My Drug is You-27 by Remruati Bawitlung (Haylor)

CHAPTER-27

Motto: Dream bigger

Ka rin loh deuh in Lily chuan a thik hran lo,Lily hi hmeichhe fel leh rilru zau tak anih avangin Coco dinhmun pawh a hrethiam hle a, engmah a sawisel lem lo.

Coco bike kan lak chhuah hnu chuan a khalh haw angaih dawn avangin kan bulah a rawn chuang ve thei tawh lo.
"i khalh haw thei tak tak ang maw?"
"aw... in tlai dawn kal vat vat rawh u... " a tih chuan car a ṭhu mek Lily chu ka va melh zeuh a,ngun takin min lo thlir kar bawk.
"ok....i thlen hunah min lo hrilh dawn nia " ka tih chuan buk nghat pahin bike ah chuan a chuang a, helmet khum ṭhat pahin a khalh chhuak nghal vat bawk.

Keipawh chu car ah ka lut ve nghal vata,car chu ka ti nung nghal hlat hlat bawk.
"Asher....i ṭha maw? "
"aw... " ka lo ti chuai raih a.
"ka fiamthu lo ania... henu lakah hian feeling i nei ani tiraw...? " inhnial buai ka duh loh avangin chhang lo chuan thawk ka han la kawk a,hma lam ka melh ngur ngur ringawt.
"min chhang rawh....ngatinge hetiang hian i awm? henu hi i duh tiraw?" min tûr nasat bakah a awki a sân tawh em avangin kei pawhin vin deuh hlar hian, "ka hrelo... ka hre bik lo "ka lo ti nghal vata, mak tih hmel takin min rawn en nghal kawk bawk.

"henu laka ka rilru put hmang hi ka hre tawh bik lo...harsatna a tawh hi ka duh bawk hek lo " dawt sawi ka duh loh avangin tlang takin ka hrilh nghal mai a, mahse ka chhan dan avang chuan a mittui a rawn far ta fap fap mai.
"i duhlo ani tih pawh i sawi thei tawh lo amaw!!" nuih luih suk pahin a han insut hraih a,
"i ngaih ang kha ani lo"
"eng nge ni chuang anga..." tih pahin kawngka a hawng sawk sawk a car aṭangin a tlan chhuak ta mai, rang lutuk in ka um zui ve nghal vat bawk.

Garage chhawng sang lutuk aṭanga zuan thlak a tum avang chuan pawh let sawk pahin "i â ta em ni? "ka ti vin nghal tuarh a,a tal chhuah theih loh nan nghet takin ka kuah bet nghal tlat bawk.

"min thlah rawh...thih ka duh zawk, min kalsan dawn ai chuan thih ka duh zawk "

Ka awmah Lily chu a ṭap chhuak nghal hawm hawm a,nghet taka lo kuah mai loh chu tih tur pawh ka hrelo, mi tlaw tak ka ni.
"Asher.... a tawk tawh em em, khawngaihin min tih nat belh tawh suh " ka inthiam lo in sawitur ka hrelo takzet,engvanga hetianga awm ta mai nge maw ka nih le? ka thiamloh vek ani, engkim hi keimah vanga thleng vek ani.

"min kalsan lo ang tiraw...? mawh engtikah mah min kalsan dawn loh thu min hrilh rawh "
"ka thiamloh ani "ka ti sap ringawt, diktaka sawi chuan engthil chiah hi nge ka rilru a awm pawh hi ka hrethiam tawh lo engkim mai chu sawi chhuah a harsa vel vek tawh .
" mawh... min kalsan lo ang tiraw...? "
" umm.... " tih pahin ka lo bu nghat a, nghet takin ka kuah nghal vawng vawng bawk.

Lily chu car ah ka hruai let leh nghal vata, damdawiin lam pana ka khalh lai pawh chuan ka kut lehlam chu nghet takin a hum tlata, ka darah thlamuang takin a bei hle hle bawk, kei erawh thil tamtak ngaihtuah tur ka neih avangin hma lam chu ka melh ngur ngur a,ka rilru hi a buai takzet, enghi nge dik anga enghi nge diklo ang tih pawh ka thliar hrang thei tawh lo.
"engkim ah ka pui vek ang che....mahse kan inkar erawh tih chhiat ka duh lo engti kawng zawng mahin ka kalsan ngai lo ang che" Lily chuan a rawn ti sap a,a lu ah ka lo fawp zeuh bawk.

Damdawiin kan thlen pawh chuan min la kai tlat tho a, dan pawh ka tum lem lo a chhanchu ka awmdan hi dik ka inti bik lo, bialnu nghet nei lai ka ni a hetiang thil ka thlen tir hi ka thiamlo hul hual ani mahse ka rilru put hmang hi ka control theih ani miau si lo alawm lê... mahse siamṭhat nan hun ka la nei.

"Babe... in i luah mai thei lo em ni, anih loh pawhin ka in luah ah rawn in sawn lut mai la "
"tunah chuan ka pa in a phal ka ring lo a chhanchu... " ka tawp nghal chawt a, "Coco vang tiraw? "min rawn sawi zawh sak takah chuan ka bu nghat ringawt.
" engtik ni ah emaw family dinner nei leh ila... kan chhungte hnenah kan inkar ala ngheh zia hi kan hriattir a ṭha in ka hria "
A nihna takah chuan Lily chhungte hi ka hmu hreh tawh takzet, min ngaihdan tur ah ka buai lo mahse an chunga ka thil tih mualpho thlak tak avang hian an inah pawh ka la kal leh miah lo.
__________________________________________

Coco pa ka tlawh zawh hnu chuan chief in min koh avangin a office ah ka kal nghal vata, thil ṭul tawpkhawk ah lo chuan min koh ngai loh avangin ka zam ru hle bawk.
"Chief... eng nge ni ta?"
"Chilham aṭanga hla lo te ah free clinic karkhat chhung huaihawt ani dawn a,chutah chuan internship ti lai mek te bakah Dr.Julian leh Dr.Min Min-i ten an kaihruai bawk ang cheu , chuan heihi kal turte list ania lo in puah chah lawk ula ka duh ani "
"awle ka hrethiam e... " file lak pahin chhuah leh mai ka han tuma mahse min rawn ro leh avang chuan ka hawi let nghal vata bawk.

"Asher... "
"tunlai hi complain i dawng nasa riau mai a, hei ai hian insawr bing leh la ka duh ani..."
"awle....ka theihtawp ka chhuah ang "
"i mimal nun leh i zirlai hi dah kawp lo la, ka lo thlithlai reng ang che... heihi in chief ang nilo in i pa ṭhianpa ka nih angin ka hrilh che anih chu"
" ka lawm e... Dr. Phill" tih pahin ka chhuak nghal a.
Dr. Phill hi ka pa ṭhianṭha ber anih mai bakah ringtu ṭha tak ani a, kohhran thunun lai ka ni tih pawh a hre vek ani.

"hello...Mr.Edward... " Maria hlim hmel ka hmuh chuan kuah pahin a biangah chuan ka han fawp zeuh a, ka rilru hah lai taka ka hmu chu ka lawm teh e, ani hi Senior nurse anih mai bakah kan innel em em a, ka nu te ang rual vel ni tawh mahse ka ṭhian ṭha tak ani a, Coco pawh alo enkawl tawh avangin a hre hle bawk.
"kan inhmu khat hle mai "
" pa i ni tawh dawn bawka hun awl pawh i nei thei tawh lo "min rawn fiam avang chuan ka lo khi suk a,ka dâng nghal der Coco chungchang an sawi tawh hi chuan chhan dan tur hi ka hre ngai lo .

"i fate eng nge an ân?"
"an ṭha ....fate enkawl hi alo har anih hi, beidawn chang ka nei fo " a fapa upa ber hi drug addict anih avangin a rilru a hah ve thei hle a,chutah pasal sun tawh alo ni bawk nen ka kiangah hian a inbun ruak mai zel, a hnen aṭang hian chhel te,keimah chiah tuar tu bik ka nih loh zia te leh thil tamtak ka zir nasa hle bawk.

"umm....kan thu ani miau si lo alawm le"
"ni e... Coco a dam ṭha maw? "
"aw... "
"Asher engthil nge thleng?  chuan Lily engtin nge a awm tak? " ka rilru a hah ani tih chu alo hmuh hmaih lo chiang kher mai, bakah Maria chauh hi ani lo  Lily nen a kan inkar hre tawh phawt hi chuan sawn ka thlak ani tih hi an hre vek anga,chutah zawhna maksak tak tak min zawt reng bawk ang.

" kan inkar chu a ṭha ...mahse Coco hi ka kalsan vat loh chuan thil ṭha lo zawk a thlen ka hlau ani "
"chuan engtin nge naute hi... "
" ka hre tawh bik lo "
"min rawn zui rawh " tih hmuk pahin Maria chu a kal nghal nal nal a, ka zui ve nghal vat bawk.