ZERO-9 BY Remruati Bawitlung (Haylor)

Chapter-9

.

.

Hetianga awm reng ringawt chu ni thei ngang a ka hriat loh avangin midang tihbuai ai chuan tiin Jade chu han call mai ka tum a mahse khawiah nge ka phone? Hmanhmawh lutuk in ka bag chu ka hai nghal rawk rawk a ,ka hmuh mai loh avang chuan ka thil ah ho chu ka bun chhuak veka chutichung pawh chuan ka la hmu chuang lo

"ehe ...ani theilo" khumah ka dah tih ka hriatchhuah meuh chuan a tlai tawh lutuk.

" Engtin nge ka tih tak ang ?" chiai hma chi ka lo ni bawk nen a khat tawkin Dylan chu ka sawi leh pawp thin a,mahse awmzia a nei lem lo. Motor atangin ka chhuah ngam loh chu sawi loh midang tanpuina dil ringawt dawn pawh ni ila motor rawn tlan pakhat te pawh hmuh tur a awm lo.

.

A tawp a tawp ah chuan tumah an awm chuang lo, a lo harh hun nghak phawt mai ang tiin ka rilru ka siamfel thei ta hram a, mahse thlamuang takin ka awm thei chuang lo.Keimah leh keimah intih huaisen tumin thawk ka han la kawk kawk a mahse thli thaw vuk vuk te leh tuipui fawn ri hlup hlup te chuan mi rap tlat peka chu chuan ka awm a ti nuam lo zual.

Chutia hlauthawng leh thinphu dep dep chunga ka thut lai chuan glass rawn kik kerh kerh ri ka hre ta thut mai !! Lo hlau sa tawh  bawk nen ka theihpatawpa ringin kan au tak tak mai chu, ka beng pawh a kiu vung vung thei in ka hria.

.

Ka au rin em avang chuan tuemaw hian kawngka ka lock vek tawh emaw ka tih chu rawn hawngin ka hmui chu a rawn hup vata.

"bengchheng suh.... " Zero hmel ka hmuh chuan ka mengphawk nghal kawk a,mak ti hle mah ila ka thla a muang nghal huai mai.

"ka kut ka la sawn dawn a.... au miah suh ang che " min rawn nuih suk pahin zawi sap hian a rawn ti thum dut a, a aw pa tak leh cool tak ai mah chuan a biangsum khuar dak hian hipna a nghah daih zawkin ka hria... nilo engthil nge maw ka ngaihtuah le?

.

A kut a lak san rual rual chuan ka nam chhuak nghal nawk nawk a ,a hmel ka hmuh ringawt pawh hian ka thin a rim nghal tun thei.

"hmela ka haw lutuk che... min tih hlauhthawn zia hi i hria em? " insum chu sawi loh ka theihpatawpa na in a awm ah chuan ka chum nghal pawp pawp a ,ngawi rengin alo dawh ve mai tho.

"Engthil nge Dylan chungah hian i tih? " ka thinrim em avang chuan ka mit a sen vek tawh a ka mittui a tling nghal pam bawk.

"Engmah "

" dawt sawi suh.... kan inturah  thil i telh lai pawh ka hmu vek "

.

Min chhan loh avang chuan melh khai pahin ,"Eng nge hetah i rawn tih....?  Engvangin nge min zui renga? Min tibuai hnem tawh lutuk ,ka hlau che maw i tih chuan i ringsual der anih chu"

min la chhang chuang lo, hepa hi a inti luhlul ve emaw ni chu le? Ka thinrim lutuk vang pawh ani mahna nakin hun zela min tih dan tur pawh ngaihtuah lova ka tawngpawr ve em em nachhan hi mahse nakinah ka la innchir dawn chiang alawm.

"i thil tih avang hian ka report dawn khawp che..... " engthil nge maw ka sawi le?  ka van mawl tak, ka sawi zawh rual rual chuan nghet takin ka kut pahnih ah a rawn man bet thut a ,hnung lamah min suih tir tlat avang chuan ka che thei tawh lo hrim hrim.

.

Chutah zet zawng ka sawi hma kha ka ngai vawng vawng mai, ka thin a rim tawh hi chuan ka kâ ka veng zo thin lo , hlau avanga ka thiphu in thum rawn dup dup te chu a hriat theih hial ka ring. Amah a sang in a lian bawk si a, kei ve teh mai mai te chu a jacket chhungah min kuah bo daih thei hial ang,mahse ka beidawng duh bik hauh lo talchhuah tumin theihtawp ka la chhuah ve fan fan tho.

" min thlah rawh.... engthil nge maw i tih le? " min thlah duh loh avang chuan ," min thlah rawh ka tih chu " ka han ti leh ngata.

" Hreptak chuan i va tawng hnem em em ve...."

" maw!! "

" i tawng leh chuan kawng thlangah ka thehthla daih ang che " .

.

"midang i sawisak ang khan min sawisa ang maw? ka hlau lo che" tha khur zawih zawih chung chuan ka han ti leh ngata, chutah zet zawng nin hmel deuh hian ka kut paih thlak pawp pah chuan,

"hmeichhe bengchheng tak i ni.... " zawi sap hian a ti zui leh kher anih chu!!  mahse ka hre hman vek tho.

"Car ah lut rawh.... "

" maw? "

"ka thlah ang cheu... "

"ka hmelhriat pawh i ni hleinem " tihngaihna hriat loh hmel zet hian a han thaw chhuak hak a, min chhan ngaihna pawh a hre tawh lo.

.

" Enteh.... " min rawn pan hnaih deuh avang chuan ka lo tawlh hnung nghal vata.

" min rawn hnaih hlek suh.... min kalsan nghal rawh "

" awle.... " tih pahin a kal daih anih chu !! a bike ah chuang nghalin a engine chu a ti nung nghal dut dut bawk. Hepa hian kal daih a tum tak tak amawn le?

"Hey.... " ka tawng a hriat loh chu sawi loh a bike phe fua bak ka hmu hman lo.A tlan liam hnu chuan a reh nghal duk in ka hria

" Ngatinge maw ka tawng chak em em mai le ?" phun bul bul pahin car ah chuan ka lut leh ta ringawt a, uluk takin kawngka chu ka lock leh thlapa tunah chuan tumah an rawn lut thei tawh lo tawp ang.

.

A tawp nan Dylan chu kaihthawh ka han tum nawn leh ngat a mahse ka hlawhchham thak.Motor tlan hmuh tur a awm bawk si lo, motor lah ka khalh thiam  bawk hek lo ,tunah chuan duhthlan tur dang ka nei tawh lo car a kan riah mai angai.Thlamuang lo tak chung chuan ka han thu awn deuh a,ka mut chhuak tawh hle mahse ka maimichhin ngam miau loh avangin hma lam ka melh kar bawk.

" Ngatinge maw a vawh em em le.... " ka ban tuai nawk nawk pahin heater on na tur chu ka han thlek kual dan dan a, car chungchang hre lo na nâ na chu ka beidawng chiang hle .

.

_________________________________________

.

Ni eng chuan ka hmai ah tak min rawn chhun sawt sawt a,a sat em avang chuan loh theih loh in ka mit ka han meng sar sar a,mahse thil mak tih deuh ka nei Jacket dum lianzet mai ka lo sin reng anih chu!! .Dylan chu ka en nghal vata ani lah alo la muttui nasa mai,sawi nawk nawk pah chuan ," Tho rawh " ka ti sap bawk.

Ka lu a nat em avang chuan ka han hmet nawk nawk a .Hawikual pahin ka kawng leh hnungzang  kham urh te chu tih ziaawm tumin ka han zi mar leh ar ar phawt a,nizana thil thleng zawng zawng kha hrilh ngai lo in ka hrechhuak lehnghal vek bawk.

.

"Tina.... engthil nge thleng?" A tawp a tawp ah a rawn harh ve ta!!

"Engthil nge thleng i hre miah lo amaw? "

" Anih chuan eng nge thleng a? "

" Lalpa leh!!  haw vat vat ang "

"nizan khan ka in control thei thlawt lo, khatiang em em khan ka mut ala chhuak ngai lo "

"Dylan....nizanah khan engthil nge i in? "

" Engmah ka in lo... ka hrethiam tawh bik lo .....heihi tu jacket nge nizanah mi an rawn kal em ni ?"

" ka hre bik lo kawngka ka lock vek bawk si a...." he jacket  ka sin daih theih nachhan hi ngaihdan pawh ka nei lo,chu aia la mak zawk chu tuin nge min rawn sin tir ? he jacket hi tu ta nge?

.

" kan haw hma in ka hruai tumna ah che khan kan kal lawk dawn mi niang "

"tunah chuan engthil mah ka ti peih lo, haw phawt ang " tih pahin seat hnung chu ka han ngheng dawt a ,pawnlam ka hawi daih bawk.

" awle...mahse Tina pawi ka ti lutuk... "

" a ho lutuk " thut rem pahin pawnlam chu ka han thlek vang vang a, side glass atangin Zero ka va hmu ta thut mai!! a bike ah thatchhe zet hian a lo thu kun lap a mak tih hmel takin ka en nghal kawk bawk, ka awih loh em avang chuan ka mit ka nuai nghal nawk nawk a ,a aia chiang zawk chuan ka han en leh ngat a, amah ngei ani bawk si mahse kan tlan chak em avang chuan ka hmuh chhunzawm thei tawh lo. Hepa hian zankhua in min lo veng reng a mawn le? nge saw tah sawn a awm zankhua zawk? Lalpa leh!!  engthil nge maw ka ngaihtuah le, ka jacket sin lai en pah chuan ka khi deuh suk a,ka maimichhing zui nghal daih bawk.

.

.

Jacket sin pah chuan ka room ah ka lut chhat chhat a, ka chau ngang aniang khumah ka bawk nghal thlawp bawk.

" Valentina.... " Jade aw ka hriat rual rual in ka inkhuh nghal thak a, ka muhil der zui nghal bawk.

" i muhil lo tih ka hria ania.... nizan chu Dylan nen hun in va hmang nuam awm ve? "

" Engtin nge i hriat? " tih leh thawh ka rual nghal.

" i pi in a sawi vek alawm ....a hlim hmel khawp lehnghal "

" i ngaih ang khan engthil mah a thleng lo "

"ehh.... i zak ani maw? "

.

" Jade...ka mu duh"

"wow... hei tu Jacket nge? " tih pahin khum a leather jacket lian zet chu a rawn  khai va va a.

"Dylan jacket chu ani lo phawt a.... Valentina engkim min hrilh vek rawh... he jacket lian zet hi tu ta nge? " hrilh pawh ni ila a awih leh chuang lo ang.

" Zero "

" maw!! "

" min ring leh dawn chuang lo ka sawi peih tawh lo " tih pahin thil dang ka tihsan daih a, sawi sawi hian awmzia a nei dawn chuang lo .

" Zero chu engtin nge a hmel a awm?" min ring ve ta amawn le....

.

"Tina..... Police bakin Zero hmel an hre hleinem.... " a rawn tih chhunzawm zat bawk

" anih chuan kha pa kha Zero ani lo i tihna em ni? "

" chu chu ka sawi tum ani lo.... Zero hian thian tamtak a nei a, heng gangster rual zozai zingah hian tu ber hi nge amah tih tumah in an hre lo ....a hmel erawh kan hmu nual tawh maithei mahse tu ber hi nge Zero tih erawh mi zawng titi a tling alawm"

" mahse ka hmu chiang alawm "

"anih chuan hria angin awm suh.... police ho pawhin a hmel an tlangzarh duh hleinem...."