kawngka in hawng rak ri ka hre ta mai, room kawngka chu hawn ka han tum zet nain hawng ta lo chuan ka kalh ta zawka, mak tak maiin ka hahdam nghal huai bawk.

Azora
D-58 Millinnium 
Third floor 
ah khian hmeichhe kawr design mawi leh nalh tak tak a awm a, mahni duh angin a thui tir nghal theih bawk....

Ps -in han kal anih chuan Remruati Haylor story atangin kan lo hmu in han ti kher dawn nia... 😂😂😂 Xoxo