My Drug is You-24 by Remruati Bawitlung (Haylor)

CHAPTER-24

"engmaw?"
"i mutpui lo tiraw? "
"Asher....engmi ah nge maw min ngaih le? " a tih takah chuan an la mu dun lo tih ka chiang, mu dun se chuan Freddie hian a zep hauh lo ang.
"kal tawh rawh...." tih sap pahin ka duty na department lam pan chuan ka kal lehnghal nal nal a, ka thawveng nghal huai bawk.

Corridor a ka kal phei lai chuan Conor chu ka lam panin a rawn kal ve mek bawka loh theih loh a ka kal pelh angaih avangin inring tawk hmel takin ka kal phei a,ka rin lawk ang ngeiin min kal pelh pah hian, "sawn i thlak tih ka lo hria a,ka tawrhpui takzet che " a rawn ti lehkher bawk.
"chutiang mai mai buaipui chuan ani maw i rawn tlai" min deuhsawh zawng hian han ṭawng ve ṭhin mah se a tawpah amah tho hi a thinrim leh tho zel, bakah Conor awmdan vel hi chu ngaiah ka nei tawh.

"anih chuan Lily tan ava han na dawn em? "
"hahh...buaina engmah kan nei lo, i lawm tawh em? "ka hmanhmawh deuh bawk nen khik suk pahin ka kalsan ta ringawt a.

Conor hi chuan min itsik ti ila ka sawi sual lo ang, exam a min phak theih loh chu sawi loh thawmhnaw, pheikhawk leh thil dang engpawh ka neih ang chu neih ve zel a duh mai bakah ka thil duh ang hi chu a neih theih nan chuan engpawh a ti duh ang. Tunah pawh hian thawmhnaw inang kan nei nual mai mahse engah mah ka ngâi ngai lo Lily alo tih buai hma kha chu.Lily nen kan inngaihzawng tirh vel khan min chuhsak tumin alo bei hrep tawh ṭhin a,tun thleng pawh hian a lo la be zeuh zeuh ṭhin, mahse a neih theih loh vang pawh ani mahna tun thleng hian ka chhiatna lai sawi tur a zawn ruai reng ni.

Ka patient te ka tlawh kual zawh hnu chuan paper tih fel tur neuh neuh a awm avangin leh ka duty hun a tawp hma ngei a zawh vek ka duh avangin ka ti nghal sawk sawk a,vawin chu hma taka zawh a Coco police station a kalpui ka duh ani.

"i va hmanhmawh ve... " Lily pawh a paper ziah fel tur nen chuan ka bulah a rawn ṭhu ve nghal thak a, tumah an awmlo bawka ka hmuiah a rawn fawp zeuh bawk.
"i chau em? "
"ka patient pakhat saw ka rilru ah a awm reng mai, kum naupang te in cancer a vei a ka lainat takzet... "
"natna hian kum a thliar si lo alawm lê... "
"hei....vawin ah i material duh kha ka rawn la a,ka hmu thei i ti em?" 
"ka lawm e... " ka thil tih lai ka chhunzawm lehnghal mawlh mawlh avangin ka rucksack ah chuan min khungsak ta ringawt a,"heihi eng nge? " tih pahin ka damdawi hawn tur ka pack ho chu a rawn khaichhuak nghal va va bawk.

"iron leh vitamin maw?" 

Coco ta tur ani tih a hriat avangin a ṭawng tawp nghal chawt a,ngawi rengin a dahlut leh nghal hmak bawk.
A ṭawng duh tak miah loh avang chuan ka inthiamlo chuan,"i ril a ṭam em? " ka ti ta ringawt a.

"Asher heng zawng zawng hi i tih sak kher angai hleinem amah pawhin a in lei ve thei reng alawm... "
"henu hian engmah a hrelo... ka tihsak zel loh chuan engmah ei a tum hleinem"
"bialpa pawh a nei ve renga...an tihsak thei reng alawm... "
" Lily..." vin deuh tak hian ka han ti hluk a.
"henu hi engvangin nge i buaipui bik em em.... heng thil lehzel te hi chu i buaipui kher angai hleinem.... " tih pahin a tlanchhuak nghal nal nal a,mahse umzui ngaiin ka hrelo.
"hreptak chuan... " tih pahin ka pen ken lai chu ka paih nghal pawp a, ka lu dawm pahin ka ṭhu kun lap bawk.
______________________________________________

Duty zawh ah Lily chu rei deuh tak ka nghah hnu chuan call a lak theih loh mai bakah a rawn thlen thlak theih tak reng reng loh avangin ka han en leh ta ringawt a,register ah chuan a haw tawh ani tih a lo inchhinchhiah kalh tawh avang chuan phur lo zetin keimah chauhin ka haw ta ringawt a.

Ni e... Lily thinrim chhan pawh kha ka hriatthiampui lutuk mahse Coco hi buaipui loh theih pawh ani lo, damdawi ei chu sawi loh engthil mah a hriat loh avangin engkim hi ka tihsak vek angai.

Hmanhmawh hle mah ila kawng sira dawr chu ka tlanpel thei tlat lo, ka car chu hung ṭha in ka lut ta nge nge a, helai hmunah hian thei leh thlai tharlam tak tak a zuar a, a thianghlim in a hrisel bik bawk.
Ngawi rengin Coco ei chak tur anga ka rin apiang grape, apple, kiwi, Pomelo, dawnfawh leh strawberry te chu ka khai bawr ṭun a, chutah ka hmaih theih loh dark chocolate pawh ka lei sak nghal bawk.
A ei chak zawng pawh ka hre lo a ,a ei chak lah ka zawt duh bik hauh si lo, chuvang chuan tihian lei ṭeuh ila a duh zawng chu a ei ve tawh mai ang chu.

Traffic signal avang chuan kan ding tlar ṭhap hlawm a, seat hnung nghen ar ar paha mipui kawng kân lai ka lo thlir reng lai chuan Coco ka va hmu ta thut mai!!  mipa pakhatin car chhunga a nawr lut dawr dawr lai ka va hmuh chuan ka sa nghal phat mai a chhanchu mipa saw Freddie a ni tlat lo, a awmzia chu midang alo kawp leh hman tawh tihna ani.
Inhum ruh ṭun chungin signal hring ka hmuh rual rual chuan ka tlan chhuak nghal vata, Coco te car pawh ka tlanpel nghal fua mai.
 
Henu hian eng tehhrep nge maw a hriata mipa tel lo hian a awm theih miah lo le? nau a neih hma tal te chu insum ve tur ani asin.
"damnit.... " steering chu ka han beng nghal pawp a, henu hi Freddie tan hian engtikah mah a ṭha tawk ngai lovang.

Dr. Jane in min rawn call avang chuan phur lo hle mah ila ka lak ngei ngei angai.
"Mr. Edward.... file kha naktuk ah  thehluh a ngai thut dawn a, i ti zo hman angem? "
"awle... zanin ah ka lo peihfel vek ang "
" a ṭhat hlauh chu... "

File thehluh tur ber ka hawn loh avang chuan phone ka dah rual rual in damdawiin lam panin ka in turn nghal pawp a,diktak chuan ni hnih ka la neih avangin ka hawn duh lo kha ani a mahse zanin ah ka tih zawh vek angaih dawn avangin ka lak ngei ngei angai.

Shelf a ka file dah chu la in hmanhmawh takin ka chhuak lehnghal nal nal a, mahse damdawiin aṭanga ka chhuak tur chiah chu damlo pakhat an rawn nawr lut ka hmuh chuan ka meng phawk nghal kawk ringawt, a chhanchu Coco in a rawn kalpui tel tlat.Thisen a chhuah nasat mai bakah an mangang em avangin ka va buaipui ve nghal vata, Coco pawh chuan min hmuh chuan mak a tih hmel hle.
"i kut kha dah sawn rawh... " tih pahin a lu a thi rawn put puana a hupna chu ka zuk hup sak nghal vata, lehlamah thisen an lo pe mek bawk.

Nurse ho in room a an nawr luh takah chuan luh ve an phal loh avangin room pawnah chuan kan nghak ran a, Coco ai mah chuan a bula mipa pakhat rawn kal tel ve hi a hlauhthawn hmel zawk.
"rawn kal teh " tih pahin Coco chu bathroom lam panin ka kai nghal dawr dawr a, a la hlauthawng ve bawk aniang ṭang pawh a tum eih lo.
"engthil nge thleng?" tih pahin a kut chu ka sil sak nghal mawlh mawlh a, a kawr ah lah thisen a kai hnuang lehnghal tihfai vek sen pawh ani lo.
" Logan kha a ṭha angem? " a tawp a tawp ah a rawn ṭawng chhuak ve ta, mahse a aw te chu a khur nasa in ka hriat ṭhin Coco kha ani ta hauh lo, a mittui chu a rawn far nghal zung zung a chutah zet zawng ka kuah lo thei ta lo.