My Drug is You-7 by Remruati Bawitlung (Haylor)

CHAPTER-7

Ka pa nen chuan kan inzui haw leh hnak hnak a, kan hlawhchham bawka a tu a mah ṭawng hmasak kan tum lo ve ve.In kan thlen chuan kawngka hawng ta mai lo in ka pa chuan ka dara rawn beng thak thak pah hian," naupang pawh i ni tawh lova, Pathian rawn chungin ngun takin in ngaihtuah leh la thutlukna i siam dawn nia" a tih takah chuan ka lo hlim ruk ve tawh nen ka mood a off lehnghal vek ,ka pa hi engtik ah mah a beidawng dawn lo tih hre tho mah ila khanu khan min neih duh miau si loh chuan va tih luih leh hi a tlawm thlak tawh takzet . 
"ka pa min neih duh miau loh te chuan neih kher angai emawni le? " 
"Pathian in fa a pe che a...i hum ngei tur ani amaherawhchu sual lian zawk i tih loh nan ṭawngtai la ngaihdam dil bawk ang che" tih pahin kawngka chu a hawng rak a, a lut nghal hna hna bawk. 

Hmeichhia ka rai avangin ka pa hi a thinrim lo ani lo,Pastor a nih shan't leh mite a zah avang chauh a nupui min neih tir duh lah ani hek lo, reitak a inngaihtuah hnu ah harsa ti hle mahse ṭha ni a a hriat avang leh thil dik anih avangin hetiang ang thutlukna hi a siam chauh ani.A nihna takah chuan tu pa in nge mahni fate hmakhua ti chhia in nupui neih tir duh ang,a bik takin khatiang ang hmeichhia leh ngat phei kha chu mahse pa diktak, mi tumah thliar hrang ngai lo leh midang hmakhua thlenga ngaihtuah ṭhin mi anih avangin khanu hmakhua kha a chhiat vek ai chuan hetiang thil hi a ti ta ani. 

Chumaibakah heti khawp hian thil sual liantham ka ti a min tih hnual a hnek in min fuih zawk avang hian ka thil sual tih te ti sual chhunzawm lo tur leh siam ṭha turin rilru ka neih phah zawk. Rilru luhlul rual vel lek ka la nih avangin min hau in min vau se chuan sual bik riau ah inngai in, nu leh pa te runluih duhna rilru ka pu ngei ang mahse khatiang thil a thlen tak hnu ah kha chuan thutlukna siam fel tura min tih avang hian a innghahna ka nih zia leh ka chungah rinna a ngah zia min hriatchhuah tir daih ani. 

Ka pa chu ka zui lut ve nghal mai a,ka luh rual rual chuan ka nu, Joel leh Rachael te chu an lo ding nghal ṭhap bawk,a awmdan aṭang hian thil dang pawh ti thei lovin min lo nghak ani tih a chiang reng. 
" eng nge chanchin? " ka nu chuan ka pa chu alo zawt nghal vata, 
" Coco in fa tih tlak a duh avangin tunah hrih chuan engmah thutlukna kan la siam fel thei lo " ka pa chuan kimchang si tawi fel tak hian a lo chhang a, an rin ang thuthlukna kan hawn loh avang chuan mak tiin an mengphawng nghal kawk hlawm a,Rachael erawh lungawi loh hmel takin inchungah a tlan chho nghal daih a, Joel an a zui chho nghal vat bawk. 
"chutiang thil a thlen hma chuan kan dan vat angai ang " 
"ni e... lungngai lo phawt ila hun a la mamawh te phawh ani mahna " 

Ka nu leh pate room ah an inzui luh hnu chuan inchungah ka chho ve nghal vata, chau hle mah ila damdawiin ah ka kal a hun ṭep tawh bawk nen muangchang hman ka ni tawh lo.Chutia ka room a ka lut tur chu Joel te room bulah lawk ka awm mai bakah kawngka alo in hawng bawk nen Rachael in ,"a tih tlak dawn ai chuan min pe daih se nimai lawm.... kan enkawl thei em em ang "a tih ri chiang taka ka hriat avang chuan ka ding nghal chawt a,ngaihthlak chian tumin kawngka phenah ka ding nghal vat bawk. 

" i â ta em ni.... Asher fa lawm anih, kan chhuhsak daih theih hleinem" 
" Joel a fair lo takzet, engatinge hetiang thil hi kan chungah a thlen bik.... keini in fa kan awh ngawih ngawih laiin ani chuan tih tlak alo tuma, ka haw takzet khanu kha ka haw takzet " ṭap zawih zawih chunga a sawi ri ka hriat chuan mi hneh takzet,ka thinlung hi a na nghal vawng vawng mai. 
"pawi ti reng reng suh.... Pathian in hun a tih hunah min la pe mai ang " 
"ka nghak thei tawh lo.... heti chen hi kan nghak tawh a tun thlengin min la pe chuang lo " 

An nupa a an lo inhnem mawlh mawlh lai chu ka ngaihthlak chhunzawm thei tawh lo,ka room ah ka luhsan nghal daih a thawk halh pahin khumah ka let nghal tawp bawk.
Joel te nupa hi mi chhunawm tak an ni, heti khawp hian fa awt in hrehawm ti mahse Pathian in a pek hun tur chu dawhthei takin an nghak hram hram a, chumai bakah an hrehawm na te hi kan bulah ti lang mai lovin an nupa chauhin an lo tuar dun ṭhin ani tih ka hriat hian ka lainat takzet. Rachael tan pawh lungawi loh hi a awm lo lo e, a chhanchu fa a awh em em laiin Coco ve thung chuan tih tlak a lo duh a lehlam zawnga ngaihtuah hi chuan nun hi a fair lo takzet. 

___________________________________________

★Coco's Pov★

Inah ka pa zu în in buaina a siam leh tawh avangin Hunter bawk chu ka pan leh ta nge nge a, kawngka in hawng reng chung siin light alo thim vek avang chuan mak ka ti hle,light ka on rual chiah a ka hma lawka Hunter an zu no dawm ran chunga min lo thlir reng ka hmuh chuan ka phu chiang teh e.
"min ti phu lawm " ka jacket phelh phaha ka zuk ṭhut rual rual chuan duhthawh takin ka fawp nghal tawn tawn a,ani pawhin min bawh bet pahin min fawp let ve nghal tawn tawn bawk.

Chutia a jacket phelh ka tum takah chuan ka in rin lo lai takin ka samah a rawn ṭham ta thut mai, ka ṭe nghal ṭhawt ringawt!! 
" i nau pai chu ila ti tla ta cheu nge " 
"ka ti tla tawh dawn lo... " tih pahin a kut chu ka paihthla nghal sawk a, Hunter hian kut min thlak ngun mai bakah hetiang hian min tih fo avangin ka hlau tawh bik lo chuvang chuan ṭhen thei lo mah ila ka bei let ve ngam tawh.
"ka thla zar hnuai ah i awm duh anih chuan i fa hi ti tla vat mai rawh... i hriat thiam dan tur chuan naupang ka duh lo " 
"mahse a pa in a duh ve thung alawm.... nang ang lo takin " 

"hahh....nangte hi, ilo huai sawt ta hle mai " nui mahse a thinrim ani tih erawh hai rual ani lo. 
"biakin saw i commission ani lawm ni bakah he naute hi ka nei dawn reng reng lo " ka tih takah chuan a hrethiam nghal niin a lang. Tunah hian biakin hmun saw tihfel ala nih loh avangin a man an pek tlak vat anih loh chuan hralh maitheih dinhmunah a awm mek a,chu chu Hunter hian mi hausa tak pakhat hnenah Casino sakna turin a commission meka amaherawhchu Pastor Samuel leh member te thawhrim na leh bei let na avangin engmah a ti thei bik lo mahse ka puihna hmangin ala hralh thei vat dawn. 

"ka hrechiang che lawm chhan neiin nau i pai tih hi.... hahaha.... kan hausa thuai dawn e " 
" mahse naute hi a thi anih chuan engkim a buai vek ang " 
"ka naute i fing hle mai...." ka sam rawn chul pahin min rawn fawp nghal chawt a, nam sawn deuh pah hian "tunah rih chuan lo la lawm lutuk duh suh...hun ka la mamawh ,saw mi te chhung sawn min rin phawt angai" 
"chutiang chen chen ka nghak thei dawn che mawni le?" 
"duhthlan tur dang i nei chuang hleinem " a hmui a fawh zeuh pahin ka jacket chu ka la lawk a, ka chhuak nghal vang vang bawk. 


Hunter hi kei aiin kum12 laiin upa mahse kum16 ka nih aṭangin kan inkawp chho ṭan tawh a, tunah hian kum 7 lai kan in kawp tawh tihna anih chu.Amaherawhchu kan inkawp han tih hian mu dun in inngaizawng te ang chiahin han awm ve ṭhin mah ila midang kan inkawp san thei tho a, kan in huatpui ngai lem lo kan mamawh te ka in phuhruk sak anih ber chu.
Ani hian uisa thiam ang maiin min chher chho ṭan a,bike intlan siak tih vel ah te telin sum ka thawk chhuak ṭhin a, mahse hmeichhia ka nih avang hian min hnawl ṭhin avangin dan lova intlansiak na velah lo chuan ka tel ngai meuh lo. 

Hun rei tak aṭang tawh khan Hunter hnen aṭang hian chhuah ka tum tawh ṭhin a,a chhanchu a duh duh hunah kut min thlak mai bakah a duh duh min tih tir ṭhin vang ani. Chau pawh ni ila a duh hunah ka mutpui angai a, a fa hial ka pai anih kha mahse khatih hun lai khan kum18 chauh ka ni a, pai tlang tur leh Hunter thu hnial turin huaisenna ka neih loh avangin ka pum chhunga ka fa ngei chu ka ti tla ta a, tun thleng hian ka thinlung ah ser nung a awm phah ta ani.
Mahse ka pa heti mai anih avang leh kei engmah ka lo nilo bawk nen Hunter kalsan chu thil awlsam tak ani lo, a chhanchu ka duh apiang min pek ṭhin avangin. 

Nau ka ti tlak tawh avangin leh inchhir ka duh tawh loh avangin tuna ka fa erawh hum ka tum tlat tawh thung.Hunter ang tho in min tih tlak tir leh dawn emaw ka tih laiin ka fa chauh pawh nilo kei lehzel pawh min duh thu an sawi khan ka rilru a hneh takzet, mahse Pastor Samuel anga pa zaidam leh nunnem mo atan chuan ka tling tawkin ka in hrelo .
Hunter lak aṭanga ka fa hum ka tum luatah hetiang thil tenawm lutuk hi ka tih phah ta ani a,engtik ni ah emaw chuan ka la inchhir ngei ang mahse duhthlan tur dang ka nei miau si lo.

Bike chu khalh chhuak in damdawiin lam pan chuan ka tlan nghal vang vang a,engpawh thleng se Asher ka biak ngei ngei angai. 
"Dr. Asher ka hmu thei angem?" ka nurse hmuh hmasak ber chu ka han zawt ve thawr ringawt a mahse ka inchei dan a en dan vel chu ka duh loh avangin receptionist chu ka pan leh ta zawka. 
"umm...zanin a doctor duty ho list ka hmu thei angem?" ka tih takah chuan ngawi rengin min lo hmuh tir ve mai bawka,list ka en zawh hnu chuan hmanhnawh takin medicine department lamah ka tlan phei nghal dawr dawr bawk.