My Drug is You-21 by Remruati Bawitlung (Haylor)

CHAPTER-21

Hawi kual hruk hruk pahin ka jacket chu ka han hnim vat vat a, thlak a ngai tawh takzet ani tih chu hrilh chawp ka ngai lo mahse thawmhnaw pakhatmah ka keng bawk si lova engtin nge ka tih tak ang?
"naktuk ah thawmhnaw tlema zawng lak tur a nih hi " tih sup paha Asher closet ka va hmuh chuan ka khi nghal suk ringawt.
Ngawi rengin closet kawngkhar chu ka han pawt vak a, alo inkalh lo hlauh.
"ka tihpalh... " nuih ver ver pahin a chung bera t-shirt dum chu ka la chhuak nghal vata, thawm dim thei ang berin ka khar nghal ṭhem ṭhem a, bathroom lam ka pan nghal chat bawk.

Ka inbual zawh chuan darthlalang hma ah dingin pajama chu ka han ha chhin vela, hetiang thil hi ka hak ngai loh avang leh ka inhmeh lo em avangin ka nuih a ti za ru hle.
"hak a nawm hi le " in thlek kual vel pahin Asher t-shirt chu ka han ha a, hmeichhe hleitling tak ni mah ila ka mal chanve chu a khuh thla hlup mai.
"pawi loh hi... " tih sup pahin ka thawmhnaw bal chu Asher thawmhnaw bal dahna zingah chuan ka dah ve thlap, a coat var (doctor coat)  suktur zinga a dah chu ka hmuh chuan la chhuak in ka han khai parh a,lian hle mahse mipa hleitling tak ft 6'3'' bawr vel leh pian nalh tak ina a ha lai vel ka han mitthla tak tak chuan lawm loh in ka lo nui leh vur vur ṭhin.
__________________________________________

Bathroom kawngka inhawng ri deuh rak ka hriat chuan ka harh nghal kawk a, ka han ṭhut chhuah nak chuan Asher chu kekawr tlawn dum chauh ha in bathroom aṭang chuan a rawn chhuak ta tung tung mai,Lalpa leh!! nizan ah khan kawngka ka kalh lo tak.Min rawn hmuh rual rual chuan a sam a hruk hulna towel chuan min rawn vawm phei nghal pawp a,
"engthil nge maw i tih le? " ka lo ti vin nghal hlar bawk.
"bengchheng suh "
"anih chuan i kawr ha vat rawh "ka ti ta ringawt a, diktak chuan a abs te leh a ban a tawk chiaha sêk te chuan khawi dang mah min hawitir thei lo,chumai bakah khami zana thil thleng kha min hriatchhuah tir zawk mai a chhanchu a hmel chu thuhran nise a pian nalh tak mai hian min hip hmasa ber tlat!

"i vawikhat hmuhna pawh anih loh kha " tih pahin t-shirt var plain chu a han ha a, mahse a tum loh deuha sawi anih vang pawh ani mahna a thil tih lai chu a tawp chawt a, a sam tuai nawk nawk pahin pheikhawk var a inchei dan nen a inmil zet chu ngawi rengin a bun nghal mawlh mawlh bawk.
"khawiah nge i kal dawn?"
"damdawiin ah " tih pahin a thil mamawh tur ho chu rucksack ah a khung nghal sawk a mahse a chhuah hma in ka ko ding hman.
"tun ang hun zing lutuk hian maw.... "
"emergency a awm a " ka rin ai daihin min chhang ṭha phian.

A phone en pahin hmanhmawh takin a chhuak nghal hlawk hlawk a, enzui tuma tukverh ka zuk dah thlak nak chuan Lily in alo nghak reng tawh chu niin, ka nui tawp chiang kher mai. Asher car a an luh lai te leh an tlan chhuah hnu thleng pawh chuan ka thlir zui renga, ka awm hmun ah ka lo inhum ruh ve em em ringawt.
Engvanga Lily hi haw tlat nge maw ka nih le?  ka pawi a sawi tawp si lova, mahse Asher hmeichhe hmangaih anih vang pawh ani mahna a ruk chuan vannei ka ti in ka thik takzet. Ni e... Asher nen hian an inhmeh zia chu chhangthawp leh butter ang vel an ni.An engkim an tuina thlengin a inmil vel veka chuta kara keia hmeichhe hmuhsitawm lutuk hian lo thik ngam ve reng reng nge maw ka nih le?

Beidawng ru tak siin ka phone chu ka zuk melh zeuh a, Freddie message ka hmuh takah chuan ka han hawng nghal vata,ka tan chuan thil thar anih mai bakah min en hrang ve lo tu anih avangin nuam ka ti phian mai. Ka sawi tawh kha mipa in ka taksa chauh nilo ,ṭhian ang leh pangngai taka min biak na hmasa ber anih vang aniang ka zam takzet.
Ka kawng leh ka hnungzang kham lutuk hmeh nawk nawk pah chuan ka tho ṭuih ṭuih a ka ril a lo ṭam ve bawk nen hreh tak chungin inhnuai ah ka chhukthla ta nge nge a midang awmlo se ka ti takzet.

Ka duh dan ang ngeiin kitchen ah chuan tumah an lo awm lova,ka tih hmasak ber tur chu ka hai lo chiang kher mai. A ruk thei ang berin fridge chu ka han hawng rak a, ka hmuh hmasak ber cheese cake lak ka tum lai tak chuan hnung lam aṭangin ,"i va tho hma ve " an rawn tih thut avang chuan phut zawk pahin ka hawilet nghal vata, ka rin loh deuh in Rachael alo ni a.
"pawi ka ti lutuk... ti hlauh che ka tum miah lo ania "
" a... a pawilo... " ka ti chuai raih ringawt.
"i duh duh kha i ei thei ania... inthlahrung miah lovin " a tih chuan za lo zetin ka khi nghal suk a,a nelawm loh hmel tehreng nen a fel zek mai.

"Juice? "
"awle... " tih pahin chair ah chuan ka ṭhu a, Rachael pawh ka ep chiahah a ṭhu ve nghal bawk.
" hrehawm i ti em?"
"engchu maw? "
"heta awm hi... " hmelhriat ngai loh bula awm hi tuin nge hrehawm lo ti ang,mahse chhang lo in ka ngawi ta reng zawka, min hriatthiam hmel zetin a bu zui nghat bawk.
"breakfast atan eng nge kan ei ang?"
"ka hrelo.... "
"kan eichhuak daih dawn mi niang...."a tih chuan nuih vur vur pahin ka lo bu nghat ringawt.

Ka kawr hak a fual em avang chuan a hmawr ah ka bawk ta ringawt a, Rachael chuan min lo en reng ringawt.
" thil ṭha deuh ka nei asin ,min rawn zui rawh"
"maw... khawiah maw?"
"min rawn zui tawp rawh... " tih pahin inchungah chuan a chho a,mak tih hmel takin ka zui chho ve nghal vat bawk.
An room ah chuan kan inzui lut hnak hnak a,drawer a hawn lai chuan khumah ka lo ṭhu vat thung.
"khawiah nge Joel...? "
"a chhuak daih tawh alawm....chawlhni ah hi chuan ka pa nen hma takah an kal ṭhin alawm"
"ummm...."
"i hria em vawin hi Asher an phuar ni ania mahse engkim a ṭha leh vek mai ang

"chu chu eng nge?" kohhran thil hi engmah hriat ka nei lo, chuvang chuan tuna mi pawh hi ka bo takzet.
"Pathian phal loh thil atih avangin thunun ani dawn ani..."
"naute vang hian maw?"
"umm....inneih hma a mipat hmeichhiatna hman te, fa neih te hi Pathian phal loh thil anih avangin dan kan bawhchhia tihna ani " ka hrethiam nghal kuarh kuarh mai a chhanchu ka nu khan hetiang thil hi min hrilh tawh ṭhin avangin.Asher an hun khirh tak a tawk ani tih chu ka hrethiam nghal mai, Pastor fapa anih vang hrim hrim pawh hian mite ngaihdan leh sawidan tur chu ka hrethiam nghal mai, mahse chuti chung chuan Pastor Samuel hian an hmingchhiatna tih belh chhah turin engvanga an ina awm tura min sawm nge maw anih le? mi mak tak ani.

"engpawh chu nise.... " thawk halh pahin Rachael chuan kawr hi ka bulah chuan a rawn keng phei a, "han en chhin teh... " a ti zui zat bawk.
"eng nge? "
" hengho hi min lawmpui tuten ka rai huna hak atan kan inneihni khan min pe a... kei aiin i mamawh zawkin ka hria... " kawr deh nuam tak tak te leh hak nawm hmel tak tak ho chu a mal te te in a han pharh diat diat a, mahse hetiang ang kawr hi ka ha ngai lova ka mumang ah pawh ka la ha chhin ngai eih lo.
"ughh...ka lawm e " han lak loh kha ka hreh ve sia ha dawn lo mah ila ka dah mai mai thei tho alawm.
_________________________________________

Asher kawr lian zet leh anu pajama min pek ha chung chuan damawiin lam panin hmanhmawh takin ka inkhalh phei nghal char char a, a chhanchu ka pa an zai thut dawn vang ani. An tum dan kha chuan naktuk tukleh vela zai turin an ruahman kha ani a mahse ka pa a ṭhat vak loh avangin an sawn hma ta ani.
Motor ka khalh lai te chuan ka thin a rim ṭun tawh mai, ka pa ka ngaihtuah ang hian ani hian min ngaihtuah ve angem? hetiang ang hian ka buai in ka ngaihsak ang tih hi ka la ring pha ngai lo, mahse ka pa ani miau sia lawm le.

An zaina room nia an sawi lam pan chuan ka tlan cho nghal hlawk hlawk a,ṭhuthleng a Freddie lo ṭhu kun lap ka va hmuh chuan ka kalna hi a dik ngei ani tih ka hre nghal.
"khawiah nge? "
"an zai mek... " a tih takah chuan a bula zuk ṭhu pah chuan ,"min va han tibuai reuh tak " tih pahin ka thaw nghal huai bawk.
"i duty ni anilo kha i ti sia... engvanga heta awm nge i nih?"
"mmm... thil tih tur ka nei thut alawm, kha hmeichhia tak tak i ang ve tawh alawm" ngeiawm zetin a rawn tih takah chuan ka inen nghal vata, hak tur dang a awm chuang si lova ka hak mai lovin.
"ngawi mai mai rawh " ka ti zui sap ringawt.

An zai rei tawh em avang chuan Freddie chu inthiar turin a kal a, kei erawh thatchhe zeta ṭhu chungin ka lo muthlu lek lek lehnghal "
Chutia ka lo ṭhut ar ar lai chuan Asher, Lily leh midang rawn kal phei lai ka hmuh chuan ka ṭhu ngil nghal zawta, ka kalsawn hma in Asher an min rawn hmu hman lehnghal.

Midang zawng kal vek mahse Asher leh Lily te erawh ka zawnah tak an rawn ding chat mai, mahse ka lo hmulo der tlat thung.
"min hmulo der vel elaw?" Asher an vin deuh hluka a rawn tih chuan Lily chuan, "Asher... kal zawk ang " alo ti nghal vata, a bialpa a chhan em avang chuan ka nui lui suk ringawt.
"hahh.... i hna chiah ngaihtuah rawh... "
" heihi... " Lily chuan mak tih hmel takin min rawn en nghal kawk a, Asher en chho leh pah chuan ,"ka kawr pek che kha ani lawm ni " a ti zui sap bawk. A ngawih tak reng avang chuan mittui tling pam chungin a kal nghal daih a,
"Lily"  Asher pawhin lungawi loh hmel zeta min rawn melh pahin a zui nghal vat bawk.

Ngaihṭha lo zetin ka kawr haklai chu ka zuk melh zeuh a, Lily pek ani tak tak emawni le? mahse a duh chuan zingah pawh khan min hrilh thei tho sia, engvanga haw miah lo nge maw anih le?
"thiamlohna ka nei lo " ni e... an inkar a buaina zawng zawng hi ka tum reng vanga thlentir ka ni bik lova, kei ngei pawhin ka duh bik lo mahse anih tur ang chu ani vek tawh.
"i ril a ṭam tawh em? " Freddie pawh a rawn let leh chiah,min zawh chat danah ka hmel aṭangin ka ril a ṭam ani tih a hria pawh ani mahna.

"aw...."
"ka hre dik chiah...kan lo zuk in ei puar dawn mi niang, thin zai hi chu hun a duh a rei deuh hlek ang "
"ngaihdan ṭha tak anih chu... " tih pahin ka tho vata, ka kal nghal nal nal bawk.

Damdawiin aṭanga ka chhuah rual rual chuan hla vak lova Logan phone hmang lai chu ka hmu ta thut mai!! rang lutuk in Freddie hnungah chuan ka biru nghal vata, ani lah chuan ka harsatna hrethiam lek lovin ala kalsan daih zui.
"engthil nge maw i tih le? "
"kal vat vat ang "
" mahse ka jacket hnuaiah ah i bihruk tlat te chuan kan kalchak thei nang "
"awle... " ka huaisenna zawng zawng sawm khawmin ka ding ngil nghal vat a, rang takin confi bawk siin ka kal nghal zung zung a, mahse ka hlauh ang ngeiin Logan an min rawn hmu ta!!

Kan lam pana a rawn kal takah chuan duhthlan tur dang ka nei ta lo, Freddie banah chuan ka kal nghal chawt a.
"sawpa saw ka ex ania.... min la duh em avangin min tibuai reng ṭhin, saw tunah pawh min rawn zui a tum leh tlat tawh "
"anih chuan ṭha takin bia la... "
" nilo.... mi sawisak a ching lutuk, heti ringawt hi chuan ka let thei tawh lo, ka naute hi midang fa anih avangin a that duh ngei ang " phut zawk pawh nei lovin dawt ka sawi nghal char char thei chu mak ka in ti zawk hial mahse Freddie chuan ka thusawi engkim chu a awih vek tih a hmelah a lang chiang hle.
"hmeichhia kutthlak ching chu tihdan ka hria alawm... "

(Asher hming ka type apianga hmel rawn lang thin Shawn Mendes hi a duh ve apiangin Asher hming a rawn lan veleh in lo mitthla ve thin dawn nia )